PĀ GƏ̄ 6
6
Kɔ́ɔ̄ɓē ī-lōō gān̄g sarya dɔḿ tə́
1Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kənde kə́ kəlān i sɔ́sɔ́. I pā yā Dabid.
2Kɔ́ɔ̄ɓē, ī-lōō kəndam̄ kə wur katāá!
Ī-lōō kəndam̄ kə wōngōó!
3Kɔ́ɔ̄ɓē, ādə̄ kumií o̰o̰ī tām̄ yāḿ tə́, tɔdɔ̄ tɔ́gə́ḿ gətóo.
Kɔ́ɔ̄ɓē, m̄-ndebə kə̄ kem kə̄ngāḿ gə̄ tə́ malang, ī-rāā ādə̄ rɔ̄ḿ ngan̄g.
4m̄-ndebə kə̄ rɔ̄ḿ gə̄ tə́ malang.
Ní, Kɔ́ɔ̄ɓē, ā ə́hɔm̄ kemií tə́ i bátə́ rə́ngáý tə́?
5Kɔ́ɔ̄ɓē, ī-tél ī-reē ī-gān̄g dɔḿ!
Ájəm̄ sɔɔ̄ń ndūí ń ī-ra dɔ tə́ ní!
6Tɔdɔ̄ deē ń oy ní a əga kemən dɔí tə́ to̰ alé.
De gə̄ ń oyn̄ ní asən̄ ɓōkíī tɔ̄ȳ to̰ alé.
7m̄-to̰ō̰ bátə́ adə̄ kɔr to̰ō̰ taā tɔ́gə́ḿ kɔ̄ɔ́.
Man̄ kumḿ nɔ̄l̄ tə̄rá yāḿ ndɔ̄ɔ́ kə dɔ ndɔ̄ gə̄.
Man̄ nōō kə́ kumḿ tə́ nɔ̄l̄ yá̰a̰ toḿ.
8Rɔ̄ḿ nelə̄m̄ aĺ bátə́ adə̄ kumḿ a̰a̰ loo kə gōó alé.
Madə̄ ba̰ā̰ḿ gə̄ alə̄n̄ naā, adə̄ kumḿ a̰a̰ loo ngá̰ý alé.
9Sḭḭ̄ ngé rāā yá̰á̰ kə́ majaĺ gə̄ malang, ɔ̄rī rɔ̄sí rɔ̄ḿ tə́ kɔ̄ɔ́,
tɔdɔ̄ Kɔ́ɔ̄ɓē oō kōō síkə̄ nōō yāḿ.
10Kɔ́ɔ̄ɓē oō ndūḿ ń m̄-rāānneé ɓɔ́ ní,
ni ndigə ndɔ̄ȳ yāḿ.
11Ādə̄ rɔ̄ madə̄ ba̰ā̰ḿ gə̄ malang sɔl̄də́ gidə kógə̄ḿ.
Ādə̄ télən̄ kə rɔ̄ sɔlɔ́ ō, ndewn̄ kə̄ rɔ̄də́ gə̄ tə́ malang ō.
Currently Selected:
PĀ GƏ̄ 6: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
