TA KƏLA 21

Sara ojə Isaak

1Kɔ́ɔ̄ɓē rāā yá̰á̰ ń ənī míndən yā rāā kadə̄ Sara ní. 2Abəraham tɔgə ɓə́ga kɔ̄ɔ́, ba Sara ndān̄ ngōn̄, ojə ngōn̄ kə́ dəngam dɔ ɓə́gan tə́ kə Abərahamaá ɓāl̄ ń Nə́ɓā ɔjə tə́ ní. 3Abəraham əndā rī ngōn̄ kə́ dəngam ń Sara ojə seneé ní na i Isaak. 4Loo ń ngōn̄ ní rāā ndɔ̄ sɔ́sɔ́ anī, Abəraham əja mɔtən tītə̄ ń Nə́ɓā ədanəń ní#21.4 Əja mɔtən: Á̰a̰ī tū «Kum Najə̄ kə́ Ngón̄g Ngón̄g gə̄» tə́.. 5Dan ń ojən̄ Isaak ní ɓāl̄ Abəraham i ɓú. 6Sara əda na:

Nə́ɓā rāām̄ adə̄ m-ə̄gō kəgō rɔ̄nel̄. De gə̄ malang ń a oōn̄ najə̄ yā Isaak ní a əgōn̄ seḿ. 7Ni-əda ɓáý to̰ na:

I náā n əda Abəraham na ndɔ̄ kógə̄ḿ tə́ anī Sara na a adə̄ ngán gə̄ mba ní? Ɓá tā ba m-ójə ngōn̄ kə́ dəngam seneé dɔ ɓə́gan tə́.

Abəraham tə̄ɓā Agar nin̄ kə Ismael kɔ̄ɔ́

8Ngōn̄ ní tɔgə adə̄ ɔr̄nən̄ ta mba tə́. Ba ndɔ̄ ń ɔr̄nəń Isaak ta mba tə́ ní, Abəraham rāā yá̰a̰ kəsa kə́ ngá̰ý ɓāŕəń de gə̄.

9Ndɔ̄ kógə̄ḿ tə́ Sara a̰a̰ ngōn̄ ń Agar, dəyá̰ kə́ Ejiptə tə́, ojə kə Abəraham ní loo kógə̄ naā tə́ anī, 10əda Abəraham na:

Ī-tə̄ɓā ɓəlo kə́ dəyá̰ ń noō kɔ̄ɔ́ kə ngōnə̄neé. m̄-ndigə kadə̄ ngōnə̄n ń noō ənge yá̰a̰ ndəbā naā tə́ kə ngōnə̄ḿ Isaak alé.

11Najə̄ ní nel̄ Abəraham aĺ ngá̰ý tɔdɔ̄ Ismael i ngōnən ō. 12Banī Nə́ɓā ədan na:

Ī-lōō kadə̄ wōn̄g rāāī najə̄ yā ngōn̄ tə́ ō, najə̄ yā ɓəlo yāí kə́ dəyá̰ tə́ ō. Ī-ndigə najə̄ ń Sara ədaī ní malang, tām̄ ngán gə̄ ń m-ə̄nī míndə́ḿ yā kadī ní, i Isaak n a ojədə́ ní. 13Kə́ tām̄ yā ngōn̄ ɓəlo yāí kə́ dəyá̰ tə́ tā anī, m-ā m̄-rāā kadə̄ a ojə nápar de kə́ ngá̰ý gə̄ ō, tɔdɔ̄ ni i ngōnīí ō.

14Adə̄ Abəraham teē dəloí ɓatə, un mápa ō, man̄ kem sɔlɔɔ́ ō, adə̄ Agar, əndā dɔ bɔ̄gə̄n tə́ ō, ngōn̄ ō, ba tə̄ɓān. Agar aw̄ dáȳ kem dəla loo kə́ Beer Seba tə́. 15Dan ń man̄ kə́ kem sɔlɔɔ́ təgā anī, ni-ənī ngōn̄ gír bɔkə́ kámbə́ kógə̄ḿ tə́, 16ba ɔr̄ rɔ̄n ndi sa̰y. Loo kə́ dɔ dáńdə́ tə́ asə kə dɔ dán loo ń deē ur gərā anī a əsō tū tə́ ní, tɔdɔ̄ ni-əda na kə n-a̰a̰ ngōnə̄n loo koy tə́ alé. Adə̄ aw̄ ndi sa̰y ndi a nōō. 17Nə́ɓā oō ndū ngōn̄ ní loo sɔ̄ḿ tə́, adə̄ nge kəla yā Nə́ɓā ndi dɔ rā̰ tə́ ɓāŕ Agar, ədan na:

Agar, i rí n rāāī? Ī-lōō sōl̄, tɔdɔ̄ Nə́ɓā oō ndū ngōn̄ loo sɔ̄ḿ tə́ loo ń to tū tə́ tə́ ní. 18Ḭ́ḭ dɔɔ́, ún ngōn̄ údən dɔɔ́ ba ə́hɔ ta jīn, tɔdɔ̄ m-ā m̄-rāā kadə̄ ni a ojə nápar de kə́ ngá̰ý gə̄. 19Nə́ɓā teē kum Agar, adə̄ a̰a̰ bəlo man̄ kógə̄ḿ. Ni-aw̄ tūr̄ man̄ adə̄ rosə sɔl reēń adə̄ ngōnə̄n.

20-21Nə́ɓā ngɔ̄m̄ ngōn̄ ní adə̄ tɔgə. Ni-ndi kem dəla loo kə́ Paran tə́, tél nge kur gərā kə́ jīn atə ngá̰ý. Kó̰o̰n taā dəyá̰ kógə̄ḿ kə́ Ejiptə tə́ adə̄n.

Abəraham nin̄ kə Abimelek əhɔn̄ madə̄ naā

22Dan ń noō tə́ ní, Abimelek nin̄ kə Pikol ngol áskar yān gə̄ reēn̄ rɔ̄ Abəraham tə́, ədanən̄ na:

Nə́ɓā i seí dɔ yá̰a̰ malang ń ī-rāā tə́ ní. 23Adə̄ ə̄nī míndí kə rī Nə́ɓāá ādə̄m̄ kadə̄ ā ī-gólə̄m̄ mā aĺ ō, ngánə́ḿ gə̄ aĺ ō, ngán kaaḿ gə̄ aĺ ō. Tītə̄ ń m̄-rāań kem majə seí ní, ī-rāā kem majə seḿ ō, kə ɓē ń ī-ndi tū tə́ toō ō. 24Abəraham əda na n-ənī míndən n-adə̄n.

25Abəraham nōō rɔ̄n rɔ̄ Abimelek tə́ najə̄ bəlo man̄ ń de gə̄ yā Abimelek gə̄ taān̄ jīn tə́ kə dɔ́nɔ́ ní. 26Abimelek tél əda na deē ń rāā yá̰á̰ ń noō ní na n-gerə̄n aĺ ō, deē ədanəń aĺ ō, adə̄ na n-oō tan tə́ na i ɓōólaā ɓáý. 27Abəraham əhɔ batə̄ gə̄ kə bə̄yā̰ gə̄ kə man̄g gə̄ adə̄ Abimelek, rāań madə̄ naā. 28Abəraham ɔr̄ mandə batə̄ gə̄ sīrí tayā, 29anī Abimelek dəjen na ké ɔr̄ batə̄ kə́ sīrí gə̄ ń noō kɔ̄ɔ́ tayā ké i tām̄ yā rí tə́ wa. 30Abəraham tél ədan na kə taādə́ jīn tə́ kadə̄ əgań kemən dɔ tə́ na i ni n na n-ndēr̄ bəlo man̄ ń toō ní 31I tām̄ najə̄ ń toō tə́ n əndānəń rī loo ní na i Beer Seba#21.31 Beer Seba kə ta Hebəro kumən na i bəlo man̄ kənī míndə. ní. Tɔdɔ̄ nin̄ jōó mbak ənīn̄ míndə́də́ adə̄n̄ naā.

32Adə̄ nin̄ rāān̄ madə̄ naā i Beer Seba. Gō tə́ anī Abimelek nin̄ kə Pikol ngol áskar yān gə̄ əsōn̄ róbó yā tél kaw̄ gogə́ dɔ nang yā Pilistin gə̄ tə́. 33Abəraham əhɔ kāgə̄ tamaris kógə̄ḿ Beer Seba, ba ndɔ̄ȳ kə rī Kɔ́ɔ̄ɓē Nə́ɓā kə́ ndi ngándáńg. 34Abəraham ndi dan i ngá̰ý dɔ nang yā Pilistin gə̄ tə́.

Currently Selected:

TA KƏLA 21: SARDC

Highlight

Copy