TA KƏLA 22

Nə́ɓā nāā Abəraham

1Gō yá̰a̰ gə̄ ń noō tə́, Nə́ɓā nāā Abəraham. Ni-ɓārə́n anī Abəraham ndigə na:

Mā n toó. 2Anī Nə́ɓā əda na:

Ún ngōnīí Isaak, ngōnīí kə́ kal kógə̄ḿ beē ń ī-tárən ngá̰ý ní, āw̄ seneé dɔ nang kə́ Moriya tə́, dɔ mbal̄ kógə̄ḿ kə́ dɔ dán madə̄ gə̄ tə́ ń m-ā m-ɔ́jiī tə́ ní, ī-róōn horoó ādə̄m̄.

3Abəraham ḭḭ dɔɔ́ ta gír loo tə́, njár̄ kīr̄ kə́ yā róoń ngōnə̄n kadə̄ Nə́ɓā, do̰ō̰ gidə kərō yān tə́, ba aw̄ kə̄ loo ń Nə́ɓā ɔjən tə́ ní. Ni-ɔy ngé kəla yān gə̄ jōó seneé ō, un ngōnə̄n Isaak ō. 4Kə ndō kə́ nge ko̰ mətá, Abəraham un kumən kə̄ dɔɔ́ anī, a̰a̰ dɔ mbal̄ ń a aw̄ kə̄ tū tə́ ní ra non tə́ sa̰y. 5Anī ni-əda ngé kəla yān kə́ jōó gə̄ ní na:

Ī-raī laā kə kərōó. Mā ō, ngōn̄ ō, j-a j-aw̄ nú yā ndɔ̄ȳ Nə́ɓā tá j-a jə-tél.

6Abəraham əndā kīr̄ dɔ ngōnə̄n tə́ ba nəkɔ́ ətō yā̰l̄ hor ō, kəyā ō, ba aw̄n̄. 7Anī Isaak ɓāŕ bɔbə̄n Abəraham na:

Bɔbə́ḿ! Bɔbə̄n ndigə na:

Mā n toó ngōnə̄ḿ. Isaak əda na:

Hor n toó ō, kīr̄ n toó ō, ba ngōn̄ batə̄ kə́ yā róō horoó kadə̄ Nə́ɓā i rá? 8Anī Abəraham tél əda na:

Ngōnə̄ḿ, Nə́ɓā nəkɔ́ a adə̄ ngōn̄ batə̄ kə́ yā róō horoó kadə̄n. Nin̄ njə̄rān̄ gō naā tə́ aw̄n̄. 9Dan ń ugə̄n̄ loo ń Nə́ɓā ɔjə Abəraham tə́ ní anī, Abəraham ɔy kūbə̄rū mbal̄ gə̄ tə́ndā dɔ naā tə́ rāań loo tun̄ yá̰a̰, ba ɔsə̄ kīr̄ dɔ tə́. Ni-do̰ō̰ ngōnə̄n Isaak ənīn dɔ kīr̄ ní tə́.

10Abəraham əla jīn unəń kəyā yā kəjań kɔ́ɔ ngōnən, 11anī nge kaw̄ kəla yā Kɔ́ɔ̄ɓē ndi dɔ rā̰ tə́ ɓārə́n na:

Abəraham! Abəraham!

Anī Abəraham ndigə na: Mā n toó. 12Kɔ́ɔ̄ɓē əda na:

Ə́ya̰ ngōn̄, ī-lōō rāān yá̰á̰ kə́ tōr̄. Ngɔlaā ní m̄-ger̄ kadə̄ ī-ɓōĺ ndílə́ḿ, tɔdɔ̄ ɔ̄gə̄m̄ ngōnīí kə́ kal kógə̄ḿ beē alé.

13Abəraham un kumən kə̄ dɔɔ́ anī, a̰a̰ bal batə̄ kə́ gajən naā dan bɔkə́ kámbə gə̄ tə́. Abəraham aw̄ əhɔ bal batə̄ ní, tɔ̄l̄ róōn horoó adə̄ Nə́ɓā kum gotə ngōnə̄n. 14Abəraham əndā rī loo ní na i Kɔ́ɔ̄ɓē a adə̄. I tām̄ ń toō tə́ n ɓōólaā gə̄gē a ədan̄ na dɔ mbal̄ yā Kɔ́ɔ̄ɓē tə́ Kɔ́ɔ̄ɓē na a adə̄ ní.

15 Nge kaw̄ kəla yā Kɔ́ɔ̄ɓē ndi dɔ rā̰ tə́ ɓāŕ Abəraham nja kə́ nge ko̰ jōó ədan na:

16-17Najə̄ yā Kɔ́ɔ̄ɓē n toó: m̄-ə̄nā ndūḿ yā rāā majə seí tām̄ yá̰á̰ ń ī-rāā tə́ ní. Ɔ̄gə̄m̄ ngōnīí kə́ kal kógə̄ḿ beē alé, adə̄ m-ā m̄-rāā kadə̄ ngán kaaí gə̄ a bəlan̄ tītə̄ tə́yō̰ gə̄ kə́ dɔ rā̰ tə́ ō, tītə̄ nán̄g ngárə̄ḿnjēý kə́ ta bā bo tə́ ō. Ngán kaaí gə̄ a taān̄ ɓē yā madə̄ ba̰ā̰də́ gə̄ ō. 18M-ā m̄-rāā majə kə nápar de gə̄ kə́ dɔ nang tə́ gə̄ malang sɔɔ̄ń ngán kaaí gə̄, tɔdɔ̄ ḭ̄ ōō taḿ.

19Abəraham téĺ reē rɔ̄ ngé kəla yān gə̄ tə́. Nin̄ télən̄ dɔ tə́ malang aw̄n̄ gogə́ Beer Seba, loo ń Abəraham ndi tū tə́ tə́ ní.

20Gō yá̰a̰ gə̄ ń noō tə́ anī, Abəraham oō kadə̄ Milka na ojə ngáń kə́ dəngam gə̄ kə ngōkó̰o̰n Nahor ō. 21Rī nge kə́ nga tɔ́gə na i Us. Rī gotə gə̄ na i Bujə ō, Kemuel bɔbə̄ Aram ō, 22Kesed ō, Hajo ō, Pildas ō, Yidəlap ō, Betuel ō. 23Betuel ojə Rebeka. Ngáń kə́ sɔ́sɔ́ gə̄ ń Milka ojə kə Nahor ngōkó̰o̰ Abəraham ní n noó. 24Də̄yá̰ gidə ndogə̄ yān kə́ nge ko̰ jōó ń rīn na i Reuma ní ojə Teba ō, Gaham ō, Tahas ō, Maaka ō.

Currently Selected:

TA KƏLA 22: SARDC

Highlight

Copy