TA KƏLA 20

Abəraham nin̄ kə Abimelek

1Abəraham aw̄ dɔ nang kə́ Negeb tə́ aw̄ ndi dɔ dán Kades nin̄ kə Sur tə́. Gō tə́ anī, aw̄ ndi Gerar sḛ́ý to̰. 2Dan ń ni a ɔr̄ najə̄ yā nə̄yá̰n Sara ɓáa, əda na Sara na i ngōkó̰o̰n kə́ dəyá̰, adə̄ Abimelek, mban̄g kə́ Gerar, adə̄ əhɔn̄ Sara reēn̄ seneé. 3Ndɔ̄ɔ́ anī Nə́ɓā reē dɔ Abimelek tə́ kə nīí, ədan na:

Ā óy najə̄ dəyá̰ ń ādə̄ əhɔ adīn̄ tə́ ní, tɔdɔ̄ ngaan i noó. 4Abimelek ń aw̄ rɔ̄ dəyá̰ ní tə́ aĺ ɓáý ní tél ədan na:

Kɔ́ɔ̄ḿ, ā ī-tɔ̄l̄ nápar de kə́ súmūú gə̄ a? 5Abəraham nəkɔ́ ədam̄ na i ngōkó̰o̰n kə́ dəyá̰, tá dəyá̰ nəkɔ́ əda na Abəraham na i ngōkó̰o̰n kə́ dəngam rɔ̄kum. Adə̄ yá̰a̰ rāāḿ i kə kem kə́ unjə̄ njáý njáý, yá̰á̰ kə́ majaĺ kə́ m̄-rāā gətóo.

6Kem nī nəkɔ́ kə́ kógə̄ḿ beē ń noō tə́, Nə́ɓā tél əda Abimelek na:

Mə̄kɔ́ m̄-ger̄ kadə̄ yá̰á̰ ń ī-rāā ní i kə kem kə́ unjə̄ njáý njáý ō, i mə̄kɔ́ n m-ə́hɔī gotoó m-ɔ̄gī rāā yá̰á̰ kə́ majaĺ seḿ ní ō. I tām̄ ń noō tə́ n m-ə́ya̰ī adə̄ ɔ́dəń rɔ̄n aĺ ní. 7Ngɔlaā ní ī-tél kə dəyá̰ ń noō ādə̄n kə ngaaneé gogə́. Ngaan i nge koō ta yāḿ. Ni a ndɔ̄ȳm̄ tām̄ yāí tə́ anī, ā ī-ndi kə kumuú. Ba ré ī-tél ādə̄n kə ngaaneé gogə́ aĺ anī, ā óyiī sḭḭ̄ kə de gə̄ yāí gēé malang.

8Abimelek teē dəloí ɓatə, ɓāŕ ngé kəla yān gə̄, ənīdə́ gotə yá̰a̰ gə̄ ní malang, anī ɓōĺ rāā de gə̄ ní ngá̰ý. 9Abimelek ɓāŕ Abəraham ədan na:

I rí kə́ beé n ī-rāā sejí toō? I rí kə́ tōr̄ n m̄-rāā seí á ī-rāājí ādə̄ jə-rāā majaĺ kə́ bo beé, mā ō, de kə́ kem ɓē ko̰o̰ yāḿ tə́ gə̄ ō ní? Deē a rāā yá̰á̰ kə́ beé seḿ māá alé. 10I rí n rāāī á ī-rāā yá̰á̰ kə́ beé ni? 11Abəraham tél ədan na:

Mā m̄-gír̄ m-ə́da na de kə́ laā gə̄ na ɓōlə́n̄ Ndíĺ Nə́ɓā alé, adə̄ na a tɔ̄l̄mə̄n̄ najə̄ yā nə̄yá̰ḿ tə́. 12Tá kə́ rɔ̄kum tə́ ní, i ngōkó̰ó̰ḿ kə́ dəyá̰. Bɔbə̄jí i kógə̄ḿ beē seneé, ba i kó̰ó̰jí gə̄ n i tayā ní. I yá̰á̰ ń toō n m̄-taānəń kə́ dəyá̰ tə́ ní. 13Dan ń Nə́ɓā ɓārə́m̄ adə̄ m̄-teē kɔ̄ɔ́ ɓē yā bɔbə́ḿ tə́ ní, m-ə́da nə̄yá̰ḿ na ré tárəm̄ anī, loo malang ń j-a j-aw̄ tū tə́ ní, kə əda na mā na i ngōkó̰o̰n kə́ dəngam.

14Abimelek əhɔ batə̄ gə̄ ō, bə̄yā̰ gə̄ ō, man̄g gə̄ ō, ɓəlo kə́ dəngam gə̄ ō, kə́ dəyá̰ gə̄ ō, adə̄ Abəraham dɔ nə̄yá̰n Sara tə́. 15Ni-əda Abəraham na:

M-ɔ̄gī loo ɓē yāḿ tə́ alé. Loo ń nelī ní, ī-ndi tū tə́. 16Gō tə́ anī ni-əda Sara na:

Á̰a̰, m-ādə̄ ngōkó̰ó̰í sə́lē kə́ rāā kə gində̄ arjā̰a̰á̰ dūbú. Nge ń noō i yá̰á̰ kə́ ɔjə kadə̄ najə̄ gətóo dɔí tə́ ta kum de gə̄ tə́.

17-18Kɔ́ɔ̄ɓē rāā adə̄ dəyá̰ kə́ kem ndogə̄ yā Abimelek tə́ gə̄ malang ojən̄ ngán gə̄ to̰ alé najə̄ yā Sara nə̄yá̰ Abəraham tə́. Banī Abəraham ndɔ̄ȳ Nə́ɓā, adə̄ Nə́ɓā adə̄ rɔ̄ Abimelek ngáā ō, rɔ̄ nə̄yá̰n ngáā ō, rɔ̄ ngé kəla yān kə́ dəyá̰ gə̄ ngáā ō, adə̄ nin̄ tél ojən̄ ngán gə̄ gogə́.

Currently Selected:

TA KƏLA 20: SARDC

Highlight

Copy