1 MAKABE GƏ̄ 5
5
Judas rɔ̄ɔ̄ nápar de gə̄ ń ndin̄ kadən tə́ ní
1Dan ń nápar de gə̄ ń ndi gīrə̄n̄ gidə Jipə gə̄ ní, oōn̄ kadə̄ Jipə gə̄ tél rāān̄ dabə tun̄ yá̰a̰ ō, lo kə́ táĺ ō gogə́ rang, adə̄ tél to tītə̄ kə́ kété anī, 2wūn̄g asədə́ nák, adə̄ ndigən̄ rāā kadə̄ gír kaa yā Jakob gətóo dɔ dáńdə́ tə́. Lo ń nuū tə́ əlan̄ gír tɔ̄l̄də́ ō, tɔ̄ɔ̄ kōōdə́ kɔ̄ɔ́ ō. 3Judas rɔ̄ɔ̄ ngán Ejawu gə̄ dɔ nang kə́ Idume tə́ ō, Akərabaten tə́ ō, tɔdɔ̄ nin̄ gīrə̄n̄ gidə Israel gə̄ əlan̄ ta naā tə́. Ni rɔ̄ɔ̄də́ kə ngangá ngá̰ý mbəre əndādə́ sa̰y ō, ɔy yá̰a̰ kənge yādə́ gə̄ ō.
4Gō tə́ anī, əga kemən dɔ kem ndul yā ngán Bayan tə́. Nin̄ i gūmbə̄ kə́ kəyā no ngáń Israel gə̄ tə́ ō, kāgə̄ kə́ dēsə́ nodə́ tə́ ō, tɔdɔ̄ umə̄n̄də́ róbó. 5Ni utə̄ tadə́ kem kújə yādə́ kə́ ngāl̄ ɓururu gə̄ tə́ ō, adə̄ gīrə̄n̄ ɓē yādə́ ō, tɔ̄lə̄n̄də́ malang kɔ̄ɔ́ ō. Ni əla hor dɔ kújə́ kə́ ngāl̄ ɓururu yādə́ gə̄ tə́, kə de kə́ kemeé gə̄ malang. 6Gō tə́ anī aw̄ ɓē ngán Amon gēé, anī ənge ɓūtə̄ áskar gə̄ kə́ tɔ́gə́də́ i ngá̰ý ō, kósə de kə́ ngá̰ý gə̄ kə́ Timote un dɔdə́ ō. 7Ni ənīdə́ rɔ̄ɔ̄ nja i ngá̰ý ō, rējə̄də́ ō, tetədə́ rɔ̄ɔ̄ ō. 8Ni taā ɓē kə́ Yajer ō, ngán ɓē kə́ kadə tə́ gə̄ ō, ba tél dɔ tə́ reē gogə́ dɔ nang kə́ Jude tə́.
Israel gə̄ ɓārə́n̄ Judas kadə̄ dḭḭ̄də́
9Gír nápar de kə́ Galaad gə̄ əndān̄ rɔ̄də́ naā tə́ yā rɔ̄ɔ̄ Israel gə̄ ń ndin̄ dɔ nang yādə́ tə́ ní, yā rāań kadə̄ gətóon̄ kɔ̄ɔ́. Adə̄ Israel gə̄ aw̄ ɓɔ̄ɔ̄n̄ rɔ̄də́ kem kújə́ kə́ ngan̄g kə́ Datema tə́. 10Nin̄ əlan̄ kəla ədan̄ Judas kə ngákṵ́ṵn gēé na: Nápar de gə̄ əndān̄ rɔ̄də́ naā tə́ yā rɔ̄ɔ̄jí kadə̄ jə-gətóo kɔ̄ɔ́. 11Nin̄ əndān̄ dɔ rɔ̄də́ danaá yā reē kənī kújə́ kə́ ngan̄g gə̄ ń jə-ɓɔ̄ɔ̄ rɔ̄jí kemeé ní rɔ̄ɔ̄ ō, i Timote n i nge kun dɔ ngé rɔ̄ɔ̄ yādə́ gə̄ ō. 12I beé ní, ī-reē ngɔr ń toō tə́ ī-taājí jīdə́ tə́. Tɔdɔ̄ de gə̄ ngá̰ý danjí tə́ oyn̄ kɔ̄ɔ́ ɓá. 13Ngákṵ́ṵ́jí gə̄ malang kə́ dɔ nang yā Tobi tə́ i kə́ tɔ̄lə̄n̄də́ kɔ̄ɔ́ ō, əhɔn̄ nə̄yá̰də́ gə̄ kə ngáńdə́ gə̄ aw̄n̄ sedə́ ɓəlo tə́ ō, ɔyn̄ yá̰a̰ kənge yādə́ gə̄ ō, de gə̄ kə́ asən̄ dūbú kógə̄ḿ ń nuū əngen̄ yo oyn̄ lo ń nuū tə́ ō. 14Ra a tə́dan̄ makətūbə̄ gə̄ ní ɓáý anī, ngámbang kəla gə̄ teēn̄ ta kə́ Galile tə́ reēn̄, kūbə̄ gə̄ kə́ rɔ̄də́ tə́ i kə́ rə́yā̰ kɔ̄kə́, reēn̄ i kə najə̄ kə́ kógə̄ḿ nəkɔ́ ń nuū: 15De gə̄ kə́ ḭḭn̄ Pətolemayis ō, Tir ō, Sido̰ ō, naā tə́ kə de gə̄ malang kə́ Galile yā tə̄rā gə̄ ō, əndān̄ rɔ̄də́ naā tə́ yā reē tɔ̄ɔ̄ kōōjí. 16Dan ń Judas nin̄ kə ngáń Israel gēé oōn̄ gotə yá̰a̰ gə̄ ń rāān̄ yá̰á̰ ní anī, ɔsən̄ dɔ de gə̄ ngá̰ý naā tə́. Nin̄ oōn̄ naā dɔ yá̰á̰ kə́ majə kə́ yā rāā tām̄ yā ngákṵ́ṵ́də́ gə̄ ń de gə̄ rāān̄ kumdə́ ndoō tə́ ní ō, ənīn̄də́ rɔ̄ɔ̄ ō ní tə́. 17Judas əda ngōkṵ́ṵn Simo̰ na: ḭ̄kɔ́ ī-gə̄rā de gə̄ ba āw̄ ī-gān̄g dɔ ngákṵ́ṵ́í gə̄ ń ndin̄ dɔ nang kə́ Galile tə́ ní. Mā ō, ngōkṵ́ṵ́ḿ Jonata̰ ō, j-a j-aw̄ dɔ nang kə́ Galaditidə tə́. 18Ni əya̰ Jəjep kə́ ngōn̄ Jakari ō, Ajariya ń i ngār yā ngáń Israel gə̄ ní ō, gotə áskar gə̄ kə́ kadə̄ ngɔ̄mə̄n̄ ta lo ō, gogə́ Jude. 19Ni adə̄də́ ndūn ədadə́ na: ṵ́ṵ̄ī ɓē dɔ de gə̄ tə́, ba ī-lōōī kənī de gə̄ ń nin̄ i Jipə aĺ gə̄ ní rɔ̄ɔ̄ bátə́ kadə̄ jə-tél jə-reē j-ugə̄ń. 20Adə̄n̄ Simo̰ de gə̄ dūbú mətá kadə̄ aw̄ń Galile ō, adə̄n̄ Judas de gə̄ dūbú sɔ́sɔ́ kadə̄ aw̄ń Galaditidə tə́ ō.
Simo̰ nin̄ kə Judas tetən̄ rɔ̄ɔ̄ nja i ngá̰ý
21Dan ń Simo̰ aw̄ dɔ nang kə́ Galile tə́ ní, ni ənī gír de gə̄ ń nin̄ i Jipə aĺ gə̄ ní rɔ̄ɔ̄ nja i ngá̰ý ō, tetədə́ rɔ̄ɔ̄ ō, a̰ȳn̄ naā non tə́ ō. 22Ni ngɔ̄də̄də́ bátə́ ugə̄ sedə́ ta róbə ɓē kə́ Pətolemayis tə́. De kə́ nin̄ i Jipə aĺ gə̄ ń tə́sō oyn̄ ní, i deē dūbú mətá ō, ni ɔy yá̰a̰ kənge yādə́ gə̄ ō. 23Ni ɔy Jipə kə́ Galile gə̄ ō, kə́ Arbata gə̄ ō, nə̄yá̰də́ gə̄ ō, ngáńdə́ gə̄ ō, yá̰a̰ kənge yādə́ gə̄ ō, ba aw̄ sedə́ dɔ nang kə́ Jude tə́ kə rɔ̄nelé.
24Judas ń a ɓāŕnən̄ na i Makabe ní ō, ngōkṵ́ṵn Jonata̰ ō, teēn̄ bā Jurdḛ ba njə̄rān̄ ndɔ̄ mətá dəla lo tə́. 25Nin̄ əngen̄ Nabate gə̄ kə́ əhɔn̄də́ kə̄ rɔ̄də́ tə́ majə ō, ənīn̄də́ gotə yá̰a̰ malang ń rāā ngákṵ́ṵ́də́ gə̄ Galaditidə tə́ ní ō. 26Ədan̄də́ na ngá̰ý gə̄ dandə́ tə́ i kə́ gīrə̄n̄də́ Bosora ō, Bosor ō, Alema ō, Kaspo ō, Karnayim ō ń i ɓē kə́ ngan̄g ngan̄g gə̄ ō, kə́ bo ngá̰ý gə̄ ō malang ní. 27Tá na utə̄n̄ ta ngé kə́rēý gə̄ kem ɓē kə́ bo kə́ rang gə̄ kə́ Galaditidə tə́ ō. Madə̄ ba̰ā̰də́ gə̄ ndigən̄ kadə̄ lo tīī anī kə n-ənīn̄ kújə́ kə́ ngan̄g gə̄ ní rɔ̄ɔ̄ ō, kə n-taān̄ ō, kə n-tɔ̄lə̄n̄ de kə́ kemeé gə̄ malang ndɔ̄ kógə̄ḿ beē ō. 28Anī kə̄ ta jī tə́ nuū Judas nin̄ kə ngé rɔ̄ɔ̄ yān gēé unən̄ róbə́ kə́ dəla lo tə́ kumdə́ sɔɔ̄ Bosora. Ni taā ɓē ō, tɔ̄l̄ de kə́ dəngam gə̄ malang kɔ̄ɔ́ kə kaskaraá ō, ɔy yá̰a̰ kənge yādə́ malang ō, əla hor dɔ ɓē tə́ ō.
29Télən̄ dɔ tə́ ndɔ̄ɔ́ aw̄n̄ ō, njə̄rān̄ bátə́ ugə̄n̄ kújə́ kə́ ngan̄g kə́ Datema tə́ ō. 30Dan ń lo tīī á unən̄ kumdə́ kə̄ dɔɔ́ anī, a̰a̰n̄ ɓūtə̄ áskar kə́ ngá̰ý gə̄ kə́ dum̄ tə́da kutədə́ ra a túdə̄n̄ ɗígə gə̄ ō, yá̰a̰ rɔ̄ɔ̄ kə́ yā ndɔ́təń gə̄ ō, yā taāń ɓē. De gə̄ udən̄ naā tə́ rɔ̄ɔ̄n̄ naā kɔ̄ɔ́ ɓá. 31Dan ń Judas a̰ā̰ kadə̄ rɔ̄ɔ̄ əla gír kɔ̄ɔ́ ō, kɔŕ kə́ kem ɓēé kə́ əla naā mbitəri ɓār̄ kə̄ dɔɔ́ dɔɔ́ ō, burúnjə ō, sō̰ḿ ō, dānə̄n̄ gō anī, Judas əda ngé rɔ̄ɔ̄ yān gə̄ na: 32ɓōólaā ní, ī-rɔ̄ɔ̄ī tām̄ yā ngákṵ́ṵ́jí gə̄ tə́. 33Ni gán̄g ɓūtə̄ áskar yān gə̄ gír lo mətá ba aw̄ sedə́ kum kə̄ dɔ madə̄ ba̰ā̰ gə̄ tə́ yā kənīdə́ rɔ̄ɔ̄ gidədə́ tə́. Nin̄ kɔ̄rə́n̄ burúnjə ō, unən̄ pā nūūnəń kə̄ dɔ Nə́ɓā tə́ ō. 34Dan ń ngé rɔ̄ɔ̄ gə̄ yā Timote gerə̄n̄ kadə̄ i Makabe anī, a̰ȳn̄ naā kɔ̄ɔ́ non tə́. Ni tetədə́ rɔ̄ɔ̄ tetə kə́ to ɓōĺ ngá̰ý ō, de gə̄ dūbú sɔ́sɔ́ oyn̄ ndɔ̄ ń nuū tə́ ta rɔ̄ɔ̄ tə́ ō. 35Gō tə́ anī, ni tūr̄ rɔ̄n kə̄ rɔ̄ ɓē kə́ Alema tə́ ənīn rɔ̄ɔ̄ ō, taā ɓē ní ō, tɔ̄l̄ de kə́ dəngam kə́ kemeé gə̄ malang kɔ̄ɔ́ ō, ɔy yá̰a̰ kənge kə́ kem ɓēé ō, əla hor dɔ ɓē tə́ ō. 36Ni ḭḭ nuú aw̄ taā ɓē kə́ Kaspo ō, Maked ō, Bosor ō, gotə ɓē kə́ rang gə̄ kə́ Galaditidə tə́ ō. Judas tetə rɔ̄ɔ̄ kə́ rang gə̄ dɔ nang kə́ Galaditidə tə́ ō.
37Gō yá̰a̰ gə̄ ń nuū ń rāān̄ yá̰á̰ tə́ ní, Timote ɔsə dɔ ngé rɔ̄ɔ̄ kə́ rang gə̄ naā tə́ ba aw̄ ndin̄ kumdə́ sɔɔ̄ ɓē kə́ Rapo̰, gidə ngōn̄ man̄ kógə̄ḿ tə́. 38Judas əla de gə̄ kəndā maȳ géŕ ger tə́ anī, reē ədanən̄ na: Nápar de gə̄ malang ń ndi gīrə̄n̄ gidəjí, adə̄ i ɓūtə̄ ngé rɔ̄ɔ̄ gə̄ kə́ kutədə́ i ngá̰ý ní, tetən̄ rɔ̄də́ gō Timote tə́. 39Nin̄ ɔyn̄ áskar Arabə kə́ ngé rāā kəla gír naraá gə̄ kadə̄ ɔsən̄ kíĺdə́ ō, ndin̄ dɔ rɔ̄də́ tə́ gidə man̄ kə́rēý tə́ yā bə̄gā naā dɔí tə́ yā rɔ̄ɔ̄ī ō. Judas teē tə́nī tadə́ ō, 40ndɔ́tə̄ kə̄ ta man̄ tə́ kə áskar yān gēé ō. Lo ń nuū tə́ Timote əda ngol gə̄ kə́ dɔ ngé rɔ̄ɔ̄ yān gə̄ tə́ na: Ré ni teē man̄ kété anī, j-a j-asiī dum̄ tan alé, tɔdɔ̄ a ənge lo kə́ majə yā rɔ̄ɔńjí. 41Ba ré ni ɓōĺ ba dəba ra gidə man̄ kə́rēý tə́ anī, j-a jə-teēī man̄ ō, j-a jə-tetiin̄ rɔ̄ɔ̄ ō. 42Lo ń Judas reē ugə̄ ta man̄ tə́ anī, tə́ndā ngé ndang makətūbə̄ yā Israel gə̄ ta man̄ tə́ ba ɔjədə́ kadə̄ rāān̄ yá̰á̰ ń toō: ə́ya̰ī deē kógə̄ḿ kadə̄ ndi géŕ gereé alé, banī ādī de gə̄ malang aw̄n̄ ta rɔ̄ɔ̄ tə́. 43Nəkɔ́ teē man̄ kété kum kə̄ rɔ̄ madə̄ ba̰ā̰ gə̄ tə́ ō, kósə de gə̄ malang utə̄n̄ gōn ō. Ni tetə nápar de gə̄ ń nin̄ i Jipə aĺ gə̄ ní rɔ̄ɔ̄, adə̄ ɓōkə́n̄ yá̰a̰ rɔ̄ɔ̄ yādə́ gə̄ kɔ̄ɔ́ ba a̰ȳ aw̄n̄ kújə ɓesə̄ kə́ Karnayim tə́. 44De kə́ Juda gə̄ taān̄ ɓē pá tá əlan̄ hor dɔ kújə ɓesə̄ tə́ ō, dɔ de kə́ kemeé gə̄ tə́ ō. Ɓē kə́ Karnayim əsō ō, ndɔ̄ nəkɔ́ ń nuū tə́ de kə́ asə ra ta Judas tə́ yā dum̄ tan gətóo ō.
45Judas kán̄ ngáń Israel gə̄ kə́ Galaditidə tə́ malang, ḭḭ dɔ de kə́ dūú tə́ bátə́ de kə́ tɔgə tə́, naā tə́ kə nə̄yá̰də́ gə̄ ō, ngáńdə́ gə̄ ō, yá̰a̰ kənge yādə́ gə̄ ō. Adə̄ i ɓūtə̄ de kə́ ngá̰ý gə̄ n a aw̄n̄ kə̄ dɔ nang yā Juda tə́ ní. 46Nin̄ ugə̄n̄ Epəro̰ ń i ɓē kə́ bo ō, tɔ́gən i ngá̰ý ō ń ra dɔ róbə kundə́ tə́ ní. Deē a gōn̄g ɓē ní kṵṵ́ aĺ ō, geleé aĺ ō, i gáŕ kadə̄ deē a ənda i dan tá a mānəń. 47De kə́ kem ɓēé gə̄ ɔgə̄n̄də́ mān̄ ō, ɔyn̄ mbal̄ kə́ bo gə̄ utə̄nəń ta róbə kɔ̄ɔ́ ō. 48Judas əla de gə̄ kadə̄ aw̄ ədan̄də́ najə̄ kə́ to lápə́ya ń toō: J-a j-ənda dan ɓē yāsí yā gān̄g, yā kaw̄ń kem ɓē yājí tə́, de kə́ yā rāāsí yá̰á̰ kə́ majə aĺ a gətóo ō, yá̰á̰ ń j-a jə-rāā ní i mān̄ kem ɓē yāsí tə́ kə njají ngóy ō. Banī nin̄ mbātə́n̄ teē ta róbə kadə̄n. 49Anī Judas adə̄ ngé rɔ̄ɔ̄ yān gə̄ ndūn kadə̄ de gə̄ kógə̄ḿ kógə̄ḿ ndin̄ dɔ rɔ̄də́ tə́ lo radə́ gə̄ tə́. 50Áskar gə̄ ran̄ dɔ rɔ̄də́ tə́ yā rɔ̄ɔ̄. Judas ənī ɓē rɔ̄ɔ̄ ndɔ̄ ń nuū tə́ kadaá bátə́ lo tíbə ō, ndɔ̄ɔ́ bátə́ lo tīī ō. Anī ɓē əsō kem jīdə́ tə́. 51Ni tɔ̄l̄ de kə́ dəngam gə̄ malang kɔ̄ɔ́ kə kaskaraá ō, nujə ɓē sák sák kɔ̄ɔ́ ō. Ni ɔy yá̰a̰ kənge kə́ kemeé ō, njə̄rā dɔ nīń de gə̄ tə́ əndań dan ɓē gān̄g ō. 52Nin̄ teēn̄ bā Jurdḛ ba aw̄n̄ kə̄ kum kubə kə́ bo ń ra sɔɔ̄n̄ ta naā kə Betəsur ní tə́. 53Judas aw̄ ō, tél ō. Ni ɔsə nja ngé nay gogə́ gə̄ kə̄ naā tə́ ō, əla go̰ kem ngáń Israel gə̄ tə́ kə gō róbó bátə́ kadə̄ ugə̄n̄nəń dɔ nang yā Juda tə́ ō. 54Nin̄ alə̄n̄ mbal̄ Siyo̰ kə rɔ̄nelé ō, ndējə̄n̄ Nə́ɓā yá̰a̰ tun̄ kə́ róō horoó gə̄ ō. Tɔdɔ̄ nin̄ tél reē ugə̄n̄ gogə́ ɓēé kə lápə́yaá ō, ta deē kógə̄ḿ tḭ̄ḭ̄ aĺ ō.
Tetən̄ Jəjep nin̄ kə Ajariya rɔ̄ɔ̄
55Kem ndɔ̄ gə̄ ń Judas nin̄ kə Jonata̰ i dɔ nang kə́ Galaad tə́ ō, ngōkṵ́ṵn Simo̰ i dɔ nang kə́ Galile tə́ no Pətoleme tə́ ō ní, 56Jəjep kə́ ngōn̄ Jakari ō, Ajariya ngol ngé rɔ̄ɔ̄ gə̄ ō, oōn̄ kōō yá̰á̰ kə́ to wurkil gə̄ ń rāān̄ ní ō, rɔ̄ɔ̄ gə̄ ń ənīn̄ ní ō anī, 57ədan̄ naā na: Ādə̄ jə-rāāī ādə̄ rījí ɓār̄ ō, j-aw̄ j-ənī nápar de gə̄ ń ndi gīrə̄n̄ gidəjí ní rɔ̄ɔ̄ ō. 58Nin̄ adə̄n̄ ɓūtə̄ áskar gə̄ ń nin̄ ndin̄ dɔdə́ tə́ ní ndūdə́ ō, aw̄ ənīn̄ ɓē kə́ Jamniya rɔ̄ɔ̄ ō. 59Gorjiyas teē kem ɓēé kə de gə̄ yān gēé yā kaw̄ kənīń rɔ̄ɔ̄. 60Rɔ̄ɔ̄ rāā Jəjep nin̄ kə Ajariya adə̄ a̰ȳn̄ naā ō, ngɔ̄də̄n̄də́ bátə́ ugə̄n̄ sedə́ ta ngóy ɓē kə́ Jude tə́ ō. Ndɔ̄ ń nuū tə́ ní, ngáń Israel gə̄ kə́ asən̄ dūbú jōó oyn̄. 61I rɔ̄ɔ̄ kə́ rāā ngáń Israel gə̄ ngá̰ý, tɔdɔ̄ Jəjep nin̄ kə Ajariya mbātə́n̄ koō najə̄ yā Judas nin̄ kə ngákṵ́ṵn gēé, tām̄ ɔjənə̄ń na n-asən̄ rāā yá̰á̰ kə́ to wurkil ō. 62Tá nin̄ i gír kaa de gə̄ ń Nə́ɓā adə̄də́ tɔ́gə kadə̄ ajən̄ ngáń Israel gə̄ ní alé.
Judas i dɔ nang kə́ Idume tə́ ō, gō nang yā Pilistin gə̄ tə́ ō
63Judas nge wurkil nin̄ kə ngákṵ́ṵn gēé ní, ngáń Israel gə̄ malang ɔsən̄ go̰ndə́ ngá̰ý ō, nápar de gə̄ malang ń oōn̄ rīdə́ ní, ɔsən̄ go̰ndə́ ngá̰ý ō. 64De gə̄ kánə̄n̄ naā dɔdə́ tə́ yā ɓōkə́də́ tɔ̄ȳ. 65Judas nin̄ kə ngákṵ́ṵn gēé aw̄n̄ yā rɔ̄ɔ̄ ngán Ejawu gə̄ nja lo kə́ dām̄ mbɔ́r ɓē kə́ geleé tə́. Ni taā ɓē kə́ Hebəro̰ ō, ngán ɓē gə̄ ń ɓē kə́ Hebəro̰ ṵṵ ɓē dɔ tə́ ní ō. Tétə̄ kújə́ kə́ ngan̄g kə́ kemeé gə̄ malang kɔ̄ɔ́ ō, əla hor dɔ kújə́ kə́ ngāl̄ ɓururu gə̄ kə́ kemeé gə̄ tə́ ō. 66Gō tə́ anī ɔr dɔɔ́ aw̄ kumən kə̄ dɔ nang yā Pilistin gə̄ tə́ ō, ənda dan ɓē kə́ Marisa gān̄g ō. 67Ndɔ̄ ń nuū tə́ ní, ngé tun̄ yá̰a̰ gə̄ sāān̄ kɔjə wurkil yādə́ kə̄ ndágá. Nin̄ ɓōlə́n̄ aĺ ba aw̄ ənīn̄ rɔ̄ɔ̄, adə̄ oyn̄. 68Gō tə́ anī Judas tūr̄ rɔ̄n kə̄ rɔ̄ Ajotos ń i ɓē kə́ gō nang yā Pilistin gə̄ tə́ ní, ba mbə́rē dabə tun̄ yá̰a̰ yādə́ gə̄ tə́nī kɔ̄ɔ́ ō, adə̄ əlan̄ hor dɔ ɓesə̄ yādə́ kə́ tɔ́l gə̄ tə́ ō, ɔy yá̰a̰ kənge kə́ kem ɓēé ō, ba tél dɔ tə́ reē gogə́ dɔ nang yā Juda tə́.
Currently Selected:
1 MAKABE GƏ̄ 5: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.