1 MAKABE GƏ̄ 4
4
Judas tetə rɔ̄ɔ̄ kem ɓē kə́ Emayus tə́
1Gorjiyas ɔy ngé rɔ̄ɔ̄ kə́ ngé njə̄rā kə njadə́ gə̄ dūbú mí ō, ngé kal̄ sə́ndá kə́ jī katə gə̄ dūbú ō, ba aw̄ sedə́ ndɔ̄ɔ́, 2yā kaw̄ kəɓa Jipə gə̄ nang tə́ kem géŕ ger yādə́ tə́ ō, teēń sedə́ rétə́ gēé yā kəhɔńdə́ dɔ jīdə́ tə́ ō. I de gə̄ kə́ kem ɓē kə́ ngan̄g tə́ n i ngé kɔrən ta róbə gə̄ ní. 3Judas oō, adə̄ aw̄ kə de gə̄ yān gə̄ kə́ ngé wurkil gə̄ yā rɔ̄ɔń de gə̄ yā mban̄g ń nin̄ i Emayus ní tə́, 4dan ń Gorjiyas kə ngé rɔ̄ɔ̄ yān gēé i sa̰y rɔ̄ géŕ ger tə́ ɓáý ní. 5Gorjiyas nin̄ kə de gēé reē ugə̄n̄ géŕ ger yā Judas tə́ ndɔ̄ɔ́. Ni ənge deē kógə̄ḿ alé, anī ndəle Jipə gə̄ dɔ mbal̄ gə̄ tə́, tɔdɔ̄ ni əda na a̰ȳn̄ i naā kɔ̄ɔ́ nodə́ tə́.
6Dan ń lo tīī anī, Judas teē kum kubə tə́ kə de gēé dūbú mətá, banī kūbə̄ gində̄ gə̄ ō, kaskar gə̄ ō ní, asə dɔdə́ alé. 7Nin̄ a̰a̰n̄ géŕ ger kə́ ngan̄g ō, tɔ́gən to ō, yā nápar de gə̄ ń nin̄ i Jipə aĺ gə̄ ní. Ngé kal̄ sə́nda gə̄ gīrə̄n̄ gidə ō, nin̄ malang i de kə́ ger̄ rɔ̄ɔ̄ gə̄ ō, rɔ̄ɔ̄ ndér̄də́ ō. 8Anī, Judas əda deē yān gə̄ na: Ī-lōōī ɓōĺ kósə de kə́ ngá̰ý gə̄ ń toō ō, dan ń a ənīn̄sí rɔ̄ɔ̄ anī, ī-lōōī kadə̄ ndíĺsí a̰ȳ ō. 9Ādə̄ əga kemsí dɔ kajə ń ajən̄ kaají gə̄ bā katə tə́, dan ń mban̄g Parao̰ ngɔ̄dəń gōdə́ kə ngé rɔ̄ɔ̄ yān gēé ní tə́ 10Ngɔlaā ní, ādə̄ j-əgāī kɔŕ kə̄ dɔ Nə́ɓā tə́. Ré gḛyjí anī, a əga kemən dɔ madə̄ naā yā kaají gə̄ tə́ ō, a rējə̄ ngé rɔ̄ɔ̄ gə̄ ń nuū kɔ̄ɔ́ nojí tə́ ɓōólaā ō. 11Lo ń nuū tə́ nápar de gə̄ malang a gerə̄n̄ kadə̄ de kógə̄ḿ ndi nuú, kə́ ni i nge gān̄g dɔ Israel ō, nge kajən ō. 12Tə̄rā gə̄ ɔrə̄n̄ dɔdə́ dɔɔ́ anī, a̰a̰n̄ kadə̄ Jipə gə̄ a reēn̄ i kə̄ rɔ̄ɔ̄də́ tə́. 13Anī, nin̄ teēn̄ géŕ gereé yā kənīdə́ rɔ̄ɔ̄. Juda gə̄ kɔ̄rə́n̄ burúnjə, 14ba udən̄ naā tə́. Tetən̄ nápar de gə̄ ń i Jipə aĺ gə̄ ní rɔ̄ɔ̄, adə̄ a̰ȳn̄ naā kum kubə tə́. 15Banī ngé kə́ gogə́ gə̄ tə́sōn̄ malang ta kaskar tə́. Ngɔ̄də̄n̄də́ bátə́ Gajara ō, kum kubə kə́ Idume tə́ ō, Ajotə tə́ ō, Jamniya tə́ ō. De gə̄ kə́ asən̄ dūbú mətá ń nuū tə́sōn̄ lo ń nuū tə́.
16Dan ń Judas tél ngɔ̄də̄də́ tə́ kə ɓūtə̄ de gə̄ yān gēé anī, əda de gə̄ na: 17ī-lōōī kadə̄ ɓōō kɔy yá̰a̰ kənge kə́ ta rɔ̄ɔ̄ tə́ rāāsí ngá̰ý, tɔdɔ̄ rɔ̄ɔ̄ kə́ rang to a ngóōjí nuū. 18Gorjiyas nin̄ kə ɓūtə̄ de gə̄ yān gēé i dɔ mbalá rɔ̄jí tə́ laā ngɔr. Ə́hɔī rɔ̄sí tɔgə ta madə̄ ba̰ā̰jí gə̄ tə́ ō, ī-rɔ̄ɔ̄īdə́ ō, pá tá ə̄nī kemsí ɔ́yiīń yá̰a̰ kənge ɓáý. 19Judas ɔr̄ najə̄ ba ənī tan kə̄ nang tə́ anī, a̰a̰n̄ ɓūtə̄ ngé rɔ̄ɔ̄ gə̄ dɔ mbalá dɔɔ́ ra a umə̄n̄ lo. 20Nin̄ a̰a̰n̄ kadə̄ ngé rɔ̄ɔ̄ yādə́ gə̄ a̰ȳn̄ naā kɔ̄ɔ́ ō, əlan̄ hor dɔ géŕ ger yādə́ tə́ ō. Saa ń əɓa kum kə̄ dɔɔ́ dɔɔ́ ní, ɔjə yá̰á̰ ń rāā yá̰á̰ ní adə̄ unjə̄ ngá̰ý. 21Dan ń a̰a̰n̄ yá̰á̰ ń nuū ní, ndíĺdə́ a̰ȳ. A̰a̰n̄ ngé rɔ̄ɔ̄ gə̄ yā Judas kə́ ran̄ dɔ rɔ̄də́ tə́ kɔ̄ɔ́ kum kubə tə́ yā rɔ̄ɔ̄ ō anī, 22nin̄ malang a̰ȳn̄ naā kɔ̄ɔ́, aw̄n̄ dɔ nang yā Pilistin gə̄ tə́. 23Lo ń nuū tə́ Judas tél dɔ tə́ reē kɔy yá̰a̰ kənge kə́ kem géŕ ger yā madə̄ ba̰ā̰ gə̄ tə́. Ɔyn̄ lɔ́ŕ ngá̰ý ō, nar ngá̰ý ō. Ɔyn̄ kūbə̄ kə́ kərē gus gus gə̄ ō, kə́ kərē ning gə̄ ō, ɔyn̄ yá̰a̰ kənge ngá̰ý ō. 24Ta téĺdə́ anī, nin̄ ɓōkə́n̄ Nə́ɓā tɔ̄ȳ ō, rāānən̄ kə́ra ō, ədan̄ na: Nə́ɓā i de kə́ majə ō, kem majə yān to ngándáńg ō. 25Ndɔ̄ ń nuū tə́ ní, gān̄g dɔ kə́ bo ngá̰ý to dɔ nang kə́ Israel tə́.
26Tə̄rā gə̄ ń a̰ȳn̄ naā ní, ngé kə́rēý gə̄ reē ɔjən̄ Lijiyas gotə yá̰a̰ malang ń rāā yá̰á̰ ní. 27Gotə najə̄ ń ni oō ní, nujə kemən ō, ɔr̄ tɔ́gən ō. Tɔdɔ̄ yá̰a̰ gə̄ ń rāān̄ yá̰a̰ tām̄ yā Israel tə́ ní, i kə gō ń ni ndigəń ní aĺ ō, ɔjən̄ i yá̰á̰ ń mban̄g əda kadə̄ yā rāā ní aĺ ō.
Judas tetə rɔ̄ɔ̄ kə́ Betəsur
28Teē ɓāl̄ kə́ rang tə́ anī, Lijiyas ɔsə dɔ de kə́ jī katə gə̄ dūbú kutə mehḛ́ ō, ngé rɔ̄ɔ̄ kə sə́ndá gə̄ dūbú mí ō naā tə́, yā rɔ̄ɔń Jipə gə̄. 29Nin̄ reēn̄ dɔ nang kə́ Idume tə́, ba əndān̄ géŕ ger yādə́ Betəsur. Judas tə́nī tadə́ kə de gə̄ dūbú kutə. 30Dan ń ni a̰a̰ ngé rɔ̄ɔ̄ gə̄ ń toō ń tɔ́gə́də́ i ngá̰ý ní anī, ndɔ̄ȳ tītə̄ ń toō beé əda na: Nge kajə Israel, ādə̄ de gə̄ ɓōkíīn̄ tɔ̄ȳ! I ḭ̄ n ī-tetə nge rɔ̄ɔ̄ kə́ tɔ́gən i ngá̰ý kə kūl̄ nge kəla yāí Dabid ní ō, i ḭ̄ n ə́lá géŕ ger yā Pilistin gə̄ jī Jonata̰ kə́ ngōn̄ Sawul tə́ nin̄ kə nge kətō der yāneé ní ō. 31Tītə̄ ń ī-rāań kété ní ə́lá ngé rɔ̄ɔ̄ gə̄ yā madə̄ ba̰ā̰ gə̄ ń toō jī Israel gə̄ ń i gír deē yāí gə̄ ní tə́. Ādə̄ rɔ̄ madə̄ ba̰ā̰ gə̄ sɔl̄də́ kə ngé rɔ̄ɔ̄ kə njadə́ yādə́ gə̄ ō, kə sə́ndá yādə́ gə̄ ō. 32Ə́la ɓōĺ kemdə́ tə́ ō, ī-tetə tɔ́gə́də́ ń a ɔjənə̄ń rɔ̄də́ ní kɔ̄ɔ́ ō. Ādə̄ ndewn̄ sɔɔ̄ń tetə ń tetən̄də́ rɔ̄ɔ̄ ní. 33Ī-rāā ādə̄ tə́sōn̄ ta kaskar yā ngé gə̄ ń táriīn̄ ní tə́ ō, ādə̄ ngé gə̄ malang ń gerə̄n̄ rīí ní, ɔsən̄ go̰nií kə pāá ō. 34Rɔ̄ɔ̄ udə naā tə́ pít ō, de gə̄ əndān̄ nganjədə́ naā tə́ ō, anī ngé rɔ̄ɔ̄ yā Lijiyas gə̄ oyn̄ i deē dūbú mí. 35Dan ń Lijiyas a̰a̰ rɔ̄ɔ̄ ń rāā áskar yān gə̄ ní ō, a̰a̰ wurkil yā áskar gə̄ yā Judas ō, a̰ā̰ kadə̄ nin̄ ndin̄ dɔ rɔ̄də́ tə́ yā kajə, aláa yā koy kə wurkilií ō anī, aw̄ A̰tiyos kɔy tə̄rā gə̄ tə́ yā tél reē kənīń rɔ̄ɔ̄ kə tɔ́gɔ́ dɔ nang kə́ Jude tə́.
Tə́gon̄ lo kə́ táĺ
36Lo ń nuū tə́ Judas nin̄ kə ngákṵ́ṵn gēé ədan̄ na: Á̰a̰ī, madə̄ ba̰ā̰jí gə̄ i kə́ rɔ̄ɔ̄ tetədə́ kɔ̄ɔ́ ní, ādə̄ j-aw̄ jə-tə́goī lo kə́ táĺ ō, j-ɔrī kamə̄n tām̄ yā Nə́ɓā tə́ ō. 37Ngé rɔ̄ɔ̄ gə̄ malang kánə̄n̄ naā ba aw̄n̄ dɔ mbal̄ Siyo̰ tə́. 38Anī a̰a̰n̄ kadə̄ de gə̄ gətóon̄ lo kə́ táĺ tə́ ō, rāān̄ dabə tun̄ yá̰a̰ i loo kə́ to rɔȳ tə́ aĺ ō, ta róbə́ kújə gə̄ i kə́ hor ṵṵ kɔ̄ɔ́ ō. Mu əɓa ndágə loo kə́ gidə lo kə́ táĺ tə́ tītə̄ loo kə́ bembeé, aláa kə́ dɔ mbalá beē ō, nujən̄ kújə yā ngé tun̄ yá̰a̰ gə̄ kɔ̄ɔ́ ō. 39Nin̄ rə́yā̰n̄ kūbə̄ kə́ rɔ̄də́ gə̄ tə́ ō, əhɔn̄ ndoō ngá̰ý ō, əgan̄ bū kə̄ dɔdə́ tə́ ō. 40Nin̄ əsōn̄, əgan̄ kumdə́ nang tə́ ō, dan ń oōn̄ kōō burúnjə anī, əgan̄ kɔŕ kum kə̄ dɔ rā̰ tə́ ō.
41Judas adə̄ ndūn de kə́rēý gə̄ kə́ dan deē yān gə̄ tə́, kadə̄ aw̄ rɔ̄ɔ̄n̄ de gə̄ ń ndin̄ kem kújə́ kə́ ngan̄g tə́ ní, bátə́ kadə̄ ni tə́goń lo kə́ táĺ adə̄ unjə̄. 42Gō tə́ anī ni gə̄rā ngé tun̄ yá̰a̰ gə̄ kə́ majaĺ tákə̄də́ aĺ gə̄ ō, kə́ ṵṵdə́ tɔdɔ̄ ndū najə̄ ō, 43adə̄ tə́gon̄ lo kə́ táĺ adə̄ unjə̄ ō, ɔyn̄ mbal̄ kə́ yḛr gə̄ aw̄ ɓōkə́n̄ lo kógə̄ḿ kə́ yḛr tə́ ō. 44Dabə róō yá̰a̰ tun̄ gə̄ ń de gə̄ rāān̄ lo kə́ to rɔȳ tə́ aĺ ní, de gə̄ dəjen̄ rɔ̄də́ najə̄ na ké kə n-rāān̄nəń i ba̰ý wa. 45Anī aw̄n̄ kə gír̄ kə́ majə kə́ yā nujəń kɔ̄ɔ́, na sōgə́ a tél i yá̰á̰ kə́ to rɔ̄sɔl̄ tām̄ yādə́ tə́, tɔdɔ̄ de gə̄ kə́ nin̄ i Jipə aĺ gə̄ rāān̄ lo róō yá̰a̰ tun̄ gə̄ ní adə̄ tél lo kə́ yḛr kɔ̄ɔ́. Adə̄ tɔ̄ɔ̄n̄ lo róō yá̰a̰ tun̄ gə̄ ní kɔ̄ɔ́ ō, 46ɔyn̄ ngán mbal̄ gə̄ ń tɔ̄ɔ̄n̄ ní aw̄ ɓōkə́n̄ dɔ mbal̄ ń rāān̄ kújə yā Nə́ɓā dɔ tə́ ní tə́, lo kógə̄ḿ kə́ əhɔn̄ naā seneé tə́, yā ngóoń ta reē nge koō taa kógə̄ḿ kə́ kadə̄ əda najə̄ kə́ dɔ tə́. 47Kə gō ń ndū najə̄ ədań ní, nin̄ ɔyn̄ ngán mbal̄ gə̄ kə́ kanjə̄ tɔ́sə̄ kadə gə̄ rāānəń dabə tun̄ yá̰á̰ kə́ kijə kə́ to tītə̄ nge kə́ kété. 48Nin̄ rāān̄ lo kə́ táĺ adə̄ tél majə gogə́, rāān̄ kemən adə̄ tél majə gogə́ ō, ɔrə̄n̄ kam̄ ndágə lo kə́ gidə tə́ ō. 49Dan ń rāān̄ yá̰a̰ rāā kəla kə́ kijə gə̄ kə́ kɔr̄ kam̄ tām̄ yā Nə́ɓā tə́ oy anī, aw̄n̄ kə ɗəra horoó ō, kə dabə róō ndujə̄ yá̰á̰ kə́ otə majaá ō, kə tábəl ō, kem kújə yā Kɔ́ɔ̄ɓē tə́. 50Nin̄ róōn̄ ndujə̄ yá̰á̰ kə́ otə majə dɔ dabə róō ndujə̄ yá̰á̰ tə́ adə̄ əɓa saa ō, əndān̄ hor ta bay hor gə̄ kə́ tū ɗəra hor tə́ adə̄ unjə̄n̄ kem kújə yā Kɔ́ɔ̄ɓē tə́ ō. 51Nin̄ ɓōkə́n̄ mápa gə̄ dɔ tábəl tə́ ō, ndájə̄n̄ gō kūbə̄ gān̄g kem kújə ō, tɔ̄lə̄n̄ ta kəla malang ń əlan̄ gíŕ ní ō.
52Kə ndɔ̄ kə́ nge kṵ kutə jōó gidə i mí yā nāā kə́ nge kṵ ndōhó ń a ɓārə́n̄ na i Kislew ní, kem ɓāl̄ kə́ nge kṵ ɓú kə kutə sɔ́ kə kalən kə́ sɔ́sɔ́ tə́ anī, ḭḭn̄ dɔɔ́ kə gír loí ɓatə 53ba tunə̄n̄ yá̰a̰ tītə̄ ń ndū najə̄ ədań ní, dɔ dabə róō yá̰a̰ tun̄ gə̄ kə́ kijə ń rāān̄ ní tə́. 54Rāān nāā dabə tun̄ yá̰á̰ i kə pā gə̄ kə́ a dānə̄n̄ gō i kə kənde kə́ bo gēé ō, kə́ dūú gēé ō, kə ngán kɔdə gēé ō, i ndɔ̄ ń nuū tə́ bang n de gə̄ kə́ nin̄ i Jipə aĺ gə̄ rāānəń dabə tun̄ yá̰a̰ lo kə́ to rɔȳ aĺ tə́ ní. 55Ngán Israel gə̄ malang əsō sébən̄ kumdə́ nang tə́ rɔȳnəń Nə́ɓā. Gō tə́ anī, unən̄ ndūdə́ kə̄ dɔɔ́ tɔ̄ȳnəń Nə́ɓā ń rāā sedə́ adə̄ tetən̄ rɔ̄ɔ̄ ní. 56Nin̄ rāān̄ nāā dabə tun̄ yá̰a̰ ndɔ̄ sɔ́sɔ́ ō, ndējə̄n̄ yá̰a̰ yá̰á̰ kə́ yā róō horoó gə̄ kə rɔ̄nel̄ kə́ ngá̰ý ō, ndējə̄n̄ yá̰a̰ tun̄ gə̄ kə́ tām̄ yā kem kógə̄ḿ tə́ ō, yá̰a̰ tun̄ gə̄ kə́ yā rāań Nə́ɓā kə́ra tām̄ kem majə yān tə́ ō. 57Nin̄ súūn̄ ta kújə yā Kɔ́ɔ̄ɓē kə́ ndágá kə jākā mbang gə̄ kə́ rāān̄ kə lɔ́rɔ́ ō, kə der kə́ dūú gə̄ ō. Rāān̄ ta róbə gə̄ kə́ yā kudəń kə̄ kemeé ō, kem kújə gə̄ ń tə́lan̄ bápə gə̄ ta tə́ ní ō, adə̄ télən̄ kə́ kijə. 58Rɔ̄nel̄ kə́ ngá̰ý to kem ɓēé. Ba rɔ̄sɔl̄ ń de gə̄ kə́ nin̄ i Jipə aĺ gə̄ əlan̄ dɔ ngáń Israel gə̄ tə́ ní gətóo kɔ̄ɔ́. 59Judas nin̄ kə ngákṵ́ṵn gə̄ ō, ngé kán̄ naā gə̄ malang kə́ Israel tə́ ō, unən̄ ndūdə́ ədan̄ na: Kə dɔ ɓāl̄ gə̄, kə kum mbang nəkɔ́ ń toō, kə ndɔ̄ kə́ nge kṵ kutə jōó gidə i mí yā nāā Kislew ní, a rāān̄ nāā dabə tun̄ yá̰a̰ kə rɔ̄nelé, bátə́ ndɔ̄ sɔ́sɔ́.
60Dan ngeé ń nuū tə́ ní, əndān̄ ndogə̄ mbal̄ kə́ ngāl̄ ngá̰ý kum kə̄ dɔɔ́ gīr̄nəń gidə mbal̄ Siyo̰ ō, kújə kə́ ngāl̄ kum kə̄ dɔɔ́ kə́ ngan̄g gə̄ ō, na sōgə́ de gə̄ kə́ nin̄ i Jipə aĺ gə̄ tél reē rāān̄ lo ní lo kə́ to rɔȳ aĺ tə́ ɓáý tṵ. 61Judas əda ɓūtə̄ áskar gə̄ kadə̄ ngɔ̄mə̄n̄ kújə yā Kɔ́ɔ̄ɓē. Ni rāā ɓē kə́ Betəsur adə̄ ngan̄g, yā kadə̄ ngán Israel gə̄ əngenə̄ń kújə́ kə́ ngan̄g kə́ ra kumən sɔɔ̄ dɔ nang kə́ Idume.
Currently Selected:
1 MAKABE GƏ̄ 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.