1 MAKABE GƏ̄ 6
6
Moy rāā mban̄g A̰tiyokus kə́ nge kṵ sɔ́ ō, oy ō
1Dan ń mban̄g A̰tiyokus a njə̄rań gō nang kə́ mbalá tə́ ní, ni oō kadə̄ dɔ nang kə́ Persə tə́ ní, ɓē kógə̄ḿ kə́ rīn na i Elimayis i nuú. I ɓē kə́ rīn ɓār̄ ngá̰ý sɔɔ̄ń yá̰a̰ kənge yān ō, gində̄ arjā̰a̰ yān ō, lɔ́r yān ō. 2Yá̰a̰ kənge i ngá̰ý kem kújə ɓesə̄ kə́ kem ɓē ní tə́. Adə̄ yá̰á̰ kə́ yā tə́la rɔ̄ tə́ rɔ̄ɔń kə́ rāā kə lɔ́rɔ́ gə̄ ō, kūbə̄ gində̄ gə̄ ō, yá̰a̰ rɔ̄ɔ̄ gə̄ ō ní, i Alekjandər n əya̰ kem ɓē ní tə́ ní. Alekjandər i ngōn̄ Pilipə, mban̄g kə́ Masedəwan ń ṵṵ ɓē ta kəga dɔ, dɔ Gərek gə̄ tə́ ní. 3Ni aw̄ kem ɓē ní tə́, ba sāā taā ɓē ní yā kɔy yá̰á̰ kə́ kemeé gə̄, banī ni asə alé. Tām̄ de kə́ kem ɓē ní tə́ gə̄ oōn̄ najə̄ yá̰á̰ ń ni sāā rāā ní. 4Əndān̄ rɔ̄də́ naā tə́ yā rɔ̄ɔn, anī ni a̰ȳ, əya̰ lo ní ba tél dɔ tə́ aw̄ gogə́ Babilon kə wūn̄g kə́ ngá̰ý. 5De gə̄ reē ədanən̄ dɔ nang kə́ Persə tə́ na rɔ̄ɔ̄ na rāā ɓūtə̄ áskar gə̄ ń aw̄n̄ dɔ nang yā Juda tə́ ní. 6Lijiyas aw̄ dɔ nang yā Juda tə́ kə ɓūtə̄ áskar gə̄ kə́ tɔ́gə́də́ i ngá̰ý, banī ni a̰ȳ kɔ̄ɔ́ no Jipə gə̄ tə́. Jipə gə̄ əngen̄ yá̰a̰ rɔ̄ɔ̄ gə̄ kə̄ dɔ naā tə́ ō, yá̰a̰ gə̄ ń ndoōn rāādə́ ní ō, tá ɔyn̄ yá̰a̰ kənge kə́ ngá̰ý yā madə̄ ba̰ā̰ gə̄ ń nin̄ tə̄ndā tḭ̄ḭ̄n̄də́ kə̄ lo gə̄ tə́ ní ō. 7Yá̰á̰ kə́ to yḛr kum ń A̰tiyokus rāā dɔ dabə tun̄ yá̰á̰ kə́ Jerusalem tə́ ní, nin̄ mbəre ənīn̄ kɔ̄ɔ́ ba əndān̄ ndogə̄ mbal̄ kə́ ngāl̄ ngá̰ý gidə kújə́ kə́ táĺ yādə́ tə́ tītə̄ kə́ kété. Betəsur ń i ɓē yā mban̄g ní, nin̄ utə̄n̄ gidə i tītə̄ ń nuū ō. 8Dan ń mban̄g oō gotə najə̄ gə̄ ń nuū ní, ɔr kumən ngá̰ý ō, kemən nujə sák sák kɔ̄ɔ́ ō. Adə̄ ni əsō suruk kem tə̄rá yān tə́. Wur tōr̄ rāan kə́ moy tə́, tɔdɔ̄ yá̰a̰ gə̄ ń rāān̄ yá̰á̰ ní, i tītə̄ ń ni gírəń ní alé. 9Ni to kə̄ kem tə̄rá nuū ndɔ̄ ngá̰ý, tɔ́gən sḛ́ý gē gətóo. Dan ń ni gír̄ kadə̄ a oy anī, 10ɓāŕ madə̄n gə̄ malang ba ədadə́ na: ɓīī ɔdə kumḿ aĺ ō, gír̄ yá̰a̰ taā tɔ́gə́ḿ kɔ̄ɔ́ ō. 11M̄-dəje rɔ̄ḿ najə̄ m-ə́da na ké m-údə kem wur kɔl kə́ asə naā beé tə́ i ba̰ý wa. I nél man̄ kə́ ba̰ý n m-údə kum tə́ beé wa. Tá dan ń tɔ́gə́ḿ toń ɓáý ní, m̄-ndi majə ō, de gə̄ tármə̄n̄ ō! 12Ba ń toō ɓá anī, əga kemḿ dɔ yá̰á̰ kə́ majə aĺ gə̄ ń m̄-rāā kem ɓē kə́ Jerusalem tə́ ní. M-ɔ́ý ngáń gájə́ yá̰a̰ malang kə́ rāā kə lɔ́rɔ́ ō, kə gində̄ arjā̰a̰ ō ń to kem ɓē kə́ Jerusalem tə́ ní ō, m-ə́la de gə̄ adə̄ aw̄ tɔ̄ɔ̄n̄ kōō de kə́ Juda gə̄ kanjə̄ kumən ō. 13M̄-ger̄ kadə̄ i tām̄ yá̰a̰ gə̄ ń nuū tə́ n yá̰á̰ kə́ tōr̄ gə̄ ń toō rāāməń ní ō, ń toō tɔ́gə́ḿ teē rɔ̄ḿ tə́ kɔ̄ɔ́ adə̄ m-ā m-óy i mbée dɔ nang kə́ rang tə́ ō. 14Ni adə̄ ɓārə́n̄ madə̄n kógə̄ḿ kə́ rīn na i Pilipə, ba əndān dɔ ɓē kṵ tə́ malang. 15Ni adə̄n jākā mbang yān ō, kūbə̄ mbang yān ō, tambō̰o̰ yān ō. Əndā kəla kɔjə̄ ngōnən A̰tiyokus dɔ Pilipə tə́, kadə̄ ətōn kətō kə́ kadə̄ ndɔ̄ń tə́ anī ndiń mban̄g. 16Mban̄g A̰tiyokus oy lo ní tə́, kem ɓāl̄ kə́ nge kṵ ɓú kə kutə sɔ́ kə kalən kə́ ndōhó tə́. 17Dan ń Lijiyas oō kadə̄ mban̄g A̰tiyokus oy anī, əndā ngōnən A̰tiyokus ń rī tɔ̄ȳn na i Opator ní gotən tə́ kə dūúneé.
Judas gīr̄ gidə kújə kə́ ngan̄g kə́ Jerusalem kə áskar yān gēé
18Judas ənī kújə́ kə́ ngan̄g kə́ Jerusalem rɔ̄ɔ̄. Dan ń nuū tə́ ní, madə̄ ba̰ā̰ gə̄ ndin̄ kem kújə́ kə́ ngan̄g kə́ Jerusalem tə́ ɓáý. Nin̄ ɔgə̄n̄ Israel gə̄ njə̄rā kə kem ndigə yādə́ gidə kújə yā Kɔ́ɔ̄ɓē tə́. Nin̄ a sāān̄ i ta róbə kə̄ lo gə̄ tə́ yā rāańdə́ yá̰á̰ kə́ tōr̄ ō, yā kɔsəń kíl de gə̄ ń i Jipə aĺ gə̄ ní ō. 19Judas ndigə tɔ̄ɔ̄ kōōdə́ kɔ̄ɔ́, adə̄ ɔsə dɔ ngáń Israel gə̄ kə̄ naā tə́ yā kənīńdə́ rɔ̄ɔ̄. 20Ngáń Israel gə̄ kánə̄n̄ naā ba aw̄ gīrə̄n̄ gidə kújə́ kə́ ngan̄g əlan̄ ta naā tə́, kem ɓāl̄ kə́ nge kṵ ɓú kə kutə mí tə́. Nin̄ rāān̄ yá̰a̰ rɔ̄ɔ̄ gə̄ kə́ yā tə́niń yá̰a̰ gə̄ kə̄ dɔ madə̄ ba̰ā̰ gə̄ tə́ ō, yá̰a̰ rɔ̄ɔ̄ kə́ rang gə̄ ō. 21Banī de kə́rēý gə̄ kə́ kem kújə́ kə́ ngan̄g gə̄ tə́ rāān̄ bátə́ ba teē a̰ȳn̄. Ngáń Israel gə̄ kə́ ngé rāā yá̰a̰ kə gō kem ndigə yā Nə́ɓāá aĺ gə̄ 22aw̄n̄ sedə́ ɓē mbangá, ba ədanən̄ na: Yā rāań yá̰á̰ kə́ gōtə́ ō, daləń ba̰ā̰ ngákṵ́ṵ́jí gə̄ ō ní, á ī-ngóō i bátə́ ríngáý tə́? 23Jḭḭ jə-ndigə rāā kəla kadə̄ bɔbí ō, jə-rāā i yá̰á̰ ń ni ədají kadə̄ jə-rāā ní ō, j-əndā kumjí gír ndū najə̄ yān gə̄ tə́ ō. 24I tām̄ najə̄ ń toō tə́ n ngáń ngé ɓē madə̄jí gə̄ gīr̄nəń gidə kújə́ kə́ ngan̄g əlan̄ ta naā tə́ ō, rāānəńjí tə̄rā gə̄ tə́ ō ní. Tá kə́ tɔȳ nge ń nuū ní, nin̄ tɔ̄lə̄n̄ de kə́ danjí tə́ gə̄ ń əsōn̄ kem jīdə́ tə́ ní ō, ɔyn̄ yá̰a̰ kənge yājí gə̄ ō. 25I jḭḭ ngóy n nin̄ rɔ̄ɔ̄n̄jí ní alé, banī ənīn̄ gō nang yājí malang rɔ̄ɔ̄ ō. 26Kum mbang ń toō tə́ ní, nin̄ gīrə̄n̄ gidə kújə́ kə́ ngan̄g kə́ Jerusalem yā taā ō, rāān̄ lo kə́ táĺ adə̄ ngan̄g ō, rāān̄ ɓē kə́ Betəsur adə̄ ngan̄g ō. 27Ré ḭ́ḭ sedə́ ngɔr ń toō tə́ kə rɔ̄ɔ́ aĺ anī, a rāān̄ yá̰á̰ kə́ tɔȳ nge ń nuū ɓáý ō, ā ásə kɔgə̄də́ rāā aĺ ō.
Mban̄g A̰tiyokus kə́ nge kṵ mí rɔ̄ɔ̄ Jipə gə̄
28Dan ń mban̄g oō najə̄ ń nuū ní anī, wūn̄g rāan ngá̰ý. Adə̄ madə̄n gə̄ ō, ngol áskar yān kə́ ngé rɔ̄ɔ̄ kə njadə́ gə̄ ō, kə́ ngé rɔ̄ɔ̄ kə sə́nda gə̄ ō ní, ni ɔsə dɔdə́ naā tə́. 29Ni ɔy ɓūtə̄ ngé rɔ̄ɔ̄ gír naraá gə̄ adə̄ ḭḭn̄ kə̄ kem ɓē kṵ gə̄ yā tə̄rā gə̄ tə́ ō, kə̄ dɔ dor̄ gə̄ kə́ kum bā bo tə́ ō, reēn̄. 30Ngé rɔ̄ɔ̄ yān gə̄ malang ní, kə́ ngé rɔ̄ɔ̄ kə njaá gə̄ i deē dūbú ɓú ō, kə sə́ndá gə̄ i deē dūbú kutə jōó ō, kə kedēé gə̄ i deē kutə mətá gidə i jōó ō. 31Nin̄ ḭḭn̄ i ta kə́ Idume tə́ n reēn̄ ō, gīrə̄n̄ gidə ɓē kə́ Betəsur əlan̄ ta naā tə́, ba ənīnən̄ rɔ̄ɔ̄ dan i ngá̰ý kə yá̰a̰ rɔ̄ɔ̄ gēé ō. Banī ngé gə̄ ń nin̄ gīrə̄n̄ gidədə́ ní, teēn̄ kə ta róbə kə́ tayā gə̄, tə́lan̄ hor dɔ yá̰a̰ rɔ̄ɔ̄ gə̄ tə́ ō, rɔ̄ɔ̄n̄ kə́ dəngam gə̄ tə́ ō. 32Lo ń nuū tə́ Judas ḭḭ kújə́ kə́ ngan̄g tə́ aw̄ Betəjakariya, ba əhɔ lo ndi kə nja rɔ̄ɔ́ kumən sɔɔ̄ géŕ ger yā mban̄g. 33Mban̄g ḭḭ dɔɔ́ kə gír loí ɓatə, ba adə̄ ngé rɔ̄ɔ̄ yān gə̄ aw̄n̄ láẃ dɔ róbə́ kə́ Betəjakariya tə́. Ɓūtə̄ ngé rɔ̄ɔ̄ yān gə̄ ran̄ kə ta naá kə nja rɔ̄ɔ́ ō, kɔ̄rə́n̄ burúnjə gə̄ ō. 34Reēn̄ kə man̄ nduú kə́ mbə́rē ō, man̄ kan̄ kāgə̄ mur kə́ mbə́rē kə́ kə̄rē ō, əndān̄ ta kum kedə̄ gə̄ tə́ kadə̄ a̰a̰n̄, yā kadə̄ əndānəń dɔ rɔ̄də́ danaá tām̄ yā rɔ̄ɔ̄ tə́. 35Tə́lan̄ kedə̄ gə̄ ní mbo̰ō̰ ngé rɔ̄ɔ̄ kə njadə́ gēé tə́. De gə̄ dūbú kógə̄ḿ i kə gō kadədə́ gēé. De gə̄ ní ṵṵ̄n̄ i kūbə̄ gində̄ gə̄ ō, jākā gində̄ nə̄ngá kasə i dɔdə́ gə̄ tə́ ō. Tá de gə̄ ɓú mí kə́ ngé ger̄ rɔ̄ɔ̄ kə sə́ndá kə́ jī katə gə̄ i gō kedə̄ gə̄ ní tə́ kógə̄ḿ kógə̄ḿ. 36Nin̄ əndān̄ kumdə́ gír yá̰a̰ malang ń kedə̄ a rāā tə́ ní ō, lo malang ń ni aw̄ tū tə́ ní tə́ ō, əya̰nən̄ dan sa̰y aĺ bátə́ ō. 37Rāān̄ lo kə́ yā kəndi gírí dɔ kedə̄ gə̄ tə́ kógə̄ḿ kógə̄ḿ kə kāgāá adə̄ ngāl̄ ɓururu. Rákə̄n̄ lo ní i kə kəlāá dɔ kedə̄ gə̄ tə́. Ngé rɔ̄ɔ̄ gə̄ mətá ndin̄ gírí ō, nge kɔr no kedə̄ i sedə́ ō. Adə̄ nin̄ i sɔ́ sɔ́ kə dɔ kedə̄ gēé. 38Mban̄g tə́ndā gotə ngé rɔ̄ɔ̄ kə sə́ndá gə̄ dɔ jī jōó kə gō kadə ngé rɔ̄ɔ̄ gēé, kadə̄ sókə̄n̄ ngé rɔ̄ɔ̄ yā Judas gə̄ ō, ngɔ̄mə̄n̄ ɓūtə̄ ngé rɔ̄ɔ̄ kə njadə́ gə̄ ō. 39Dan ń mbang əsō tū der gə̄ kə́ rāān̄ kə lɔ́rɔ́ tə́ ō, kə gində̄ nə̄ngá kasaá tə́ ō anī, ndə́lēdə́ əsō dɔ mbal̄ gə̄ tə́, anī mbal̄ gə̄ ndə́lēn̄ tītə̄ hor ngel̄ beé. 40Núsə́ ngé rɔ̄ɔ̄ kógə̄ḿ gə̄ yā mban̄g aw̄ ran̄ dɔ mbal̄ gə̄ tə́ dɔɔ́ ō, núsən kə́ rang gə̄ aw̄ ran̄ nja mbal̄ tə́ nang tə́ ō. Nin̄ ənīn̄ kemdə́ njə̄rānəń kum kə̄ kété kə ta naá. 41De gə̄ malang ń oōn̄ kōō dūbə̄ de gə̄ ń toō ō, kōō njadə́ ń a njə̄rānəń ní ō, kōō yá̰a̰ rɔ̄ɔ̄ yādə́ gə̄ ń a ɔdə naā á a ɓār̄ ní ō anī, ɓōĺ rāādə́. Ngé rɔ̄ɔ̄ gə̄ ngeé ń toō ní, nin̄ i ngá̰ý rɔ̄kum ō, tɔ́gə́də́ i ngá̰ý ō. 42Judas nin̄ kə ngé rɔ̄ɔ̄ yān gēé njə̄rān̄ kə̄ kété aw̄ ənīn̄ rɔ̄ɔ̄, anī de gə̄ ɓú mehḛ́ dan áskar yā mban̄g gə̄ tə́ oyn̄. 43Lo ń nuū tə́ Eleyajar ń rī tɔ̄ȳn na i Awaran ní, a̰a̰ kedə̄ kógə̄ḿ sa̰y dan madə̄ gə̄ tə́, kedə̄ ní bo tɔȳ madə̄ gə̄ malang ō, yá̰a̰ gə̄ ń rákə̄n̄ gidən tə́ ní, i yā mban̄g ō. Ni gír̄ kadə̄ mban̄g i dɔ tə́, 44adə̄ ənī rɔ̄n kɔ̄ɔ́ yā kajəń gír deē yān gə̄ ō, kadə̄ rīn ɓārəń ta kə́ jóo ō. 45Ni a̰ȳ ngɔ̄də̄ kanjə̄ ɓōĺ kum kə̄ rɔ̄ kedə̄ ní tə́, dan ngé rɔ̄ɔ̄ kə njadə́ gēé tə́. Ni tɔ̄l̄ de gə̄ kṵṵ́ gē, geleé gē, adə̄ madə̄ ba̰ā̰ gə̄ əya̰n̄ lo adə̄nən̄ dɔ jī jōó. 46Ni mān̄ láẃ udə gír kedēé, ba ɔsən gír kemən tə́ lo yon tə́. Kedə̄ ní əsō dɔ Eleyajar tə́, adə̄ oy kə̄ ta jī tə́ nuū. 47Dan ń a̰a̰n̄ kadə̄ tɔ́gə́ ngé rɔ̄ɔ̄ yā mban̄g i ngá̰ý ō, a̰a̰n̄ kadə̄ təngān̄ ngá̰ý lo rɔ̄ɔ̄ tə́ ō anī, əya̰n̄ lo adə̄n̄də́.
A̰tiyokus gīr̄ gidə mbal̄ Siyo̰ əla ta naā tə́
48Ngé rɔ̄ɔ̄ gə̄ yā mban̄g aw̄n̄ Jerusalem yā rɔ̄ɔ̄ Jipə gə̄. Mban̄g əndā dɔ rɔ̄n danaá yā rɔ̄ɔ̄ gō nang malang kə́ Jude ō, gīr̄ mbal̄ Siyo̰ əla ta naā tə́ ō. 49Ni əndā najə̄ naā tə́ kə de kə́ Betəsur gə̄ tām̄ yā lɔm tə́. Adə̄ teēn̄ kɔ̄ɔ́ kem ɓēé, tām̄ yá̰a̰ kəsa kə́ yā kadə̄ rɔ̄ɔ̄nəń gətóo, tɔdɔ̄ i ɓāl̄ kə́ nge kṵ sīrí ń dɔ nang a ɔrə̄ń koō ní. 50Mban̄g taā ɓē kə́ Betəsur ba əndā áskar kə́ ngé ngɔ̄m̄ lo gə̄ kemeé. 51Ni gīr̄ gidə lo kə́ táĺ əla ta naā tə́ ndɔ̄ i ngá̰ý ō, tə́ndā yá̰a̰ rɔ̄ɔ̄ kə́ tadə́ i ngá̰ý gə̄ ō, gində̄ rɔ̄ɔ̄ gə̄ ō, yá̰a̰ gə̄ kə́ yā tínəń hor dɔ madə̄ ba̰ā̰ gə̄ tə́ ō, kə́ yā tə́niń ngán mbal̄ gə̄ ō, ga̰ gərā kə́ rāā kə gindí yā túrəń kum gərā gə̄ ō, ga̰ gərā kə́ karī gə̄ ō, bējə̄ gə̄ ō. 52Jipə gə̄ rāān̄ gində̄ rɔ̄ɔ̄ gə̄ kə́ yā nujəń gində̄ rɔ̄ɔ̄ gə̄ yā madə̄ ba̰ā̰ ō, rɔ̄ɔ̄n̄ dɔ ndɔ̄ i ngá̰ý ō. 53Banī yá̰a̰ gətóo kem mōyō̰ó̰ tām̄ i ɓāl̄ kə́ nge kṵ sīrí ō, Israel gə̄ ń ḭḭn̄ sedə́ dan tə̄rā gə̄ tə́ tél reēn̄ sedə́ gogə́ dɔ nang kə́ Jude tə́ ní, əsan̄ yá̰a̰ malang kɔ̄ɔ́ ō. 54Adə̄ i de kə́ sḛ́ý beé gə̄ ngóy n əya̰n̄də́ kem lo kə́ táĺ tə́ ní, tɔdɔ̄ ɓōō i ngá̰ý. Gotə de gə̄ tḭ̄ḭ̄n̄ naā kə̄ lo gə̄ tə́, náā nəkɔ́ ɓáa aw̄ i lo yān.
A̰tiyokus kə́ nge kṵ mí adə̄ Jipə gə̄ ta róbə ndɔ̄ȳ Nə́ɓā kə gō kem ndigə yādə́
55Dan ngeé ń nuū tə́ ní, Lijiyas oō najə̄ yā Pilipə ń mban̄g A̰tiyokus gə̄rān dan ń ndiń kə kumneé ɓáý kadə̄ ətō ngōnən A̰tiyokus ō, əndā dɔ ngōnən ní danaá tām̄ yā kṵ ɓē tə́ ní ō. 56Pilipə ḭḭ Persə ō Medi ō, reē kə ɓūtə̄ áskar gə̄ ń dānə̄n̄ mban̄g kə́ dūú ní. Tá Lijiyas oō kadə̄ ngɔlaā ní Pilipə a sāā i ndi dɔ yá̰a̰ malang kə́ kem ɓē kṵ tə́ tə́. 57Anī nāgə́ láẃ əndā dɔ rɔ̄n danaá yā kaw̄. Ni əda mban̄g ō, ngol áskar gə̄ ō, de kə́ dəngam gə̄ ō na: Tɔ́gə́jí a təgā i mbée kum kə̄ kété kété kə dɔ ndɔ̄ gə̄ ō, yá̰a̰ kəsa ń adə̄n̄jí ní asə tají aĺ ō, lo ń jə-gīrī gidə ní i kə́ ngan̄g ō. Tá ɓáý tṵ ní, kəla kə́ dɔ ɓē kṵ tə́ to kə taá a ngóōjí nuū ō. 58Ādə̄ j-əlaī jī kṵṵjí j-adī de gə̄ ń nuū,#6.58 Kəla jī kṵ kadə̄ deē: i ndigə rɔ̄ɔn tṵ alé ba ādī lɔm to mbənājí tə́ sedə́ ō, kə de gə̄ yādə́ gēé malang ō. 59J-əya̰īdə́ ādə̄ rāān̄ yá̰a̰ kāgə̄ ɓē yādə́ tītə̄ kə́ kété. Tɔdɔ̄ ré wūn̄g rāādə́ ō, rāān̄ yá̰a̰ gə̄ ń nuū malang ō anī, i tām̄ yá̰a̰ kāgə̄ ɓē yādə́ ń j-ɔgīdə́ rāā ní tə́. 60Najə̄ ní nel̄ mban̄g ō, ngār gə̄ ō. Ni əla de gə̄ adə̄ aw̄ ɔrə̄n̄ najə̄ kə́ dɔ lɔm tə́ kə Jipə gēé, anī ndigən̄. 61Mban̄g gə̄ ō, ngār gə̄ ō túbən̄ ɔjənə̄ń kadə̄ i rɔ̄kum. Gō tə́ anī teēn̄ kɔ̄ɔ́ kem kújə́ kə́ ngan̄g tə́. 62Ba dan ń mban̄g aw̄ ugə̄ dɔ mbal̄ Siyo̰ tə́ á a̰ā̰ kadə̄ lo ní i lo kə́ rāān̄ adə̄ ngan̄g ngá̰ý anī, tūr̄ ndūn ń túbəń ní kɔ̄ɔ́. 63Gō tə́ anī tél kə nāgá láẃ aw̄ gogə́ A̰tiyos, a kə́ ənge Pilipə ń i kɔ́ɔ̄ ɓē ní. Ənīn rɔ̄ɔ̄ ba taā ɓē kə́ A̰tiyos dɔ gúú tə́.
Currently Selected:
1 MAKABE GƏ̄ 6: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.