Apocalipsis 6
6
Jaso' siete n'anaxanaqtepi
1Qana'chi sauáachiỹi jeso' n'aanaxate lec'óxot da' naqat jaso' 'oonole jaso'me n'anaxanaqtepi, qana'chi semachíỹa so' 'oonolec saua' cuatro síiỹac da' laviliỹáxac 'ená'am da' l'oxóỹaxac jaso' qasoxonaxa, 'eet'oi:
—¡'Aỹala, ỹa 'auc'aten!
2Qana'chi sec'aten, qana'chi selá'a so' pegaq pagaxaic. Jeso'me netalégue lasóqot'a so' lichiquínec. Qana'chi jeso'me qoỹanem jaso' naxa'do jen' net'a. Qana'chi jec, da' qaidi dauégaxan, qataxa qaidi na'chi 'eeta't da' dauégaxaatac.
3Qana'chi jeso'me n'aanaxate lec'óxot, joca'li ỹitaxa naqat jaso' n'anaxanaqte laqáỹa, qana'chi semachíỹa so' síiỹac laqáỹa, 'eet'oi:
—¡'Aỹala, ỹa 'auc'aten!
4Qana'chi nenoxonéegue so' pegaq laqáỹa tóomaxadaic. Jeso'me netalégue, jeso'me qoỹanem da' l'añaxac, qaidi deuootáxanec da' namaic jen' 'aléua, qataxa da' qaidi ỹ'étec ñi' 'oonolec siỹaxaua da' ỹalaat ga' laqáỹa. Qana'chi jeso'me qoỹanem so' let'ádaic legaxanaxat.
5Qana'chi so' n'aanaxate lec'óxot ca'li ỹitaxa naqat jaso' n'anaxanaqte laqáỹa, qana'chi ỹitaxa semachíỹa so' síiỹac laqáỹa, 'eet'oi:
—¡'Aỹala, ỹa 'auc'aten!
Qana'chi sec'aten, qana'chi selá'a so' pegaq laqáỹa léedaxaic. So' netalégue jeso'me lasóqot'a jaso' napogoqtaxanaxaqui. 6Qana'chi semachíỹa so' n'aqtac chimaqapíinỹi na' laiñi saua' síiỹac, 'eet'oi:
—Ga' un kilo na' trigo taiỹet qomle jaga' laso'vi ga' siỹaxaua da' d'onataxan di' 'oonolec nolo', qataxa ga' tres kilo na' cebada. Qaláxasa sa 'te qomle da' 'uo ga' 'auét'ec na' aceite qataxa na' latáxa.
7So' n'aanaxate lec'óxot ca'li ỹitaxa naqat jaso' n'anaxanaqte laqáỹa, qana'chi ỹitaxa semachíỹa so' p'áteegue síiỹac, 'eet'oi:
—¡'Aỹala, ỹa 'auc'aten!
8Qana'chi sec'aten, qana'chi selá'a so' pegaq laqáỹa qoñoxoic. Jeso'me netalégue lenaxat Neleuaxa. So' nec'ataxanáuo, jeso'me naqaiso so' liquí'i jega'me lapónaqa' jen' napa'lpi. Qana'chi jeso' Neleuaxa qoỹanem da' l'añaxac, da' qaidi ỹalaat ñi' 'oonolec naua' cuatro siỹaxa'u jen' huetalégue jen' 'aléua, da' ỹidolégue ga' laataxac, qataxa ga' noqouáxa, qataxa jen' napite'na, qataxa jen' síiỹacpi 'me di'quiỹaac 'me huetalégue jen' 'aléua.
9Jeso'me n'aanaxate lec'óxot ca'li ỹitaxa naqat jaso' n'anaxanaqte laqáỹa, qana'chi selá'a so' liqui'ipi jeso'me qoỹalaat ca'li, ỹasouaxat da' ỹipaquetelóo'te da' ỹ'axátet'ape naua' l'aqtaqa ñi' Dios. Jeso'me huet'ot na' p'áñi jaso' neco'ỹoxonaxalate. 10Qana'chi jeso'me ỹátaqta nesamaxadéetac, 'eet'oi:
—'Am qadasoxola' Dios 'me ỹátaqta 'am ỹoqovíta qataxa 'aupaquetelégue jega'me 'aualoxóotac, ¿jái'chogamaxa quesetelégue da' ỹivíta ga' lalóqo' da' 'animit qataxa 'aua'uo ga' ne'uaxánaguec jega'me ỹ'étetac ca'li da' qanalaataguec 'me huetalégue jen' 'aléua?
11Qana'chi qoỹanema naua' louo pagaxaiqa jeso'me niqui'ipi. Qana'chi qoỹinapéga da' maliaxa cadá'ac da' nepogoxoin, dito' qomle da' ỹátaqta nalot'a't na' laỹi 'me l'onataxanaxau'pi 'me maliaxa d'onataxaatapeelégue so' Cristo, da' na'chi 'ená'am qomle jen'me da' qoỹalaat.
12Qana'chi jeso' n'aanaxate lec'óxot ca'li ỹitaxa naqat jaso' n'anaxanaqte laqáỹa, qana'chi sec'aten, qana'chi 'uo so' let'ádaic n'iquiaxa. Qana'chi jaso' c'atena 'om, ỹátaqta n'áltapiỹi. Qataxa so' 'auóxoic qaa'le ỹátaqta 'ená'am na' letóomaxa jan' netauo'. 13Qataxa jan' huaqchiñipi qaa'le n'áqañi, talégue jen' 'aléua, 'ená'am jan' 'ipaq higo da' 'uootaxa n'áqtapiiñi jan' jala 'me maliaxa dadála, ỹasouaxat da' ỹ'iquiaxáatac jen' laỹat let'ádaic. 14Jen' piỹem qaa'le nelágaxataac, 'ená'am da' qoỹinana't. Jen'me qasoxonaxa qataxa jan'me nepe qaa'le ca'ai qoỹi'n naua' l'achaqa'te. 15Qana'chi jen'me net'alpi 'me ỹilotalégue jen' netalégue jen' 'aléua, qaa'le ỹima nañoxótoovlo naua' jauaco, nataq'en nañoxóchiñi no'to naua' qadi 'me net'oto naua' qasoxonaxádi. Nataq'en nañoxóchiñi ỹima na' ỹ'oxodaicpi, saliaxanqapi, qataxa na' huataxanaq let'alpi, qataxa na' 'uañaxaicpi, qataxa ỹima jen'me nelatacpi qataxa jen'me sa nelatacpi. 16Jen'me detaqátapecot na' qasoxonaxapi qataxa jen' qadísat, 'eet'oi:
—Ỹa qo'mi 'apatáxadiñii qomle, qataxa qo'mi 'auoxochí'nsopa qomle da' lec'atenaxanaxac jiñi'me nétanỹi jañi' s'ónaxaqui, qataxa da'me let'ádaic ne'uaxánaguec qa'en ñi'me n'aanaxate lec'óxot.
17Qá'a ma'le ỹivíta di' lalóqo' da' ỹátaqta let'ádaic ne'uaxánaguequéna. Qana'chi ¿jái'chogamaxa ỹañoxot da' nichaata'aguet? ¡Qaỹa!
Currently Selected:
Apocalipsis 6: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
