Apocalipsis 5
5
Jaso' nede qataxa so' sega'me n'aanaxate lec'óxot
1Ỹim, qana'chi jaỹim selá'a jaso' nede huétaỹi so' louaq ỹaỹáten so' nétanỹi jaso' s'ónaxaqui. Jaso'me qolcoqot'ague, qoỹidetalégue so' p'áuo qataxa na' p'áiỹi. Jaso'me qoỹitouoqtalóo'te saua' siete n'anaxanaqte da' qoỹapadéetaỹi. 2Nataq'en selá'a so' namaxasec piỹem lé'ec, ỹátaqta qaỹa 'te ga' 'ená'am da' l'añaxac. Ỹátaqta neten da' denataxáatac, 'eet'oi:
—¿Jái'chogamaxa tasa'aguet da' naqa't saua' n'anaxanaqte qataxa da' ỹ'ouáchiỹi jadójo' nede?
3Qá'a qaỹa ga' 'oonolec jen'me huet'ot na' piỹem da' 'uootaxa ỹañoxot da' ỹ'ouáchiỹi da' 'chi ỹic'aten jaso'me, qataxa na' huetalégue jen' 'aléua, qataxa jen'me p'áñi. 4Jaỹim ỹátaqta ñoỹen, ỹasouaxat da' qaỹa 'te ga' taiỹet da' ỹ'ouáchiỹi da' ỹitaxaỹaxan, 'uootaxa da' 'chi ỹic'aten jaso'me nede. 5Qana'chi so' 'oonolec so' ỹ'axaicáchiỹipi jaỹim 'enapéga, 'eet'oi:
—Sa 'te qomle da' 'oquet'ot da' 'anoinaxac. Qá'a ñi' qoỹíitapega Sáuaxaic Pólio' 'me chiỹaqáaue na' lec'óqo'tepi so' Judá, nataq'en chiỹoxoguet so' net'a David, jiñi'me dauégaxan. Chan'eesa jiñi'me ỹañoxot da' naqa't saua' siete qoỹitouoqtalóo'te n'anaxanaqtel qataxa da' ỹ'ouáchiỹi jadójo' nede.
6Qana'chi selá'a so' huétanỹi na' laiñi jeso'me s'ónaqa', huetanỹilo saua' cuatro síiỹac qataxa so' ỹ'axaicáchiỹipi. Jeso'me 'ená'am na' n'aanaxate lec'óxot. Jeso'me nichaatétañi, qataxa di'ỹoqóta da' 'éeta joca'li qoỹalaat. Jeso'me siete jan' lepee qataxa siete naua' l'ai'te. Jenaa'me l'ai'te naqainaua naua' siete sa di'ỹo't 'me namaxalo ỹima jen' 'aléua ñi' Dios. 7Jeso'me n'aanaxate lec'óxot ỹacona jaso'me nede 'me huétanỹi na' louaq ỹaỹáten jeso'me nétanỹi jaso' s'ónaxaqui. 8Qana'chi jeso'me joca'li ma'le ỹacona jaso' nede, qana'chi saua' cuatro síiỹac qataxa jeso'me veinticuatro ỹ'axaicáchiỹipi ỹisocoto naua' liliictel so' n'aanaxate lec'óxot. Ñi' 'oonolec jeso'me ỹ'axaicáchiỹipi 'uo jan' liviqui, qataxa lasóqot'a jan' ỹómaxaqui 'me chiỹaqaỹi jan' oro. Jan'me huétaỹi jen' nichínataxanaxat. Jénjo' nichínataxanaxat, naqáina jen' netamnaxac jen' lalémaxasetpi ñi' Dios. 9Jeso'me ỹ'axaicáchiỹipi ỹ'óotac da' dálaxaic nalac, 'eet'oi:
'Am ỹátaqta 'asa'aguet da' 'auacona jana' nede qataxa da' 'anaqa't naua' qoỹitouoqtalóo'te n'anaxanaqtel;
qá'a 'am qoỹalaat joca'li,
qataxa saua' 'adetauo' na'chi laso'vi da' qo'mi 'aneuodenalo,
qo'mi 'auachiỹoxotaavlo jen' ỹodapecachi siỹaxadipi 'me ỹodapecachi naua' l'aqtaqa,
da' qaidi ỹima qo'mi lalémaxase'te ñi' Dios.
10Qataxa qo'mi 'auanaỹilo da' qo'mi net'al
qataxa da' qo'mi letaxaỹáxanaxanqa na' siỹaxadipi da' s'onataxanqot ñi' qadet'a Dios.
Qana'chi seloxogue ỹima jen' huetalégue jen' 'aléua.
11Ỹim, qaa'le jaỹim seloséguem, qana'chi semachíỹa da' laviliỹáxac ỹátaqta sa lec'óxotolec namaxasec piỹem lé'ecpi coleetasop jaso' s'ónaxaqui qataxa saua' síiỹac qataxa saua' ỹ'axaicáchiilo. Ỹátaqta qaỹa 'te ga' ỹañoxot da' naloqten jeso'me. 12Qana'chi ỹátaqta ỹisam da' laviliỹáxac, 'eet'oi:
Jiñi'me n'aanaxate lec'óxot 'me qoỹalaat da' qoỹa'uo nachítaqtaxanaxat,
ñi'me ỹátaqta tasa'aguet da' qoỹanem da' damaxasóxonac qataxa da' nesaliaxa,
naỹátenaxanaxac, qataxa da' n'añaxac,
n'amaqchic, ni'ỹoxodic qataxa ni'ỹoxodénataguec.
13Qataxa semachíỹa nataq'en ỹima jen' l'onatacpi ñi' Dios 'me net'ot di' piỹem qataxa jen' huetalégue jen' 'aléua qataxa jen' huétaaue jen'me, qataxa na' huétanỹi jaso' huaxai. Ỹima jen'me 'eet'oi:
Da' ni'ỹoxodénataxanaxac qataxa da' n'amaqchic,
da' ni'ỹoxodic qataxa da' n'añaxac,
qoỹanot qomle jiñi'me nétanỹi jañi' s'ónaxaqui, qataxa jiñi' n'aanaxate lec'óxot.
Jeda'me qaỹa 'te loiquiaqa' qomle.
14Ỹim, qana'chi saua' cuatro síiỹac 'eet'oi:
—¡Já'a, na'chi naq'áita dójo'!
Jeso'me veinticuatro ỹ'axaicáchiỹipi qana'chi ỹasóidiñi naua' liliictel, qana'chi ỹi'ỹoxoden jiñi'me qaỹa 'te ga' loiquiaqa' da' l'óiỹaxac.
Currently Selected:
Apocalipsis 5: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
