Apocalipsis 4
4
Da'me ni'ỹoxodénataxanaxac 'me huet'ague da' piỹem
1Jaỹim Juan ca'li ỹim dójo', qana'chi seloséguem, qana'chi selásee'ma so' som di' piỹem n'ouátetaiỹi. Qana'chi so' naviliỹáxac 'me 'ená'am jan' naseede jeso'me 'uáichiiñi da' jaỹim detaqátapega, qana'chi jaỹim 'enapéga, 'eet'oi:
—Ỹa 'anenódesee'ma jénjo', qaidi 'am saloxóna jen'me sétaaque da' naloxon qomle ma'le ỹim dójo'.
2Huá'a, qana'chi jaỹim souáaue da' l'añaxac so' Espíritu Santo, qana'chi selá'a jaso' nes'ónaxaqui so' net'a net'ot di' piỹem. Jaso'me s'ónaxaqui 'uo so' nes'óotanỹi. 3Jeso'me nes'óotanỹi jaso'me s'ónaxaqui ỹátaqta 'ená'am da' l'óiỹaxac jen' qa' lenaxat jaspe, 'uootaxa na' cornalina, da' ỹátaqta ỹaqasélec. Naua' lail jaso' s'ónaxaqui coleesop so' sega'me huosac. Jen' laqasélgaxa qaa'le 'ená'am jen' qa' esmeralda. 4Qataxa naua' lail jaso' s'ónaxaqui qaa'le selá'a jaso' veinticuatro nes'ónaxaqui so' nasoxonecpi. Jeso'me ỹátaqta pagaxaiqa naua' louo, qataxa naua' naxa'dol 'ená'am jaga' naxa'do ga' net'a, jenaa'me nedot'a't oro. 5Jaso'me s'ónaxaqui chiỹoqótapee'uo jen' naqasélgaxa, nesamaxa qataxa l'oxóỹaxac. Qataxa saua' siete coỹadáxanaqtel na' l'edáxa 'ená'am na' dóle'. Jesaa'me naqaisaua saua' siete 'me sa di'ỹo't 'me chiỹoqo'oto ñi' Dios. 6Jidi'me nalótee'ga jaso' s'ónaxaqui nataq'en 'uo jaso' 'ená'am jan' huaxai ỹátaqta ỹ'aqáñi jen' lé'ec qataxa chíchiiñi.
Naua' lail jaso' s'ónaxaqui, qana'chi huet'alo saua' cuatro síiỹac 'me nec'alétraiỹi. Jesaa'me ỹátaqta saqachiilo naua' lose' jan' l'aitepi. 7So' 'uáichiiñi saua' síiỹac, jeso'me 'ená'am jen' sáuaxaic pólio'. So' laqáỹa qaamaxa 'ená'am jen' huaca. So' laqáỹa qaamaxa 'ená'am na' siỹaxaua so' latáxasoxoc. Qataxa so' p'áteegue qaa'le 'ená'am na' huedélcaic da' huaỹótac. 8Saua' cuatro síiỹac, ñi' 'oonolec huo'oi naua' seis naua' láua'. Jen' p'áiỹi jana' laua qaa'le d'aichiilo jan' l'aitepi, qataxa na' p'áuo. Jesaa'me na'chi quete'dot di' nolo' qataxa di' pí'ỹaq da' 'éete':
'Am 'me ỹátaqta 'am ỹoqovíta,
'am qadasoxola' Dios 'me qaỹa 'te 'auqalánaac,
'am 'me na'chi 'eeta't da' 'am 'uo,
qataxa na'chi'am 'au'onataxáatac naỹi, qataxa 'auanat'aquéna.
9Naale da' saua' síiỹac da' ỹi'ỹoxodéetrac qataxa ỹanoto da' netónaxa'j jeso'me nes'óotanỹi jaso' s'ónaxaqui 'me qaỹa 'te loiquiaqa' da' l'óiỹaxac, 10qana'chi jeso' veinticuatro nasoxonecpi ỹisóctrañi naua' liliictel da' ỹi'ỹoxode'n jeso'me qaỹa 'te loiquiaqa' da' l'óiỹaxac. Qana'chi naqa't naua' naxa'dol da' ỹacho'to jaso' nes'ónaxaqui. Ỹim, qana'chi 'eet'oi:
11'Am qadasoxola' Dios, 'asa'aguet da' 'am qoỹanot
da' 'adi'ỹoxodic, 'ad'amaqchic, qataxa da' 'ad'añaxac;
qá'a na'chi'am 'ad'onatac ỹimaquéna,
mai'chi 'am chiỹaqaỹi,
chan'eesa di'ỹoq ỹima jen'me.
Currently Selected:
Apocalipsis 4: PLGNT93
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.