Apocalipsis 3
3
Da' n'aqtac 'me qoỹamaxa so' néta'ña di' Sardis
1Nataq'en 'auamaxa qomle jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Sardis. 'Auétojo' qomle: “D'aqtaxan jen' lasóqot'a so' siete sa di'ỹoq 'me chiỹoqo'ot ñi' Dios qataxa saua' siete huaqchiñi, 'eet'oi da' l'aqtac: Jaỹim saỹáten ỹima jen' 'au'étetacpi, qataxa saỹáten da' 'am 'adeleu, temaqaidi da' 'uo da' 'an'aqtaguec da' 'am 'adec'alétaiỹi. 2'Anlóỹi qomle, qana'chi 'au'añaqtet da'me maliaxa 'uo 'ad'onataxanaxac 'me ma'le sétaaque da' ỹim. Qá'a jaỹim selótapega da' sa nala'a't da' 'ad'onataxanaxac da' ỹic'atéetac ñi' ỹit'a Dios. 3'Aueenata qomle da' napaxaguenataxanaxac 'me 'auaconguet joca'li. Naqaida 'oquegue, qataxa 'oca'ai naua' 'adoico. Da' sa 'te 'adatom, qana'chi 'am sec'áta qomle, qaláxasa sadénaxat ga' cacháxaic 'me sa 'te da' qoỹaỹáten ga' lalóqo' da' nóvi'. 4Qaláxasa 'uo na' siỹaxadipi 'me néta'ña na' Sardis sa 'te da' ỹisepaxanaqte't naua' louo. Jen'me jaỹim huet'asop qomle, ỹáatrañi gaua' pagaxaiqa louo, qá'a naqaida tasa'aguet. 5Jega'me dauégaxan qomle, qana'chi qoỹanaiỹilo gaua' neuo pagaxaiqa. Qana'chi sa 'te da' sapalaxat ga' lenaxat da' qoỹidéta'uo jaga' nedáxalate jen' nec'aléegue. Qataxa s'axáte'uo ñi' ỹit'a qataxa na' lamaxasec piỹem lé'ecpi. 6Ga' ỹaỹáten da' naquiáxanaxac, qaa'le n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi.”
Da' n'aqtac 'me qoỹamaxa so' néta'ña di' Filadelfia
7Nataq'en 'auamaxa jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Filadelfia. 'Auétojo' qomle: “D'aqtaxan jen' ỹátaqta ỹoqovíta qataxa 'eesa, jen' huet'ot jan' livínaqte ga' l'emec so' net'a David, jen'me da' ỹ'ouáteuo ga' som qaa'le qaỹa 'te ỹañoxot da' 'uo ga' ỹapadínỹi, qataxa da' ỹapadínỹi ga' som qaa'le qaỹa 'te ỹañoxot da' ỹ'ouáteuo, 'eet'oi da' l'aqtac: 8Jaỹim saỹáten ỹima jen' 'au'étetacpi. Jaỹim 'am sanem ñi' sega'me som n'ouátetaiỹi 'me qaỹa 'te ga' ỹañoxot da' ỹapadínỹi. Qá'a temaqaidi da' sa 'eesa'me da' 'ad'añaxac, qaláxasa 'aualaxalégue da' ỹ'aqtac, qataxa sa 'te da' jaỹim 'anpecoxolégue. 9Chan'eesa jaỹim s'étec qomle da' ỹisocoto naua' liliictel da' 'onéta jen'me quétapegue' so' qadó'o Satanás, jen'me pecaicpi 'me 'enapeela't judío lé'ecpi qaláxasa sa 'eesa, da' qaidi jen'me ỹaỹáten da' jaỹim ỹátaqta 'am sauotec. 10Qá'a 'am ỹátaqta 'aué'et da' ỹ'aqtac da' ỹátaqta 'aneuálaxain. Chan'eesa jaỹim 'am ñiquepaxatetalégue qomle ỹivíta ga' lalóqo' ga' napiináanataxanaxac 'me naguelégue ỹima, da' qoỹapiỹen ỹima jen' netalégue jen' 'aléua. 11Jaỹim sa ñiỹáloxoden da' ñanac. Chan'eesa 'aviỹamaxatétac qomle jega'me 'am huet'ot, qaidi sa 'te da' 'uo ga' ỹacona ga' 'adaso'vi. 12Jega'me dauégaxan qomle, qana'chi jaỹim sanaỹi da' sega'me sotenaxa 'me ỹisóiñi jega' tamnaxaqui lalémaxaset ñi' ỹit'a Dios, qana'chi jega'me sa 'te da' nauá'ne' da' p'átaiỹi. Qana'chi jega'me sedelégue da' lenaxat ñi' ỹit'a Dios qataxa ga' lenaxat ga' l'acháqa' jiñi'me, ga' dálaxaic Jerusalén 'me chiỹoqo'ot di' piỹem, chiỹoqo'ot ñi' ỹit'a Dios. Nataq'en sedelégue jega'me dauégaxanpi ga' dálaxaic ỹenaxat. 13Jega'me ỹaỹáten da' naquiáxanaxac, n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi.”
Da' n'aqtac 'me qoỹamaxa so' néta'ña di' Laodicea
14Qataxa nataq'en 'auamaxa qomle jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Laodicea. 'Auétojo' qomle: “D'aqtaxan jen'me ỹátaqta 'eesa, jen' sa 'te napacalégue ga' l'aqtac, jen' chiỹaqaỹi ỹima jen' ỹí'etpi joca'li ñi' Dios. 'Eet'oi da' l'aqtac: 15Jaỹim saỹáten ỹima jen' 'au'étetacpi. Qataxa saỹáten da' sa 'am 'te dapiágaxata, qataxa sa 'am 'te p'e. ¡'Ónaxaic toqo' da' 'chi 'am dapiágaxata, 'uootaxa da' 'am p'e! 16Qaláxasa sa 'te da' 'chi 'am p'étac. Chan'eesa qaa'le 'am sanolec, qá'a sa 'am 'te dapiágaxata qataxa sa 'te da' 'am p'e. 17Qá'a 'auenapeela't da' 'am saliaxanec qataxa ỹátaqta 'aviỹamqáchiiñi, qaỹa 'te ga' 'auéetaaque. Qaláxasa sa 'te 'aulá'a da' 'am ỹátaqta qaỹa ga' 'adama'. 'Am choxodaicolec, qaỹa 'te 'ansáaque, 'am qanam, qataxa 'am saléuaic. 18Chan'eesa naỹi 'am saqáta da' jaỹim 'auachiỹoxot'ot qomle da' 'aneuodéna ga' nedot'a't oro 'me nec'oic laicaua, da' qaidi ỹátaqta 'am saliaxanec, qataxa da' 'aneuodenalo gaua' 'adeuo pagaxaiqa, qaidi huapolégue da' 'adesaléuaxa 'me ỹí'et da' 'am qonpecoxolégue, qataxa da' 'aneuodéna ga' lata' naua' 'ad'ai'te, da' qaidi 'anauáachiiñi. 19Qá'a jaỹim ỹátaqta sevídaxat'ot, qataxa siỹamaxachiñi ga' lasouaxac jega'me ỹátaqta sauotec. Chan'eesa 'an'añaxato' qomle, qataxa 'auaxadíñi naua' 'adoico. 20Péga, jaỹim souetaa'uet jen' som, siỹáxatac. Da' 'uo ga' demachíỹa da' ỹiỹáxanaxac, da' 'uootaxa jaỹim ỹ'ouateguet, qana'chi jaỹim senoxonóoue ga' l'emec. Ỹim, qana'chi qo'mi niqui'ỹáxa'u. 21Jega'me dauégaxan qomle, qana'chi jega'me sanem da' 'uo jaga' nes'ónaxaqui ga' ñis'ónaqa' da' jaỹim net'a, da' qaidi 'ená'am ca'li jaỹim da' sauégaxan, qana'chi sonéta'ñi' ñi' ỹit'a Dios. 22Jega'me ỹaỹáten da' naquiáxanaxac, qaa'le n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi.”
Currently Selected:
Apocalipsis 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.