Apocalipsis 2
2
Da'me n'aqtac 'me qoỹamaxa so' 'amaqténataxanaxaicpi 'me netañalo saua' siete noiqa: Da' n'aqtac 'me qoỹamaxa so' néta'ña di' Efeso
1'Auamaxa qomle jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Efeso. 'Auet'oi qomle: “D'aqtaxan na' siỹaxaua 'me huetanỹilo na' louaq laiñi jana' siete huaqchiñi qataxa huétanỹi na' laiñi jana' siete coỹadáxanaqte 'me chiỹaqaỹi jan' oro, 'eetojo' da' l'aqtac: 2Jaỹim saỹáten ỹima jen' 'au'étetacpi, qataxa saỹáten da' let'ádaic 'ad'onataxanaxac qataxa da' 'aneuálaxainaxac. Qataxa saỹáten da' 'am sa 'te 'auseteguet da' lasoxoc jen' 'itaxalóxoicpi. Qataxa jaỹim saỹáten da' 'am ỹátaqta 'av'iỹen jen' 'éetapega da' lamaxa'spi so' Jesús, qaláxasa sa 'eesa. 'Am qaa'le 'aulalégue jen'me da' 'chi qovínaxanaxaicpi. 3'Uo da' 'aneuálaxainaxac qataxa da' 'an'queténaxac, qataxa jalcote da' 'ad'onataxanaxac ỹasouaxat jaỹim, qaláxasa sa 'te da' 'adiliiñi. 4Qaláxasa jaỹim 'uo da' sa siỹamaxaden da' 'onéta, 'eet'oi: Sa natenguet jeso' 'uáichiiñi 'adasoxoc da' 'adauochidíỹaxac. 5Chan'eesa 'aueenategue qomle so' huá'ña da' 'am 'auanachiñi. Ỹim, qaa'le 'auadálaxat ga' 'adasoxoc, qana'chi 'aué'et jeso'me 'uáichiiñi ca'li da' 'au'étetac. Péga, qomle sa huaỹáloq da' 'am sec'áta, qana'chi seuootáxanec jañi' 'adecoỹadáxanaqte. Qaláxasa qomle 'auadálaxat da' 'adasoxoc, qana'chi sa 'te da' seuootáxanec. 6Qaláxasa 'uo da' ỹiỹamaxadénataxanaxac da' 'onéta. Qá'a ỹátaqta 'aniquiỹá'a jen'me ỹ'étetacpi jen'me quétapegue' da' lapaxaguenataxanaxac so' Nicolás, 'me nataq'en jaỹim ỹiquiỹáxat. 7Jega'me ỹaỹáten da' naquiáxanaxac, n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi, 'eet'oi: Jega'me dauégaxan qomle, jaỹim sanem da' ỹalic jen' jala jada' 'ipaq 'me chiỹaqaỹi da' nec'alaxa 'me níchiinỹi laiñi di' lanaxanqa' ñi' Dios.”
Da' n'aqtac 'me qoỹamaxa so' néta'ña di' Esmirna
8Nataq'en 'auamaxa jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Esmirna. 'Auétojo' qomle: “D'aqtaxan na' 'uáichiiñi joca'li da' chi'ena 'uo qataxa p'áteegue, jen'me qoỹalaat ca'li, qaláxasa ỹitaxa nec'aléegue, 'eet'oi da' l'aqtac: 9Jaỹim saỹáten ỹima jen' 'au'étetacpi qataxa ỹima 'an'queténaxacpi qataxa da' 'adachoxodec, temaqaidi da' ỹátaqta 'am saliaxanec. Qataxa saỹáten da' ỹátaqta sa n'oi'n naua' letaxaỹaxaco da' 'am detaxaỹá'a jen' 'enapeela't da' judiopi, qaláxasa sa 'eesa. Na'chidáta da' jen'me ỹ'amaqtéetac so' paiỹac qadó'o Satanás. 10Sa 'te qomle da' 'au'oỹa ga' 'an'queténaxac. Qá'a so' paiỹac qadó'o 'uo qomle ga' ỹamaxáaue jañi' cointáxanaxaqui da' 'oñíita, da' qaidi ỹima da' 'oñíita qoỹa'uo ga' 'anapiinaguiquii. Qana'chi ỹátaqta 'uo ga' 'an'queténaxaquii, ỹivídaxatetreegue gaua' diez noloqo'te. Qaláxasa 'oquiit'ot da' 'adip'iỹáxaquii, cha ỹivíde'ta da' 'ami 'adelivii. Qana'chi jaỹim 'ami sanema da' n'óiỹaxac, 'ená'am jaga' 'adasiichii. 11Jega'me ỹaỹáten da' naquiáxanaxac, n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi, 'eet'oi: Jega'me dauégaxan qomle, qana'chi jega'me sa 'te da' ni'quichínỹi da' naỹaliaxa ga' niỹaqa'aguet neleuaxa.”
Da' n'aqtac 'me qoỹamaxa so' néta'ña di' Pérgamo
12Nataq'en 'auamaxa qomle jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Pérgamo. 'Auétojo' qomle: “D'aqtaxan jen' 'uo na' legaxanaxat ỹátaqta ỹaic qataxa dos naua' nedégaqa'te, 'eet'oi da' l'aqtac: 13Jaỹim ỹátaqta saỹáten ỹima jen' 'au'étetacpi, qataxa saỹáten da' 'onétanỹi jen' ỹilotalégue so' paiỹac qadó'o Satanás. Qaláxasa taqadíta 'am ỹátaqta jaỹim 'oquetelégue, ỹátaqta sa 'te 'axañi da' jaỹim 'au'amaqten, temaqaidi da' joca'li qoỹalaat so' ỹ'aqtáxanaxanec Antipas, jeso'me 'oonolec da' 'oñíita 'me huá'ña jidi'me huét'a so' Satanás. 14Qaláxasa jaỹim 'uo na' sa siỹamaxadenpi da' 'onéta. ¿Tóoqo'chi 'uo na' néta'ña na' Pérgamo da' sa 'te da' ỹaxanéegue da' lapaxaguenataxanaxac so' Balaam? Qá'a jeso'me ỹapaxaguenec josii'chi so' Balac, da' qaidi ỹadín'a so' Israel lec'óqo'tepi da' ỹalic jen' nachítaqtaxanaxat lapat 'me qoỹanot ga' niquí'i, qataxa da' táaue qa'en da' nequeséeguetaxac, da' qaidi 'uo ga' loic. 15Nataq'en 'uo na' néta'ña di'me sa 'te da' ỹaxanéegue da' lapaxaguenataxanaxac so' Nicolás 'me ỹiquiỹáxat. 16Chan'eesa 'axadíñi qomle naua' 'adoico. Péga, qomle sa ñiỹáloxoden da' 'am sec'áta, qana'chi selóỹi'ỹi' jena'me, sedó'oc jen' ỹilgaxanaxat 'me nétaaue jen' ñidégaxat. 17Chan'eesa ga' ỹaỹáten da' naquiáxanaxac, n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi, 'eet'oi: Jega'me dauégaxan qomle, jaỹim sanem da' ỹalic ga' nalic sa di'ỹoq 'me chiỹoqo'ot ñi' Dios, qataxa nataq'en sanem ga' qa' pagaxaic. Jega'me qa' nedetalégue ga' dálaxaic lenaxat 'me qaỹa 'te ỹaỹáten, na'chigáta jega'me ỹaconguet 'me ỹaỹáten.”
Da' n'aqtac 'me qoỹamaxa so' néta'ña di' Tiatira
18Nataq'en 'auamaxa qomle jaga' 'adidíise ñi' namaxasec piỹem lé'ec 'me ỹilotalégue na' 'amaqténataxanaxaicpi 'me néta'ña di' Tiatira. 'Auétojo' qomle: “D'aqtaxan jen' lec'óxot ñi' Dios, jen' 'ená'am na' l'edáxa ga' dóle' naua' l'ai'te, qataxa naua' lichil 'ena'ama jen' qoỹaqasélgaxat laicaua lai lenaxat bronce, 'eet'oi da' l'aqtac: 19Jaỹim saỹáten ỹima jen' 'au'étetacpi, qataxa saateton da' 'adauo'chi, qataxa da' 'adip'iỹáxac, 'ad'onataxanaxac, qataxa da' 'aneuálaxainaxac. Qataxa saỹáten da' ỹátaqta ỹágueegue naỹi da' 'ad'onataxanaxac, sa 'ená'am so' 'uáichiiñi. 20Qaláxasa 'uo da' sa siỹamaxaden da' 'onéta. Qá'a 'am ỹátaqta 'anaseet'eguet jañi' ỹauo lenaxat Jezabel 'me 'éetapega da' l'aqtáxanaxana ñi' Dios. Qaláxasa dójo' lapaxaguenataxanaxac ỹisómaxanaac na' ỹamaxa'spi da' ỹauec'aguet da' nequeséeguetaxa qataxa da' ỹiqui'ỹáxanec jen' nachítaqtaxanaxat lapat 'me qoỹanot na' niqui'ipi. 21Jaỹim sóxote sanem da' ledáqa' jañi'me, qaidi ỹaxadíñi naua' loico. Qalqaiga sa ỹaxadíñi, qataxa sa 'te da' ỹaxañi da' lequeséeguetaxa. 22Chan'eesa naỹi da' sa 'te da' ỹaxanéegue jen'me siỹaxadipi jeda'me ỹ'étetac jañi'me, qana'chi sen leuaxai qomle jañi'me, qaidi nenáatañi, qaidi ỹátaqta 'uo da' ne'queténaxac jen' lequeséeguetaxau'pi jañi'me. 23Qataxa salaat qomle ỹima jen' lec'óqo'tepi, qaidi ỹima na' 'amaqténataxanaxaicpi ỹaỹáten da' jaỹim 'eesa da' saỹáten jega'me sa di'ỹoq neenataxac qataxa jan' niquidiaqtepi. Qataxa ñi' 'oonolec da' 'oñíita seseetenguet jega'me náỹi ga' ỹ'étetac. 24Qaláxasa 'ami 'me 'oñíita'ña na' Tiatira 'me sa 'te da' 'oquíỹiỹi dójo' napaxaguenataxanaxac qataxa sa 'te da' 'avídi'ỹa da' 'auaatetoñii jeda'me qoỹíitapega sa di'ỹoq lasoxoc so' qadó'o Satanás, jaỹim 'ami senapegalo da' sa 'te da' ỹitaxa sa'uo ga' laqáỹa 'ami sachalóo'te. 25Qaláxasa 'aviỹamaxachíit'ec qomle jeda'me sóxote 'ami huet'oto, cha ỹivíde'ta ga' nolo' qomle ñ'iỹílaq. 26Jega'me dauégaxan, qataxa ỹivídaxat'a ga' loiquiaqa'éna da' ỹ'étetac jega'me siỹamaxaden, jega'me sanem da' ỹamaqaac jen' ỹodapecachi siỹaxadipi, 27da' qaidi 'ená'am da' 'éeta ñi' ỹit'a Dios da' jaỹim ỹanem da' samaxasóxonaac. Qana'chi jega'me ỹilo'ogue jen' ỹodapecachi siỹaxadipi, ỹauót'ai ga' nepon laicaua. Qana'chi ỹoláxachiỹi na' siỹaxadipi, 'ená'am qa'en jaga' jáco'na 'aléua da' qoỹoláxachiỹi. 28Qataxa sanem nataq'en jaga' huaqchiñi 'me ní'chise. 29Jega'me ỹaỹáten da' naquiáxanaxac, n'óota da' naquiáxana da' l'aqtac so' Espíritu Santo da' 'enapéga na' 'amaqténataxanaxaicpi.”
Currently Selected:
Apocalipsis 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
