Apocalipsis 1

Da' naq'áita da' leuoqtaxanaxac so' Jesucristo

1Naqaida da' 'éeta da' neuoqtaxanaxac 'me ỹanem ñi' Dios so' Jesucristo, da' qaidi jeso'me ỹaỹátenaxanaxanec na' lamaxa'spi da' sa huaỹáloq da' di'ỹoq. Qana'chi so' Jesucristo ỹachiỹoxotaỹi so' lamaxasec piỹem lé'ec da' ỹaỹátenaxanaxan so' lamaxasec Juan. 2Chan'eesa jeso'me ỹátaqta 'eesa dójo' l'aqtaxanaxac ỹima jen'me ỹauáachiỹi, da' ỹátaqta 'eesa da' l'aqtacpi ñi' Dios 'me qo'mi neda'alo so' Jesucristo.

3Ỹátaqta mátac qomle ga' ỹitaxaỹaxan jánjo' nede, qataxa mátac nataq'en ga' naquiáxatapega qomle qoỹitaxaỹaxan dójo' n'aqtaxanaxac 'me chiỹoqo'ot ñi' Dios, qataxa da' ỹátaqta ỹalaxaguet dójo' qoỹidetalégue jánjo' nede, qá'a ma'le sa qaỹáaque ga' lalóqo' da' di'ỹoq ỹima jen'me.

So' Juan ỹamaxa jaso' lidíise saua' siete noiqa 'me netalóo'te so' 'amaqténataxanaxaicpi

4Jaỹim Juan, samaxalo jana' ỹidíise naua' siete noiqa 'me netalóo'te na' 'amaqténataxanaxaicpi 'me nétaaue di' 'aléua Asia. 'Ami ỹaqáỹa', jaỹim sétaaque da' 'ami 'auacoñiiỹet da' nichoxodénataxanaxac qataxa da' nelagaxadic 'me chiỹoqo'ot ñi' Dios 'me na'chi 'eeta't da' 'uo, qataxa d'onataxáatac naỹi, qataxa naỹa'quéna. Qataxa nataq'en chiỹoqodo'ot naua' siete sa di'ỹo't 'me dasótra'uo ga' nes'ónaqa' jiñi'me da' lamaxa's. 5Qataxa chiỹoqo'ot so' Jesucristo 'me ỹátaqta ỹipaquetelóo'te naua' l'aqtaqa ñi' Dios, qataxa naqaiso so' 'uáichiiñi da' ỹitaxa qonec'alaxatéegue qoỹachiỹoxotáaue da' neleuaxa, qataxa naqaiso so' lasoxola' jen' net'alpi 'me huetalégue jen' 'aléua. Jeso'me ỹátaqta qo'mi ỹauoteque, qataxa ỹiỹo jen' qadoicpi, diỹoxonalo naua' letauo', 6qataxa qo'mi ỹanaỹilo da' qo'mi net'al qataxa da' qo'mi letaxaỹáxanaxanqa jen' siỹaxadipi da' qaidi s'onataxanqot jiñi'me let'a Dios. ¡Jeso'me na'chi 'eeta't qomle da' li'ỹoxodic qataxa da' l'añaxac! Já'a, na'chi naq'áita dójo'.

7¡Ỹa 'auloi'ỹaguet, na' Cristo naquétaaue na' ló'oc! Ỹima qomle da' qoỹila'aguet, ỹivid'alo qomle jenaa'me ỹi'quemaqte't jeso'me ỹañoxo't da' ỹilod'aguet. Ỹima qomle jen' ỹodapecachi siỹaxadipi 'me huetalégue jen' 'aléua ỹátaqta noỹíitaỹi qomle qoỹila'aguet. Já'a, na'chi naq'áita dójo'.

8Ñi' qadasoxola' Dios 'enaaco': “Jaỹim 'me na'chaỹim 'me se'uáichiiñi qataxa na'chaỹim sep'áteegue, sená'am ga' 'uáichiiñi jen' leetrapi qataxa jega' p'áteegue.” Naqaida da' 'enaac jiñi'me qaỹa 'te ga' ỹaqalánaac, jiñi'me na'chi 'eeta't da' 'uo, qataxa jiñi'me d'onataxáatac naỹi, qataxa naỹa'quéna.

Da' nec'atenaguec da' li'ỹoxodic so' Cristo

9Jaỹim Juan 'me mai'chi jaỹim 'adaqaỹai qataxa 'ami sena'ama da' 'uo da' ñi'queténaxac qataxa da' s'axátetac da' l'onataxanaxac da' net'a jiñi'me Dios qataxa da' 'uo da' ñiuálaxainaxac 'me chiỹoqo'ot so' Jesucristo. Jaỹim qoỹicoñideta't ca'li, sonetalégue jan' nepe lenaxat Patmos, ỹasouaxat da' jaỹim s'axátetac da' l'aqtac ñi' Dios 'me qo'mi neda'alo so' Jesucristo. 10Qana'chi souétaaue so' nolo' 'me lalóxoqui da' qoỹi'ỹoxoden so' qadesaliaxanec, joca'li jaỹim nivíta da' sáatañi da' l'añaxac so' Espíritu Santo. Qana'chi semachíỹa ca'li so' sa lec'óxotolec naviliỹáxac chimaqpeegue jen' ỹóvi', 'ená'am da' lesamaxa jan' naseede. 11Qaa'le jaỹim 'enapéga, 'eet'oi:

—Na'chaỹim 'me se'uáichiiñi qataxa na'chaỹim 'me sep'áteegue, sená'am ga' 'uáichiiñi jen' leetrapi qataxa ga' p'áteegue. 'Am 'audelégue qomle jaga' nede ỹima jen' 'auauáachiỹi. Ỹim, qana'chi 'auamaxalo qomle naua' siete noiqa 'me netalóo'te jen' 'amaqténataxanaxaicpi 'me nétaaue da' 'aléua Asia: 'me lenaqa'te Efeso, Esmirna, Pérgamo, Tiatira, Sardis, Filadelfia, qataxa di' Laodicea.

12Ỹim, qana'chi ñiselec ca'li da' sec'aten jeso'me jaỹim detaqátapega. Ca'li seloséguem, qana'chi selá'a jaso' siete coỹadáxanaqte, nedot'a't oro. 13Jeso' laiñi jesaua' siete coỹadáxanaqtel selá'a so' 'oonolec 'ená'am jen' siỹaxaua lec'óxot. Saua' louo ỹátaqta ỹivídedañi, qataxa so' lasota'la ỹidalégue jan' letógue, jeso'me chiỹaqaỹi jan' oro. 14Jen' laỹoxot ỹátaqta ỹapagaq, 'ená'am da' lapagaxa jen' n'aanaxate laỹoxot, 'uootaxa jan' loñi. Naua' l'ai'te qaa'le 'ená'am jen' l'edáxa na' dóle'. 15Naua' lichil ỹátaqta ỹaqaséle'j, 'ená'am jen' qoỹaqasélgaxat laicaua lai lenaxat bronce 'me qoỹasaxánỹi na' dóle'. Da' laviliỹáxac 'ená'am da' lesamaxa jen' lepáxa jaso' huaxai. 16Jen' louaq 'me ỹaỹáten huetaavlo saua' siete huaqchiñi. Na' nedégaxat nétaaue so' legaxanaxat ỹátaqta ỹaic, dos naua' nedégaqa'te. Jen' latáxasoxoc ỹátaqta 'ená'am jañi' c'atena da' ỹivíta da' 'edánỹi.

17Ca'li selá'a, qana'chi soua'ndi, sega'me ỹátaqchiiñi da' seleu. Qaláxasa jeso'me jaỹim ỹachalégue so' ỹaỹáten louaq da' jaỹim ỹipotelégue. Qana'chi jaỹim 'enapéga, 'eet'oi:

—Sa 'te qomle da' 'auó'e. Jaỹim 'me na'chaỹim se'uáichiiñi, qataxa jaỹim 'me na'chaỹim sep'áteegue. 18Jaỹim 'me na'chi 'eeta't ñic'alétaiỹi. Jaỹim ca'li seleu, qaláxasa naỹi ỹitaxa ñic'aléegue, qana'chi sa ỹitaxa seleu. Naỹi jaỹim huet'ot da' l'añaxac da' neleuaxa qataxa jega'me lapónaqa' jen' napa'lpi. 19'Audíñi qomle ỹima jen'me 'auauáachiỹi, qataxa ỹima jen'me naỹi di'ỹoq, qataxa jega'me maliaxa taỹá'a da' di'ỹoq. 20Naqaida da'me sa di'ỹoq naquétaaue jaso'me siete huaqchiñi 'me 'auauáachiỹi da' huétaỹi jen' ỹouaq qataxa jaso'me siete coỹadáxanaqte 'me chiỹaqaỹi jan' oro, 'eet'oi: jaso'me siete huaqchiñi náỹi ñi' 'oonolec jen' namaxasec piỹem lé'ecpi 'me ỹilot'ague na' 'amaqténataxanaxaicpi 'me netalóo'te naua' siete 'ale'u. Qataxa jaso' siete coỹadáxanaqte náỹi na' 'amaqténataxanaxaicpi netalóo'te saua' siete 'ale'u.

Currently Selected:

Apocalipsis 1: PLGNT93

Highlight

Copy