Judas 1

So' Judas ỹamaxa jaso' lidíise jeso'me liỹáxañiisecpi ñi' Dios

1Jaỹim 'me ỹenaxat Judas, jaỹim lelatac so' Jesucristo, qataxa jaỹim lanoqolec so' Jacobo. Jaỹim sedelégue jan' ỹidíise da' samaxa jena'me liỹáxañiisecpi ñi' qadet'a Dios da' ỹiỹotái'ỹa da' 'en lalémaxasetpi. Jen'me ỹátaqta qonetelá'a, ỹasouaxat da' ỹoqotéta'uo so' Jesucristo. 2Jaỹim sétaaque da' 'ami 'auacoñiiỹet jeda'me sa nalóta nichoxodénataxanaxac, qataxa n'emáxac, qataxa nauochidíỹaxac.

Jen' dapaxaguenataxáatapeec da' sa 'eesa lasoxoc

(2 Pedro 2.1-17)

3'Ami ñauotaxa'u ỹaqáỹa', jaỹim 'uo da' let'ádaic ỹidiáxa da' sidíñi da' ladíquiaxac da' nec'alaxa 'me sóxote ỹima qo'mi huetaavlo da' 'ami samaxalo. Qaláxasa naỹi selá'a da' ỹiuen da' sidíñi da' 'ami ñachoxodenoovlo da' na'chi 'eeta't da' 'aulóiquiitapeelégue qomle da' qad'amaqténataxanaxac 'me sóxote ỹim da' qoỹanem ỹima na' lalémaxasetpi ñi' Dios. 4Qá'a 'uo na' siỹaxadipi ỹinoxótaaue da' loqovínaxanaxac da' 'ami taavlo. Jena'me chi'ena joca'li da' ỹ'axa't naua' nidii's l'aqtaqa ñi'me Dios da' taỹá'a da' lepagaxat ne'uaxánaguec. Jen' siỹaxadipi ỹátaqta 'itaxalóxoicpi, qá'a ỹaconguet da' lichoxodénataxanaxac ñi' qadet'a Dios da' 'chi daỹáquitaỹi da' ỹ'e't naua' loico da' lapáchiỹaxac, qataxa noqolgué'te' ñi' Dios jiñi'me qo'mi lalémaxase'te qataxa so' qadesaliaxanec Jesucristo.

5Temaqaidi da' 'ami 'me sóxote da' 'auaỹáchiñii dójo', qaláxasa na'chi 'ená'am jaỹim sétaaque da' 'ami séenataxanaxanque da' 'éeta ñi' qadasoxola' Dios da' temaqaidi da' naqatéegue joca'li chiỹoxotáaue di' Egipto so' lec'óqo'tepi so' Israel, qaláxasa joca'li qaỹat'ague, qana'chi ỹileu qa'en jeso'me sa 'te d'amaqténataxan so' siỹaxadipi. 6Qataxa jeso'me lamaxa'spi piỹem lé'ecpi ñi' Dios 'me sa ỹiỹamaxategue joca'li da' l'onataxanaxac, na'chidáta da' cá'ai ga' lalémaxaset l'acháqa', qana'chi ñi' Dios qaỹa 'te loiquiaqa' qa'en da' ỹicoñida'aguet jen' l'álaxa jeso'me, da' ỹiuatet'aguet qa'en ga' p'áteegue nolo' qomle nimit ỹimaquéna. 7Nataq'en so' siỹaxadipi l'acháqa' di' Sodoma qataxa Gomorra, qataxa jeso'me leseecpi 'me 'ená'am jeso'me namaxa'spi piỹem lé'ecpi da' nañanguet da' lequeséeguetaxa, qataxa táaue da' namanaxanaxa 'me sa natenguet da' ỹátaqta lasoxoc ga' siỹaxaua, qana'chi ỹima jeso'me ni'quichínỹi so' dóle' let'ádaic 'me qaỹa 'te loiquiaqa' joca'li qoỹa'uo da' ne'uaxánaguec. Jeda'me 'ená'am da' naqátaxac ỹima na' siỹaxadipi.

8Qaláxasa na'chi 'ená'am sa 'te ỹaqalan dójo' jen'me siỹaxadipi. Jen'me quétapee'to naua' lichoxonaxaco, chan'eesa ỹisepaxanaqtet da' ló'oquiaxac, qataxa sa ỹaconguet da' lamaxasóxonaxac ñi' qadasoxola' Dios, qataxa ỹisouéetac jen'me namaxa'spi piỹem lé'ecpi. 9Qamaale so' lasoxola' jen' namaxa'spi piỹem lé'ecpi, lenaxat Miguel, joca'li delóictapegue' so' paiỹac qadó'o, joca'li nec'óotapegue' jeso'me ỹasouaxat so' ló'oc so' Moisés. Qaláxasa sa 'te da' 'uootaxa ỹi'uaxanque naua' l'aqtaqa. Na'chidáta da' 'eet'oi: “Ñi' qadasoxola' Dios 'am nelaxa qomle.” 10Qaláxasa jénjo' siỹaxadipi ỹátaqta sa n'oi'n naua' l'aqtaqa da' detaxaỹá'a jega'me sa 'te ỹaateton. Qamaale jen'me lasoxocpi 'me 'chi ỹachiỹoxotáaue da' lec'atenaxanaxac da' ỹaateton, qaláxasa 'ená'am da' laatetonaxanaxac ga' síiỹac 'me qaỹa 'te ỹaatetonaac, qana'chi d'onataxana, qaláxasa mai'chi ỹi'quemáxam.

11¡Ỹátaqta choxodaicpi jeso'me! Qá'a quétapegue' da' lasoxoc so' Caín, qataxa ỹasouaxat da' sétaaque da' nauec jañi' laicaua, qana'chi daséegue, 'ená'am so' Balaam. Qataxa ỹiméuo qoỹin, 'ená'am so' Coré joca'li qoỹalaat, ỹasouaxat da' nep'aguénaxac. 12Na' siỹaxadipi ỹátaqta ỹí'et da' nepecóxo da' ỹalegóoue jen' 'adiqui'ỹáxaquii da' ñi' 'oonolec da' 'oñíita neuán'ai ga' laqáỹa. Qana'chi jen'me huétauo da' de'quétac qataxa niỹómtac, ỹátaqta mátac qataxa ỹátaqta qaỹa 'te ga' lepecóxo. Jen'me 'ená'am ga' nasoxola' da' mai'chi netelela't, qataxa 'ená'am ga' ló'oc 'me sa chiỹaqaỹi ga' huétep, 'chi ỹachítac jen' laỹat, qataxa 'ená'am jaga' 'epaq 'me qaga 'te jala da' ỹivíta ga' lalóqo', ỹátaqta qaqáta da' ỹivíta da' qonaqat. 13Qataxa jen'me 'ená'am jen' let'ádaic lepáxa jen' noxop 'me mai'chi nemálaxaseguem jan' qaỹa 'te ga' lodiac l'alii. Qataxa jen'me 'ená'am jan' huaqchiñipi 'me cá'ai ga' ỹátaqta ladic, qana'chi qoỹi'uaxánec da' quétapegue' jen'me n'álaxa 'me qaỹa 'te loiquiaqa'.

14Nataq'en so' Enoc jeso'me huétaaue so' p'áteegue da' siete noqochic jen' laual jen' lec'oqtepi so' Adán, jeso'me ỹ'axát'a jen'me siỹaxadipi joca'li ỹ'aqtaxanaxan ñi' Dios, 'enaac: “Jaỹim sauaat'eguet ñi' qadesaliaxanec náictapegue' jeso'me sa lec'óxotolec jen' lalémaxasetpi, 15da' qaidi nimit ỹima jen' siỹaxadipi, qataxa da' ỹa'uo da' ne'uaxánaguec jen'me 'itaxalóxoicpi, ỹasouaxat ỹima jen'me sa nó'inpi 'me chiỹaqaỹi jen'me, qataxa ỹasouaxat jen' sa nó'in l'aqtacpi jénjo' 'itaxalóxoicpi 'me sa ỹodiáquenaac da' detaxaỹá'a jiñi'me.” 16Jen'me taxaỹaxaicpi qataxa quetapeelégue ga' laqáỹa. Na'chidáta da' nimitá'i da' mai'chi loqopi'chi. Qataxa naua' l'aqtaqa ỹátaqta ỹ'oxodénaxaiqa. Qataxa da' detaxaỹá'a ga' laqáỹa siỹaxaua, qaa'le ỹátaqta ỹodiáqueetac, qá'a 'chi naquitét'a.

Qouaqátetapega na' 'amaqténataxanaxaicpi

17Qaláxasa 'ami ñauotaxa'u ỹaqai'ỹolqa, 'aueenachíỹa da' chi'ena ca'li saua' lamaxa's so' qadesaliaxanec Jesucristo, 18da' ỹ'axátetrac dójo', 'eet'oi: “Gaua' p'átreegue noloqo'te, da' 'uo qomle na' siỹaxadipi 'me ỹátaqta ỹi'uena't da' n'amaqténataxanaxac, qataxa 'chi quétaaue jen'me mai'chi 'éetapeecpi 'me sa nó'in.” 19Naqáina jen'me ỹí'et da' ỹodapecachi qa'en na' siỹaxadipi, qá'a ỹalaxaguet da' 'éetapeec da' lapáchiỹaxac. Qataxa jen'me sa 'te da' néta'nỹet so' lepaqal ñi' Dios.

20Qaláxasa 'ami ñauotaxa'u ỹaqáỹa', ỹátaqta 'aviỹamaxachíitac qomle jeda'me ỹoqovíta 'ad'amaqténataxanaxaquii. Qataxa da' 'antamñii, qaa'le naqaida da' l'añaxac so' Espíritu Santo. 21Qataxa sa 'te qomle da' 'axañíiñi da' lauo'chi ñi'me Dios. Qataxa 'auachiỹa'aguet ga' p'áteegue nolo' qomle so' qadesaliaxanec Jesucristo ỹachiỹoxotaỹi da' lichoxodénataxanaxac da' qo'mi ỹanema ga' nec'alaxa 'me qaỹa 'te ga' loiquiaqa'.

22Qataxa jega'me 'uo da' loqolguétaxanaxac, qaa'le ỹátaqta 'au'aqtaxañíit'em. 23Jega'me 'anec'alaxachiỹi'isop ga' dóle'. Qataxa nataq'en 'avichoxodíñii jega'me laỹi, qaláxasa ỹátaqta 'auqaiquiỹa'agueta naua' louo 'me nataq'en ỹividaỹilo da' sa nó'in n'onataguec jen'me.

Da' p'áteegue ni'ỹoxodénataxanaxac

24-25Ñi' qadet'a Dios 'me qaỹa 'te ga' laqáỹa qataxa ỹátaqta ỹátenaxanaxaic, qataxa qadec'alaxaqui, jiñi'me ỹátaqta 'uañaxaic da' 'ami netelalo, da' qaidi sa 'ovíỹañi, qataxa da' qaidi 'ami nichaalataxana'ualo jega'me huét'a 'me qaỹa 'te ga' 'ená'am da' li'ỹoxodic, qaláxasa ỹátaqta 'ami ỹoqovíte' qataxa 'ami madet'ape. Jiñi'me na'chi 'eeta't qomle da' ni'ỹoxodénataguec, qataxa da' l'amaqchic, qataxa da' l'añaxac, qataxa da' 'enec, ỹasouaxat so' qadesaliaxanec Jesucristo. Jeda'me na'chi 'eeta't da' chiỹoqot'ague, qataxa naỹi, qataxa jeda'me taỹa'ague. Já'a, na'chi naq'áita dójo'.

Currently Selected:

Judas 1: PLGNT93

Highlight

Copy