Apocalipsis 7

So' n'añiisecpi so' lec'óqo'tepi so' Israel

1Ca'li ỹim dójo', qana'chi sela'alo saua' cuatro namaxa's piỹem lase', nichaatétrañi, huet'alo naua' cuatro ladico na' laỹat. Jesaa'me neláxatetrañi naua' laỹa'chi, da' qaidi sa 'te da' ỹaseedáxatelégue jen' 'aléua, qataxa jan' huaxai, qataxa jan' 'ipaq. 2Nataq'en selá'a so' 'oonolec namaxasec piỹem lé'ec chiỹoxogue da' liiséguem jaso' c'atena, qataxa lasóqot'a jaso' l'anaxanaqte ñi' Dios 'me nec'alétaiỹi. Qana'chi jeso' namaxasec ỹátaqta nesamaxaden da' 'enapegalo saua' laqáỹa' cuatro namaxa's 'me qoỹanema da' n'añaxac da' qaidi 'uo ga' n'áxat jen' 'aléua qataxa jaso' huaxai. 'Eet'oi da' l'aqtac:

3—Sa 'te qomle da' 'uo ga' 'aviñíit'ec jen' 'aléua qataxa jaso' huaxai qataxa jan' 'ipaq, dito' qomle ma'le ỹim da' s'anaq na' latap ỹima na' lamaxa'spi ñi' qadet'a Dios.

4Ỹim, qaa'le jaỹim semachíỹa so' nalót'a da' ỹóvi' na' n'añiisecpi, 'eet'oi: ciento cuarenta y cuatro mil da' ỹima'a't na' n'añiisecpi so' lec'óqo'tepi so' Israel. 5Ỹóvi' na' doce mil na' n'añiisecpi so' lec'óqo'tepi so' Judá, qataxa doce mil so' n'añiisecpi so' lec'óqo'tepi so' Rubén, qataxa doce mil so' n'añiisecpi so' lec'óqo'tepi so' Gad, 6qataxa ỹóvi' so' doce mil so' n'añiisecpi so' lec'óqo'tepi so' Aser, qataxa doce mil so' n'añiisecpi so' lec'óqo'tepi so' Neftalí, qataxa doce mil so' n'añiisecpi so' lec'óqo'tepi so' Manasés, 7qataxa ỹóvi' so' doce mil so' n'añiisecpi so' lec'óqo'tepi so' Simeón, qataxa doce mil so' n'añiisecpi so' lec'óqo'tepi so' Leví, qataxa doce mil so' n'añiisecpi so' lec'óqo'tepi so' Isacar, 8qataxa ỹóvi' doce mil so' n'añiisecpi so' lec'óqo'tepi so' Zabulón, qataxa doce mil so' n'añiisecpi so' lec'óqo'tepi so' José, qataxa doce mil so' n'añiisecpi so' lec'óqo'tepi so' Benjamín.

So' sa lec'óxotolec siỹaxadipi 'me pagaxaiqa naua' louo

9Ca'li ỹim dójo', qana'chi selá'a so' ỹodapecachi siỹaxadipi 'me ỹodapecachi na' l'aqtacpi. Jeso'me nichaatétañi, dasóta'uo so' s'ónaqa' qataxa jeso'me n'aanaxate lec'óxot. Jeso'me siỹaxadipi sa lec'óxotolec, qaỹa 'te ga' ỹañoxot da' naloqten. Jeso'me ỹima pagaxaic na' loxot, qataxa lasóqot'a jaso' chaic laua. 10Ỹima jeso'me ỹ'alqátaỹi, 'eet'oi:

Da' qadec'alaxa chiỹoqo'ot ñi' qadet'a Dios,

'me nétanỹi jañi' s'ónaxaqui da' net'a

qataxa jiñi'me n'aanaxate lec'óxot.

11Ỹima jen'me namaxa'spi piỹem lé'ecpi nichaatétañi, coleesop jaso' s'ónaxaqui, qataxa so' nasoxonecpi, qataxa saua' cuatro síiỹac. Qana'chi jeso'me siỹaxadipi ỹisóidiñi naua' liliictel ỹátaqta ỹivídaxatet'aguet naua' lata'pi jen' 'aléua. Qana'chi ỹi'ỹoxoden ñi' Dios, 12qoỹiit'oi:

¡Já'a, na'chi naq'áita dójo'!

Da' ni'ỹoxodénataxanaxac, da' ni'ỹoxodic, qataxa da' naỹátenataxanaxac, da' tónaxac,

qataxa n'amaqchic, namaxasóxonaxac, qataxa da' n'añaxac,

ỹima jeda'me qoỹanot ñi' qadet'a Dios, jeda'me qaỹa 'te ga' loiquiaqa' qoỹin.

Já'a, na'chi naq'áita dójo'.

13Qana'chi so' 'oonolec so' nasoxonecpi jaỹim ỹinat, 'enaac:

—¿Jái'chi na'me nójo' siỹaxadipi 'me pagaxaic jen' loxot? ¿Jái'chogamaxa hua'ague ga' chiỹoxogue?

14Qana'chi jaỹim seet'oi:

—Neegue't, 'am ỹasoxola', 'am 'me 'auaỹáten.

Qana'chi jeso'me 'enáacjo':

—Qá'a jen'me, naqáina na' chiỹaqáaue da' let'ádaic 'queténaxac. Naqáina jen'me ỹiỹoi' naua' louo qataxa ỹátaqta ỹapaga't qa'e'n, ỹasouaxat da' diỹoxonalo naua' letauo' ñi' n'aanaxate lec'óxot. 15Chan'eesa jen'me dasóta'uo na' nes'ónaqa' ñi' Dios, qataxa d'onataxaatapeelégue jiñi'me naua' noloqo'te qataxa naua' pi'ỹáxadi jiñi'me tamnaxaqui 'me lalémaxaset ñi' Dios. Jiñi'me nétanỹi jañi' s'ónaxaqui, jiñi'me nepelteetalégue jen'me. 16Huá'a, qana'chi sa ni'quichínỹi na' loqouáxa qataxa da' láquip lamaic. Qataxa sa 'te da' ỹavíỹaxat jañi' c'atena, qataxa sa ni'quichínỹi na' nipi'ỹaxa. 17Qá'a ñi' n'aanaxate lec'óxot 'me nétanỹi na' laiñi di' s'ónaqa', jiñi'me ỹilotalégue qomle jen'me siỹaxadipi, 'ená'am qa'en jan' lalo n'aanaxate, qataxa ỹauéguee'ga jega'me 'chi náatetaseguem noxop 'me chiỹaqaỹi da' nec'alaxa. Huá'a, qana'chi ñi' Dios ỹiỹo ỹima jan' láchi' jen' siỹaxadipi.

Currently Selected:

Apocalipsis 7: PLGNT93

Highlight

Copy