Hebreos 2
2
Sa nó'in da' sa qoỹilo'ogue da' ladic da' nec'alaxa
1Chan'eesa qo'mi qomle ỹátaqta seloqot'egue da' ladic jeda'me ñaquiáxanaqchiỹi n'aqtac, qaidi sa sesamaxataqáiỹi. 2Qá'a jeda'me n'aqtac 'me qoỹan joca'li saua' 'uáudeegue 'uóidi, chiỹoqóchiỹi qoỹin jen' namaxa'spi piỹem lé'ecpi, jeda'me qoỹaloxon da' ỹátaqta 'eesa. Chan'eesa jen'me 'uo ga' ỹasouaxat qataxa sa ỹalaq, qaláxasa ỹátaqta táchiỹi da' qoỹa'uo da' ne'uaxánaguec. 3Chan'eesa ¿tóoqo'chi da' qo'mi ỹaxa'n ga' qane'uaxánaguec da' 'uootaxa sa seloxogue ga' ladic jeda'me let'ádaic nec'alaxa? Qá'a naqaiso so' qadesaliaxanec so' huá'au da' ỹ'axat dójo' nec'alaxa, ỹim, qataxa jec jen'me naquiáxatapega jeso'me, qana'chi ỹaloxon da' ỹátaqta 'eesa dójo' n'aqtaxanaxac. Ỹim, qana'chi qo'mi d'aqtaxanema. 4Ñi'me Dios nataq'en ỹátaqta 'eesa qa'en dójo' n'aqtaxanaxac. Qá'a ỹauo'oi naua' l'anaqa, qataxa jen'me ỹí'et da' qoỹ'aalá'ac, qataxa jalcote jen'me ỹí'et jen'me sa qoỹauanápiỹi, qataxa chiỹaqaỹi qa'en so' Espíritu Santo da' jiñi'me ỹodapecachi qa'en da' 'éet'ec da' qo'mi ỹanema, qana'chi ỹipaquíchiỹi da' mai'chi 'éetapeec.
So' Jesucristo 'ená'am da' lasoxoc jen' ỹ'oqóchiỹi laỹi
5Qá'a ñi'me Dios sa 'te qomle da' ỹacho'ot qa'en ga' lamaxasóxonaxac na' lamaxa'spi piỹem lé'ecpi, jega'me dálaxaic 'aléua 'me s'axátaqtac. 6Qá'a jenaa'me nedétrañi l'aqtaqa 'uo so' ỹ'axat joca'li jeda'me 'eet'oi:
¿Jái'cho' jogamaxa ga' 'chi siỹaxaua, 'am ñitamnaxala', da' 'uootaxa 'aueenata jega'me?
Qataxa ¿jái'cho' jogamaxa ga'me siỹaxaua 'me 'uo ga' loiquiaqa' da' 'uootaxa 'aneuálaxai'ne' jega'me?
7Cada'acolec da' 'am 'auanaỹi ga' 'adamaxasec piỹem lé'ecpi da' nasoỹá'ña qa'en jen'me siỹaxadipi.
Qaláxasa 'auanaỹi da' li'ỹoxodic qataxa da' l'amaqchic,
ỹim, qana'chi 'auanem da' ỹilo'ogue ỹima jen'me 'ad'onatacpi;
8ỹima na' 'ad'onatacpi 'ená'am da' 'auacho'to naua' lapia'te jen'me.
Chan'eesa joca'li ma'le ỹim da' qoỹacho'to naua' lichil na' siỹaxadipi ỹima jen' n'onatacpi, qana'chi ñi'me Dios qaỹa ga' 'oonolec da' daqatéegue da' sa huet'ot qa'en da' lamaxasóxonaxacpi na' siỹaxadipi. Qamaale naỹi maliaxa sa selaqá'a da' 'uootaxa ỹima jen' n'onatacpi ỹátaqta ỹalaxaguet jen' siỹaxadipi. 9Qaláxasa qo'mi seloqóchiỹi so' Jesús jeso'me cadá'ac da' nasoỹá'ña qa'en ñi'me Dios jen' lamaxa'spi piỹem lé'ecpi. Qaláxasa ỹasouaxat da' lauo'chi da' qo'mi jiñi'me Dios, qana'chi ỹanéegue jeso'me, da' qaidi ỹileualégue ỹima jen' siỹaxadipi. Qana'chi naỹi jeso'me qoỹanaỹi da' li'ỹoxodic qataxa da' l'amaqchic ỹasouaxat da' ne'queténaxac da' leleuaxa.
10Qá'a ỹima jen'me huetalquéna, jen'me lalémaxaset ñi' Dios, qataxa mai'chi chiỹoqo'ot jiñi'me. Qataxa ñi' Dios sétaaque da' ỹima jen'me lec'oqtepi neuána'uo dójo' li'ỹoxodic. Chan'eesa jiñi'me naloqchíichiiñi qa'en da' lasoxoc so' Jesucristo 'me lec'alaxaqui jen'me, ỹachiỹoxotaỹi qa'en da' ne'queténaxac. 11Qá'a jen'me qoỹiỹo da' l'óiỹaxac qataxa jeso'me diỹóxotac, jenaa'me 'oonolec ñi' let'a' Dios. Chan'eesa so' lec'óxot ñi' Dios, jeso'me sa nepecoxolégue da' ỹiỹáxana jen'me da' ỹátaqta laỹi. 12Qá'a 'enapega't naua' nidii's n'aqtaqa, 'enapega'to':
S'axátem qomle jen' ỹaỹi da' 'onéta,
qataxa só'on ga' nalac da' 'am si'ỹoxoden da' souétaaue ga' lapoot'a't 'amaqténataxanaxaicpi.
13Naua' n'aqtaqa nataq'en 'eet'oi:
Jaỹim ỹátaqta sip'iỹá'a ñi' Dios.
Nataq'en 'eet'oi:
Naỹi souét'a jénjo', sonétanỹi jen' ỹalaqapi 'me jaỹim ỹanem ñi' Dios.
14Ga' nec'oqtepi 'me 'oonolec ga' chiỹaqaỹi, jega'me 'eeta't da' ló'oquiaxac qataxa naua' letauo'. Qana'chi 'ená'am nataq'en so' Jesús, jeso'me da' ló'oquiaxac qataxa naua' letauo' chiỹaqaỹilo jen' siỹaxadipi, qaidi jeso'me ỹañoxot da' ỹileu, huá'a, qana'chi noláxachiñi jeso'me huet'ot da' n'añaxac da' dalaataxan, jeso'me qadó'o paiỹac. 15Naqaida da' 'éet'ec da' ỹisóiỹi ỹima jen'me sega'me le'uaquíñiisecpi da' loqolánaxa da' neleuaxa naỹi da' ỹatemaliaxa nec'alétaiỹi. 16Qá'a ỹátaqta 'eesa jeso'me sa janac qaidi lecochiỹa jen'me namaxa'spi piỹem lé'ecpi, na'chidáta da' lecochiỹa jen' lec'oqtepi so' Abraham. 17Qana'chi naqaida tadeeto' jeso'me ỹiuen da' ỹátaqta 'ená'am qoỹin da' lasoxoc jen' laỹi, qaidi ỹivíd'a da' nepé'et qataxa choxodénataxanaxaic lasoxola' jen' netaxaỹáxanaxanecpi da' qodetaxaỹapégue' ñi' Dios, qataxa da' qaidi ỹapalaxat jen' lasouaxaset jen' siỹaxadipi, ỹachiỹoxotaỹi da' nañanguet da' nalaataguec. 18Chan'eesa naỹi jeso'me ỹañoxot da' lecochiỹa jega'me 'uo da' napiinaguec, qá'a jeso'me nataq'en 'uo joca'li da' ne'queténaxac qataxa napiinaguec.
Currently Selected:
Hebreos 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
