Hebreos 3
3
So' Jesús napacalégue da' li'ỹoxodic so' Moisés
1Chan'eesa 'ami ỹaqáỹa' 'me 'ami liquiỹáqa ñi' Dios qataxa 'ami ỹiỹaxanalo da' 'ami lalémaxase'te, 'ami ỹátaqta 'aulóichiỹi qomle so' Cristo Jesús, jeso'me qo'mi qonamaxalo qataxa qadasoxola' da' detaxaỹapégue' ñi' Dios 'me s'amaqténaqtac. 2Qá'a so' Jesús, jeso'me ỹátaqta lepé'et ñi' Dios, chan'eesa ỹanaỹi dójo' n'onataxanaxac, 'ená'am da' 'éeta so' Moisés, da' ỹátaqta nepé'et da' ỹilo'ogue ỹima so' l'emec ñi' Dios. 3Qaláxasa so' Jesús, jeso'me ỹátaqta táchiỹi da' 'uo da' li'ỹoxodic, sa 'ená'am so' Moisés. Jeso'me 'ená'am da' 'éeta ga'me ỹí'et ga' 'emec da' ỹátaqta 'uo da' ni'ỹoxodénataguec qoỹin, sa 'ená'am da' ni'ỹoxodénataguec so' 'emec. 4Ñi' 'oonolec jen'me 'emecpi 'uo ga' ỹátaqta chiỹoqóchiỹi da' ỹí'et, qaláxasa jiñi'me Dios 'me naqaiñi jiñi'me chiỹoqóchiỹi ỹima jen'me huetalquéna. 5Dójo' 'éeta so' Moisés da' namaxasec qataxa nepé'et da' ỹilo'ogue ỹima so' l'emec ñi' Dios. Qana'chi jeso'me da' l'onataxanaxac ỹ'axat jega'me sétaaque da' 'enaac ñi' Dios. 6Qaláxasa so' Cristo, jeso'me lec'óxot ñi' Dios qataxa ỹátaqta nepé'et da' ỹilo'ogue sójo' l'emec ñi' Dios, 'me na'chiqo'mi, da' ỹátaqta qo'mi sa nedámchidiñi qataxa da' qadip'iỹáxac cha ỹivíde'ta ga' qadoiquiaqa', nedóchiiñi da' ỹátaqta qo'mi máchidiñi ỹasouaxat da' qanaquitaxac.
Ga' nemataxac jen' lalémaxasetpi ñi' Dios
7Chan'eesa naua' nidii's l'aqtaqa so' Espíritu Santo 'enaaco':
Naỹi da' 'ami 'anaquiáxañiichiỹi ga' 'enaac ñi' Dios,
8qaláxasa 'ena'to' qomle da' 'au'añaxachiiỹilo naua' 'adiquidiaqtéldii',
da' 'aviñíit'em da' 'éeta joca'li jeso'me sa ỹalaq,
qana'chi ỹ'iỹen ñi' Dios joca'li hualégue so' totelégue 'aléua.
9Jeso'me huá'au 'adet'aipi hualégue jeso'me totelégue 'aléua joca'li jaỹim ỹapiỹen,
temaqaidi jeso'me ỹivi't saua' cuarenta 'uóidi da' ỹauáachiỹi jen' sé'etpi.
10Chan'eesa jaỹim salemataỹa jeso'me siỹaxadipi.
Qana'chi senapéga: “Jen'me ỹátaqta na'chi 'eeta't naale da' ỹisómtac jañi' liquidiaqte,
qataxa sa ỹaqanatet da' ỹaỹáten ga' ỹadic.”
11Chan'eesa salemataỹa jeso'me siỹaxadipi,
huá'a, qana'chi senapéga jeso'me sa ỹaqanatet qomle da' ỹinoxoneuó'o ga' ñimataqa'.
12'Ami ỹaqáỹa', ma'choqo' qomle da' 'oñíita da' 'uo ga' sa ỹiỹamaxañi da' leenataxac da' sétaaque da' cá'ai ñi'me Dios 'me na'chi 'eeta't da' nec'alétaiỹi ỹasouaxat da' sa ỹ'amaqten jiñi'me. 13Na'chidato' qomle da' ñi' 'oonolec quet'oto naua' noloqo'te da' ỹ'añaqtétac ga' laqáỹa, ỹatemaliaxa 'uo di' qadedáqa' jénjo' nolo', qaidi qaỹa ga' 'oonolec da' 'oñíita da' sega'me ỹoqovin da' n'etaxalóxo, qana'chi jañi' liquidiaqte sa ỹalaq. 14Qá'a da' ỹátaqta qo'mi sa nedámchidiñi da' qanaquitaxac 'me saconaxaguet jeso'me 'uáichiiñi, cha ỹivíde'ta ga' qadoiquiaqa', qana'chi sañoxotaq qomle da' ñiuánaqa'uo so' Cristo.
15Qá'a da' n'aqtac 'enaac:
Naỹi da' 'ami 'anaquiáxañiichiỹi ga' 'enaac ñi' Dios,
qaláxasa 'ena'to' qomle da' 'au'añaxachiiỹilo naua' 'adiquidiaqtéldii',
da' 'aviñíit'em da' 'éeta joca'li jeso'me sa ỹalaq.
16¿Jái'cho' josomaxa joca'li jeso'me sa naquiáxana da' l'aqtac ñi' Dios, qataxa da' sa ỹalaq? Naqaiso ỹima jeso'me cá'ai qa'en joca'li di' 'aléua Egipto so' Moisés. 17Qataxa ¿jái'cho' josomaxa ỹóvi' cuarenta huó'e da' dalemataỹa ñi' Dios? Naqaiso jeso'me 'uo ga' huasoilégue, qana'chi ỹima so' siỹaxadipi ỹileu joca'li hualégue so' totelégue 'aléua. 18Qataxa ¿jái'cho' josomaxa detaxaỹá'a joca'li ñi' Dios qaidi sa ỹañoxot da' ỹinoxoneuó'o ga' nemataqa' jiñi'me? Naqaiso jeso'me sa ỹalaq joca'li. 19Qana'chi qo'mi seloxolégue jeso'me siỹaxadipi da' sa ỹañoxot joca'li da' ỹinoxoneuo, ỹasouaxat da' sa d'amaqténataxan.
Currently Selected:
Hebreos 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
