Hebreos 1
1
Ñi' Dios ỹachiỹoxotaỹi so' lec'óxot da' l'aqtac
1Saua' 'uáichidiñi 'uóidi joca'li ñi' Dios jalcote da' d'aqtaxanem jeso'me huá'au qadet'alpi, qaláxasa ỹodapecachi da' 'éet'ec qa'en da' ỹ'aqtaxanaxan jeso'me l'aqtaxanaxanecpi. 2Qaláxasa náajo' p'átreegue noloqo'te, jiñi'me ỹachiỹoxotaỹi so' lec'óxot da' qo'mi d'aqtaxanema. Ñi' Dios ỹachiỹoxotaỹi joca'li jeso'me lec'óxot da' ỹí'et ỹimaquéna, qataxa naqaiso so' ỹipataxaguet da' ỹilo'ogue ỹima jen'me. 3Jeso'me naqaiso jeso'me li'ỹoxodic da' l'edáxa ñi' Dios, qataxa jeso'me naqaiso jeso'me liquí'i jiñi'me, qataxa jeso'me naqaiso jeso'me lasóqtaiỹi ỹima, jenaa'me l'aqtaqa 'me qaỹa 'te ỹaqaládaac. Jeso'me joca'li ỹimat da' ỹiỹo ỹima jen'me qadoicpi, qana'chi jeso'me na'ague da' loic ñi' Dios 'me nétanỹi jaga' nes'ónaxaqui da' net'a 'me net'ague da' piỹem.
So' lec'óxot ñi' Dios jeso'me nasoỹá'ña na' namaxa'spi piỹem lé'ecpi
4Jeso' lec'óxot ñi' Dios, jeso'me nasoỹá'ña ỹima jen' namaxa'spi piỹem lé'ecpi, qá'a jeso'me qoỹanaỹi da' lalémaxaset lenaxat 'me ỹátaqta napacalégue da' l'amaqchic jen'me. 5Qá'a ñi'me Dios sa 'te da' 'uootaxa ỹiỹáxana ga' lamaxasec piỹem lé'ec da' 'eet'oi:
'Am 'me na'chi'am ỹalec;
'am sec'oic jénjo' nolo'.
Qataxa sa 'te da' detaxaỹá'a ga' lamaxasec piỹem lé'ec da' 'eet'oi:
Jaỹim qomle jaỹim let'a jeso'me,
qataxa jeso'me qomle ỹalec.
6Qaláxasa joca'li nacot so' lepíloxot lec'óxot da' namaxá'ña jen' 'aléua, qana'chi 'enaaco':
Ỹima qomle jen'me lamaxasec piỹem lé'ec ñi' Dios,
jen'me qomle ỹisocoto naua' liliictel.
7Jeda'me n'aqtaguec jen'me namaxasec piỹem lé'ecpi, qaa'le ñi' Dios 'enaaco':
Jiñi'me ỹ'étec jen' lamaxasec piỹem lé'ecpi da' 'ená'am qa'en jen' laỹat,
qataxa jen'me l'onataxanaxanecpi 'ená'am qa'en na' l'edáxa jen' dóle'.
8Da' n'aqtaguec so' lec'óxot, qaláxasa ñi'me Dios 'enaaco':
Jañi' 'ans'ónaxaqui da' 'am net'a, 'am tamnaxala', qaỹa 'te loiquiaqa';
qataxa da' 'ad'onataxanaxac da' 'am net'a, jeda'me ỹátaqta ỹiỹamqáchiiñi.
9'Am ỹátaqta 'anoqopita da' 'aué'et ga' ỹiỹamqáchiiñi,
qataxa ỹátaqta sa 'anoqpita ga' sa ỹiỹamaxañi.
Chan'eesa ñi' 'antamnaxala', jiñi'me ỹicodelégue 'am da' let'ádaic 'adamaic,
sa 'ená'am qa'en jen' 'adaỹi.
10Nataq'en 'enaaco':
'Am 'me 'am nesaliaxanec, so' 'uáichiiñi joca'li 'am 'aué'et jen' 'aléua,
qataxa naua' 'adoua' na'chi l'onata'j na' piỹem.
11Jen'me taỹá'a da' ỹiméta, 'am qaamaxa 'oneta't.
Qataxa ỹima jen'me taỹá'a da' deto, 'ená'am ga' 'chi noxot.
12Qataxa da' 'aunana't jen'me, qaa'le 'auenét'em 'auen ga' napoto.
Qataxa jen'me taỹá'a da' qonadálaxat, 'ená'am ga' huáloq.
'Am, qaamaxa, na'chi 'oneta't,
qataxa da' 'ad'óiỹaxac qaỹa 'te loiquiaqa'.
13Qataxa ñi'me Dios sa ỹauana da' 'enapéga ga' 'oonolec jen'me lamaxa'spi da' 'eet'oi:
'Ona'ague qomle da' ỹoic,
cha ỹivíde'ta qomle ma'le sacho'to naua' 'adichil jen'me 'am ỹip'aguéetacpi.
14Qataxa ỹima jen'me namaxa'spi, 'me sa di'ỹoq, d'onataxaatapecot ñi'me Dios. Jen'me qonamaq, qaidi lecochiỹa jen'me ỹaconguet qomle da' nec'alaxa.
Currently Selected:
Hebreos 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.