Filemón 1
1
So' Pablo ỹamaxa jaso' lidíise so' Filemón
1Jaỹim Pablo, 'me jaỹim qoỹicoñideta't ỹasouaxat da' sasoilégue so' Cristo Jesús. Jaỹim qataxa ñi' Timoteo 'am sedénaqtena jan' ỹidíise, 'am qanauotaxaua qadaqáỹa Filemón 'me 'am qad'onataxanaxaua, 2qataxa ỹima na'me 'amaqténataxanaxaicpi 'me lemáqa' na' 'ad'acháqa', qana'chi 'ená'am jaga' qadaqáỹa Apia, qataxa ga' Arquipo 'me nataq'en nesoxonec qadecochaxaua da'me qad'onataxanaxac. 3'Auacoñiiỹet qomle da' l'ágaxanataxanaxac qataxa da' n'emáxac 'me chiỹoqo'ot ñi'me qadet'a Dios qataxa so' qadesaliaxanec Jesucristo.
Da' lesóxodic qataxa da' lip'iỹáxac so' Filemón
4Jaỹim na'chi 'eeta't da' saatapecot da' ñitónaxac ñi' Dios naale da' 'am seenata da' ñitaméetac. 5Qá'a jaỹim ỹ'añaqtet da' sep'iquilégue da' 'adoqopi'chi qataxa da' 'adip'iỹáxac so' qadesaliaxanec Jesús qataxa da' 'adoqopi'chi ỹima na' Dios lalémaxasetpi. 6Siỹaxatapecot nataq'en ñi'me Dios, da' qaidi jen'me 'amaqténataxanaxaicpi 'me chiỹaqaỹi da' 'adip'iỹáxac, qaidi ỹiviteguet jen'me da' ỹaỹáten da' lasoxoc ỹima na' qaneméỹaxac 'me chiỹoqo'ot so' Cristo Jesús. 7Chan'eesa jaỹim ỹátaqta mátac qataxa 'uo da' ỹ'añaxac ỹasouaxat da' 'adoqopi'chi, qá'a na'chi'am ỹaqáỹa, 'me chiỹoqóchiỹi da' 'uo da' l'añaxac jan' liquidiaqte ỹima jen' qadaỹi 'amaqténataxanaxaicpi.
So' Pablo nachoxodeelégue so' nelatac Onésimo
8Chan'eesa jaỹim, temaqaidi da' jaỹim lamaxasec so' Cristo qataxa 'uo da' senec da' 'uo ga' 'am samaxalégue da' 'aué'et, 9qaláxasa jaỹim sepacapéga da' 'am ñachoxodenot, ỹasouaxat da' nesóxodic. Jaỹim Pablo naỹi sóxote ma'le jaỹim ỹ'axaicáchiỹi qataxa jaỹim qoỹicoñideta't, ỹasouaxat da' sasoilégue so' Cristo Jesús, 10naỹi 'am siỹaxanot da' 'avichoxoden qomle na' Onésimo. Na'me sóxote ma'le ỹiviteguet qasen da' 'ená'am ga' ỹaleesa jan'me sonétaaue cointáxanaxaqui.
11Na'me Onésimo saua' noloqo'te laqáỹa' na'me 'chi 'adelatacolec qaỹa 'te ló'o, qaláxasa naỹi na'me ỹátaqta ỹipé'et, nataq'en 'am 'adpé'et. 12Naỹi na'me ỹitaxa 'am samoqot. 'Auaconeguet qomle, qaláxasa qonét'em qomle da' na'chaỹim da' jaỹim 'auaconeguet. 13Taama'le ñavíiñi na'me, da' qaidi jaỹim net'asop, da' qaidi 'anemeneguet na'me da' jaỹim d'onataxanot naỹi da' maliaxa jaỹim qoỹicoñideta't ỹasouaxat da' n'aqtac. 14Qaláxasa jaỹim sa se'uailégue, qá'a da' 'uootaxa da' sa 'aviỹamaxaden, qaidi ga'me jaỹim 'au'étec 'adichoxodénataxanaxac, da' sa 'te sega'me 'am qoỹamaqtalégue. Na'chidáta da' mai'chi 'am chiỹoqot'ot. 15Qá'a sa ỹiuénaaque na' Onésimo da' 'uo so' sa 'am 'te no'ot, qaidi naỹi da' ỹitaxa 'am no'ot, qana'chi sa 'te 'am cá'ai. 16Naỹi na'me sa 'te 'ená'am ga' nelatac. Qá'a na'me sa 'ená'am ga' 'chi nelatac, qá'a na'me 'ená'am ga' 'anauotaxaua 'adaqáỹa. Na'me ỹátaqta sauotec, qaláxasa ỹágueegue 'auen qomle da' 'adauo'chi. Sa 'te 'chi 'avichoxoden qá'a 'auená'am siỹaxaua, qá'a na'me 'ená'am ga' 'adaqáỹa 'ad'amaqténataxanaxaua so' qadesaliaxanec.
17Chan'eesa qomle 'eesa da' jaỹim 'auen 'adaqáỹa, qana'chi 'onét'em jaỹim da' 'auaconeguet na'me. 18Qataxa qomle 'uo ga' 'am ỹ'étec sa ỹiỹamaxañi ca'li, 'uootaxa 'uo jaga' lavíỹaxasete, qaláxasa jaỹim 'ap'axaneguet da' seseeten. 19Jaỹim Pablo, ỹátaqta mai'chi ñapoquena lidii's da'me 'am senapéga da' mai'chi seseeten qomle, temaqaidi da' 'uootaxa 'am seenataxanaxanec da' jaỹim net'ot nataq'en jañi' 'adavíỹaxasete, ỹasouaxat da' mai'chi 'ad'óiỹaxac. 20Já'a, 'am ỹaqáỹa, jaỹim 'avichoxoden qomle, qá'a 'am sóxote da' ỹ'amaqténataxanaxaua so' qadesaliaxanec. 'Au'añaqtet qomle jan' ỹiquidiaqte, qá'a mai'chi qo'mi n'amaqténataxanaxa'u so' Cristo.
21'Am samaxa jan' ỹide, qá'a saỹáteeta da' ỹátaqta 'am láxadic, qataxa da'me ỹácteegue 'auen ga'me siỹáxataaque. 22Nataq'en sepitaqtenaac da' 'am senapéga da' 'auaqátaxaata't qomle ga' ỹ'ochaqa' da' sevíd'a quena, qá'a jaỹim seuatét'a da' qoỹ'ateguet ga'me 'antamnaxaqui. Qana'chi ñi' Dios jaỹim ỹanem da'me 'ami sec'atalo.
Da' p'áteegue nip'iỹénataxanaxac qataxa da' nichoxodénataxanaxac
23'Am ỹamaxata da' lip'iỹénataxanaxac ñi' Epafras, ñi'me ñicoñitáxaua da' sasouaxalégue so' Cristo Jesús, 24qataxa ñi' Marcos, Aristarco, Demas qataxa ñi' Lucas 'me jaỹim lecochítrapega da'me ỹ'onataxanaxac.
25So'me qadesaliaxanec Jesucristo 'ami ỹanema qomle ga' 'ónaxaic 'adadíquiaxaqui. Já'a, na'chi naq'áita dójo'.
Currently Selected:
Filemón 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.