Hebreos 12

Ỹátaqta seloqóchiỹi so' Jesús

1Chan'eesa qo'mi, qá'a ỹátaqta jalcote jen' qo'mi dasota'ualo siỹaxadipi 'me ỹátaqta ỹaloxon da' lip'iỹáxac, qana'chi 'ónaxaic da' ñ'ónaxataqchiiñi ỹima jen'me sasápiaqtapiỹi qataxa jen'me n'etaxalóxo 'me qo'mi nequepaxatét'aita. Qana'chi ỹátaqta sauoqo da' qaneuálaxainaxac da' ñaqalégoxosoq jeda'me ñoqomitaqat'ague jeda'me saqat'ague. 2Ỹátaqta seloqóchiỹi qomle so' Jesús ỹátaqta n'añaxateguet da' 'éet'ec joca'li qoỹip'eneuo, qaláxasa sa ỹoqo'cha da' ne'uenáguec dójo' leleuaxa. Qá'a jeso'me ỹaỹáten da' 'uootaxa ma'le ỹinoxonaqtenéegue dójo' ne'queténaxac, qana'chi 'uo da' netónaxac qataxa da' lamaic. Qana'chi jeso'me na'ague da' loic ñi' Dios.

3Chan'eesa 'ami 'aueenachíit'a da' 'éet'ec da' ne'queténaxac so' Jesús joca'li n'añaxateguet da' lachoxodénataxanaxac jen' siỹaxadipi 'itaxalóxoicpi, qaidi da' 'an'añaxataxaquii na'chi 'eeta't sa ỹilaualégue. 4Qá'a da' 'oñíita maliaxa da' 'uo ga' ỹivíta da' qoỹalaat, ỹasouaxat da' dasot'aguet da' n'etaxalóxo. 5¿'Ami séetapega sóxote sa 'antovíñiiỹec da' laqátaxac ñi' Dios da' 'ená'am ga' siỹaxaua da' huaqátetapega ga' lalémaxaset lec'óxot? Naua' nidii's n'aqtaqa 'eet'oi:

'Am ỹalecolec, 'ena'to' qomle da' qaỹa ga' 'auanáỹi da' lapaxaguenataxanaxac ñi' qadasoxola' Dios qomle 'ená'am da' sega'me 'am nelaxa,

qataxa 'ena't da' 'an'aloxola't qomle 'ená'am da' 'am nouoxom.

6Qá'a jiñi'me qadasoxola' ỹátaqta nolaxanéegue ga' lauotaxat,

qataxa ỹátaqta ỹi'uaxan ỹima jen' lalémaxasetpi lec'oqtepi.

7Chan'eesa 'an'añaxachiiỹet qomle da' 'ane'uaxánaỹiquii, qá'a ñi' Dios 'eet'ema 'ami qa'en ga' mai'chi lalémaxaset lec'óxot. ¿Séetapega qaỹo' ga' nec'óxot da' sa ỹapaxaguen ga' let'a? 8Qá'a ñi' Dios da' 'uootaxa sa 'ami ỹapaxague'n da' 'ená'am qa'en da' 'éet'ec da' nolaxanéegue ỹima jen' lalémaxaset lec'oqtepi, qana'chi 'ami sa 'eesa da' mai'chi lalémaxase'te lec'óqo'te. 'Ená'am da' 'chi 'ami chíuaxase'te. 9Qataxa da' laqáỹa 'eet'oi: Ca'li sona'li qo'mi ỹ'axaiqa, qaa'le ỹátaqta salaxasoxolóo'te saua' ỹ'oqóchiilo qadet'al 'me qo'mi ỹapaxagueet'ape. ¿Táalia'chi toqo' da' sa ỹágueegue qasenaq da' qadaláxadic ñi' qadet'a 'me sa di'ỹoq, qaidi sevídaq'a da' nec'alaxa? 10'Eesa da' saua' ỹ'oqóchiilo qadet'al cada'acolec da' qo'mi ỹapaxaguenque joca'li jega'me ỹipétetrapega da' ỹiỹamqáchiiñi qadasoxoc. Qaláxasa sa 'ená'am ñi' Dios 'me qo'mi ỹapaxaguenque da' ỹátaqta 'eesa da' qo'mi ỹiỹamaxachidíñi, qá'a sétaaque da' qo'mi ỹoqovíte', senqá'am jiñi'me. 11'Eesa da' qaỹa ga' qane'uaxánaguec da' 'uootaxa sa co'ỹaq da' qo'mi qonolaxáatrapegueegue. Ỹátaqta co'ỹaq da' ỹímta. Qaláxasa da' ma'le cop'a, qana'chi di'ỹoq da' jaláỹaxac dójo' napaxaguénataguec ga' siỹaxaua da' ỹátaqta huelégue da' ỹalaq da' qoỹapaxaguen. Da' l'óiỹaxac ỹátaqta ỹoqovíta qataxa 'uo da' lelagaxadic.

Da' lichic ga' siỹaxaua da' 'uootaxa sa ỹoqo'cha da' l'aqtac ñi' Dios

12Chan'eesa 'ami ỹitaxa n'añaxa't 'aviñii' qomle naua' 'adouá'adii' 'me ma'le niliidíñi qataxa naua' 'adiliictéldii' 'me sa d'añiiỹilo. 13Qana'chi 'anmichiỹáaque qomle so' naq'aic 'me ỹátaqta ỹáateegue, qaidi jega'me nápia' 'me sa d'añiiỹi, qaa'le n'óota, qataxa sa ñ'íuo.

14Ỹátaqta 'anpogoxóiñiỹapegue' da' 'aulaquíitapeeguet ỹima jen' siỹaxadipi, ỹátaqta ỹoqovíta 'aviñii da' 'adasoxoquii. Qá'a ga' sa ỹoqovíta qa'en da' l'óiỹaxac, qana'chi sa nauá'ne' ñi' qadasoxola' Dios. 15Qataxa ma'chaxa qomle da' 'oñíita da' qaỹa ga' ỹaxanéegue da' letauánaxanaxac ñi' Dios 'me ỹáatac, qaidi qaỹa ga' 'oonolec da' 'oñíita da' 'ená'am jaga' nañiise 'me dedónataxan 'me ỹaqanatet da' n'áxat jan' laqáỹa. 16Qataxa qaỹa qomle ga' 'oonolec da' 'oñíita da' necachítapegue' jaga' sa loua, qataxa da' ỹ'otan ga' chiỹoqo'ot ñi' Dios. Qá'a jeda'me na'chida da' 'éet'ec so' Esaú joca'li jalcote da' loqouáxa, qana'chi ỹimen jeso'me qoỹaqátaxaataỹi nesaliaxa da' talégue qoỹin, qá'a ỹátaqta nepíloxot nec'óxot. 17Qataxa 'ami 'auaỹáchiñii da' joca'li ỹimat da' ỹimen, qana'chi joca'li ỹivíta so' nolo' so' Esaú sétaaque da' ỹaconguet da' 'ónaxaic ladíquiaxac 'me ỹanem so' let'a, qana'chi jeso'me qonmanguet. Temaqaidi da' ỹátaqta noỹen, qaláxasa ma'le sa ỹañoxot da' nadálaxat ga' 'éet'ec jeda'me sóxote ỹí'et.

18'Ami 'ená'te 'aviñí'ỹam so' lec'oqtepi so' Israel joca'li ỹic'áta so' qasoxonaxa 'me ỹañoxot da' qoỹipoteuó'o, qataxa 'edétanỹi, qataxa huá'ña da' ỹátaqta n'áltapiỹi qataxa so' laỹat let'ádaic. 19Qataxa sa 'amachíiỹa so' lesamaxa jan' naseede qataxa da' laviliỹáxac ñi' Dios joca'li detaqátapegue' jeso'me siỹaxadipi. Qá'a jen'me demachíỹa joca'li dójo' naviliỹáxac, jen'me nachoxodéetac, da' qaidi sa qov'iỹílaxalégue da' qodetaxaỹapégue'. 20Qá'a jeso'me siỹaxadipi sa nalo'oguet da' naqátaxac 'me 'eet'oi: “Da' 'uootaxa 'uo ga' 'chi peuó'o jen' lai jenójo' qasoxonaxa, qaa'le jega'me 'aualaachii, 'auauóit'ai jen' qa', 'uootaxa jan' miỹoxo, temaqaidi da' 'uootaxa ga' 'chi síiỹac.” 21Ỹátaqta 'uo da' lichic jeso'me qoỹilót'a, da' ỹivíd'a so' Moisés 'eet'oi: “Jaỹim ỹátaqta ỹivíloxolaqtet da' ỹoqolánaxa.”

22Qaláxasa 'ami, qamqaa'me sóxote 'auc'áchiisee'mec jega' qasoxonaxa lenaxat Sión, jidi'me nenoic let'ádaic ñi' Dios 'me na'chi 'eeta't da' nec'alétaiỹi, jidi'me Jerusalén 'me huet'ague di' piỹem, jidi'me huét'a jen'me ỹátaqta sa lec'óxotolec namaxa'spi piỹem lé'ecpi, 23lapoot'a't da' ỹi'ỹoxodéetac ñi' Dios, qataxa ga' lapoot'a't lec'oqtepi ñi' Dios 'me qoỹidéta'uo jaga' nedáxalate jen'me huet'ague da' piỹem. Qataxa sóxote 'auasoit'ot ñi' Dios 'me naqaiñi ñi' nimit ỹima jen' siỹaxadipi, qataxa ga' huét'a jen' liquí'ipi na' siỹaxadipi 'me 'ónaxaic da' lasoxoc 'me ỹátaqta naloqchíichiiñi ñi' Dios, 24jega'me huét'a so' Jesús 'me naqaiso so' qadetaxaỹáxanaxanec naỹi da' dálaxaic qaniỹamaxataxac da' qoniỹamaxá'te' ñi' Dios, qataxa ga' huétra'ña saua' letauo' so' Jesús 'me qodichiỹoxosoxonalo. Jesaa'me ỹátaqta napaquedalégue da' 'éete' saua' letauo' so' Abel da' qo'mi d'aqtaxanema.

25Chan'eesa ma'chaxa qomle da' 'oñíita, da' 'uo ga' sa ỹoqo'cha ñi' Dios 'me qo'mi detaqátapecoto. Qá'a ỹátaqta qaỹa ga' qoỹaxan joca'li jeso'me siỹaxadipi sa demachíỹa ñi' Dios joca'li huaqátetapega jeso'me jen' 'aléua, ¿hua'ague toqo' da' qo'mi ỹaxa'n da' 'uootaxa sa ñaquiáxanaxa da' laviliỹáxac jiñi'me net'ot di' piỹem da' qo'mi huaqátetapegalo? 26Dójo' laviliỹáxac ñi' Dios jeso' nolo' ỹátaqta dachólaxan qa'en jen' 'aléua; qaláxasa naỹi jiñi'me 'eet'oi: “Jaỹim sa na'chínata jen' 'aléua da' ỹitaxa dachólaxan qasen qomle, nataq'en di' piỹem.” 27Da' náỹi da' 'éeta: “Jaỹim ỹitaxa sen dachólaxan,” jeda'me náỹi da' qonaqat qomle ỹima na' qoỹañoxot da' qoỹadiỹot 'me mai'chi l'onatacpi ñi' Dios, huá'a, qana'chi n'ónañi jen'me sa qoỹañoxot da' qoỹadiỹot. 28Jega'me l'onataxanaxac ñi' Dios 'me qo'mi ỹanema da' qaidi qo'mi net'al, jega'me sa qoỹadiỹot. Chan'eesa sanoqot qomle da' qanetónaxac jiñi'me qataxa ỹátaqta 'uo da' qad'oiỹa qataxa qadetelá'a da' si'ỹoxodénaq jiñi'me 'me naqaida da' ỹiỹamaxaden; 29qá'a ñi' qadet'a Dios, jiñi'me 'ená'am ga' dóle' 'me dec'atoxon.

Currently Selected:

Hebreos 12: PLGNT93

Highlight

Copy