Hebreos 13
13
Da' 'éet'ec da' qaidi qo'mi ỹiỹamaxade'n ñi' Dios
1Sa ỹaxanéegue qomle ñi' 'oonolec da' 'oñíita da' ỹauotec ga' laqáỹa, 'ená'am 'aviñii ga' lauotaxadic ga' mai'chi laqaỹasa. 2Qataxa 'ena't qomle da' 'apetelaqaiỹet da' ỹátaqta 'auloiỹet ga' 'anamaxasóxoiqui. Qá'a jeda'me naqaida da' chiỹaqaỹi da' 'uo joca'li jeso'me sa nóma da' ỹa'uo ga' l'ochaqa' so'me namaxasec piỹem lé'ecpi.
3Qataxa 'aueenachíit'a qomle jen' necointáisecpi, 'ená'am 'aviñii da' 'uootaxa 'ancointáxauaipi jen'me, qataxa jen' sa qoỹa'uo ga' nodiáquenaguec, qá'a 'ami nataq'en 'auaỹáchiñii da' 'auañoxochii da' 'uo da' ne'queténaxac da' 'adó'oquiaxaquii.
4Qataxa ỹiuen da' ỹátaqta qonetelá'a qomle ỹima da' nouáỹaxac, qataxa gaua' nóua' ỹiuen da' ỹátaqta node'n, qá'a ñi' Dios ỹa'uo qomle da' ne'uaxánaguec jen' queséeguetaxaicpi qataxa jen' leuauátac jaga' sa loua.
5Qataxa sa 'apichiỹá'a jañi' laicaua; na'chidáta da' 'antóñiitapeec jega'tai'me 'uo. Qá'a ñi' Dios 'eet'oi: “Sa 'am seỹotéegue, qataxa sa 'am seguem.” 6Chan'eesa sa ỹidiỹaqalégue da' senqát'oi:
Ñi' qadasoxola' Dios, naqaiñi ñi' jaỹim lecochiỹa,
chan'eesa sa s'óitapega ga' jaỹim ỹ'étec ga' 'chi siỹaxaua.
7Qataxa 'aueenachiỹá'a qomle jeso'me 'adasoxoládiipi 'me 'ami ỹ'axatema josii'chi da' l'aqtac ñi' Dios; 'aueenachíit'a da' 'éet'ec da' náỹi da' l'óiỹaxac, qana'chi ỹátaqta 'auadénaxachii da' 'éet'ec da' lip'iỹáxac.
8So' Jesucristo, jeso'me sa ỹañoxot da' noqochic, jeso'me na'chi 'eeta't. 9Chan'eesa sa 'amachíit'a da' 'chi 'ami ỹauect'ape jen' ỹodapecachi napaxaguenataxanaxacpi 'me sa qoỹauanápega. Na'chidáta da' ỹátaqta ỹaconguet qomle jañi' qadiquidiaqte da' l'añaxac 'me chiỹaqaỹi da' lesóxodic ñi' Dios, 'me sa 'ená'am da' lasoxo'j naua' nali'j da' 'uo jen' qoỹalic qataxa jen' sa qoỹalic. Qá'a dójo' lasoxoc da' sa qoỹalictaqueda, jen' ỹátaqta quetegue da' ỹí'et, qaa'le qaỹa 'te ga' nesáaque.
10Qá'a qo'mi 'uo jaso' qadec'oỹoxonaxalate 'me sa qoỹasenem da' 'uootaxa ỹalic ga' lai jen' nachítaqtaxanaxatpi jeso'me letaxaỹáxanaxanecpi jen' siỹaxadipi da' qodetaxaỹapégue' ñi' Dios 'me ỹilot'ague so' toisec l'emec ñi' Dios. 11Qá'a jeso'me lasoxola' jen' letaxaỹáxanaxanecpi so' judiopi, jeso'me ỹidó'uo jaso' letauo' jen' síiỹacpi jeso'me nedáqa' 'me sa qoỹisetaxat jen' nachítaqtaxanaxat, da' qaidi qonaqat jen' janoicpi. Qaláxasa jen' lapat jen' síiỹacpi, da' qoỹigóoue, qaa'le qoỹidói'ỹa jega'me qaỹái'ỹa jeso'me qouét'a. 12Qana'chi naq'áita nataq'en so' Jesús da' nalaataguec huá'ña so' qaỹái'ỹa so' noic, da' qaidi ỹiỹo jen' jaloic jen' siỹaxadipi, diỹoxonalo saua' mai'chi letauo'. 13Chan'eesa sec'átaxai'ỹa qomle so' Jesús 'me huétai'ỹa jega'me qaỹái'ỹa jeso' qouét'a, da' qaidi nataq'en ñi'queténaxaỹi da' sa qoỹa'uo ga' qanodiáquenataguec, da' senqá'am da' ne'queténaxac jeso'me. 14Qá'a jen' souqatalégue 'aléua qaỹa ga' qad'acháqa' da' 'uootaxa na'chi 'eeta't, qá'a qo'mi ñimitaqátaaque jega'me noic 'me maliaxa naỹa'quéna. 15Chan'eesa na'chi 'eeta't qomle da' sachiỹoxotaqaỹi so' Jesucristo da' si'ỹoxodénaqtac ñi' Dios. Dójo' qadi'ỹoxodénataxanaxac, naqaida jeda'me sega'me qadachítaqtaxanaqte 'me sanaqátapecot jiñi'me. ¡Si'ỹoxodénaqtac qomle jiñi'me naua' qad'aqtaqa! 16Qataxa 'ena't qomle da' 'apetelaqaiỹet da' 'av'íchii ga' ỹiỹamqáchiiñi qataxa da' 'alcochíiỹa ga' 'adaqaỹai jega'me 'ami huet'oto, qá'a dójo' nachítaqtaxanaxac, naqaida jeda'me ỹátaqta ỹiỹamaxaden ñi' Dios.
17Ỹátaqta 'aualaqailégue qomle jen' 'adasoxoládiipi qataxa 'anañiỹiỹet da' 'ami ỹilo'oguelo, qá'a jen'me naqáina jen' ỹilo'ogue da' 'ad'óiỹaxaquii, qá'a ỹaỹáteet'a da' 'uo ga' nolo' da' ỹinat ñi' Dios jen'me. Qataxa 'anpogoxóiñiỹapegue', qaidi ỹátaqta máchiiñi da' l'onataxanaxac qataxa sa ỹapáisaiỹi da' desali. Qá'a da' na'chi 'éeta dójo', qana'chi qaỹa ga' 'anaqachii.
18Qo'mi 'antamñiitalóo'te qomle, qá'a saỹátenaq da' qaỹa 'te 'uo da' qadaviliỹáxac. Qá'a sauoqótaaque da' ỹátaqta 'uo ỹima da' qadadíquiaxac. 19Ỹátaqta seuen ga' 'antamnaxaquii, qaidi ñi' Dios jaỹim ỹanem da' sa huaỹáloq da' ỹitaxa 'ami souetaavlo.
Da' nichoxodénataxanaxac qataxa da' p'áteegue nip'iỹénataxanaxac
20Ñi' Dios 'me ỹí'et da' nelagaxadic, jiñi'me ỹitaxa nec'alaxatéegue so' Jesucristo, 'me naqaiso so' 'oonolec neuatoqo't jan' n'aanaxate, ỹasouaxat saua' letauo' 'me ỹátaqta d'añáañi qa'en jeda'me qaniỹamaxataxac 'me qaỹa 'te loiquiaqa', 21jiñi'me ỹátaqta 'ami naloqchíichidiñi qomle qataxa n'ónaxat ỹima da' 'adasoxoquii, qaidi 'av'íchii jega'me 'éetapeec; qataxa qaidi jiñi'me mai'chi ỹoiquíitac ga' qo'mi ỹ'eteque, ỹachiỹoxotaỹi so' Jesucristo. ¡So' Cristo ỹátaqta na'chi 'eeta't qomle da' ni'ỹoxodénataguec! Já'a, na'chi naq'áita dójo'.
22'Ami ỹaqai'ỹolqa, 'ami ñachoxodeetoovlo da' ỹátaqta 'an'añaxachiiỹet da' ỹaqátaxac da' 'oñíita, qá'a sa 'amaqtaq da' sidíñi ỹ'aqtac 'me 'ami samaxalo. 23'Ami s'axatema so' qadaqáỹa Timoteo ma'le sóxote da' qoỹisóiỹi. Qomle sa huaỹáloq da' jaỹim nivíta, qana'chi sauec qomle 'ami sec'atalo.
24'Auañimii qomle da' ỹip'iỹénataxanaxac ỹima na' 'adasoxoládiipi, qataxa ỹima na' qadaỹi 'me qad'amaqténataxanaxau'pi. Jena'me néta'ña na' Italia 'ami ỹamaxalo da' lip'iỹénataxanaxac.
25Ñi'me Dios 'ami ỹanema qomle ga' 'ónaxaic 'adadíquiaxaquii. Já'a, na'chi naq'áita dójo'.
Currently Selected:
Hebreos 13: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
