Hebreos 11
11
Da' nip'iỹáxac
1Da' 'uo da' qadip'iỹáxac, qana'chi di'ỹoq da' ỹátaqta 'eesa qasenaq da' saconaxaguet qomle jega'me ñaquitaqátaaque, da' ỹátaqta 'uo qasenaq jega'me sa qoỹilá'a. 2Jeso'me huá'au qadet'alpi joca'li ỹátaqta ỹiỹamaxaden ñi' Dios ỹasouaxat da' 'uo da' lip'iỹáxac.
3Chiỹoqóchiỹi da' qadip'iỹáxac da' qo'mi saỹátenaq ñi' Dios l'onatac jen' 'aléua, l'onata'j naua' l'aqtaqa. Chan'eesa jen'me seloqótaiỹi naỹi, jen'me chiỹaqaỹi jega'me sa di'ỹoq joca'li.
4Jeso' Abel ỹasouaxat joca'li da' lip'iỹáxac, qana'chi ỹanot ñi' Dios jaso' lachítaqtaxanaqte, jaso'me ỹátaqta napacalégue jeso'me lachítaqtaxanaxat so' Caín. Chan'eesa ñi' Dios ỹátaqta ỹiỹamaxaden jeso'me da' 'ónaxaic da' lasoxoc, qana'chi ỹaconguet jaso' lachítaqtaxanaqte. Naqaida da' 'éeta so' Abel, temaqaidi da' sóxote ỹileu, qaláxasa da' lip'iỹáxac maliaxa quéta da' qo'mi d'aqtaxáatapeema.
5Jeso' Enoc nataq'en ỹasouaxat da' lip'iỹáxac, qana'chi qoỹaueegue da' piỹem, qana'chi jeso'me sa nauá'ne' da' ỹileu. Qana'chi sa qonata joca'li, qá'a ñi' Dios ỹauec. Qataxa naua' nidii's l'aqtaqa ñi' Dios ỹ'axa't jeso'me joca'li maliaxa sa qoỹauec, qana'chi chi'ena da' sóxote ỹiỹamaxaden jeso'me ñi' Dios. 6Chan'eesa qaỹa ga' ỹiỹamaxaden ñi' Dios, da' 'uootaxa qaỹa ga' lip'iỹáxac. Qá'a da' qonchíi'uo jiñi'me, qaa'le ñi' 'oonolec ỹiuen da' ỹátaqta ỹ'amaqten ñi' Dios da' ỹátaqta 'eesa da' 'uo, qataxa ỹ'amaqten jiñi'me da' ỹañoxot da' ỹiseeten jega'me nimitáaque jiñi'me.
7Jeso' Noé nataq'en ỹasouaxat da' lip'iỹáxac joca'li ñi' Dios huaqáta jeso'me da' naỹá'a jega'me sona'li di'ỹoq. Qaláxasa jeso'me ỹátaqta ỹalaq, qataxa ỹisoga't jaso' lilicota lat'édai, da' qaidi nec'aléegue so' lec'oqtepi. Ỹasouaxat jeso'me 'uo da' lip'iỹáxac, qana'chi ỹaloxon da' qoỹa'uo ga' ne'uaxánaguec jen'me huetalégue jen' 'aléua, qataxa jeso'me ỹivíd'a da' ỹátaqta qoỹiỹamaxaden. Qá'a ñi' Dios ỹátaqta ỹiỹamaxaden jega'me 'uo da' lip'iỹáxac.
8So' Abraham nataq'en chiỹaqaỹi da' lip'iỹáxac joca'li ñi' Dios ỹiỹáxana, qaa'le jeso'me ỹátaqta ỹalaq da' jec, ỹic'áta so' 'aléua 'me ỹaloxóna ñi' Dios da' ỹanem da' lalémaxaset. Qana'chi jeso'me cá'ai so' l'acháqa', sa ỹaỹáten ga' taiỹi. 9Qá'a 'uo da' lip'iỹáxac so' Abraham, qana'chi jeso'me nalégue jeso'me 'aléua 'me ỹaloxóna ñi' Dios, qaláxasa 'ená'am qa'en ga' ỹaqá'a 'aléua da' netalégue. Qana'chi jeso'me nétaaue so' lepe'l. Naqaida da' 'éeta nataq'en so' lec'óxot Isaac qataxa so' laual Jacob 'me nataq'en ỹacooteguet dójo' qoỹaloxóotac joca'li. 10Qá'a so' Abraham ỹiuatét'a jega'me noic let'ádaic 'me sa noláiñi, jega'me noic 'me mai'chi lapaxañi ñi' Dios qataxa mai'chi n'oxoséguem.
11Jaso' Sara nataq'en chiỹaqaỹi da' lip'iỹáxac da' qaidi 'uo ga' lec'óxot, temaqaidi da' sóxote ỹ'axáina'. Qaláxasa jaso'me ỹaconguet da' l'añaxac, qaidi decó'o. Qana'chi ỹañoxot da' 'uo so' lec'óxot, qá'a jaso'me ỹ'amaqten ñi' Dios da' ỹipaquíchiỹi jega'me ỹaloxon. 12Nataq'en so' loua Abraham, temaqaidi da' huec da' ỹivíta ga' lalóqo' da' l'óiỹaxac, qaláxasa jeso'me ỹátaqta ỹivíd'a da' sa lec'óxotolec so' lec'oqtepi, 'ená'am jan' huaqchiñi 'me net'ot di' piỹem qataxa jen' pogaxanaxa 'me huet'ot jen' loxogue jaso' huaxai, da' qaỹa 'te 'uo ga' naloqten.
13Ỹima sójo' siỹaxadipi cha ỹivíd'a da' ỹileu da' sa ỹaconguet jega'me ỹaloxóotapega joca'li ñi' Dios. Qaláxasa ỹasouaxat da' 'uo da' lip'iỹáxac, qana'chi jeso'me 'ená'am da' 'chi ỹilót'a, qataxa ỹátaqta ỹ'amaqten, qataxa 'uo da' loqopi'chi da' tátapiỹi lauel. Dójo' 'éeta jeso'me 'ená'am da' ỹ'axátetac da' sa 'eesa da' ỹátaqta l'acháqa' jénjo' 'aléua. 14Qá'a jen'me 'éet'ec dójo' da' l'aqtaxanaxac, jen'me 'ená'am da' ỹ'axátetac da' maliaxa nimitétaaque jega'me ỹátaqta lalémaxaset l'acháqa'. 15Qá'a jeso'me da' 'uootaxa maliaxa tátapiỹi lauel jidi'me 'aléua 'me chiỹoqóchii'ña, qana'chi sóxote táxa da' ỹañoxot da' v'iỹílaxa. 16Qaláxasa jeso'me maliaxa ỹipaquétapega jega'me ỹátaqta 'ónaxaic lalémaxaset l'acháqa', jega'me n'acháqa' 'me huet'ague da' piỹem. Chan'eesa ñi' Dios sa n'aloxola't da' jen'me siỹaxadipi ỹimatá'ac jiñi'me da' ỹátaqta netamnaxala', qá'a jiñi'me sóxote da' ỹaqátaxaatapiỹe't jega'me mai'chi nenoic.
17So' Abraham nataq'en ỹasouaxat da' lip'iỹáxac joca'li ñi' Dios ỹa'uo da' ỹapiỹen, qana'chi jeso'me ỹauec so' lec'óxot Isaac da' ỹalaat, qana'chi ỹigóoue da' ỹanot ñi' Dios. Jeso'me ỹátaqta qaỹa ga' ỹiga da' ỹaneuo so' 'oonolec lec'óxot, temaqaidi da' na'chiso jeso'me ỹaloxóna joca'li ñi' Dios, 'eet'oi: 18“Chiỹaqaỹi qomle ñi' Isaac da' 'am 'uo ga' 'ac'oqtepi.” 19Qá'a so' Abraham ỹaỹáten ñi' Dios ỹátaqta 'uo da' l'añaxac, ỹivíd'a da' ỹitaxa nec'alaxatéegue jen' napa'lpi. Qana'chi da' náỹi dójo', 'ená'am so' Abraham ỹitaxa ỹaconguet so' lec'óxot da' chiỹoxotáaue jen' napa'lpi.
20Jeso'me Isaac nataq'en ỹasouaxat da' lip'iỹáxac, qana'chi jeso'me ỹanem da' 'ónaxaic ladíquiaxac so' Jacob qataxa so' Esaú. 21So' Jacob nataq'en ỹasouaxat da' lip'iỹáxac, qana'chi jeso'me joca'li ỹamtaa'le ỹileu, qana'chi ỹanem da' 'ónaxaic ladíquiaxac saua' lec'óqo'te so' José. Qana'chi huaseltalégue joca'li jeso' lase'l da' ỹi'ỹoxoden ñi' Dios. 22So' José nataq'en ỹasouaxat da' lip'iỹáxac, qana'chi jeso'me joca'li ỹamtaa'le ỹileu, qana'chi d'aqtaxanem so' lec'oqtepi so' let'a Israel da' 'uo ga' nolo', qana'chi cá'ai di' 'aléua Egipto. Qana'chi jeso'me ỹan da' l'aqtac, qaidi sa qon'ónaxatrañi saua' lip'ináqa.
23Nataq'en ỹasouaxat da' lip'iỹáxa'j saua' let'al so' Moisés joca'li niỹíñi jeso'me, qana'chi jesaa'me ỹivid'alo saua' tres 'auóxoiqa da' ỹoxochidíñi, ỹasouaxat da' ỹilód'a jeso'me da' ỹátaqta 'ónaxaicolec, qataxa sa d'óitrapega da' l'aqtac jeso'me ỹan so' net'a da' qoỹalaat jen' ñoqolqapiolec. 24So' Moisés nataq'en ỹasouaxat da' lip'iỹáxac, qana'chi jeso'me joca'li ma'le ỹ'axaic, qana'chi sa ỹiỹamaxaden da' qoỹíitapega lec'óxot jaso' lec'oqte so' let'a jen'me néta'ña di' Egipto. 25Na'chidáta da' jeso'me ỹipacapéga da' ne'queténaxaua qoỹin jeso'me lalémaxasetpi ñi' Dios, sa cadá'ac da' táaue da' tónaxac ỹasouaxat da' loqopi'chi da' n'etaxalóxo. 26Qataxa 'ená'am da' ỹátaqta saliaxanec qa'en da' 'uootaxa sa qoỹodiáquenaac ỹasouaxat da' huasoilégue so' Cristo, sa 'ená'am qa'en ỹima jen' ỹ'oqóchiỹi lesaliaxa di' Egipto. Qá'a jeso'me ỹátaqta ỹilót'a jega'me leseeténataxanaxac ñi' Dios 'me ỹanem qom'chi jeso'me. 27So' Moisés nataq'en ỹasouaxat da' lip'iỹáxac, qana'chi jeso'me cá'ai di' 'aléua Egipto, sa d'óitapega da' lalemataic so' net'a. Qana'chi jeso'me ỹátaqta quetalégue da' leenataxac, 'ená'am da' ỹátaqta ỹilot'ot ñi' Dios 'me sa di'ỹoq.
28So' Moisés nataq'en ỹasouaxat da' lip'iỹáxac, qana'chi damaxasoxolégue so' niqui'ỹáxac 'me náỹi da' qoỹin cá'ai di' Egipto so' lec'oqtepi so' Israel. Qataxa so' Moisés damaxasoxolégue da' qoỹ'ame'n naua' so'mi jan' netauo', qaidi so' namaxasec piỹem lé'ec 'me laataxanaxaic sa ỹalaat ga' lepíloxot lec'óxot jen'me lec'oqtepi so' Israel. 29So' lec'oqtepi so' Israel nataq'en ỹasouaxat da' lip'iỹáxac, qana'chi ỹ'axasoxota jaso' peróna tóomaxadai, 'ená'am da' qaqáchiinỹi. Qana'chi so' Egipto lé'ecpi joca'li sétaaque da' ỹ'axasoxota jaso'me, qana'chi 'ouaxaicpi.
30Nataq'en ỹasouaxat da' nip'iỹáxac, qana'chi 'uáxadiñi saua' lequepáxanaqa'te so' noic let'ádaic Jericó joca'li so' Israel lec'oqtepi ma'le ỹimat da' coleetapeesop jeso'me ỹivid'alo saua' siete noloqo'te. 31Nataq'en ỹasouaxat da' lip'iỹáxac jaso' Rahab 'me queséeguetaxai, qana'chi jaso'me sa leleuaxaua jeso'me sa ỹalaq siỹaxadipi. Qá'a jaso'me ỹátaqta ỹiỹamaxatet'ape joca'li ỹaconeeta saua' lec'atenáxanaxanqa so' lec'oqtepi so' Israel.
32¿Jái'chogamaxa laqáỹa s'axat? Qá'a ma'le qaỹa ga' ledáqa' da' s'axat so' Gedeón, Barac, Sansón, Jefté, David, Samuel qataxa so' l'aqtaxanaxanecpi ñi' Dios. 33Ỹima jeso'me chiỹoqóchiỹi da' lip'iỹáxac tadeeto' loxonaqa naua' laqáỹa' 'ale'u, qataxa ỹiỹamqáchiiñi da' l'onataxanaxac da' net'a, qataxa da' qonaqchíchiiñi da' letauánaxanaxac ñi' Dios 'me ỹaloxon joca'lio', qataxa da' qoỹapadínỹi jen' nedégaxat jen' síiỹac 'me di'quiỹaac, 34qataxa da' qoỹalamat jen' let'ádaic dóle', qataxa da' qoỹaxan jen' sétaaque da' qoỹalaat. Qataxa jen'me qaỹa ga' l'añaxac, qaa'le ỹivíd'a da' ỹátaqta 'uañaxaic da' 'uo ga' laataxac, qana'chi loxonec jen'me nep'aguénaxau'pi. 35'Uo jen' ỹauodipi nataq'en ỹitaxa nauá'ne' jen' laqatacpi da' ỹitaxa nec'aléegue.
Qataxa 'uo jen' ỹileu ỹasouaxat da' ne'queténaxac, qá'a sa ỹaconguet da' qoỹaxanéegue. Qá'a sétaaque da' ỹivíd'a qomle da' ỹitaxa qonec'alaxatéegue, qaidi 'uo ga' l'óiỹaxac qaỹa ga' 'ená'am. 36Qataxa 'uo jen' laqáỹa ỹátaqta ni'quichínỹi da' ne'uenáguec, qataxa da' nalaqáinaguec, qataxa da' qoỹicoñida't naua' loua', qataxa da' qoỹanáaue jan' cointáxanaxaqui. 37Qataxa 'uo jen' qoỹalaat, qoỹidó'oc jen' qa'. Qataxa 'uo jen' qoỹiquesoxoỹi na' lasot, qataxa 'uo jen' ỹátaqta qoỹapiỹen, qataxa 'uo jen' legaxanaxat da' qoỹalaat, qataxa 'uo jen' 'chi tateu'alo, ỹáatrañi naua' louo n'aanaxate ló'oc qataq quétaq ló'oc, ỹátaqta 'uo da' lachoxodec qataxa da' ne'queténaxac, qataxa qaỹa ga' qoỹodiáquenaac. 38Jeso'me siỹaxadipi ỹátaqta sa taiỹet da' leseec jen'me siỹaxadipi 'itaxalóxoicpi 'me huetalégue jen' 'aléua. Qana'chi jeso'me 'chi quetalégue jen' totelégue 'aléua, qataxa naua' qasoxonaxádi, qataxa huetaa'uet jen' jauac qataxa jan' l'aite jen' 'aléua. 39Ỹima jeso'me siỹaxadipi, temaqaidi da' ỹátaqta ỹiỹamaxaden ñi'me Dios ỹasouaxat da' lip'iỹáxac, qaláxasa sa ỹaconguet jega'me ỹaloxóotac joca'li jiñi'me, 40qá'a jiñi'me 'uo jega'me ỹágueegue da' lodiac 'me ỹaqátaxaatapiỹe't. Qá'a jiñi'me táchiỹi lauel da' senqáta, qaidi jeso'me siỹaxadipi ỹañoxot da' qadiquiáxauauo qomle ỹinoxoneuó'o da' ỹátaqta nalóchiiñi qoỹin da' l'óiỹaxac.
Currently Selected:
Hebreos 11: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
