Hebreos 10

1Qá'a jen' naqátaxacpi 'me chiỹoqo'ot joca'li so' Moisés, jen'me 'ená'am da' 'chi lepaqal jega'me naỹa'quéna 'me ỹátaqta ỹiỹamqáchiiñi, jen'me sa naqáina jena'me ỹátaqta 'eesa. Chan'eesa jen'me naqátaxacpi sa ỹañoxot da' ỹátaqta nalóchiiñi qa'en da' lasoxoc jen'me dasouó'o ñi' Dios, chiỹaqaỹi jen'me qoỹáatapeeuo 'me qov'iỹílaqtalégue di' huó'e. 2Qá'a jen'me naqátaxacpi da' ỹañoxot toqo' da' nalóchiiñi qa'en da' lasoxoc jen' siỹaxadipi, qana'chi jen'me nachítaqtaxanaxatpi sa ỹiuen táxa da' ỹitaxa qoỹaneuo. Qá'a jen'me dachitaqtaxáatacpi, da' 'uootaxa ma'le qoỹiỹo na' jaloicpi, qana'chi jen'me ỹátaqta nóm'ta da' qaỹa ga' loic. 3Qaláxasa jen'me qoỹáatapeeuopi, jen'me 'chi náỹi da' qaidi jen'me hueenata da' 'uo na' jaloicpi di' huó'e, 4qá'a jan' letauo' ga' huaca louádaicpi qataxa jen' quétaq loua', jen'me sa ỹañoxot da' naqat jen' janoicpi.

5Chan'eesa so' Cristo joca'li sétaaque da' naỹa jen' 'aléua, qana'chi 'enapéga ñi' Dios, 'enaaco':

'Am sa 'auaconguet jen' nachítaqtaxanaxatpi, qataxa jen' qoỹáatapeeuo síiỹacpi,

na'chidáta da' 'am 'auqátaxaatapiỹe't jega'me ỹó'oquiaxac.

6Nataq'en sa 'aviỹamaxaden jan' nachítaqtaxanaqte 'me qoỹigóoue,

qataxa jan'me qoỹáatapeeuo 'me náỹi da' qaidi qonaqat jen' janoicpi.

7Qana'chi jaỹim senaac: Jaỹim naỹi ñanac,

da' qaidi sé'et ga' 'auéetapeec, 'am ñitamnaxala',

qá'a na'chida da' qoỹidétañi ỹadíquiaxac naua' 'ad'aqtaqa 'me nedétrañi.

8So' Cristo 'uáichiiñi da' 'enapéga ñi' Dios da' sa ỹaconguet qataxa sa ỹiỹamaxaden jen' nachítaqtaxanaxatpi, qataxa jen'me qoỹáatapeeuopi síiỹacpi, qataxa jen' qoỹaneuo da' qoỹigóoue 'me náỹi da' qaidi qonaqat jen' janoicpi, temaqaidi da' na'chína jen'me damaxasoxoléguepi jen' naqátaxacpi. 9Ỹim, qataxa 'enaac: “Jaỹim naỹi ñanac, da' qaidi sé'et jega'me 'onétapeec, 'am ñitamnaxala'.” Jeda'me náỹi da' 'eet'oi: Naqat jen'me nachítaqtaxanaxatpi 'me qoỹigóoue, qana'chi taỹi qoỹin dójo' dálaxaic nachítaqtaxanaxat. 10Ñi' Dios sóxote da' qo'mi ỹoqovíte' qa'e'n, qá'a so' Jesucristo ỹí'et joca'li da' 'éetapeec ñi'me joca'li ỹan da' mai'chi ló'oquiaxac da' 'oonolec qoỹalaat, sa ỹitaxa taa'le qoỹalaat.

11Jen' letaxaỹáxanaxanecpi na' judiopi da' qodetaxaỹapégue' ñi' Dios, ỹima jen'me ỹí'et da' l'onataxanaxac naua' noloqo'te qataxa quet'ot da' v'iỹílaqtalégue da' ỹáatapeeuo jan' nachítaqtaxanaxatpi, temaqaidi jen'me nachítaqtaxanaxatpi sa ỹañoxot da' naqat jen' janoicpi. 12Qaláxasa so' Jesucristo nañan da' qoỹalaat ỹasouaxat na' janoicpi, qana'chi sa ỹitaxa da' nañan. Ỹim, qana'chi na'ague da' ỹaỹáten ñi' Dios. 13Huá'a, qana'chi ỹiuata'aguet ga' nolo' qomle ma'le qoỹacho'to naua' lapia'te jen' nep'aguénaxau'pi. 14Qá'a ỹachiỹoxotaỹi jaso' 'oonole lachítaqtaxanaqte da' jeso'me 'chi táteegue qa'en da' nalóchiiñi da' lasoxoc jen'me sóxote ỹoqovíta qa'en. 15Qataxa so' Espíritu Santo ỹátaqta 'eesa qa'en dójo' da' qo'mi d'aqtaxanema, qá'a da' 'uáichiiñi n'aqtac 'enaac:

16Jiñi'me qadasoxola' 'enaaco':

Ga' ñiỹamaxataxac qomle ñiỹamaxá'te' jen'me qomle sóxote ỹinoxodéegue gaua' noloqo'te,

qana'chi jaỹim sachaiỹilo qomle naua' ỹaqátaxaco naua' liquidiaqtel jen'me,

qataxa sedelóo'te naua' leenataxaco.

17Ỹim, qataxa 'enaac:

Sa ỹitaxa seenatapéga qomle jen' jaloicpi jen'me siỹaxadipi qataxa jen'me ỹí'et sa nó'inpi.

18Chan'eesa da' 'uootaxa ma'le qoỹapalaxa't naua' janoico, qana'chi sa ỹiuen da' ỹitaxa qoỹa'uo jaga' nachítaqtaxanaqte laqáỹa da' qoỹapalaxat jen' janoicpi.

Ñichíỹaxa'uo ñi' Dios

19Chan'eesa, 'ami ỹaqáỹa', naỹi qaỹo' qomle ga' qad'óictaaque da' senoxonaxauó'o di' nedáqa' 'me sa qoỹisetaxat, sachíỹoxosoqchiilo saua' letauo' so' Jesucristo, 20qolqat'egue so' qadadic dálaxaic 'me chiỹaqaỹi da' nec'alaxa, jeso'me naq'aic 'me taỹa'ague da' lai so' napadénaxanaxat, chiỹoqóchiỹi da' mai'chi l'óiỹaxac joca'li nañan. 21So' Jesús naqaiso jeso'me 'oonolec qadetaxaỹáxanaxanec 'me ỹilotalégue jega'me l'emec ñi' Dios. 22Chan'eesa qo'mi ỹátaqta ñichíỹaxa'uo ñi' Dios, qaláxasa ỹátaqta huosóte' qasena' naua' qadiquidiaqtel qataxa ỹátaqta 'eesa qasenaq da' qadip'iỹáxac. Qá'a jiñi'me sóxote ỹoqovíte' qa'e'n naua' qadiquidiaqtel, qaidi qo'mi sa 'ená'am da' maliaxa 'uo ga' qadoic qataxa ma'le sóxote da' qoỹiỹóta da' qadó'oquiaxac, qoỹauót'ai jen' nedot'a't noxop. 23Ỹátaqta ñ'añaxataxac qomle da' qanaquitaxac da' qad'amaqténataxanaxac, sa saxanaxáiỹi, qá'a ñi' Dios ỹátaqta ỹipaquíchiỹi qomle da' qo'mi ỹaloxonalo. 24Qataxa qo'mi n'óota da' ñi' 'oonolec ỹipacapégue' ga' laqáỹa da' maliaxa 'uo qa'en da' lesóxodic, qataxa da' ỹí'et ga' ỹiỹamqáchiiñi. 25'Ená'te qomle da' qolqat'ague da' ladíquiaxac jen' 'uo da' n'onataguec da' sa dasoỹapée'uo da' qademáxac. Na'chidáta da' ñi' 'oonolec ỹ'añaqtet ga' laqáỹa, lamá'asa naỹi da' selaqá'a da' ma'le sa qaỹáaque ga' nolo' da' n'iỹílaq so' qadesaliaxanec.

26Qá'a da' na'chi qadeenataxac da' qolqat'ot da' s'étaq ga' qadoic da' 'uootaxa sóxote saatetonaq jeda'me 'eesa lasoxoc, qana'chi qaỹa qomle da' ỹitaxa 'uo ga' qoỹan da' qoỹalaat, qaidi qoỹapalaxat ga' janoic. 27Na'chidáta da' qo'mi seuataqat'aguet jega'me qaỹa 'te ga' 'ená'am lichic qomle qonimit ỹimaquéna, qataxa ga' qaỹa 'te ga' 'ená'am jen' l'edáxa dóle' 'me ỹigóoue jen' nep'aguénaxau'pi ñi' Dios. 28Da' 'uootaxa 'uo ga' sa ỹalaxaguet jen' naqátaxacpi 'me chiỹoqo'ot so' Moisés, da' 'uootaxa huo'oi gaua' dos 'uootaxa tres nateet'a't ga' l'aqtaxanaxa'j da' ỹ'axa't jega'me, qana'chi jega'me ỹátaqta sa qoỹichoxodénaac da' qoỹalaat. 29Qana'chi ¿táalia'chi toqo' da' sa taỹapiilo 'adai'lídii' 'ami da' ỹátaqta 'eesa da' ỹágueegue qomle da' ne'uaxánaguec jega'me sega'me pétapiỹi so' lec'óxot ñi' Dios, qataxa ỹátaqta qaỹa 'te ga' ỹanaỹilo saua' letauo', qataxa ỹisouen so' lepaqal ñi' Dios 'me ỹauotec jega'me? Qá'a jesaua' letauo' naqaisaua saua' ỹátaqta 'eesa qa'en jeda'me ỹamaxataxac jeda'me chiỹoqóchiỹi da' ỹoqovíta qoỹin jen'me. 30Qo'mi saỹátenaq ñi' qadasoxola' 'eet'oi: “Jaỹim 'me na'chaỹim sé'et ga' ne'uaxánaguec ga' siỹaxaua, na'chaỹim 'me seseeténataxan.” Nataq'en 'eet'oi: “Jen' 'adasoxoládi, jen'me ỹiseeten qomle jen' lalémaxasetpi.” 31¡Ỹátaqta let'ádaic da' lichic da' louaq ñi' Dios 'me na'chi 'eeta't da' nec'alétaiỹi da' 'uootaxa 'uo ga' ỹaconé'uo!

32Qaláxasa 'ami 'aueenachii qomle da' 'éeta saua' 'uáudeegue 'uóidi joca'li 'ami ỹímta da' 'ami qoỹicoỹadelóo'te. Huá'a, qana'chi ỹátaqta 'uo da' 'aneuálaxainaxaquii da' 'an'queténaxaquii ỹasouaxat da' 'adelóquiaxaquii. 33Qá'a da' 'oñíita 'uo jen' qoỹisouéetac, qataxa qoỹauana'a't da' sa qoỹodiáquenaac, qataxa 'uo da' 'oñíita jen' neuána'uo da' ne'queténaxac jen' na'chi 'éet'ec dójo' da' ne'queténaxac qoỹin. 34Qataxa 'ami ỹátaqta 'uo da' 'adechoxodénataxanaxaquii jen'me qoỹicoñideta't, qataxa ỹivíd'a da' ỹátaqta 'uo da' 'antónaxaquii da' 'an'añaxachiiỹet da' qodeuootáxanec jen' 'adalémaxasichii, qá'a 'ami 'auaỹáchiñii da' 'uo jega'me huet'ague da' piỹem 'me ỹágueegue da' lodiac qataxa qaỹa 'te ga' loiquiaqa'. 35Chan'eesa qaỹo' qomle ga' 'ad'óitaaque, qá'a ỹátaqta let'ádaic qomle ga' 'anseeténataỹiquii. 36'Ami ỹiuen da' ỹátaqta 'uo ga' 'aneuálaxainaxaquii, da' qaidi 'av'íchii jega'me 'éetapeec ñi' Dios, qataxa da' qaidi 'auacoñiiỹet jega'me ỹaloxóotac jiñi'me. 37Qá'a naua' nidii's l'aqtaqa ñi' Dios 'eet'oi:

Ỹátaqta sa huaỹáloq da' janac qomle jega'me naỹa'quéna,

qataxa sa niỹáloxoden da' janac.

38Qaláxasa jega'me siỹamaxaden da' naqaiga ga' 'ónaxaic lasoxoc,

jega'me da' lec'alaxa chiỹaqaỹi da' lip'iỹáxac.

Qaláxasa jega'me da' 'uootaxa v'iỹílaq, sa siỹamaxaden jega'me.

39Qaláxasa qo'mi sa na'chiqo'mi da' s'iỹílaxasoq qataxa da' sega'me qo'mi qonoláxachidiñi. Na'chidato' da' qo'mi ỹátaqta 'uo da' qadip'iỹáxac qaidi qoỹiỹamaxat da' qad'óiỹaxac.

Currently Selected:

Hebreos 10: PLGNT93

Highlight

Copy