Hebreos 9

So' l'emec ñi' Dios jen' 'aléua qataxa jega'me net'ague da' piỹem

1Nataq'en jeso'me 'uáichiiñi ỹamaxataxac 'uo da' lasoxoc da' qoỹí'et da' qoỹi'ỹoxoden ñi' Dios, qaláxasa huáaue jega'me tamnaxaqui 'me néta'ña jen' 'aléua. 2Jeso'me tamnaxaqui joca'li qoỹí'et, qaa'le qoỹiỹamaxachíchiiñi da' n'onataguec jeso'me 'uáichiiñi nedáqa', lenaxat nemáqa' ỹoqovíta. Jeso'me nétaaue jaso' coỹadáxanaqtepi lase qataxa so' lemala't saua' pan 'me qoỹanoto ñi' Dios. 3Qaláxasa jeso'me lai so' napadénaxanaxat nataq'en 'uo so' laqáỹa nedáqa', lenaxat nedáqa' sa qoỹisetaxat. 4Qana'chi huétaaue jeso'me jaso' neco'ỹoxonaxalate 'oro. Jaso'me neco'ỹoxolate jen' nichinaxanaxat. Qataxa huétaaue jeso'me jaso' lai't da' ỹamaxataxac. Jaso'me qolapaxalégue ỹima jan' 'oro. Jaso'me na'chi huétaaue jaso' 'aleuole 'me huétanỹi jaso' pan, lenaxat jái'chana'manójo'. Nataq'en jeso'me lase'l joca'li so' Aarón 'me nolel joca'li qataxa saua' dos qadi 'me qoỹidelóo'te jeda'me ỹamaxataxac. 5Jeso'me p'áseguem jaso'me, na'chi netalóo'te saua' dos nadénaqtaqa siỹaxa'u 'me dasote'dot ñi' Dios. Saua' láua' jesaa'me na'chi ỹipelteetralégue jeso'me huá'a da' qoỹapalaxat jen' janoicpi. Qaláxasa qo'mi naỹi qaỹa 'te qadedáqa' da' qolqat'ot da' s'axátaqta ga' lasoxoc jeda'me.

6Naqaida da' 'éeta da' niỹamaqtaguec jeso'me 'emec. Qana'chi na' netaxaỹáxanaxanecpi v'iỹílaqtaaue naua' noloqo'te jeso'me 'uáichiiñi nedáqa', da' qaidi neuálaxai'ne' da' l'onataxanaxac da' qoỹi'ỹoxoden ñi' Dios. 7Qataxa so' laqáỹa p'áuo nedáqa', qaa'le na'chisóta jeso'me lasoxola' jen' netaxaỹáxanaxanecpi 'me ỹañoxot da' ỹinoxoneuó'o ga' 'oonolec nolo' di' huó'e. Qaláxasa da' ỹinoxoneuo, qana'chi ỹachítrauo naua' letauo' ga' síiỹac da' ỹaadéuo, da' qaidi qoỹapalaxat ga' mai'chi jaloic qataxa jen'me siỹaxadipi. 8Naqaida da' 'éeta so' Espíritu Santo da' qo'mi ỹ'axatema so' 'uáichiiñi nedáqa', da' maliaxa na'chi 'eeta't da' qod'onataxáatapegooue da' qoỹi'ỹoxodéetac ñi' Dios, qana'chi maliaxa da' sa qoỹ'ouáteuo so' nadíiuo 'me taỹá'uo so' laqáỹa nedáqa' 'me sa qoỹisetaxat. 9Ỹima dójo' 'ená'am da' 'chi naloqtenaxanaxat naỹi nauójo' souqataavlo noloqo'te. Qá'a jan' nachítaqtaxanaqte qataxa jen'me qoỹaneuo da' qoỹigóoue 'me huáaue jeso'me da' qoỹanot ñi' Dios, jenaa'me sa ỹañoxot da' ỹiỹamqáchiiñi qa'en da' laviliỹáxac jen'me siỹaxadipi 'me 'éet'ec dójo' da' ỹi'ỹoxoden ñi' Dios. 10Qá'a jeda'me na'chida da' 'chi ỹ'oqóchiỹi niqui'ỹáxac qataxa da' ỹómaxac qataxa da' ỹodapecachi niỹóxoc 'me 'chi lasoxoc da' qadó'oquiaxac, jeda'me ỹátaqta 'uo da' náỹi da' 'uootaxa maliaxa da' sa nadálaxat ga' lasoxoc ñi' Dios.

11Qaláxasa ma'le sóxote da' nóvi' so' Cristo, qana'chi naỹi jeso'me naqaiso so' 'oonolec qadetaxaỹáxanaxanec, da' qaidi qo'mi qoỹanema jen'me 'ónaxaic lasoxocpi 'me sóxote nóvi'. Jega'me tamnaxaqui 'me d'onataxáatapegooue da' netaxaỹáxanaxanec, jega'me ỹátaqta 'ónaxaic qataxa nalóchiiñi, sa 'ená'am jeso' 'uáichiiñi. Jega'me sa l'onatac ga' siỹaxaua, qataxa sa néta'ña jen' 'aléua. 12So' Cristo sóxote ỹinoxoneuó'o ga' nedáqa' 'me sa qoỹisetaxat, qaláxasa sa ỹaadéuo naua' letauo' ga' quétaq, 'uootaxa ga' huaca lec'óxot, qá'a na'chinaua naua' mai'chi letauo' naua' ỹaadéuo. Qana'chi naqaida da' 'éet'ec jeso'me 'oonolec da' p'áiỹi jeso' nedáqa', sa ỹiuen da' vi'ỹílaxalégue. Huá'a, qana'chi ỹa'uo da' qadec'alaxa qaỹa 'te loiquiaqa'. 13Qá'a naua' letauo' ga' huaca lec'óxot qataxa ga' quétaq lec'óxot qataxa jen' jálo da' qoỹigóoue jaga' huaca lec'oqte, jen'me ỹátaqta 'eesa da' 'uo da' l'añaxac da' ỹiỹo qataxa ỹoqovíta jen' p'áiỹi, da' qoỹiquetegaxalégue ga' siỹaxaua 'me 'ená'am da' paxáchiỹi. 14Qaláxasa da' na'chi 'éet'ec dójo', qana'chi ¡hua'ago' da' sa ỹágueegue da' l'añaxa'j saua' letauo' so' Cristo! Qá'a chiỹoqóchiỹi da' l'añaxac jeso'me nepaqal 'me qaỹa 'te loiquiaqa', so' Cristo mai'chi nañanot ñi' Dios, 'ená'am jaga' nachítaqtaxanaqte 'me ỹátaqta ỹoqovíta. Qana'chi naua' letauo' jeso'me ỹañoxot da' ỹiỹóỹi jen' qadauel jen' qadoicpi 'me taỹá'a da' neleuaxa, qaidi sañoxotaq da' s'onataxanoqot jiñi'me Dios 'me na'chi 'eeta't da' nec'alétaiỹi.

15Chan'eesa so' Jesucristo naqaiso jeso'me qo'mi detaqatapeelóo'te naỹi jeda'me dálaxaic ỹamaxataxac. Dójo' leleuaxa so' Cristo, jeda'me náỹi da' qaidi qoỹapalaxa't naa'me qadoico 'me huáaue so' 'uáichiiñi ỹamaxataxac, qataxa qaidi jen'me ỹiỹáxana jiñi'me ỹaqanatet da' ỹaconguet ga' ỹaloxóotac 'me qaỹa 'te loiquiaqa'. 16Qá'a da' 'uootaxa qoỹí'et jaga' nede 'me lemalate da' qoỹan ga' nalémaxaset, qaa'le ỹiuen da' qoỹ'axat da' leleuaxa jega'me ỹí'et, qaidi jaga'me nede ỹaqanatet da' ỹátaqta ỹipaquíchiỹi jega'me qoỹidelégue. 17Qá'a jaga'me lemalate da' qoỹan ga' nalémaxaset qaỹa 'te ga' nesáaque da' 'uootaxa maliaxa nec'alétaiỹi jega'me ỹí'et, na'chidáta da' 'uootaxa ma'le ỹivíta da' ỹileu jega'me. 18Chan'eesa jeso' 'uáichiiñi ỹamaxataxac joca'li qoỹí'et, qaa'le ỹiuen da' qoỹicodédeegue naua' netauo'. 19Qá'a so' Moisés joca'li ỹ'axatema naua' laqátaxaco ñi' Dios ỹima so' siỹaxadipi. Joca'li ỹim, qana'chi ỹacona so' n'aanaxate laỹoxot tóomaxadaic qataxa jan' lepee jan' 'epoqole lenaxat hisopo, qana'chi ỹisomñíiỹi saua' letauo' so' huaca lec'óxot qataxa so' quétaq lec'óxot 'me qoỹalectenguet jen' noxop. Ỹim, qana'chi ỹiquetegaxalóo'te saua' laqátaxaco ñi' Dios qataxa ỹima jen' siỹaxadipi. 20Qana'chi 'enapego' so' siỹaxadipi, 'enaaco': “Nauójo' netauo', jenaa'me naqainaua naua' ỹátaqta 'eesa qa'en dójo' niỹamaxataxac ñi' Dios da' 'ami niỹamaxade'to.” 21So' Moisés nataq'en ỹiquetegaxalégue joca'li so' tamnaxaqui qataxa jen'me qod'onataxáatapegapi naale da' qoỹí'et da' tamnaxac. 22Dójo' ladíquiaxac jen'me naqátaxacpi ỹ'axat qam da' ỹima jen'me qoỹ'étetacpi ỹiuen da' qoỹauót'ai naua' netauo' da' 'uo ga' qoỹin ỹoqovíta. Qataxa qaỹa ga' 'chi qoỹapalaxa't naua' loico, da' 'uootaxa sa qoỹicodédeegue naua' netauo'.

Da' nañan so' Cristo, jeda'me ỹapalaxat ga' janoic

23Naqaida da' 'éeta da' qoỹiuen da' 'uo ga' qoỹaneuo da' qoỹigóoue, qaidi qoỹin ỹoqovíta jen' noxosetpi 'me 'chi liquí'i jega'me huet'ague da' piỹem. Qaláxasa jen'me noxosetpi 'me huet'ague da' piỹem, jen'me nataq'en ỹiuen da' qoỹa'uo ga' qoỹan 'me napacalégue jénjo' qoỹáatapeeuopi naỹi da' qoỹigóoue. 24Qá'a so' Cristo sa ỹinoxonóoue so' tamnaxaqui 'me l'onatac jen' siỹaxadipi 'me 'chi liquí'i jega'me ỹátaqta 'eesa tamnaxaqui. Qá'a jeso'me na'chína na' piỹem 'me ỹinoxoneuó'o, da' qaidi dasouó'o ñi' Dios, da' qaidi qo'mi detaqatapeelóo'te. 25So' lasoxola' jen' letaxaỹáxanaxanecpi na' judiopi, jeso'me 'oonolec naale da' ỹinoxoneuó'o so' nedáqa' 'me sa qoỹisetaxat di' 'oonolec huó'e, qaidi ỹaneuo da' qoỹigóoue jan' netauo' 'me sa lalémaxaset. So' Cristo, qaa'le sa v'iỹílaqtalégue da' nañan. 26Qá'a da' 'uootaxa na'chi 'éet'ec dójo', qana'chi ỹátaqta jalcote toqo' da' qov'iỹílaxalégue da' qoỹalaat, chiỹoqóchii'ña joca'li ỹímta da' qoỹí'et jen' 'aléua. Qaláxasa naỹi da' ma'le ỹinoxóotraiỹi naua' noloqo'te, qana'chi so' Cristo 'oonolec da' naloxon, qana'chi sa v'iỹílaxalégue da' mai'chi nañan, da' qaidi naqat ỹima jen' janoicpi. 27Qana'chi dójo' 'éeta da' ỹima jen' siỹaxadipi da' 'oonolec da' ỹileu, ỹim, qana'chi ỹiuatet'aguet ga' nolo' qomle qonimit ỹimaquéna, 28qana'chida da' 'éeta nataq'en so' Cristo da' 'oonolec da' nañan, da' qaidi naqat jen'me jaloicpi jen' jalcote siỹaxadipi. Ỹim, qana'chi ỹitaxa naloxon qomle, qaláxasa sa naga qomle da' naqat jen' janoicpi, na'chidáta da' jeso'me naga da' nec'alaxatéegue jen'me ỹiuatétaaque jeso'me.

Currently Selected:

Hebreos 9: PLGNT93

Highlight

Copy