Hechos 6
6
Qoỹauo'oi saua' siete necochaxa'u
1Saa'me noloqo'te ỹátaqta nichígueegue da' jalcote na' d'amaqtenataxan. Chan'eesa na' judiopi 'me ỹaỹáte'n naua' l'aqtaqa na' griegopi, jen'me sa nodínapegue' na'me laỹi judiopi, qá'a na'me sa ỹilosa'aguet jan' p'aipi 'me ỹaỹáte'n naua' griego l'aqtaqa da' ỹivíta da' qoỹanéegue na' nalic di' nolo'. 2Chan'eesa saua' doce Jesús lamaxa's, saa'me ỹauóte so' lemáxa'j ỹima so'me 'amaqténataxanaxaicpi. Qana'chi 'enapega'to':
—Sa ỹiỹamaxañi da' qo'mi saxanaxañi da' s'axátaq da' l'aqtac ñi' Dios, qataxa qademelégue da' ỹ'oqóchiỹi niqui'ỹáxac. 3Chan'eesa 'ami qadaqáỹa', 'auloỹapiỹi qomle gaua' siete siỹaxa'u da' 'oñíita, gaa'me chi'ena nepe'e'te, qataxa 'uo da' ỹaỹáte'n, qataxa saqachiilo so' Espíritu Santo, qaama'le naqaigaua qomle 'me 'aupataqailóo'te da'me n'onataxanaxac. 4Qo'mi qana'chi qolqat'ot da' qantamnaxac qataxa da' qadapaxaguenataxanaxac da' l'aqtac ñi' qan'étoqo't.
5Ỹima jeso'me ỹiỹamaxadéeta da'me. Qana'chi qoỹaconé'uo so' Esteban, so'me ỹátaqta nesaqáchiỹi da' lip'iỹáxac qataxa so' Espíritu Santo. Qataxa qoỹacone'ualo saua' Felipe, Prócoro, Nicanor, Timón, Parmenas, qataxa so' Nicolás. So'me griego lé'ec 'me néta'ña di' Antioquía, qaláxasa joca'li ma'le ỹ'amaqten da' l'amaqténataxanaxac na' judiopi. 6Ca'li ỹim, qana'chi saa'me qonauee'ualo saua' Jesús lamaxa's, qana'chi qonetameelóo'te qataxa qouaseltalóo'te jesaa'me.
7Qana'chi da' l'aqtac ñi' Dios ỹátaqta laquétaiỹi qataxa di'me liiñi so' d'amaqtenataxan ỹátaqta nichíctaseguem di' Jerusalén, qataxa ỹivíd'a da' jalcote na' d'amaqtenataxan jen'me netaxaỹáxanaxanecpi da' qodosápegue' ñi' Dios 'me judío lé'ecpi.
Da'me necointáguec so' Esteban
8So' Esteban, jeso'me ỹátaqta saqáchiỹi da' lañoqtaxanaxac qataxa da' l'ágaxanataxanaxac ñi' Dios, so'me ỹ'e't naua' sa qoỹauanapegalo qataxa na' n'anecpi huáaue qa'en so' siỹaxadipi. 9Chan'eesa huo'oi saua' chiỹoqodá'a jega' lemáxaqui na' judiopi 'me qoỹimatá'ac lemáxaqui na' nelatacpi 'me qoỹisóiỹi. Qataxa so' laỹi 'uo na' chiỹaqá'a di' Cirene, qataxa di' Alejandría, qataxa di' Cilicia, qataxa di' 'aléua Asia. Qana'chi ỹima qonqolguétetapegue' so' Esteban. 10Qaláxasa sa qonalo'oguet so'me, qá'a da' detaqa, qana'chi da' laỹátenaxanaxac chiỹaqapecot so' Espíritu Santo. 11Chan'eesa so'me siỹaxadipi ỹauo'oi saua' ỹiseete'n, da' qaidi 'enapega't da' 'uo ga' naquiáxadee'gue ga' l'aqtac so'me da' ỹisouéetac so' Moisés qataxa ñi' Dios. 12Naqaida da' qoỹíit'ec da' qoỹ'iuoxonaqtet na' siỹaxadipi, qataxa na' nasoxonaqapi, qataxa na' dapaxaguenataxanapeec na' naqátaxacpi. Qana'chi ỹátaqta sa qoỹiỹáloxoden da' qoỹaconé'uo so' Esteban, qana'chi qoỹauée'uo so' net'alpi 'me ỹ'étac na' nasoxocpi. 13Qataxa qoỹauosa'ai saua' netaxaỹáxanaxanaqa laqáỹa' da' qaidi ỹ'axa't ga' sa 'eesa. Qana'chi saa'me 'enapega'to':
—Dójo' siỹaxaua, da'me ỹátaqta sa ỹaxañi da' nautéetapega jiñi' huosóta qantamnaxaqui di' Jerusalén qataxa na' laqátaxacpi so' Moisés. 14Qo'mi semacháqtapega da'me siỹaxaua da' ỹ'axátetac so' Jesús 'me Nazaret lé'ec, da' 'enaaco' noláxachiñi jiñi' huosóta qantamnaxaqui qataxa dálaxaic qa'en na' qan'onataguecpi 'me chiỹoqo'ot ca'li so' Moisés.
15Chan'eesa so'me net'alpi qataxa ỹima so'me laỹi 'me ñíchiiñi, ca'li qoỹilot'ot so' Esteban, qana'chi qoỹauáachiỹi na' latáxasoxoc da' ỹátaqta 'ená'am da' latáxasoxoc jen'me namaxasec piỹem lé'ecpi.
Currently Selected:
Hechos 6: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
