Hechos 5
5
Da' jaloi'j saua' Ananías qataxa jaso' Safira
1Qaláxasa so' siỹaxaua laqáỹa lenaxat Ananías qataxa jaso' loua Safira, saa'me ỹimen so' n'aléua'. 2Jeso'me siỹaxaua navíiñi jaso' laso'vi lai jeso'me l'acháqa', qana'chi ỹanoovlo jaso' lai saua' namaxa's, sega'me nalot'a't. Qataxa jaso' loua ỹima ỹaỹáten dójo'. 3Qaama'le so' Pedro 'enapéga so'me, 'enaaco':
—Ananías, ¿tá'nooqo'chi 'aunoxonaqtenóoue na' 'adauel so' paiỹac Satanás da' qaidi 'auqovin so' Espíritu Santo, qana'chi 'anavíiñi jaso' laso'vi lai so' 'ad'acháqa' 'me qoneuodéna? 4¿Qo'li sa 'adalémaxaset josomaxa 'aléua? Qá'a da'me 'aumen so'me, qana'chi ¿sa 'adalémaxasete jaso' laso'vi? ¿'Éeto' 'chi táchiỹi 'adauel da' 'aué'et dójo'? 'Am 'auqovin ñi' Dios, sa naqaiga ga' ỹ'oqóchiỹi siỹaxaua.
5Joca'li naquiáxanee'gue da'me dójo' so' Ananías, qana'chi hua'ndi, qana'chi ỹileu. Qana'chi jen'me ỹaỹáten da'me dójo', ỹima ỹátaqta jalcote da' loqolánaxa. 6Qana'chi janac saua' neso', qana'chi qolecoxogue jeso'me, qana'chi qoỹidóiỹi, qoỹisiiñi.
7Joca'li ma'le copát'a, qataxa nivídeuo jaso' loua. Jaso'me sa nóma dójo'. 8Qana'chi so' Pedro ỹinato' jaso'me, 'enaaco':
—Jaỹim 'auchoxotem. ¿Qo'li naqaso jaso' laso'vi ga'me 'ad'acháqadii 'me 'aumiñii jaso' 'andóiuo?
Qana'chi jaso'me ỹ'ato', 'enaac:
—Já'a, na'chaso.
9Qaama'le 'enaaco' so' Pedro:
—¿Tá'nooqo'chi 'auosíiỹapiỹi 'ami da' 'auqovíñii joca'li so' lepaqal ñi' Dios? Naỹi sóxote nivídedeuo naa'me ỹidódeegue da' ỹisiidíñi so' 'adoua. Qataxa naỹi nataq'en 'am qoỹidóiỹi.
10Huá'a, qana'chi jaso'me hua'ndi ỹileu, qana'chi ỹileuá'ña ga' huét'a so' Pedro. Ca'li nenoxodéuo saua' neso', qana'chi ỹilodalégue jaso'me, qataxa ỹidódeegue da' ỹisíidi'ña ga' lai di' loua. 11Qana'chi ỹima na' siỹaxadipi 'me 'amaqténataxanaxaicpi qataxa ỹima na' laỹi ca'li qonóm'a dójo', qana'chi ỹátaqta jalcote da' loqolánaxa.
Jalcote na' sa qoỹauanápiỹi qataxa na' n'anecpi
12Ỹátaqta jalcote na' n'anecpi qataxa na' sa qoỹauanápiỹi 'me ỹ'e't saua' namaxa's da' huáaue qa'en na' siỹaxadipi. Qataxa ỹima jen'me ỹimétapega't, huét'a ga'me qoỹimatá'ac nasoxoc so' Salomón. 13Qaláxasa 'uo na' siỹaxadipi laỹi 'me sa neuógooue jen'me ỹimétapega't, qaláxasa ỹima jen'me sa neuóiuo ỹátaqta ỹi'ỹoxodéetac jen'me. 14Qataxa ỹivíd'a da' ỹátaqta jalcote na' ỹ'amaqten so' qadesaliaxanec na' siỹaxadipi qataxa na' ỹauodipi. 15Qataxa cha ỹivíd'a da' qonauégueegue na' leuaxaicpi, qoỹipenapeelóo'te naua' l'ochaxala'te, qataxa naua' letala'te, da' qoỹipenapeguee'galo naua' nadíco, qaidi da' 'uo ga' tái'ỹa so' Pedro, qana'chi 'uootaxa 'chi lepaqal ga' talégue ga' 'oonolec jen'me leuaxaicpi. 16Nataq'en jen'me sa qaỹáaque noiqapiolec ỹátaqta jalcote na' janac siỹaxadipi da' nec'áta di' Jerusalén da' nedo't jen'me leuaxaicpi, qataxa jen'me 'uo na' lé'ec nataqtáqaic, qana'chi ỹima ỹiméegue qoỹin.
So' Pedro qataxa so' Juan qoỹicaat'ape
17Chan'eesa so'me let'a na' netaxaỹáxanaxanecpi qataxa na' lauegaqtac na' saduceopi 'me nauéctapegue' jeso'me ỹátaqta niquiỹa'alo saua' Jesús lamaxa's. 18Qana'chi ỹacoodé'uo saa'me da' ỹicoñi't, ỹaadáaue jaga' cointáxanaxaqui lat'édai. 19Qaláxasa 'uo so' lamaxasec piỹem lé'ec ñi' qadasoxola' ỹ'ouátreegue saua' naso'mi jaso' cointáxanaxaqui so'me pí'ỹaq, qana'chi ỹisodéegue saa'me. Qana'chi 'enapegalo, 'enaac:
20—Jamoỹi, 'auc'áchiỹa jiñi' tamnaxaqui. Huá'a, qataxa 'au'axáchiim ỹima na' siỹaxadipi da'me nec'alaxa dálaxaic.
21Joca'li naquiáxadee'gue dójo', qana'chi so' nolo' laqáỹa, qana'chi potrá'uo da' taidáaue jeso' tamnaxaqui, qataxa dapaxaguenataxat'ape.
Qaa'le so'me let'a na' netaxaỹáxanaxanecpi qataxa so'me lecochaxau'pi ỹa'uo so' lemáxac, ỹasoxona't na' net'alpi 'me ỹ'étac na' nasoxocpi. Da'me náaue da' janac ỹima na'me lasoxonecpi na' lec'óqo'te so' Israel. Qana'chi qodamaxasóxonee'galo saua' Jesús lamaxa's 'me nétraaue jaso' necointáxanaxaqui. 22Qaláxasa so'me huataxanaq lé'ecpi ca'li ỹivíde'uo jaso' necointáxanaxaqui, qana'chi sa qoỹauanalo saa'me. Qana'chi v'iỹíla', ỹáchi da'me nipí'ic, 23'enaac:
—Qo'mi sec'atenaqátac jañi' cointáxanaxaqui da' ỹátaqta qoỹapadíichiỹi, qataxa huo'oi daua' huataxanaq lase' 'me nouatoqo't naua' so'mi. Qaláxasa cana'le s'ouátaxauo, qana'chi ỹátaqta tóchiỹi na' lauel.
24Qana'chi joca'li naquiáxanee'gue dójo' so'me let'a na' netaxaỹáxanaxanecpi qataxa so'me let'a na'me ỹilápegue' so' tamnaxaqui, qataxa so'me lasoxola'pi na' netaxaỹáxanaxanecpi, qana'chi so'me nenada't ga'me 'éeta qomle ga' taiỹi ỹima da'me dójo'. 25Huá'a, qana'chi nivídeuo so' siỹaxaua, qana'chi d'aqtaxanem jeso'me, 'enaac:
—Daa'me siỹaxa'u 'me 'ami 'auañíidaaue jañi' cointáxanaxaqui, daa'me ỹitaxa huétr'a jiñi' tamnaxaqui, ỹapaxaguéetrac jen' siỹaxadipi.
26Chan'eesa so' let'a na' huataxanaq jec, nauécapegue' so' nesoxonaqapi da' nauéedeuo saa'me, qaláxasa sa ỹauáxanapeelóo'te saa'me, qá'a d'óita na' siỹaxadipi da' 'uootaxa qoỹasaxaque na' qa'. 27Joca'li nivídaxatreuo saa'me, qana'chi qoỹasoxona'agueta so'me net'alpi 'me ỹ'étac na' nasoxocpi. Qana'chi so'me let'a na' netaxaỹáxanaxanecpi 'enapegalo jesaa'me, 'enaac:
28—Qo'mi sóxote 'ami s'eláxataxama ca'li da' 'auapaxaguenataxañíỹic da' lenaxat so' Jesús. Qaláxasa ¿jái'chogamaxa 'éeta da'me 'av'íchii? 'Ami sóxote laguéegue ỹima na' Jerusalén da' 'adapaxaguenataxanaxaquii, qataxa sétaaque da' qo'mi 'aupolquiilóo'te da' leleuaxa jeso'me siỹaxaua da' qadasouaxac.
29Chan'eesa so' Pedro qataxa saua' laqáỹa' namaxa's 'enapega'to':
—Qo'mi ỹátaqta seuénaq da' cha'li soqochaxa ñi' Dios; ỹim, qaama'le jen' siỹaxadipi. 30Ñi'me netamnaxala' so' huá'au qadet'alpi, ñi'me 'me ỹitaxa nec'alaxadiséguem joca'li so' Jesús, so'me 'aualaachii joca'li, qataxa 'aup'iñiỹasée'mec jaso' nesodooso. 31Qaláxasa ñi' Dios ỹaueegue so'me di' piỹem, qana'chi ỹana'ague jen' ỹaỹáten, qataxa ỹanaỹi da' net'a qataxa qadec'alaxaqui. Qá'a ñi'me sétaaque da'me na' Israel lec'óqo'tepi da' ỹigue'm naua' loico, qaama'le qoỹapalaxa't naua' lesamaxataxaco. 32Naqaida 'me qo'mi s'axátaqtac, nataq'en ỹ'axátetac so' Espíritu Santo 'me Dios ỹanem ga'me ỹoqo'cha jiñi'me.
33Joca'li qodemachíỹa dójo', qana'chi so'me net'alpi ỹátaqta dalemata, qana'chi sétaaque qoỹalaa't saa'me. 34Qaláxasa so'me net'alpi ỹalquétaaue so'me chiỹaqáaue na' fariseopi, lenaxat Gamaliel. So'me dapaxaguenataxanapeec na' naqátaxacpi, chan'eesa ỹátaqta 'uo qoỹin da' 'enec. Qana'chi so'me nichaachiñi, qana'chi damaxasoxolóo'te da' cada'acolec da' qoỹauéedeegue saua' namaxa's. 35Joca'li ỹim, qaama'le 'enapéga so' net'alpi, 'enaac:
—'Ami Israel lé'ecpi, ma'chaxa 'avichiỹalóo'te qomle daa'me siỹaxa'u da' 'uo ga' 'aviñiit'eque. 36'Aueenachíiỹa da' 'uo so' nolo' ca'li nichaachiñi so' Teudas, qana'chi 'enapéga da' 'uo qoỹin da' 'enec, qana'chi ỹóvi' cuatrocientos so' siỹaxadipi 'me 'equegue so'me. Qaláxasa ca'li qoỹalaat, qana'chi ỹima so'me quétapegue' so'me nelágaxataac. Huá'a, qana'chi qaỹa da' l'onataxanaxac. 37Ca'li qaỹat'ague dójo', qana'chi ỹitaxa huétooue so' nolo' joca'li qoỹidíñi ỹima na' siỹaxadipi da' qonaloqtena't, qana'chi nichaachiñi so' Judas, Galilea lé'ec. Qanataxa 'ená'am ỹátaqta jalcote na' 'equegue so'me. Qaláxasa so'me nataq'en qoỹalaat, qana'chi laga't ỹima so'me quétapegue'. 38Chan'eesa 'ami n'óota da' 'amachiit'alo qomle jedaa'me siỹaxa'u, 'ená'te da' 'aualaachii'. Qá'a dójo' ỹ'étetrac qomle 'chi siỹaxaua ga' l'onataxanaxac, qana'chi qaỹa qomle. 39Qaláxasa qomle na'chiñi ñi' Dios da' chiỹoqo'ot, qana'chi 'ami sa 'auañoxochii da' 'anoláxachiiñi. 'Au'oiỹ'aguet qomle dójo'. Píiỹa, qomle 'ená'am da' 'adautéuai ñi'me Dios.
40Qana'chi ỹima ỹiỹamaxadéeta jeso' net'alpi da' 'enaac so'me Gamaliel. Qaama'le qoỹiỹáxanee'galo saua' Jesús lamaxa's, qana'chi qoỹi'uaxáat'ape qataxa qoỹ'iláxatema da' ỹ'axátetrac da' lenaxat so' Jesús. Ỹim, qana'chi qoỹisodéegue. 41Qana'chi saa'me Jesús lamaxa's chiỹoqótrooue so' net'alpi da' ỹátaqta 'uo da' lamai'j, qá'a ñi' Dios ỹaseet'ema saa'me da' 'uo da' ne'queténaxa'j, huasoidelégue da' lenaxat so' Jesús. 42Qana'chi saa'me quetr'ot da' dapaxaguenataxáatrapeec qataxa ỹ'axátetrac so' Jesucristo, ỹiméda naua' noloqo'te, da' huétr'a jeso' tamnaxaqui, 'uootaxa naua' n'acháqa'te.
Currently Selected:
Hechos 5: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
