Hechos 4
4
So' Pedro qataxa so' Juan qoỹasoxoda'aguet so' net'alpi
1So' Pedro qataxa so' Juan maliaxa d'aqtaxáatrapeguem so' siỹaxadipi, ca'li nividi't so'me letaxaỹáxanaxanecpi na' siỹaxadipi da' qodetaxaỹapégue' ñi' Dios, qonáictapegue' so'me let'a na'me ỹilápegue' jeso' tamnaxaqui qataxa na'me saduceopi. 2So'me net'alpi ỹátaqta dalemata, qá'a so' Pedro qataxa so' Juan ỹapaxaguéetrac na' siỹaxadipi, qataxa ỹ'axátrapeguem da' 'éeta da' ỹitaxa nec'aliséguem qomle na' siỹaxadipi, qá'a so' Jesús sóxote ỹitaxa qonec'alaxadiséguem. 3Chan'eesa qoỹauéedeuo saa'me da' qoỹicoñi't, qana'chi qoỹaadáaue jaso' necointáxanaxaqui. Chan'eesa qoỹipagaqteet'eguet so' nolo' laqáỹa, qá'a sóxote jávit. 4Qaláxasa ỹátaqta jalcote jeso'me naquiáxatapega so'me n'aqtaxanaxac, qana'chi d'amaqtenataxan. Qaa'le so'me dálaxaic d'amaqtenataxan tema'le ỹóvi' ga' cinco mil nedot'a't na' l'imdipi.
5So' ỹ'oxoñi, qana'chi 'uo so' lemáxac di' Jerusalén na'me let'alpi na' judiopi, dasoỹa't na'me ỹ'axaicáchiipi qataxa na'me dapaxaguenataxanapeec na' naqátaxacpi. 6Nataq'en ỹalquétauo so' Anás jeso'me let'a na'me lasoxola'pi na' netaxaỹáxanaxanecpi, qataxa so' Caifás, qataxa so' Juan, qataxa so' Alejandro, qataxa ỹima na'me mai'chi laqaỹasa so'me lasoxola'pi na' netaxaỹáxanaxanecpi. 7Qaama'le qodamaxasoxonalo da' qonaviidi't so' Pedro qataxa so' Juan. Qana'chi qonichaalataxadínỹi na' laiñi, qana'chi qoỹinatet'ape, qoỹinaac:
—¿Jái'chi ga'me lañoqtaxanaxac, 'uootaxa ga'me lenaxat da'me 'au'onataxañíitapega da' 'av'íchii dójo'?
8Chan'eesa 'enaac so' Pedro 'me ỹátaqta saqáchiỹi qa'en so' Espíritu Santo 'enaaco':
—'Ami 'me 'ami lasoxola'te na' siỹaxadipi, nataq'en 'ami lasoxonaqapi na' Israel lec'óqo'tepi, 9naỹi da'me 'aunachíitapeeque qo'mi ga' 'éeta da'me nó'in 'me qoỹ'étec da'me siỹaxaua 'me sa nó'in ca'li, da' qaidi 'auaỹáchiñiita ga'me 'éeta ga' lasoxoc joca'li n'óota. 10Naỹi 'ami sechoxotaxama, qaidi ỹaỹáteeta da'me ỹima na' lec'óqo'tepi so' Israel, da'me siỹaxaua 'me 'auloit'ot naỹi ỹátaqta n'óota. Da'me chiỹoxotaỹi da' lenaxat so' Jesucristo 'me Nazaret lé'ec, so'me 'auañiiuo jocalia'chi, qaláxasa ñi' Dios ỹitaxa nec'alaxadiséguem jeso'me. 11Jeso'me Jesús, na'chiso so'me qa' 'me 'ad'otáñiquii joca'li, 'ami 'me 'ami 'emec ló'olpi, qaláxasa naỹi na'chiso so' d'añiỹapeeguet qa'en ga' 'emec. 12Qaỹa 'te laqáỹa da' chiỹoqo'ot da' nec'alaxa. Qá'a ñi' Dios qaỹa 'te ga'me laqáỹa ga'me lenaxat da' qo'mi ỹanema jen' 'aléua, da' qaidi qo'mi nec'alaxatréegue.
13Mané'e ca'li so' net'alpi di'ỹoq qa'en da' so' Pedro qataxa so' Juan ỹátaqta sa d'oidalégue da' letaxaỹaxa'j, qataxa di'ỹoq da' saa'me sa paxaguenaxaiqa, qataxa naqáina na' siỹaxadipi 'me 'chi huosoxoic, qana'chi 'uo da' qoỹoqochi'ma. Qataxa qoỹaateto'n da' na'chisaua saua' náigaxa'u joca'li so' Jesús. 14Qataxa nataq'en so'me siỹaxaua 'me n'óota qoỹin sa qoỹoxó'ỹa, qana'chi sa qodiilégue nauel da' qoỹinapegalo saa'me. 15Chan'eesa qodamaxasoxolóo'te da' quéd'ai qoỹi'n so' nemáxac, qana'chi mai'chi p'aỹa't da' dosapega't. 16Qana'chi 'enapega'to' so'me net'alpi:
—¿Jái'chi ga'me 'éeta ga' senqat'eque daa'me siỹaxa'u? Qá'a sóxote ỹima na'me néta'ña di' Jerusalén ỹaỹáten da' ỹ'e't daa'me ga' n'anec 'me sa qoỹauanápiỹi, qataxa jeda'me sa soqolguétaq. 17Qaláxasa da' qaidi sa quéta da' ỹaỹáten na' siỹaxadipi dójo', n'óota da' sadénaqpegalo daa'me, qaidi naỹi na'chi táchii'ña da' 'ená'te 'uo ga' ỹ'axátrem da'me lenaxat so' Jesús.
18Qaama'le qoỹiỹáxanee'galo saa'me, qana'chi qoỹinapegalo da' na'chi táchii'ña da' l'aqtaxanaxa'j qataxa sa dapaxaguenataxadec da' lenaxat so' Jesús. 19Qaláxasa so' Pedro qataxa so' Juan 'enapega'to':
—Qamaa'chi táxa 'aueenachíiỹa ñi' Dios da' 'uootaxa ỹiỹamaxaden da' 'ami soqochaxalo, 'uootaxa soqochaxa ñi'me. 20Qá'a qo'mi sa saxanaxañi da' s'axátaqtac ga'me sauanáqchiỹi qataxa ga' ñaquiáxanaqchiỹi.
21Chan'eesa so' net'alpi ỹátaqta ỹadeetalóo'te saa'me, qaláxasa qoỹisodéegue. Qá'a sa qonata ga'me tauó'o da' qaidi qoỹi'uaxa'n, qá'a ỹima na' siỹaxadipi ỹátaqta ỹi'ỹoxodéetac ñi' Dios, qá'a ỹasouaxat da'me huánỹi. 22So'me siỹaxaua 'me chiỹoqóchiỹi da'me sa qoỹauanápiỹi 'me n'óota qoỹin, so'me sóxote napacalóo'te saua' cuarenta naua' 'uóidi da' ỹ'axaic.
So' 'amaqténataxanaxaicpi ỹiỹáxanaaque ga' l'añaxac da' qaidi sa dó'i
23So' Pedro qataxa so' Juan ca'li qoỹisodéegue, qana'chi saa'me ỹic'ádeta ga'me huét'a so'me mai'chi laỹi, qana'chi ỹ'axátetrapeguem so'me ỹima na' l'aqtacpi so' lasoxola'pi na' netaxaỹáxanaxanecpi qataxa so'me ỹ'axaicáchiipi. 24Qana'chi joca'li qonaquiáxanee'gue dójo', qana'chi ỹima da' qonetamenot ñi' Dios, qoỹinaac:
—'Am qadasoxola', 'am 'me na'chi'am 'ad'onatac na' piỹem, qataxa jen' 'aléua, qataxa jan' huaxai, qataxa ỹima na' huetalquéna. 25'Am 'auachiỹoxochichiỹi jocalia'chi so' Espíritu Santo da' ỹosáxanaxan so' 'adamaxasec David da' 'auenaac:
¿Tóoqo'chi na' ỹodapecachi siỹaxadipi 'chi ỹátaqta dalemata,
qataxa na' siỹaxadipi naua' leenataxaco qaỹa 'te naavlo?
26Na' net'alpi jen' 'aléua nichaada't,
qataxa na' lasoxola'pi na' siỹaxadipi ỹima'a't,
da' nauténa ñi' qadasoxola' Dios qataxa so'me lamaxasec net'a 'me qadec'alaxaqui.
27Qá'a ỹátaqta 'eesa ñi' net'a Herodes qataxa ñi' Poncio Pilato, naa'me ca'li ỹima'a't, huétr'a jen' noic let'ádaic, qoỹapeteneuo na'me chiỹaqáiỹi qataxa na'me mai'chi lec'óqo'te so' Israel, da' ỹima qonauténa so'me huosóta 'ac'óxot Jesús, 'me 'auanaỹi da' net'a 'me qadec'alaxaqui. 28Da'me ỹí'et jen'me ỹima da' tachiilo naa'me 'alapaxadíñi 'adeenataxaco ca'li maliaxa taỹá'a dójo'. 29Qataxa naỹi, 'am qadasoxola', ỹa 'auc'aten da'me qanadénaguec. Qana'chi qo'mi 'auanema ga' qad'añaxac, qo'mi 'me qo'mi 'adamaxa's, qaidi sa qad'oilégue da' s'axátaq da' 'ad'aqtac. 30Qataxa qo'mi 'auanema ga'me nañoqtaxanaxac, qaidi qo'mi n'óota qasenaq na' leuaxaicpi, qataxa da' s'odáqaiỹi na' né'ecpi qataxa na' sa qoỹauanápiỹi, da' s'euóxonaxa da' lenaxat so'me huosóta 'ac'óxot Jesús.
31Joca'li ỹim da' netamnaxac so'me 'amaqténataxanaxaicpi, qana'chi so' qouét'a ỹátaqta dachólaxan. Qana'chi so' Espíritu Santo ỹátaqta saqáchiỹi qa'en ỹima so'me siỹaxadipi. Huá'a, qana'chi sa qod'oilégue da' qoỹ'axat da' l'aqtac ñi' Dios.
Ỹima na' neuoxosetpi ỹátaqta qoneuochíichiỹi
32So'me jalcote siỹaxadipi 'me d'amaqtenataxan, jeso'me ỹima da' ỹátaqta 'oonolec da' leenataxac. Qaỹa 'te ga' 'enapéga mai'chi lalémaxaset ga'me huet'ot, na'chidáta da' ỹima qoneuochíichiỹi. 33Saua' namaxa's ỹátaqta 'uo da' l'añaxa'j, qana'chi quetr'ot da' ỹ'axátetr'ac da' sóxote ỹitaxa qonec'alaxadiséguem so' qadesaliaxanec Jesús, qana'chi ñi' Dios ỹanem let'ádaic da' neméỹaxac ỹima jeso'me. 34Huá'a, qana'chi qaỹa 'te ga' 'oonolec jeso'me da' deuénaxatapiỹe't. Qá'a ỹima jen'me 'uo jen' n'aléua qataxa jen' l'emec, qaláxasa ỹimen, qana'chi ỹaneuo jan' laso'vi, 35qana'chi qoỹanema saua' Jesús lamaxa's. Qana'chi saa'me ỹaadéegue, qoỹanem jen'me ỹátaqta 'eesása da' lovic. 36Qaa'le 'uo so' ỹalquétauo lenaxat José, 'me lañoqo' jaga' na'a't 'aléua lenaxat da' Chipre. So'me chiỹaqáaue na'me lecochaxau'pi na' netaxaỹáxanaxanecpi 'me lec'óqo'tepi so' Leví. Qaláxasa saua' namaxa's ỹaatec da' dálaxaic da' lenaxat Bernabé. Da'me náaue da' 'añaqtaxanaxaic. 37Jeso'me ỹimen so' n'aléua, qana'chi jaso' laso'vi qana'chi ỹanoovlo saua' Jesús lamaxa's.
Currently Selected:
Hechos 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
