Hechos 3
3
N'óota qoỹin so' l'íoxoic
1'Uo so' nolo', qana'chi so' Pedro qataxa so' Juan tadísee'ma jeso' tamnaxaqui let'ádaic jidi' Jerusalén, qaa'le ma'le dasíiñi jaso' c'atena, qá'a lalóqo' da' qolapaxañi da' tamnaxac. 2Qana'chi 'uo so' siỹaxaua 'me noloqo'te da' qonauéctapee'uo jeso' tamnaxaqui. Jeso'me nañáxat'ai da' l'íoxoic. Qana'chi so'me netaa'uet qoỹin so' som 'me lenaxat 'ónaxaic, qaidi so'me ỹaséltac jen'me ỹinoxótapeeuo. 3Jeso'me siỹaxaua joca'li ỹila'aguet so' Pedro qataxa so' Juan da' taidáaue jeso' tamnaxaqui, qana'chi ỹaselt'ape. 4Chan'eesa so' Pedro qataxa so' Juan ỹilóchidiỹi so'me. Qana'chi so' Pedro 'enapego' so'me, 'enaac:
—Péga, qo'mi 'auc'ate'n.
5So'me siỹaxaua 'uo da' n'añaxata't da' ỹilotaavlo saa'me, qá'a nip'itáxatapega taa'le 'uo ga' qoỹanem. 6Qaláxasa so' Pedro 'enapego' so'me, 'enaac:
—Jaỹim qaga 'te ỹimena. Qaláxasa da'me jaỹim huet'ot 'am sanem, 'enaac: 'Am sedolégue da' lenaxat so' Jesucristo 'me Nazaret lé'ec, 'am senapéga da' 'oñíseguem, 'aueuoỹapiỹe't.
7Chan'eesa so' Pedro ỹacona na' louaq 'me ỹaỹáten so'me, qana'chi nichaalataxañi. Huá'a, qana'chi d'ai'ñiilo naua' lichil qataxa naua' liquiỹóquenal jeso'me. 8Qana'chi so'me siỹaxaua ỹátaqta nep'átaxachiseguem da' nichaachiñi, qana'chi jec da' leuoxoc. Qana'chi coo'uelo saa'me da' tadóoue so' tamnaxaqui. Qana'chi 'éetapiỹe't mega, nasotétaseguem qataxa ỹi'ỹoxodéetac ñi' Dios. 9Qana'chi ỹima na' siỹaxadipi ỹauáachiỹi so'me da' 'éetapiỹe't mega qataxa ỹi'ỹoxodéetac ñi' Dios. 10Qataxa ỹima so' siỹaxadipi ỹátaqta ỹ'aalátapeec qataxa ỹoqo'chim da'me ỹauáachiỹi, qá'a ỹima da' qoỹaateton so'me siỹaxaua qataxa qoỹ'amaxac da' naqaiso 'me dasélaxatac naale netaa'uet ga' nasom so' tamnaxaqui 'me lenaxat 'ónaxaic.
Da' l'aqtaxanaxac so' Pedro ca'li huét'a ga'me qoỹimatá'ac nasoxoc so' Salomón
11So'me siỹaxaua 'me n'óota qoỹin, so'me qana'chi sa ỹiỹotréegue saua' Pedro qataxa so' Juan. Qana'chi ỹima na' siỹaxadipi naqalégoqo'ta ga' huétr'a saa'me 'me lenaxat Nasoxoc so' Salomón, qá'a ỹátaqta 'uo da' l'aalaxac. 12Qana'chi so' Pedro joca'li ỹilá'a dójo' noqochoxo, qana'chi 'enapego' so' siỹaxadipi, 'enaac:
—'Ami Israel lec'oqtepi, ¿'te 'eeto' 'chi ỹágueegue da' 'adoqchoqoi? ¿Tá'nooqo'chi qo'mi 'auloitaỹilo, sa na'chiqo'mi da' n'óota qasenaq da'me siỹaxaua, qataxa sa mai'chi qad'añaxac 'uootaxa ga' qad'amaqtenataxanaxac ñi' Dios ga' sedoxolégue da'me da' qaidi ỹiuo? 13Qaláxasa ñi' netamnaxala' so' huá'au qadet'a Abraham, qataxa so' Isaac, qataxa so' Jacob, ñi'me 'me ỹanem da' let'ádaic 'enec so' lec'óxot Jesús, jeso'me 'ami 'auañiiuó'o josii'chi na' net'alpi. Qataxa so' net'a Pilato ca'li sétaaque da' ỹisóiỹi, qaláxasa 'ami sa 'aviỹamaxadíñii. 14Taichaqai'me 'aviỹáxañii'uo da' qoỹisóiỹi so' siỹaxaua 'me huesóta qataxa 'ónaxaicaloic. Qaama'te 'ami 'aviỹáxañii'uo da' qoỹisóiỹi so'me laataxanaxaic. 15Naqaida 'me 'oñíit'ec da' 'aualaachii so'me ỹauáaque n'óiỹaxac. Qaláxasa ñi'me Dios ỹitaxa nec'alaxadiséguem so'me, qana'chi ỹima dójo' qo'mi sauanáqchiỹi. 16Na'chida da'me lenaxat so'me Jesús, da' 'uootaxa qop'iỹá'a da' lenaxat so'me, da'me 'me chiỹoxotaỹi da' l'añaxac da'me siỹaxaua 'me 'auañíichiỹi qataxa 'ad'oỹaxáchii. Jeda'me 'éeta da' qop'iỹá'a so' Jesús, na'chida 'me 'en ỹátaqta nalóchiiñi da' n'óota da'me siỹaxaua 'me ỹima da' 'oñíita 'auloit'ot.
17Qaláxasa jaỹim saỹáten, 'ami ỹaqáỹa', da' joca'li 'ami qataxa na'me 'adasoxolá'aipi 'aualaachii so' Jesús, qá'a sa ỹátaqta 'auaỹáchiñii da'me 'av'íchiitac. 18Qaláxasa da'me ỹátaqta tachiilo naa'me 'enapegalo ñi' Dios joca'li ỹosáxanaxan so' l'aqtáxanaxanecpi da' 'enaac: “Ga'me samaq net'a 'me nec'alaxaqui, ga'me ỹátaqta 'uo qomle da' ne'queténaxac.” 19Chan'eesa 'aviimi' qomle naua' 'adoicódii', qaama'le 'av'iỹílaqaiỹa ñi' Dios, qaidi ỹapalaxa't naua' 'adoicódii'. Qaidi ñi' qadasoxola' Dios ma'le 'ami ỹanema gaua' noloqo'te da' 'aulaquíitapiiñi. 20Qataxa qonamaxalo 'ami so' Jesús 'me net'a qadec'alaxaqui, so'me chi'ena jocalia'chi da' sétaaque da' 'adec'alaxaquii. 21Temaqaidi da'me naỹi so' Jesucristo maliaxa net'ague da' piỹem, sa taỹa'ague qomle ỹivíta ga' nolo' da' ñi' Dios nadálaxat ỹima na' l'onataxanaxacpi, qá'a ñi'me naqaida da'me 'éetapeec joca'li dosóoue so'me huá'au letaxaỹáxanaxanecpi 'me huosóta. 22Qá'a so'me Moisés naqaida da'me 'enaac joca'li 'éetapega so'me huá'au qadet'alpi: “Ñi' Dios 'me qadasoxola', ñi'me 'me 'ami namaxalo qomle ga' l'aqtáxanaxanec. Ga'me mai'chi 'ami chiỹoqotoovlo 'adaqaỹai. Ga'me 'ená'am jaỹim qomle da' 'ami qonamaxalo. Chan'eesa ỹátaqta 'auqochíiỹa ga'me qomle ga'me 'enaac. 23Qá'a ỹima qomle na' sa ỹoqo'cha ga'me, qana'chi qoỹiỹotái'ỹa na' lec'óqo'tepi so' Israel, qaama'le qoỹalaat.”
24Qá'a ỹima so'me huá'au n'aqtáxanaxanecpi, chiỹoqóchii'ña so' Samuel qataxa janac so' laỹi, qana'chi ỹima qoỹ'axat'aita naa'me noloqo'te 'me souqataavlo. 25Da'me ỹaloxóotac joca'li ñi' Dios da' ỹan, 'me ỹosáxanaxanec so' l'aqtáxanaxanecpi, da'me mai'chi 'adalémaxasichii. Qataxa ñi'me ỹí'et da' sétaaque 'adiỹamqáichiiñi jocalia'chi niỹamaxá'te' so'me huá'au qadet'alpi, joca'li 'enapéga so' Abraham, 'enaac: “Ỹima qomle na' ỹodapecachi siỹaxadipi 'me netalégue jen' 'aléua 'uo da' neméỹaxac, ỹachiỹoxotaỹi ga'me 'ac'óqo'tepi.” 26Chan'eesa ñi' Dios ca'li ỹitaxa nec'alaxadiséguem so' lec'óxot Jesús, qana'chi 'uáichidiñi da' 'ami ỹamaxalo, da' qaidi 'ami ỹanema ga' nó'in 'adadíquiaxaquii, qaidi ñi' 'oonolec da' 'oñíita ỹiguem da' loic.
Currently Selected:
Hechos 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
