Hechos 2

Ca'li nóvi' so' Espíritu Santo

1Joca'li ỹivíta so' nolo', lenaxat Pentecostés, qana'chi ỹima so' 'amaqténataxanaxaicpi ỹima'a't ga' qouét'a. 2Qana'chi nepeláxateta da' qodemachíỹa so' nalimáxa let'ádaic chimaqpecot di' piỹem, 'ená'am na' lesamaxa na' laỹat let'ádaic, ỹátaqta ỹalimaqtet ga'me 'emec 'me qonétaaue. 3Huá'a, qana'chi di'ỹoq so' nacháxatpi, 'ená'am na' dóle' lauaq, qana'chi ta'nỹet na' 'oonolqat'ape jeso'me siỹaxadipi. 4Qana'chi ỹima jeso'me ỹátaqta saqáchiỹi qa'en so' Espíritu Santo. Huá'a, qana'chi dosiilo naua' ỹoda'alo n'aqtaqa 'me ỹanema so' nepaqal.

5Qaa'le saua' noloqo'te di' Jerusalén 'uo so' judiopi 'me chiỹoxoguelo ỹiméda naua' lail jen' 'aléua. Jeso'me quetalégue da' l'amaqténataxanaxac. 6Qana'chi joca'li qodemachíỹa so'me nalimáxa, qana'chi taỹa't ỹima so' siỹaxadipi, qana'chi ỹátaqta sa naỹáten ga' leenataxac ỹasouaxat da' demachítapega ñi' 'oonolec da' qodosiilo naua' mai'chi l'aqtaqa. 7Qana'chi ỹátaqta 'uo da' l'aalaxac qataxa da' loqochoxo, qana'chi mai'chi dosétapega't 'enaac:

—¿Qo'li sa Galilea lé'ecpi ỹima jen'me dosétac? 8¿Jái'te 'eeto' 'chi semacháqtapegalo qo'mi naua' mai'chi qadalémaxase'te qad'aqtaqa da' nasaqátrapegueegue? 9Qá'a qo'mi 'uo na' chiỹaqá'a di' Partia, qataxa da' Media, qataxa da' Elam, qataxa da' Mesopotamia, qataxa Judea, qataxa da' Capadocia, qataxa da' Ponto, qataxa di' 'aléua Asia, 10qataxa da' Frigia, qataxa da' Panfilia, qataxa da' Egipto, qataxa da'me lai di' Cirene 'me Africa, qataxa nataq'en 'uo na' chiỹaqá'a da' Roma 'me huet'éna. 'Uo jen' chiỹoxotáuo da' judío lec'óxot, qataxa 'uo na' sa judío lé'ec, qaláxasa quelégue da' l'amaqténataxanaxac jen'me. 11Qataxa 'uo nataq'en na' chiỹoxogue da' Creta, qataxa di' Arabia. Qaláxasa ỹima da' losáxac qo'mi semacháqtapega da' qoỹ'axátetac naua' ỹ'étet'ape ñi' Dios 'me qaỹa 'te 'ena'ama qoỹi'n naua' mai'chi qad'aqtaqa.

12Qaa'le jeso'me ỹátaqta 'uo da' l'aalaxac qataxa sa ỹaỹáten ga' 'éeta ga' leenataxac. Qana'chi mai'chi nenatétapega't, 'enaac:

—¿Jái'te 'éeta ga'me lasoxoc ỹima da'me dójo'?

13Qaláxasa 'uo na' laỹi 'me de'uenáxatac, qana'chi 'enaac:

—Jen'me taxaicpi.

Da'me 'enaac so' Pedro ca'li d'aqtaxanem so' siỹaxadipi

14Chan'eesa so' Pedro nichaata'to saua' laqáỹa' once namaxa's, qana'chi ỹátaqta netenque naua' l'aqtaqa ca'li dose, 'enaac:

—'Ami Judea lase' qataxa ỹima na'me néta'ña jen' Jerusalén, 'ami sétaaque da' 'auaỹáchiñii da'me dójo', píiỹa, 'anaquiáxañiichiỹi da'me senaac. 15Jénjo' siỹaxadipi sa taxaicpi, sa naqaida da' 'adeenataxaquii, qá'a ỹímta ma'le qaỹat'ague jañi' c'atena. 16Qá'a da'me 'auañíichiỹi naỹi, naqaida da'me ỹ'axátet'aguet joca'li so' l'aqtáxanaxanec ñi' Dios, lenaxat Joel, ca'li 'enaac:

17Ñi' Dios 'enaac: gaua' p'átreegue noloqo'te,

qana'chi ñanacot ñi' ỹipaqal da' sanem ỹima na' siỹaxadipi;

qana'chi na' nec'oqtepi qataxa jan' nec'oqtepi, ỹ'axa't qomle naua' ỹ'aqtaqa,

na' soxodipi di'ỹo't naua' lauanáxanaxaco jaỹim chiỹoqodápecot,

qataxa na' ỹ'axaicáchiipi huo'oi naua' lichoxonaxaco.

18Gaa'me noloqo'te, qana'chi jaỹim ñanacot qomle ñi' ỹipaqal,

qana'chi sanem na' ỹamaxa'spi qataxa jan' ỹamaxasepi,

huá'a qomle, qana'chi ỹ'axa't naua' ỹ'aqtaqa.

19Sacho'ot na' piỹem da' saloxon ga' ỹa'uo n'aalaxac,

qataxa jen' 'aléua sa'uo na' n'anecpi:

netauo', dóle', nichaxa let'ádaic.

20'Om jañi' c'atena,

ñi' 'auóxoic 'ená'am jaga' netauo',

qom'chi ỹamtaa'le ỹivíta ga' nolo' 'me livídaxaqui ñi' qadasoxola' Dios.

Ga'me nolo' ỹátaqta qaỹa 'te 'ená'am da' lichic qataxa da' li'ỹoxodic.

21Qana'chi ỹima na' liỹáxanaxat da' lenaxat ñi' qadasoxola',

jen'me qonec'alaxatéegue.

22Píiỹa, 'ami Israel lec'oqtepi, 'anaquiáxañiỹa da'me senaac: So' Jesús 'me Nazaret lé'ec, so'me ỹátaqta ỹáateegue da' 'eesa lamaxasec ñi' Dios. 'Ami 'auañíichiỹi ca'li so'me da' ỹ'e't naa'me n'aalaxaco qataxa naa'me sa qoỹauanapiilo qataxa na' n'anecpi 'me huaavlo 'ami da' ỹ'e't qa'e'n ñi' Dios jeso'me. 'Ami sóxote da' 'auaỹáchiñiita da'me. 23Qaláxasa taqadíta joca'li 'ami qoỹanoovlo, qaidi ỹipaquichiilo naa'me 'éetapeeque 'me lapaqátrañi ñi' Dios ca'li maliaxa sa ỹivíta dójo'. 'Ami josii'chi 'auacoñíi'uo jeso'me da' 'aucondíỹi, qataxa 'aualaachii, qataxa 'aviñii ỹip'enaséguem jen'me siỹaxadipi 'me sa ỹataxalégue. 24Qaláxasa ñi' Dios nec'alaxadiséguem jeso'me. Huesoỹi qa'en da' lañoqtaxanaxac da' neleuaxa, qá'a da' neleuaxa sa ỹañoxot da' ỹipatáqtañi so'me. 25Qá'a so' net'a David nataq'en ỹ'axátet'a so' Jesús joca'li, 'enaac:

Jaỹim na'chi 'eeta't da' selót'a ñi' qadasoxola';

ñi'me huét'a na' saỹáten, qaidi qaỹa 'te ga' jaỹim ỹadiỹot.

26Chan'eesa ỹátaqta nesaxáỹi jañi' ỹiquidiaqte da' ñitónaxac,

qataxa naua' ỹosáxaco na'chinaua naua' ỹamaico.

Chan'eesa nataq'en da' ỹapáchiỹaxac da' ỹivíta da' nematéegue, qaláxasa sa s'óitac.

27Qá'a 'am sa 'aviimá'ña so' ỹipaqal ga'me loda' na' napa'lpi,

qataxa sa 'auasenem da' noláiñi da' lapáchiỹaxac jen'me 'adamaxasec 'me 'adauotaxat.

28Qataxa jaỹim 'aualoxónỹi so' nadic 'me nec'alaxa,

qataxa ỹátaqta jaỹim saqáchiỹi da' ñitónaxac, qá'a jaỹim 'ouet'aguet.

29'Ami ỹaqai'ỹolqa, 'ami 'auaỹáchiñiita so' huá'au qadet'a David, ca'li ỹileu, qana'chi qoỹisiiñi, qá'a sa pal jañi' napalénaqa' lai't maliaxa di'ỹoq. 30Qaláxasa so' David, so'me Dios l'aqtáxanaxanec. Qataxa jeso'me ỹaỹáten da' Dios ỹanem da' l'aqtac so'me da' 'enapéga ỹipaquíchiỹi, ga' 'oonolec jen'me lec'óqo'tepi, 'me naqaiga net'a 'me qadec'alaxaqui, qataxa na'chiga 'me qoỹin náỹi da' l'onataxanaxac so'me da' net'a. 31Chan'eesa so' David sega'me chi'ena da' ỹilot'ot so'me joca'li, qana'chi ỹ'axátet'a da' ỹitaxa qonec'alaxadiséguem qomle so'me net'a 'me qadec'alaxaqui, qataxa so' lepaqal sa qoỹiimá'ña ga' loda' na' napa'lpi, qataxa da' lapáchiỹaxac sa 'chi doláchiiñi qoỹin. 32Chan'eesa ñi' Dios ỹitaxa nec'alaxadiséguem so'me Jesús. Qataxa ỹima da' senqáta sauanáqchiỹi da'me dójo'. 33Chan'eesa ñi' Dios ỹaueegue da' piỹem, ỹacoosop qa'en jen' louaq 'me ỹaỹáten. Huá'a, qaama'le ỹaconeguet so' Espíritu Santo 'me ỹ'axatema joca'li ñi' let'a da' ỹanem. Qana'chi ỹima da'me dójo' 'me 'auañíichiỹi qataxa 'anaquiáxañiichiỹi, jeda'me chiỹoqo'ot jeso'me. 34Qá'a so' David sa na'chiso 'me taiỹi da' piỹem. Qá'a so'me 'enaaco':

Ñi' qadasoxola' Dios, 'enapéga ñi' ỹasoxola', 'enaac:

“'Ona'ague qomle na' saỹáten,

35cha ỹivíd'a qomle sacho'to naua' 'adapia'te jen'me 'anp'aguénoqo'tpi.”

36Chan'eesa ỹima na' lec'óqo'tepi so' Israel ỹátaqta ỹiuen da' ỹaỹáteeta da'me dójo', qá'a so'me Jesús 'me 'ap'iñiỹaséguem ca'li, naqaiso so'me ỹanaỹi ñi' Dios da' qadasoxola' qataxa net'a qadec'alaxaqui.

37Qana'chi so' siỹaxadipi ca'li naquiáxanee'gue da' dójo', qana'chi ỹátaqta liichiilo naua' lai'li. Qana'chi qoỹinatétac so' Pedro qataxa saua' namaxasóxo'u, 'enapega'to':

—'Ami qadaqáỹa', naỹi ¿jái'chi 'éeta ga' senqáta?

38Qaama'le so' Pedro 'enapego' jeso'me siỹaxadipi, 'enaaco':

—'Aviimi' qomle naua' 'adoicódii' da' 'auasoiỹot ñi' Dios, qana'chi 'ami qonachiláxa'n, qodachiláxanataxana da' lenaxat so' Jesucristo, qaidi ñi' Dios ỹapalaxa't naua' 'adoicódii', qataxa 'ami ỹanema ga' Espíritu Santo. 39Qá'a da'me 'ami qoỹ'axatet'ama joca'li, da'me mai'chi 'adalémaxasichii qataxa jen'me 'ac'óqo'tepii qataxa ỹima naua' qaỹa'alo jen' siỹaxadipi. Qá'a da'me sétaaque da' taỹot jen'me ỹiỹáxana ñi'me qadet'a Dios 'me qadasoxola'.

40Jenaua naa'me 'enapegalo so' Pedro, qataxa 'uo na' l'aqtac laỹi da' 'éetapega so' siỹaxadipi, 'enaac:

—'Anélotaxañiiỹet qomle ga' natalégue ne'uaxánaguec na' siỹaxadipi 'me sómaicpi, qaidi 'adec'aliỹíiỹi.

41Huá'a, qana'chi na' ỹoqo'cha da' l'aqtac so' Pedro, qana'chi qonachiláxan. Qana'chi jeso'me nolo' nichíỹiỹi na' 'amaqténataxanaxaicpi, qam da' ỹóvi' tres mil so' siỹaxadipi dálaxaicpi. 42Qaa'le ỹima so' siỹaxadipi ỹátaqta quetelóo'te naua' lapaxaguenataxanaxaco saa'me namaxa's, qataxa ỹátaqta nauoda't, qataxa netaméetac, qataxa da' dequé'e, qana'chi ỹima'a't.

Da' lasoxoc so' 'uáichiiñi 'amaqténataxanaxaicpi

43Ỹátaqta 'uo da' l'aalaxac ỹima na' siỹaxadipi, qá'a saua' namaxa's jalcote na' ỹ'e't n'anecpi qataxa jen'me sa qoỹauanápiỹi. 44Ỹima na' 'amaqténataxanaxaicpi ỹátaqta 'oonolec da' lasoxoc, qataxa ỹima na' loxosetpi ỹátaqta neuochíichiỹi; 45'uo na' ỹimen na' n'atet, qataxa ỹima na' leuoxosetpi, chan'eesa jan' laso'vi qana'chi ỹanem ga' laqáỹa, ỹátaqta jen' ỹiuéetaaque ñi' 'oonolec. 46Qana'chi ỹiméda naua' noloqo'te ỹimétapega't, qouét'a jega' tamnaxaqui, qataxa da' qouet'alo naua' n'acháqa'te qana'chi neuan'a't, ỹátaqta mátac qataxa qaỹa 'te pagaxalaic. 47Qana'chi qoỹi'ỹoxodéetac ñi' Dios, qataxa ỹima na' siỹaxadipi ỹátaqta sa qolate't saa'me. Chan'eesa so' qadesaliaxanec Jesús nichíỹaxatetaiỹi ỹiméda naua' noloqo'te na' 'amaqténataxanaxaicpi 'me qonec'alaxatéegue.

Currently Selected:

Hechos 2: PLGNT93

Highlight

Copy