Matayo 19

1 # Mk 10:1-12. Kosodi kanen nakedaunia Yesu akiro ŋun, konyou koGalilaya, kodol oikorun luka Yudaya okekwa Yorodan. #Mat 7:28; 11:1; 13:53; 26:1. 2Kotupasi ikodeta luipu; kitaŋaleu kes kaŋina.

3 # Mat 5:31,32. Kopotu Iparisayon mama ejai kocodut, kotemasi atiar, “Ibus kereka etuŋanan ainyein akeberu kanuka akirot kere?” 4#Age 1:27; 5:2. Koboŋok kotema kes atiar, “Mam isomenenete ebe Lokesubi kes kageunet abu kosub kes yenikiliokit, ka yeniberu. 5#Age 2:24; Pes 5:31. Kotema atiar, ‘Kanuka ŋun inyeini etuŋanan papake ka totoke kirotakinos kakeberu, ŋul luarei eraunos adiopetekuan’? 6#1 Kor 7:10,11. Aso mam bobo eraas iarei dimarai adiopetekuan. Aso lukimorikikini Edeke, kinyek ituŋanan aitiak.” 7#Ikis 24:1-4; Mat 5:31. Kotemasi ŋes atiar, “Aso do kanukinyo kicorakinia Musa ainakin ebalua loka atiak, ka ainyein?” 8Kotema atiar, “Kanuka aninik naka ikusitauon abu Musa kocam yes ainyein akusiŋor, konye ameun kageunet mam arai kwaŋin. 9#Mat 5:32; 1 Kor 7:10-11; Luk 16:18. Katemari yes atiar, Ŋolituŋanan loinyeini akeberu dimarai kanuka aelo, komany ace, adotiar; ŋol da loemanyi nakinyeinio adotiar.”

10Kobalasi ikesisiak ŋes ebe, “Arai ikote nen akiro nuka etuŋanan ka akeberu, emamei ajokis aimany.” 11#1 Kor 7:7,17. Konye kotema kes atiar, “Mam ituŋa kere epedorete acamun akirot ŋin, dimarai ŋul lueinakinitai. 12Naarai ejaas ibwacin lukeurio kopone kaŋol ameun kakoikes nuka nukatotokec; bobo da ejaas ibwacin lukidoŋete ituŋa; bobo da ejaas ibwacin lukibwaciikinete kanuka ajakanut naka akuj, ŋol da loepedori acamun akirot na, kocam.”

13 # Mk 10:13-16; Luk 18:15-17. Kosodete koinutu idwe ludidik tetere idokokini akaninike ka ailipakin kes. Koriemeriemata ikesisiak ituŋa. 14#Mat 18:2,3. Konye kobala Yesu ebe, “Kocamutu idwe ludidik kopotu mama ajai, kwabo sirikisimika kes; naarai lueputos kaŋul ajakanut naka akuj erai nakec.” 15Kidokok kes akekanin, konyou kaŋina.

16 # Mk 10:17-31; Luk 18:18-30. Ido koany, kobu ece mamakeŋ, kotema atiar, “Ekesisianakinan, kebusakinit aswam akirot anyoin naejok, tetere adumuni aijar naka ikar kere?” 17#Luk 10:26-28. Kotema ŋes atiar, “Kanukinyo kiŋisia eoŋ nuka ajokis? Ejai ediopet loerai loejok. Konye arai ikoto alomar aijar, koricite ikisila.” 18#Any 20:13-16; Ikis 5:17-20. Kotema atiar, “Alu?” Kotema Yesu atiar, “Siriari, Siridote, Sirikokoi, Sirisabanakinenei, 19#Any 20:12; Ikis 5:16; Leb 19:18. Koyoŋitenenei papakon ka totokon, Komina da ikoniidunyet kwape iminar bon.” 20Kobala etelepat ebe, “Aricit ŋul kere; inyo eriŋa kaolikinit bobo?” 21#Mat 6:20; Luk 12:33. Kotema Yesu ŋes atiar, “Arai ikoto araun loitekoro, kolot, kogwela kere luijaatar, kokoranak lukican, ijaunete kabar toma akuj; kosodi kobu kotup eoŋ.” 22#Sab 62:10. Nakiiraria etelepat ŋun kolot itururwei; naarai kejaas iboro luipu.

23Kotema Yesu ikekesisiak atiar, “Abeit katemari yes atiar, etionikini ekabaran alomar toma ajakanut naka akuj. 24Katemari bobo atiar, Epatanikinit akaala aitor apedot naka ekus itia ekabaran alomar ajakanut naka Edeke.” 25Nakiirariata ikesisiak ŋun koumokis noi, kotemasi atiar, “Aso iŋai bo do epedori aitajario?” 26#Age 18:14; Yob 42:2; Sek 8:6. Konye kosesen Yesu kes, kotema atiar, “Mam epedorio akiro ŋun kotuŋa, konye kama ejai Edeke epedoros kere.” 27Kosodi koboŋok Petero kotema Yesu atiar, “Koany, kipou isio kenyeis kere katuputu jo. Inyoin bo do kidumuni?” 28#Mat 25:31; Luk 22:30; Dan 7:9,10. Kotema Yesu kes atiar, “Abeit, katemari yes atiar, kotoma akwap nakitetet naiboikinor Okoku loka etuŋanan oicoloŋ loka aibusesuke, yes da lukiitupunete eoŋ iboikinos toma oicoloŋo itomon ka luarei, itubokinete atekerin atomon ka nuarei nuka Isirael. 29#Bur 10:34. Ŋinituŋanan yenikinyeini itogoi, arai iinacan, arai ainacan, arai papa arai toto, arai idwe arai amanat, kanuka ekakiror, edumuni irwan akwatat ka airum da aijar naka ikar kere. 30#Mat 20:16; Luk 13:30. Konye luipu lueraas lusodit eraunete lukawasia, ka lukawasia da eraunete lusodit.”

Currently Selected:

Matayo 19: AOV1961

Highlight

Copy