Matayo 17

1 # 2 Pet 1:17-18. Ketuboros apaarasia akanykape abu Yesu koyaŋa Petero ka Yakob ka Yokana onaceke, kogitaros bonik, kitodoka ŋesi kes oroŋat loeoja.

2 # 2 Pet 1:16-18. Kituluor kakonyenekec, koiriir ekereet kwape kakoloŋ, kokwaŋuut akenapito kwape kaica. 3Ido koany, kitakanikinos Musa ka Eliya, inerasi kaŋes. 4Koboŋok Petero kotema Yesu atiar, “Ejakait, ejok oni ajaut ne; arai ikoto, eswami ne iswamin iuni, ediopet lokon, ediopet loka Musa, ka ediopet da loka Eliya.” 5#Age 22:2; Ikis 18:15; Sab 2:7; Isa 42:1; Mat 3:17; 12:18; Mk 1:11; Luk 3:22. Napekinerar ŋun, koany, kiteribo kes edou loemilia; ido koany, kolom eporoto kotoma odou kobala ebe, “Lo ŋes Okokuka lominat, loalelakinit noi; kiirasi ŋes.” 6Nakiirariata ikesisiak ŋun, kibiroros ebuburia, kokuriakaros noi. 7Kobu Yesu kotiro kes, kotema atiar, “Konyoutu, sirikikuriakaros.” 8Kikeutu akecekonye, mam eanyuna ituŋanan dimarai Yesu bon.

9 # Mat 16:20. Napedokunete koroŋat, kicorak Yesu kes kotema atiar, “Sirikilimokis idiotuŋanan kere nuianyut, aitodol naejarunia Okoku loka etuŋanan kotoma okatwak.” 10#Mal 4:5; Mat 11:14. Kiŋita ikekesisiak ebe, “Aso kanukinyo ineratar ikewadikak ebe, ibusakinit ber Eliya aige abunore?” 11Koboŋok ŋesi ebe, “Abeit ebunit ber Eliya, itemokini ŋesi kere: 12#Mat 11:14; 14:9,10. konye katemari yes atiar, Adau Eliya abunore, mam apotu kojenutu ŋes, konye kiswamakis kere nuakotos, Kwape kwaŋin elosi Okoku loka etuŋanan da aiticanio kamakec.” 13#Luk 1:17. Kosodete kojenut ikesisiak ebe enera ŋesi kakes nuka Yokana Lokebatisan,

14 # Mk 9:14-29; Luk 9:37-42. Nakedolokinioto ekodet, kobu etuŋanan ediopet mamakeŋ, kokukokin, kobala ebe, 15“Ejakait, kitim ikakoku, naarai edek ipumu iticanete noi; naarai irwan ipu ibironokin akim, irwan ipu da akipi. 16Abu kainu ikonikesisiak, mam epedoro aitaŋaleun ŋes.” 17#Ikis 32:5; Yok 14:9. Koboŋok Yesu kotema atiar, “Wu atur namam iyuunit, naepaarit, etodoli ai aiboi kayes? Etodoli ai da atitiŋikinit yes? Koinunai kane.” 18Kiretak Yesu ŋes, kolom ajokit: koŋaleu etelepat ameun kosawa kaŋol. 19#Mat 10:1. Kosodete kopotu ikesisiak mama ejai Yesu kaiyeiyea, kotemasi atiar, “Kanukinyo mam sio kipedoria aireŋear ŋes?” 20#Mat 21:21; Mk 11:23; 1 Kor 13:2; Luk 17:6. Kotema atiar, “Kanuka aiyuunikus naedit. Naarai abeit katemari yes atiar, arai kijaas kaiyuun naetia ecokat loka ekaradali, ilimokinete eroŋat lo ebe, ‘Konyou kane, kolot laije,’ enyouni do; kwabo emamei akirot nakikaruni yes. [21Konye mam enyouni epone lo, dimarai kanuka ailip ka ailuŋ.]”

22 # Mk 9:30-32; Luk 9:43-45. Nakiboioto koGalilaya, kotema Yesu kes atiar, “Elosi Okoku loka etuŋanan ainakinio akanin nuka ituŋa, #Mat 16:21. 23earete ŋes, apaaran nakiwuniet ejaruni.” Kokadakis kes noi.

24 # Any 30:13; 38:26. Nakedolioto Kaparanaum, kopotu iketelemak esolo loka atutubet naka esekel mama ejai Petero, kobalas ebe, “Mam kereka ekesisianakinanikus elemi esolo loka atutubet naka esekel?” 25Kobala Petero ebe, “Elemi.” Nakelomaria togo, koliŋ Yesu aiŋit ŋes ebe, “Iwomit ijo biai, Simon? Edumunete ikabakan luka akwap esolo loka akwap arai esolo loka ekayaiton kotuŋa inyoika? Kodwekec, arai bo komo?” 26Napekiner ebe, “Komo,” kobala Yesu ebe, “Aso anu ikote nen, ijakakaete cado odwe. 27Konye kenyeis aitiguikin kes, kolot aŋolol kocakak egolu, kolem agar nasodit naikeuni; kiŋaa aitukuke, ianyuni esekel; koyaŋa ŋol, koinak kes kanukaŋ, kanukon da.”

Currently Selected:

Matayo 17: AOV1961

Highlight

Copy