Param Marikanka 10
10
Insal wauhkataya blakan bri kan ba
1Bara insal karnakira wala kum, kasbrika pura ba wina bal iwuya kan kaikri. Witin ba kasbrika kum ni dingkan kan, bara ai lal purara kumadura kum bri kan; ai mawan ba wan yu lapta baku ingwi kan, bara ai kuhma nani ba lika pauta lakni playa nani baku kan. 2Ai mihta ra wauhkataya sirpi blakan kum ilingki bri kan; bara ai mina aihkika ba kabu purara mangkan, bara ai mina smihka ba lika sauhka purara bri kan. 3Bara ai bîla baikra tara ni winan, sim layan kum ihbi ba baku. Witin winan ba ra, alwani 7 ba ai bîla baikra nani saki winan. 4Alwani 7 ba aisi kan ningkara, yang mahka ulbaia kapri; sakuna kasbrika purara ba wina bîla baikra kum ai aisan walri: “Alwani 7 diara nani aisan ba, pain yukuki bris; baha nani ba ulpara.”
5Baha ningkara, insal kabu purara bara sauhka ra bûi kan nani ba kaikri, ai mihta aihkika kasbrika pura tani ra bukan, 6bara Gâd nina mâki swer taki, witinka ban kaia ra raya iwi ba, bara kasbrika purara, tasba, kabu bara diara nani sut bahara banhwi ba paskan ba, bahara naku wisata: “Kau piua âpu kabia. 7Sakuna insal 7 ba ai trumpitka mahka puhbaia piua balbia ba ra, Gâd dahra yukukan ba aimakan kabia, witin pali ba ai dukia dadaukra nani prapit nani ra win ba baku.”#Imp St 20.11; Kli S 32.40; Dn 12.7; Em 3.7.
8Baha bîla baikra kasbrika pura wina aisi kan walri, yang ra kli aisin bara ai win: “Was, baha insalka kabu purara bara sauhka ra bûi ba mihta ra baha wauhkataya lupia ulbi karbi swin kan ba ilingki bri ba bris.” 9Yang insalka ra wari, bara wauhtaya lupia ba aikbia wîri. Bara witin mita ai win: “Brih bara pis. Bîlam ra nasma baku damni kabia, sakuna biamra bilara lika tahpla takbia.”
10Bara wauhtaika lupia ba insal ba mihta wina brih piri; baha ba bîli ra nasma baku damni kan, sakuna piri ningkara, biaira bilara tahpla takan.#Isi 2.8—3.3. 11Bara yang ra ai win kan: “Man kli Gâd prapitka kaia sma upla ailal dukiara, nisan nani, bîla sât ailal, bara king nani dukiara sin.”
Currently Selected:
Param Marikanka 10: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
