Param Marikanka 9
9
1Insal matsipka ba ai trumpitka puhban, bara slilma kum kasbrika pura wina tasba ra kauhan kan kaikri; baha tihuka tara kîka ba yan kata. 2Ba ningkara, baha tihuka ba kwâkan ba ra, baha wina kiasma takan sim kubus tara kum kiasmika baku;#Bla St 19.28. bara baha kiasmika mita yan wan yu lapta ba bara pâsa ba sin tihmu takan. 3Kiasmika ba wina tristrisia nani taki tasba purak pâli banhwi kan;#Imp St 10.12-15. bara baha nani ra karnika yan kan tasba ra misri nani karnika bri ba baku. 4Witin nani ra adar yan kan tasba ra twi ba saura munaia apia, diara kura kumi ra sin apia, dus kumi ra sin apia, upla nani Gâd sîlka ba ai mawan purara mark munras ba baman lika.#Isi 9.4. 5Sakuna baha nani ra upla ikaia lika adar yaras kan, latwan baman yabaia kati matsip baku; bara latwanka yabi nani kan ba lika misri kum upla ra sami ba latwanka baku kan.
6Baha kati matsip nani ra upla nani ba prura plikbia, sakuna sâkbia apia; bara pruan dauki nani kabia sin, prura ba lika witin nani wina laihura takbia.#Job 3.21; Jir 8.3.
7Tristrisia nani ba aras nani war ra waia ridi daukan ba baku kan;#Jl 2.4. bara ai lal nani purara diara kum gul kraunka talia baku bri kan, bara ai mawan ba lika upla mawan baku. 8Ai tâwa nani ba mairin tâwa baku kan, bara ai napa nani ba lika layan napa baku.#Jl 1.6. 9Ai wîna tara nani ra ayan ni daukan prâka nani baku ni dingkan kan, bara ai tnawa nani binka ba lika, wagin ailal aras nani raski war ra brih plapi dimuya binka baku.#Jl 2.5. 10Ai wâika nani ba napa nani bri kan, sim misri bri ba baku. Bara ai wâika nani ra karnika bri kan upla nani ra rausauhkaia kati matsip prais. 11Tristrisia nani ba ai wihtka kum bri kan, baha lika tihu tara insalka ba. Naha insalka nina lika Hibru bîla ra Abadón mâkisa, bara Grik bîla ra Apolión.#Hibru ra ulban ba: Abadón, baha bîla ba Grik wisa Apolión, tânka ba sasauhkra.
12Sauhkanka pas ba lui wan; sakuna kau wâl balaia sa.
13Insal matlalkahbika ba ai trumpitka puhban ba ra, gul altarka walhwal ba aringka nani wina,#Imp St 30.1-3. baha Gâd mawanra kan ba wina, bîla baikra kum takan yang walri. 14Bara bîla baikra ba insal 6 trumpit bri kan ba ra win: “Éufrates awalka tara ra insal walhwal priskan ba, lanhks.” 15Insalka walhwal ba lanhkan kan; witin nani ba ridi daukan kan baha awarka ra yua ra, katka ra bara sim manka ra upla yumhpa bani wina kumi ba ikaia. 16Ai suldiarka nani aras uli kan ba kulkan walri, bara baha ba lika milian handat wâl kata.
17Baha diara aihka kaikri ba ra, aras nani bâra kan bara âiulra nani ba sin; aras uli nani ba ai lama prakaika bri kan ba lika pauta klauhi baku kan, blu jasint baku kan, bara lalahni sim sulpa baku kata. Araska nani lal ba lika layan lal baku, bara ai bîla nani wina pauta, kiasma bara sulpa sin taki kan. 18Upla yumhpa bani wina kumi ba naha pâtka saura yumhpa aras nani bîla wina taki kan ba ikan kan: pauta, kiasma, bara sulpa ba mita. 19Kan baha araska nani karnika ba ai bîla ra bara ai wâika ra sin kata; ai wâika nani ba piuta nani lal nani bri baku kan bamna, baha nani wal upla ra klala yabi kan.
20Bara upla wala nani baha pâtka saura nani mita ikras kan ba, ai kupia lakras, diara saura nani dauki kan ba sin swiras, lasa nani ra ai pura suni mayuni kan ba gul ni, silbar ni, gul ni, walpa ni, dus ni paskan nani ra ai pura suni mayuni kan ba sin swiras, baha nani sip aisaras bara sip kaikras, sip walras, sip sin wapras ba.#Law 115.4-7; 135.15-17; Dn 5.23. 21Ai kupia sin lakras upla nani iki ba swiaia, sukia lâka nani, bara rug lâka nani, diara impliki nani ba sin swiras.#Imp St 8.15,19.
Currently Selected:
Param Marikanka 9: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
