Lawana Nani 89
89
LAWANA 89 (88)
Gâd bui Debit ra pramis daukan ba
Etán Esdras wina ba naha smalkan.
1Dawan, man kupiam yamnikira sma ba tânka,
piua sut aiwani wimni;
aima bani ban aisamni man ba kasak sma.
2Upla nani ra wimni,
lamtwanka ba ban kaia ra bâra sa;
kasakkam lâka ba aihka takras,
kasbrika pura ba aihka takras ba baku.
3Debit wal lâ kum daukram;
man nampakan bâk sakram ba wal pramis daukram:
4“Man kiamkam nani wal lâ daukri piua
sut man wamtlika ra king aimaki kabia.”#2 Sa 7.12-16; 1 Kr 17.11-14; Law 132.11; Ap St 2.30.
5Man Dawan,
kasbrika purara nani ba sut,
man kasakkam lâka bara diara aihka daukram ba dukiara
mamyuni banhwisa.
6Dawan, man wal mai prakaia gâdka kumi sin âpu sa,
tasba ra kasbrika purara sin âpu.
7Dawan tara bara sibrinkira
kasbrika purara ba insalka nani,
kutbi kir mai bri ba.
8Dawan Gâd, karnika sut brisma ba,
karnika sut ba man dukiam,
bara kasakka lâka ni kir mai kutbi brisa;
¡man baku wala âpu sa!
9Kabu pâsa karna krawi ba,
lamni daukisma;
ai ripka nani ba sin lamni takisa.
10Kabu daiwra saura tara ba ikram,
upla pruan kum kan baku;#Law 74.13.
waihlam nani ba sut yaram plapan
man klamhkla karnika ba ni.
11Kasbrika pura bara tasba ba wal man dukiam sa,
tasba aiska bara diara nani sut tasba ra ba man paskram sa.#Law 24.1-2; 95.4-5; 2 Ko 10.26.
12Man yahbra bara muna wal ba paskram;
Tabor bara Hermón ilka nani ba,
lilia aiwani ninam mayunisa.
13Man klamhkla ba karna pali sa;
man mihtam aihkika ba karna sa, bara pura lalura sa.
14Man king iwaikam ba kasakka lâka,
bara upla raitka bâra bapan sa,
latwan lâka ba bara kasakka lâka ba wal prawisa.
15Man Dawan,
lilia pali sa baha uplika lilia mamyunaia lan banhwi ba,
bara ingnikam ba ai yabalka ra ingwi kabia,
16man ninam ra sika piua sut lilia brisa,
wapni lâka brisma ba mita sika wilin ridi ba.
17Kasak sa, man ai karnika sma bara prana sin;
yawan wan karnika ba kau tara takisa,
man kupiam lâka ba mita.
18¡Dawan ba wan kan kahbaika sa!
¡Wan Kingka ba sika Israel ra Holikira ba!
19Aima wala ra diara aihka kaikram ba aisaram,
bara nampakan kasakkira nani ra wiram:
“Yang upliki tila wina
kupia karnakira kum bâk saki briri
purara bukri bara hilp munri.
20¡Naipakan Debit ba pliki sakri!#1 Sa 13.14; Ap St 13.22.
Baha batana yamni munan wal yûkri;#1 Sa 16.12.
21bara yang hilpki ba luha apia kata.
Yang karniki ba wal tâ baikri.
22Waihli nani ba sip pura luras kan,
watawikira nani sin sip pura lubia apia.
23Ai waihla nani ba âpu daukamni;
¡ai nakra wina sin sakamni!
¡Misbara kaiki nani ba wina sin dakbi sakatna!
24Laitwanka lâka bui kasakki lâka ba witin kulkbia,
bara ai karnika ba pura praki yabamni.
25King lâka karnika ba yabamni,
Mediterráneo wina Éufrates kat.
26Bara witin ai wibia:
‘Man ba yang Aisiki sma,
yang Dawanki,
swaki ai sakisma bara kaini kahbisma sin.’
27Bara yang luhpi almuk raitka ba maikamni,
tasba kingka nani sut purara.#Par M 1.5.
28Laitwanka ba ban yabi kamni,
yang wal lâ daukan lâka ba ban karna kabia.
29Ai kiamka nani ba, ban king aimaki kabia,
ban kaia ra kasbrika purara bâra sa piua ra.
30“Sakuna witin nani smalkanki ba lulki swisa kaka,
bara lâika bîla ba kat alki daukras,
31yang lâika nani âpu takbia kaka,
bara lâika bîla nani ba wali daukras kaka,
32ai kiama karnika bara ai watawika ba dukiara klala bara
dus karna ba wal yabamni.#Kli S 8.5; 2 Sa 7.14; Law 94.12; S L 3.11-12; Hib 12.5-11.
33Sakuna yang Debit ra
latwan kaikisna ba ban bri kamni,
kasakki lâka witin ra brisna ba ban kabia.
34Lâika bîla wal daukri ba krikamna apia,
bîli ba sin luha kabia apia.
35Aima kumi yang holikira lâka ra swer takri,
bara yang sip kunin munamna apia:
36ai kiamka nani ba, witin watlika ra king aimakbia,
wan yu ba ban bâra sa piua ra.
37¡Kati baku ban wapni kabia!
¡Kasbrika pura ba ban bâra sa piua ra!”
38Ban sakuna, bahki ai kulki ai lulki ai swiram
baha kingka bâk saki briram ba;
¡man bui witin wal kupiam sauhkram sa!
39Man nampakan wal lâ daukram ba, sauhki tikram;
bara king kraunka ba tasba kat batakram.
40Kutbanka sut ba sauhki tikram;
¡ai tawanka nani ba sut sauhki tikram!
41Upla nani sut lui auya ba,
dîa implikaia want ba implikisa;
lamara iwi nani ba, witin ra lawaska kikisa.
42Yabram ai waihla nani ba,
ai mihta buki liliakira pura lalura baku lilia brisa.
43Ai sordka malira ba mihta wina sakram,
bara war ra tâ baiki briras kapram.
44Ai ingnika ba daskram;
king iwaika ba tasba kat batakram;
45raya kaia manka ba, witin wina sakram
bara swira lâka banhki dauki yaram.
46Man Dawan,
¿ahkia kat ban yukuwi kama?
¿Man lawankam ba pauta klauhi ba baku ban ami kabia?
47Dawan, kupiam krauks rayaki ba kunhku sa;
man upla paskram ba,
piu wiria man tasba ra iwisa.
48¡Upla nani ba, kumi sin pruras kabia apia!
¡Upla kumi sin prura karnika wina swak takbia apia!
49Dawan,
¿lamtwanka lâka pas kata ba anira sa,
man pramiskam kasak
Debit ra yabatma ba?
50Dawan, luki bas nampakan nani ra
upla nani mita manis mina batakisa;
baha swira paski ba kupi ra brisma.
51Man Dawan,
¡waihlam nani ba baku saura wan wisa!
¡Baku saura wisa bâk sakram nani ba taukanka ra!
52Dawan ba yamni pali kabia ban kaia ra.
¡Baku kabia!
Currently Selected:
Lawana Nani 89: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
