Pilipai 4
4
Man nani piu bani ra Dawan ra liliam bas
1Baku bamna, muihki laitwankira nani, man nani mai kaikan pali ai daukisa; man nani sika lilia ai daukisma ba, bara yang prisantki sin. Laitwankira nani, man nani baku ban Dawan ra rayakam ba bapi bûi bas.
2Evodia ra bara Síntique ra sin makabisni, trai kaiki wal ai kupia kumi lâka daukbia Dawan ra, ai muihni nani baku. 3Bara man sin, wark daukaia mapa ra pâinika kasak sma ba, mamkabisna naha mairka nani ra hilp munma, witin nani ba yang wal swaki sakan sturka yamni ba smalki karna wark taki bamna, Clemente bara wala nani yang wal wark takan ba aikuki. Witin nani nina ba raya kaia wauhkataya ra ulban sa.
4Man nani piu bani ra, Dawan ra liliam bas. Yang kli wisni: ¡Liliam banhwi bas!#1 Tes 5.16. 5Yarka upla sut mita man nani ba upla yamni baku mai kaikbia. Dawan ba wan lamara sa.#Law 119.151.
6Man nani diara kumi dukiara sin sari takpara, sakuna dîa dîa luha sma ba sut, Gâd ra puram sunra nani ra wis, makabi bas bara tingki sin wis.#Kol 4.2-7; 1 Tes 5.17-18. 7Bara Gâd ai kupia kumi lâka bara upla tânka briaia praiska sut pura lui ba, witin maikbia; bara naha kupia kumi lâka na, man kupiam nani lukanka nani sin main kaiki kabia, Kraist Jisas wal asla.
Diara yamni ba kat man nani luki bas
8Bara tnata kat, muihki nani, diara pain bara mayunra briaia aitani ba lukankam ra mangki bris. Diara kasak nani ba, dîa dîa kulki briaia aitani ba, diara wapni nani ba, diara sunu nani ba, dîa dîa upla mita lihki ba bara dîa dîa upla mita pain kulki ba.
9Diara nani man nani ra mai smalkri ba, maikatna ba, diara nani yang aisari walatma ba bara daukri kaikatma ba sin, baha sut dauki bas; man nani baha dauks, bara kupia kumi Gâdka ba man nani wal kabia.
Pilipai nani Pal ra prisant nani blikan ba
10Dawan ra yang uya lilia takisna man nani bui yang ra kli lukram bamna. Yang ra âmya tiwan kan lika mai wiras, kan man nani hilp ai munaia piua âpu kapram. 11Yang diara want sna dukiara lika mai wiras, kan yang dîa brisna ba wal lilia kaia lan takri sa. 12Umpira iwi kaia ba yang lan sna, diara ailal bri kaia ba sin. Dîa dîa mapara daukaia sna ba, yang lan takri, biaira banhki, apia kaka plun ai dauki ba ra kra, diara manis bri, apia kaka diara âpu ba sin. 13Diara sut mapara karnika brisni, Kraist mita karnika aiki ba mita. 14Ban sakuna, yang wal pâtki nani wauhram ba pain daukram sa.
15Man nani Pilipai nani sin pain kaikisma, swaki sakan sturka yamni mahka smalkri ba ra, Macedonia wina taki wari ba ra, man nani baman sika yang ra hilp ai munan sertska ba; man nani baman sika yang diara nani briri bara tikri bara sin aikuki asla kata ba. 16Yang kau Tesalonaika ra katna ba ra sin,#Ap St 17.1. hilp want katma ba ra, kli kli man nani mita prisant nani ai blikram.#2 Ko 11.9. 17Yang diara briaia baman lukisna dukiara lika apia; yang want sna ba lika man nani briaia sma ba kau pura lui bri kama Gâd mawanra. 18Bamna yang lika pat diara nani sut briri, bara pura lui pali. Epafrodito wal prisant nani ai blikram ba ni, dîa dîa luha sna ba sut brisna. Man nani mita ai blikram ba lika dus nani mâka kîa yamni prisantka kum baku kan, sakripais kum Gâd mita pain kaiki bri ba baku.#Imp St 29.18. 19Baku bamna, man nani dîa dîa âpu sma ba sut, Gâdki mita maikbia, ai yuyaka pranakira Kraist Jisas ra bri ba praiska kat. 20Wan Gâdka ra bara Aisa ra mayunan kabia, ban kaia ban kaia ra. Baku kabia.
Prakaia lakula nani
21Jisas Kraist ba mita, Gâd uplika takan nani ba sut ra laikula wis. Wan muihni nani yang wal nani ba sin ai lakula mai blikisa. 22Nahara Gâd uplika nani na sut lakula blikisa, bara kau pali Rom wihtka watla uplika nani.
23Wan Dawan Jisas Kraist, man nani sut ra yamni mai munbia.
Currently Selected:
Pilipai 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua