Pilipai 3

Wapni lâka mana ba

1Bara nanara, muihki nani, Dawan ra liliam banhwi bas. Pât tâura mai ulbri ba, kli mai ulbaia yang wilin pali sna, baha ba man nani mampa ra yamni sa. 2Aman kaiki banhwi bas baha upla saura nani ba mapara, witinka nani diara saura dadaukra nani bara wan wîna tara ra klaki banhwi ba. 3Kan yawan sika kasak pali Aisa sainka brin,#Jir 4.4; Ro 2.28-29; Gal 6.14-15; Kol 2.11-13. yawan nani Spirit bâk Gâd ra wan pura suni mayuni ba, bara yawan Kraist Jisas ra bamna sika lilia banhwisa. Yawan lika wan wîna tara ra dauki dukia ba ra kasak lukras. 4Ban sakuna, yang sin sip sna baha dukia nani ra kasak lukaia. Ya ya bahmuna dukia mita swaki sâkbia lukanka brisa kaka, yang kau bahara kasak lukaia lâ brisna. 5Kan yang lika ai baikan wik kum alkri ba ra, Aisa sainka ba ai daukan. Yang na Israel kiamka, Benjamín taika wina;#Ro 11.1. aisubi takri Hibru sna, bara aisiki nani ba Hibru sa. Ju nani lâ bri ba kat yang na parisi katna;#Ap St 23.6; 26.5. 6karna mamunra pali kapri bamna, serts uplika nani nina bliki rausauhki katna.#Ap St 8.3; 9.1-2; 22.4; 26.9-11. Moses lâka bîla kat alki wan rayaka wapni bri kaia ba mapara, yang lika pât kumi sin âpu kapri. 7Sakuna naha dukia nani sut pas piua maipara uya yamni kan ba, nanara Kraist tâwan baha sut diara bahki atia kulkisni. 8Baha dukia nani baman apia; dîa dîa yang briaia sip kapri ba, bahki tiwan baku kulkisna, Jisas Kraist yang Dawanki ba, kakaira kaia yang maipara kau pain sa, diara wala nani sut ba wal. Kraist tâwan yang diara sut tikri; bara baha sut dipasta baku kulkisni, Kraist yang duki brimna ba tâwan, 9bara witin wal asla pali kamna ba dukiara; baha ba Moses lâka kat yang rayaki wapni brisna ba dukiara lika apia, sakuna Kraist ra kasak lukisna ba tâwan, Gâd pri ai saki ai brin ba mita lika; kan Gâd lika kasak luki uplika nani ba pain brisa. 10Yang want sna ba lika Kraist ra kakaira kaia, bara yang wîni ra sin witin pruan wina buan karnika ba bri kaia, ai pâtka wahwan nani ba sin witin wal yang asla wahwaia, bara ban sin witin pruan baku pruaia,#Ro 6.11-13; 8.29; 2 Ko 3.18; Gal 4.19. 11baku kra yang sin pruan wina kli buaia sip kamna ba bîla kaikanka wal.

Trabil taki mark bâra ba alkaia

12Yang pat naha diara ba sut briri lika wiras, bara yang na pat kasak aihwa sna sin wiras; sakuna yang ban tâiura auni baha ba briaia trai kaiki, baha ba Kraist Jisas yang ra pas ai alkan ba. 13Muihki nani, yang pali sin naha na pat alkri wiras; sakuna diara kumi baman daukisna ba lika: dîa dîa yang ninira ba âiya tikaia, bara diara nani kainira ba tâi baiki muni alkaia. 14Baku bamna, yang mark ba alkaia plapisni prisant ba briaia dukiara, baha briaia Gâd kasbrika purara ba mita wan paiwi ba, yawan Kraist Jisas wal asla ba mita.

15Yawan nani wan kasak lukan lâka mapa ra kasak pâwan ba, baku lukaia sa. Ban sakuna, man nani wina kum aihka lukisa kaka, Gâd bui baha ba sin param mamrikbia. 16Sakuna naha na lika: yawan luki iwi kaia sa dîa pat alkan ba kat.

17Muihki nani, man nani sut yang daukisna ba kat dauki bas.#2 Ko 4.16; 11.1. Yang nani mita man nani ra nina blikaia lâka kau pain ba maikri sa; baku bamna, baha nina bliki nani ba kat aman kaiks. 18Naha dukia na man nani ra pat aima manis mai wîri, bara nanara naikra laya saki kli mai wisni: upla ailal bâra sa, witin nani Kraist dusa prihni ba wal ai waihla brih iwisa, 19piua tnata ra, naha nani sut sauhki tikan kabia. Witin nani gâdka lika ai wîna brinka nani, bara ai swira briaia dukia nani ba watlika ra, kalwi banhwisa. Witin nani ba naha tasba dukia nani ra baman lukisa. 20Sakuna yawan na kasbrika purara ba suliarka nani sika, bara kasbrika purara ba wina Sasakra ba balbia bîla kaikisa, baha ba lika Dawan Jisas Kraist. 21Witin bal wan wîna tara umpira pali na lakbia, witin klauna ai wîna tara pranakira ba baku kabia dukiara. Bara baha diara nani sut ba, witin ai mihta alki briaia karnika bri ba wal daukbia.

Currently Selected:

Pilipai 3: MSKTU

Highlight

Copy