Pilipai 2

Kraist ra bawikira lâka bâra ba

1Baku bamna, Kraist mita man nani ra tâm baikisa kaka, witin latwanka lâka mita maisam nihkisa kaka, ai Spiritka ba sin man nani wal sa kaka, uplikam ra kupiam pihni brih bara latwan kaikisma ba pain daukisma kaka, 2yang kupi na lilia baman banhki dauki bas, sut sim lukanka brih asla baha latwan lâka ba sin bri bas, bara sut sin sulkam mapa ra, bara dîa daukisma ba mapa ra sin, kumi kaia. 3Yakan dukiamra bara waihla lâka mita ban sin diara kumi daukpara; sakuna bawikira nani bas, bara kumi bani ai walka nani ba witin purkara kau pain sa kulkbia. 4Kumi bani ai painka yamnika baman plikaia apia sa, sakuna wala nani yamnika dukiara sin plikbia.

5Man nani kumi bani luki bas, Kraist Jisas luki kan ba baku, 6kan:

Witin ba sika Gâd kan, sakuna ai karnika wina Gâd wal baku ban pali kaia lukras kan.#Jn 1.1-3; Kol 1.15.

7Sakuna baha watlika ra,

witin ai dukia kan ba tnaya ra swi si,

alba talia takan.

Witin lika upla baku aisubi takan,

8silp ai wîna ba kulkanka yabras,

witin bawikira kan,

bara ai kiama lihni kan ba mita prura kat wan,#Mt 26.39; Jn 10.18; Hib 5.8.

bara baha sika witin dus prihni ra pruan ba.

9Baha mita, Gâd mita kau prana tara ba witin ra yan,#Hib 2.9; 12.2.

bara nina sut purkara kau nina tara ba sin yaban,

10bamna baku Jisas nina wali banhbia ba ra,

kasbrika purara banhwi ba sut,

tasba ra bara tasba mununhtara nani ba sut sin,

ai lula kriki banhbia.

11Bara upla param pali aisabia,#Ais 45.23.

Jisas Kraist ba Dawan sa,

Gâd Aisa ra kulkanka yabaia dukiara.

Kristian nani ba lika naha tasba ingnika sa

12Baku bamna, muihki laitwankira nani, piu bani man nani wal kapri bara bîli kat wali dauki kapram ba baku, nanara laihura sna ba ra, kau bîli wali dauki banhwi bas. Ban Dawan warkka taki bas, bawikira lâka brih bara sibrinkira sin, swaki mai sakan lâka briaia dukiara; 13kan Gâd mita sika man nani ra brinka yamni nani ba maikisa, bara baku kat daukaia sin hilpka maikisa, ai kupia lâka yamni ba kat.

14Diara nani sut brukras bara blahwan sin âpu dauki bas, 15bara baku upla kumi sin man nani ra watawanka kum kra, apia kaka swakwanka kum sin sâkbia apia, kuna tâski âpu Gâd luhpia nani kama, upla saura nani bara tâskikira nani ba tilara.#Kli S 32.5. Man nani ba witin nani tilara slilma baku ingwaia sma naha tasbaya tilara, 16raya kaia sturka yamni ba witin nani ra yabi. Baku, Kraist balbia ba ra, man nani dukiamra yang âiyapah pali kamna, kan baku lika kaikamna bahki plapras sna bara bahki sin wark takras sna ba. 17Man nani kasakkam lâka mita Gâd ra prisant yabisma ba tnata alkaia dukiara, rayaki pali na sin sakripais dauki yabia kaka, yang lilia sni bara baha liliaka ba man nani sut aikuki brisni. 18Man nani sin liliam bas, bara yang liliaki na sin aikuki brip.

Timoti bara Epafrodito

19Dawan Jisas hilpka ra, lukisni Timoti ba aihni ridi dauki man nani ra mai kaikaia blikamna,#Ap St 16.1-3. bara baku sturkam wali, yang lilia kamni. 20Witin baman sika yang lukisna ba baku luki ba, bara man nani painkam dukiara sin trabil taki luki ba. 21Upla wala nani lika, witin pain kaia baman plikisa, bara Kraist Jisas dukia nani ba lika ai kupia lukras. 22Sakuna man nani kaikisma nahki Timoti ai tânka kasak marikan ba, bara nahki sin yang wal sturi yamni aisi smalkaia warkka daukan ba, sim luhpa kum ai aisika ra hilp muni ba baku. 23Baku bamna, yang lâika na nahki auya ba kaikamna wal baku, witin ba mai blikamna lukisni; 24bara Dawan ra kasak lukisni, yang pali sin pat pali wih mai kaikamni.

25Sakuna aitani lukisna, wan muihni Epafrodito ba mai blikamna, witinka yang tnaiya ra wark karna pali takan ba, bara man nani mita blikram ba hilp ai munaia dukiara. 26Witin ba man nani sut mai kaikan daukisa, bara uya lukisa witin ba siknis sa sturka wali banhram ba dukiara. 27Kasak witin siknis kan, pruaia baila kata; sakuna Gâd mita umpira kaikan, bara witin ra baman apia, yang ra sin, sari nani brisna ba purkara kau sari brimna apia dukiara. 28Baha mita, kau witin ba blikan pali ai daukisa, man nani mita kli kaiki liliam takma dukiara, bara yang sin uya sari pali kamna apia. 29Witin ba lilia pali tilamra bri bas, Dawan ra muihkam kum baku, baha sât uplika nani ba pain kulki bris; 30kan witin ba Kraist warkka tâwan pat pruaia man kan. Ai rayaka trabil ra mangkan, man nani bui hilp aikaia sip apia kapram ba, witin mita aikaia dukiara baku daukan.

Currently Selected:

Pilipai 2: MSKTU

Highlight

Copy