Mark 16

Jisas raiti wina buan ba

(Mt 28.1-10; Lk 24.1-12; Jn 20.1-10)

1Ris yua ba luan ba ra, Meri Magdalin, Meri Jems yaptika, Salomé kat, sîka mâka kîa pain atkan, Jisas wîna tara ba wih yukaia wisi. 2Bara titan pali, wik yua pas pali ra, witin nani raiti ra wan, pat wan yu ulan kan. 3Bara pana pana aisi kan:

—¿Raiti dimaika ra walpa ba, ya saki wankbia ki?

4Sakuna witin nani kaikan ba ra, walpa tara raiti durka prakan kata ba ai pliska ra âpu kan. 5Witin nani raiti ra diman ba ra, aihkika tani ra wahma kum iwi kan ba kaikan, kwala pihni yari kum dimi; bara witin nani tâ iwan. 6Sakuna witin bila mairin nani ra:

—¡Sirang iwpara! Man nani Jisas Nasaret wina dus prihni ra sabata ba plikisma. Witin buan sa; nahara sin âpu sa. Kaiks witin tnikan pliska ba. 7Man nani was, bara ai disaipilka nani ra, Pita ra sin wis: ‘Jisas ba man nani kainamra Galili ra auya;#Mt 26.32; Mk 14.28. bahara man nani bui witin ra kaikma, mai win ba baku.’

8Bara mairka nani raiti ba wina plapi wan, witin nani sirang iwi tatatwi kan bamna. Witin nani lika upla kumi ra sin diara wiras, sibrin bri kan ba mita.

Meri Magdalin ra Jisas latan takisa

(Jn 20.11-18)

[ 9Jisas buan ningkara, wik yua pas pali titanka ra, Meri Magdalin ra pas latan takan; witinka wina sika pirit saura 7 kangbi sakan ba. 10Bamna Meri lika wan, Jisas disaipilka nani ra maisa pakan; baha nani lika sari man ini kan. 11Witin nani walan Jisas ba raya sa, bara mairin ba sin kaikan, sakuna witin nani sip kasak lukras kan.

Jisas ai disaipilka wâl ra latan takisa

(Lk 24.13-35)

12Baha ningkara, Jisas ai wîna sât wala taki, upla wâl tawan sirpi ra impaki auya kan nani ra latan takan. 13Witin nani wala nani ra sin wih maisa pakan, sakuna baha nani sin kasak lukras kan.

Jisas ai apastilka nani ra warkka yabisa

(Mt 28.16-20; Lk 24.36-49; Jn 20.19-23)

14Naika Jisas ai disaipilka 11 ra latan takan, tibil ra iwi kan piua ra; bara witin nani ra lawi daukan sip kasak lukras, ai kupia nani karna bri kan ba dukiara sin, witin nani lika Jisas buan ba kaikan uplika nani ra kasak lukras kan bamna. 15Witin nani ra sin win: “Man nani tasba aiska ra was, bara sturka yamni ba upla sut ra aisi smalks.#Ap St 1.8. 16Ya kasak lukbia ba, tahbi daukan kabia, witin lika swaki sakan kabia; sakuna ya kasak lukras kaka, witin pât ra lulkan kabia. 17Bara kasak luki nani ra naha sainka nani ai yula kahbia: yang nini mâki pirit saura nani kangbi sâkbia; bîla raya nani sin aisabia; 18ai mihta ni piuta saura nani alkbia, bara puisin saura dibia kaka, witin nani ra diara munbia apia; baha purkara upla siknis nani purara ai mihta nani kahbia kaka, baha nani sut rawbia.”

Jisas kasbrika purara uli wan

(Lk 24.50-53)

19Witin nani ra aisin ba ningkara, Dawan Jisas lika kasbrika purara bukan kan,#Ap St 1.9-11. bara mahka Gâd mihta aihkika ra iwan. 20Bamna disaipil nani mahka taki, sturi yamni ba plis sut ra aisi smalkan. Dawan sin witin nani ra hilp muni kan, bara ai smalkanka, sain nani taki ba mita, tâ baiki kan.]

Currently Selected:

Mark 16: MSKTU

Highlight

Copy