Mark 15

Jisas Pailat mawanra

(Mt 27.1-2,11-14; Lk 23.1-5; Jn 18.28-38)

1Bara yu baiwan ra, prîs wihtka nani asla prawan, wihta almuk nani, Lâ Smasmalkra nani, lâ wihtka nani sut ba kira. Bamna witin nani bui Jisas ba priski bri si, Pailat mihta ra mangkan. 2Pailat witin ra makabi walan:

—¿Man ba Ju nani Kingka sma ki?

Bara pana win:

—Âu, man aisaram ba kat.

3Prîs wihtka nani diara ailal dukiara dahra saki kan. 4Bara Pailat kli witin ra makabi walan:

—¿Man pana diara aisaras ki? ¡Kaiks nahki diara ailal dukiara damhra saki na!

5Sakuna Jisas pana diara aisaras kan; bamna Pailat dîa lukaia sapa kaikras kan.

Jisas ba prura mihta ra mangkan sa

(Mt 27.15-31; Lk 23.13-25; Jn 18.38—19.16)

6Pailat ai lâka kum bri kan: baha lilia yua nani ra silak uplika kum upla nani ra lanhki yabaia, ani witin nani makabia ba. 7Silak watla waitna kum kan, ai nina Barabas; witin lika upla wala nani aikuki wihta nani mapara war buki, upla ailal ikan. 8Upla nani Pailat ra bal makaban, ai lâka kan ba baku daukbia wisi. 9Bara Pailat witin nani ra win:

—¿Man nani want sma ki Ju nani Kingka ba pri saki maikamna?

10Bamna Pailat kaikan, prîs wihtka nani mita tuman lâka mita Jisas ba ai mihta ra mangkan. 11Sakuna prîs wihtka nani mita upla nani ra kupia turbi, maisa kapi, win, Barabas ba pri sakaia makabaia. 12Bara Pailat witin nani ra makabi walan:

—¿Bamna man nani Ju nani Kingka mâkisma ba, dîa munamna want sma ki?

13Witin nani ai bîla baikra tara wini, aisin:

—¡Witin ba dus prihni ra sas!

14Bara Pailat witin nani ra win:

—¿Bamna witin dîa saura daukan ki?

Sakuna witin nani kli ai bîla baikra tara winan:

—¡Witin ba dus prihni ra sas!

15Bamna Pailat mita upla nani ba wal pain kaia dukiara, Barabas ba pri sakan; bara Jisas lika klala ni wipaia blikan, ningkara yan dus ra sabaia.

16Bara suldiar nani, Jisas ba wihta tara ba watla latara bri si, suldiar daknika aiska ba asla winan. 17Witin ra kwala mapla siksa talia kum dingkan, bara kraun kum kiaya ni pitbi lal ra mangkan. 18Bara mahka witin nani bui Jisas ra wini, win:

—¡Ju nani Kingka ba ban raya kabia!

19Bara dus kum ni ai lal ra prukan, yabalaya tuhban, ai lula sin kriki ai pura suni mayuni kan. 20Baku ai lawaska kiki muni, kwala mapla siksa talia ba daiki si, ai kwalka dingkan. Bara mahka saki brih wan, dus prihni ra sabaia.

Dus prihni ra saban ba

(Mt 27.32-44; Lk 23.26-43; Jn 19.17-27)

21Cirene wina waitna kum nina Saiman, Alejandro bara Rufo wal aisika,#Ro 16.13. insla wina aula kan; bara bâk luan, taibi munan Jisas dusa prihni ba twilkaia.

22Bara witin nani bui Jisas ba plis kum ra brih wan, nina Golgota wi ba ra (baha tânka lika: “Wan Lalkamhka Pliska”). 23Bara wain, sîka mahka tahpla wal mangki witin ra yan, sakuna baha sip diras kan. 24Baha ningkara dus prihni ra saban. Suldiar nani ba mita Jisas kwalka ba yui briaia wisi,#Law 22.18. dais pulan, witin nani kumi bani dîa briaia sapa kaikaia.

25Titan 9 aklak, witin nani bui Jisas ba dus ra saban. 26Witin nani mita dîa tâwan Jisas ra iki kan ba dukiara, naku ulban: “Ju nani Kingka.” 27Âimplikra wâl sin witin wal sabi banhwan, kumi ai aihkika ra, wala ai smihka ra.#Ais 53.12. 28[Baku sika Ulbanka ba aimakan, bara naku win ba: “Witin ba watawikira nani tilara kulkan sa.”]

29Bara ai lamak lui nani ba witin ra swira daukan, ai lal sin wauhi, naku aisin:#Law 22.7; 109.25.

—¡Alai, man tempel batakisma bara yu yumhpa ra kli bapisma ba,#Mk 14.58; Jn 2.19. 30wînam ra swaki sâks, bara dus prihni ba wina bal iws!

31Baku sin prîs wihtka nani, bara Lâ Smasmalkra nani sin ai lawaska kikan, bara pana pana aisi kan:

—Witin bui upla wala nani ra swaki sakan, sakuna witin ai wîna ra lika sip swaki sakras. 32Misaya Israel Kingka ba, witin dus prihni wina bal iwbia kaka, yang nani lika witin ra kasak lukamna.

Bamna Jisas wal dus prihni ra saban nani ba sin ai swira daukan.

Jisas pruanka

(Mt 27.45-56; Lk 23.44-49; Jn 19.28-30)

33Yu 12 aklak aimakan ba ra, tasba aiska tihmia tara takan, baha ba tutni 3 aklak kat. 34Bara baha sim awarka ra, Jisas ai tâ baiki ai bîla baikra karna winan: “Eloí, Eloí, ¿lemá sabactani?” (Baha tânka lika: “Yang Gâdki, yang Gâdki, ¿dîa kan lulki ai swiram ki?”)#Law 22.1.

35Tila nani bâra kan ba naha walan, bara naku aisin:

—¿Man nani walisma ki? Witin prapit Ilayas winisa.

36Baha nani wina kum plapan, bara wahmuk kum ra wain swahwan buski, yauhrus dusa kum ra mangki yan dibia wisi.#Law 69.21. Naku sin win:

—Swis bara kaiki kap, Ilayas bal dus prihni wina alahbia sapa.

37Bamna Jisas ai bîla baikra karna kum wini si, pruan. 38Tempel kwalka paman kan ba,#Imp St 26.31-33; 2 Kr 3.14. wâl lilak kalwan, pura wina mâya kat. 39Rom kiaptinka kum Jisas mawan tani ra bûi kan ba kaikan bara walan, nahki Jisas ai bîla baikra tara wini si, pruan ba. Bamna witin bila:

—Kasak pali, naha waitnika na Gâd Luhpia kan.

40Tila mairin nani sin bâra kan ba, laih wina bûi kaiki kata; witin nani tilara Meri Magdalin, Meri Jems sirpi Josep wal yaptika, bara Salomé sin. 41Naha mairka nani ba Jisas nina bliki kan, hilp sin munan, witin kau Galili ra tauki kan ba ra.#Lk 8.2-3. Mairin wala nani ailal sin bâra kan, witin nani lika Jisas wal Jerusalem ra balan kan ba.

Jisas ba bikan sa

(Mt 27.57-61; Lk 23.50-56; Jn 19.38-42)

42Pat tutni pali kan ba ra, diara sin ridi daukan kata ris yua kainara, 43Josep Arimatea tawanka wina kan ba balan, witin lika lâ wihtka kum kan. Witin sin Gâd king aimaki ba lâka bîla kaiki kan, bara ai kupia karna brih Pailat ra wih, Jisas wîna tara ba makaban. 44Pailat tâ iwan pat pruan ba dukiara, bara ai kiaptinka ra winan, pat pruan sapa makabi walaia. 45Kiaptin ba âu win ba ra, Pailat mita Josep ra Jisas wîna tara ba yan. 46Josep mita kwalyapa pain kum atkan, bara Jisas wîna tara ba alahbi, bahara blakan. Ningkara, walpa raiti kum param ba ra bri si tnikan, bara raiti durka ba walpa kum ni prakan. 47Meri Magdalin bara Meri Josep yaptika sin anira bikan ba kaiki kan.

Currently Selected:

Mark 15: MSKTU

Highlight

Copy