Luk TÂ BÎLA NANI
TÂ BÎLA NANI
Luk ulbanka ba Jisas tânka marikisa, Israel baman sasakrika apia ba, sakuna upla sut tasba aiska ra ba sasakrika sa. Naha wauhkataya ra, Jisas dahra aisanka dukiara kasak mangki lukisa.
Âiulbra ba, tâura ulbanka pîska nani ba ra wan marikisa, ulbanka wala nani ra witin tânka dukiara pliki kaikan, dîa daukan nani ba, ningkara asla wapni dauki ulban (1.1-4). Ba mita, sturi kau ailal ulban nani brisa Matiu wauhkataya ba wal, Jisas aisubanka ba bara tuktan kan sturka, baku sin Jan Tatahbra tâura balan ba dukiara (1.5—2.52). Baha tânka ulbanka manis bâra ba, nahara baman ulban sa. Matiu, Mark sturi yamni ulbanka ai talia ba, Jan Tatahbra warkka nani (3.1-20), Jisas tahbi daukaia ba bara traika kaikan ba (3.21—4.13) mariki si, nanara Jisas Galili ra upla nani mawanra wark daukan ba aisisa (4.14—9.50). Wala wâl ba baku, bara laki kaikbia kaka ulban sa, impakanka lâs daukan ba Galili wina Jerusalem ra (9.51—19.27), pât wahwan wikka ba (19.28—23.56). Bara kli raiti wina buan, upla nani ra param takan bara Dawan kasbrika purara uli wan ba (sapta 24).
Jisas ai warkka upla nani mawanra daukan ba, aisabia kaka, naha sturi yamni ra tânka kau tara ba marikisa, Nasaret ra Ju nani priaska watla ra wan ba dukiara bara sin wan wisa ani saptika Aiseya wauhkataya wina brih ai smalkanka plamaya baku brin ba, bara Jisas ai wîna kat brin Spirit Holikira karnika ba, upla umpira nani ra sturi yamni ba brih waia dukiara.
Naha sturka yamni na ai natka sa, param ra saki aisi kaia, umpira nani makabanka ba, pât wahwi nani ba, kulkanka yabras bahki kulki nani ba tânka.
Naika dîa takaia kan ba, Jisas aisubanka piua ba, baku sin kli kasbrika purara uli wan ba dukiara aisisa, kuna kau ba lilia kaia lâka ba kau aisisa. Samaritan pain kum maprika lilka ba, bara aisa kum ai luhpia waitna ra padin muni ba dahra naha sturka yamni na ra baman ulban sa. Bara baku sin yamni sa pura sunra dukiara aisi ba, Spirit Holikira, saurka dukiara, padin munaia. Bara mairin nani dîa pali ba ai warkka sa Dawan warkka nani tila kat.
Currently Selected:
Luk TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua