Luk 7
7
Jisas bui suldiar wihtka kum albika rakisa
(Mt 8.5-13; Jn 4.43-54)
1Jisas bui upla nani ra aisi luan ba ra, witin Kapernaum ra wan. 2Bahara Rom kiaptin wihtka kum iwi kan, witin ai albika latwan pali kaiki kan ba siknis alkan, bara pruaia man kata. 3Bamna kiaptin wihtka ba Jisas dukiara upla aisin walan, witin mita Ju almukka kum kum saki blikan, makabaia bal ai albika ba raki yabia wisi. 4Witin nani ba Jisas lamara bal makabi, win:
—Naha kiaptin ra aitani sa hilp munma, 5kan witin wan nisanka ra latwan kaikisa; baha purkara witin pali ba mita wan priaska watla sin mâki wankan.
6Baku kan ba ra, Jisas witin nani wal wan. Sakuna utla lamara aula kan ba ra, kiaptin ba mita ai uplika kum blikan Jisas ra wiaia: “Dawan, trabil takpara, kan yang aitani apia sna man ba waitla ra dimaia; 7baha mita yang pali mita sin mai pliki balaia sip apia kapri. Sakuna adar baman yas, bara albiki ba rawbia. 8Kan yang pali na sin kau karnika alki nani ba adarka mununhtara sna, bara sin suldiar nani ba karniki mununhtara brisna. Ani piua kum ra ‘Was’ wisna kaka, witin auya; wala ra ‘Bal’ wisna ba ra, witin aula; bara albiki ra naha wih ‘Dauks’ wisna kaka, witin wih daukisa.”
9Jisas naha diara walan ba ra, waitna ba dukiara tâ iwan, bamna witin ai nina bliki kan uplika nani ra tawi kaiki, naku win:
—Kasak pali mai wisna, naha waitna kasak lukan lâka manis bri na sât yang kau Israel ra sakras.
10Blikan uplika nani ba kli tawi utla ra wan ba ra, kaikan alba siknis kata ba pat rawan kan.
Jisas mita piarka mairin kum luhpia waitna pruan wina bukan ba
11Naha ningkara, Jisas tawan kumi nina Nein wi ba ra auya kan, bara ai disaipilka nani, upla ailal sin ai yula kahbi kata. 12Tawan ba lamara wan bara kaikan upla dakni kum pruan kum bikaia brih auya kan, baha ba piarka mairin kum luhpa waitna kumi baman pali bri kan ba. Tawan ba wina upla ailal witin yula kahbi kata. 13Dawan baha kaikan ba ra, piarka mairin ba dukiara ai kupia swapni takan, bara naku win:
—Inpara.
14Ba ningkara krikrika lamara wih ai mihta ni kangban, bara twilki kan uplika nani ba takaskan. Bamna Jisas pruan uplika ra naku win:
—Wahma, yang mai wisna: ¡Bus!
15Baha sim piua ra, pruan kata ba bûi iwan, mahka sin sturi aisin, bamna Jisas bui yaptika ra yan. 16Upla sut naha diara kaikan ba ra, sibrin taki, mahka Gâd ra mayuni, win:
—Prapit kum bal takan.
Baku sin aisi kan:
—Gâd balan ai uplika nani ra hilp munaia.
17Jisas sturka na Judia tawanka aiska bara ai lamara iwi nani ba sut walan.
Jan Tatahbra blikan uplika nani ba
(Mt 11.2-19)
18Jan naha diara nani sut sturka walan, kan ai nina blablikra nani witin ra win. Baha wina wâl ra wini sakan, 19bara blikan Jisas ra waia makabi walaia: “¿Kraist balaia kan ba baha man sma ki, apia kaka wala kum yang nani bîla kaikaia sna ki?” 20Jan blikan nani ba Jisas lamara bal, naku win:
—Jan Tatahbra wan blikan mamkabi walaia: ¿Man ba Kraist balaia kata ba, apia kaka, wala kum bîla kaikaia sna ki?
21Baha nani aidrubi balan ba sim piua ra, Jisas bui upla manis raki kan, siknis nani wina, taya ra diara saura taki ba wina, pirit saura nani wina, bara blain nani ra nakra yan. 22Baku bamna, Jisas pana win:
—Man nani wih Jan ra wis, dîa kaikram bara walram ba sin: Blain nani ba kaikisa, mina skahwa nani ba wapisa, liparkira nani klin daukan sa ai sikniska wina, kiama prawan nani ba walisa,#Ais 35.5-6. pruan nani ba kli rawi buisa, bara umpira nani ra swaki sakan sturka ba smalkan sa.#Ais 61.1. 23¡Bamna yamni pali sa, baha nani yang ra ai mina pruki kauhras ba!
24Jan blikan uplika nani ba mahka wan piua ra, Jisas mita Jan dukiara upla nani ra naku aisi, win: “¿Man nani dîa kaikaia twi ra waram? ¿Yauhrus dusa kumi pâsa mita wauhi ba? 25¿Apia kaka, dîa kaikaia waram? ¿Waitna kumi kwala painkira baman dimi ba? Man nani kaiki tânka brisma, kwala pain baman dimi bara ai liliaka ra iwi nani ba lika king nani watla ra iwisa. 26Bamna, ¿dîa kaikaia waram ki? ¿Prapit kum? Âu, kasak baha ba prapit wal kau tara sa. 27Jan dukiara sika Ulbanka ra naku wi ba:
‘Yang naipakan kainamra blikuna,
yabalkam ridi daukaia dukiara.’#Mal 3.1.
28Yang mai wisna, upla nani sut tilara, Jan Tatahbra baku prapit tara wala kumi sin âpu sa; ban sakuna, ya Gâd kingka lâka ra sirpi baku ba, Jan purkara kau tara sa.
29“Naha walan piua ra, upla nani bara lal mana sasakra nani Jan mita tahbi daukan kan ba sut kaikan Gâd ba kasak sa. 30Sakuna parisi nani bara Lâ Smasmalkra nani Jan mita tahbi daukras kan ba, Gâd bui witin nani dukiara dîa daukaia lukan ba, bahki kulkan.”#Mt 21.32; Lk 3.12.
31Bamna Dawan bila: “¿Naha piua uplika nani na, yang dîa wal prakamna ki? ¿Dîa wal baku sa ki? 32Sim tuktan nani wal baku sa, witin nani pulaia pliska ra pulaia iwisa, ai pânika nani ra naku wini ba: ‘Yang nani plut puhbri, sakuna man nani lilia pulras; yang nani sin sari lawana nani aiwanri, sakuna man nani lika inras.’ 33Kan Jan Tatahbra balan, bara witin plun uya piras, wain sin diras, sakuna man nani wisma witin pirit saura kum brisa. 34Ningkara, Upla Luhpia Waitna balan, plun pîsa bara diara sin dîsa, bara man nani wisma plun papira, dadira, upla saurakira nani lal mana saki Rom ra bliki nani pânika. 35Sakuna Gâd sinska lâka ba ai daukanka nani bâk latan marikisa.”
Jisas Saiman parisi ba watla ra dimisa
36Baha piua nani ra parisi kum Jisas ra paiwan plun piaia, bamna witin parisi ba watla ra dimi, mahka tibil ra iwan. 37Baha tawanka ra mairin kum bâra iwi kan, witinka saurka lâka dadaukra kata. Witin tânka brin Jisas parisi ba watla ra plun piaia wan, bamna witin alabaster batilka kum ra batana laya kîa pain ba brih, bahara wan. 38Mairin ba ini Jisas lamara wih, witin mina nani ra ai nakra laya ni buskan. Ningkara, ai tâwa ni dikan, kiawalan, batana kîa pain ba ni sin yukan.#Mt 26.7; Mk 14.3; Jn 12.3. 39Jisas ra paiwan parisika ba mita naha kaikan piua ra, ai kupia ra naku lukan: “Naha waitnika na prapit kum kata, ai dara walaia kan witin ai taya ra kangbi mairka ba ya sapa, kan witin lika saura lâka dadaukra sa.” 40Bamna Jisas parisi ba ra win:
—Saiman, yang diara brisna man ra mai wiaia.
Parisi ba pana win:
—Ai wis, Smasmalkra.
41Jisas bila:
—Lalah lin mamunra waitnika kum ra waitna wâl mita lalah yabaia bri kan. Kumi ba lalah 500 yaia kan, bara wala mita lika lalah 50 baman yaia kan. 42Baha nani sip aibapras kan bamna, lalah lin mamunra ba mita wâlsut traska ba ban swin tiwan. Nanara ai wis, ¿baha wâl ba wina ani ba kau witin ra latwan kaikbia ki?
43Saiman pana win:
—Yang lukisna baha traska kau tara kan swin tiwan yaba.
Jisas bila:
—Man kasak aisaram.
44Jisas mairin ba ra kaiki si, Saiman ra win:
—¿Man naha mairka na kaikisma ki? Yang wamtla ra dimri bara man lî aikras mini nani sikbaia, sakuna naha mairin ai nakra laya ni yang mini nani sikban, bara ai tâwa ni sin dikan. 45Man mita ai kiawalras, sakuna mairin na bal dimri ba wina, mini nani kiawali sip swiras kan. 46Man mita laila ra batana mangkras, sakuna mairin na batana kîa pain ba ni mini nani ra yukan. 47Baha mita yang mai wisna, witin ai latwanka tara ba mita marikisa ai saurka nani sut ba swih tikan sa; bamna ani uplika saurka wiria baman swih tikan ba, pana wiria baman latwan kaikisa.
48Bamna Jisas mita mairka ba ra win:
—Man saurkam nani ba sut swih tikan sa.
49Paiwan uplika nani Jisas wal tibil ra iwi kan ba mahka pana pana makabi walan:
—¿Naha waitnika na ya, upla saurka nani sin ban swih tiki na?
50Sakuna Jisas mita mairin ba ra win:
—Man kasak lukram bamna, swaki mai sakan sa; bamna kupiam kumi wal was.
Currently Selected:
Luk 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
