Luk 8

Mairin nani Jisas ra hilp muni kan ba

1Naha ningkara, Jisas tawan tara nani bara tawan sirpi nani ra sin impaki, Gâd Kingka Lâka sturka ba smalki kan. Apastil 12 ba witin yula kahbi tauki kan. 2Mairin nani sin ai yula kahbi tauki kata, baha nani Jisas mita pirit saura nani wina, bara siknis nani wina rakan kan nani ba. Baha nani tilara kum auya kan ba lika Meri, nina Magdalin mâki kan ba, witinka wina pirit tâski 7 kangbi sakan ba; 3bara Cuza maya mairin ai nina ba Juana, waitnika ba lika Herod watla ra klark kata; wala ba Susana, bara mairin wala nani sin uya; witin nani lika Jisas ra bara disaipil nani ra dîa diara bri kan ba wina hilp muni kata.#Mt 27.55-56; Mk 15.40-41; Lk 23.49.

Mamangkra maprika lilka ba

(Mt 13.1-9; Mk 4.1-9)

4Tawan ailal wina upla manis taki aula kan Jisas kaikaia; upla manis asla takan, witin baha nani ra maprika lilka kumi aisi, naku win: 5“Mamangkra kum taki wan plun mâ mangkaia. Witin mangki kan ba ra, mâ kum kum yabal tnaya ra kauhan bara upla ai mina ni taiban, daiwan tnawira nani sin pin. 6Mâ wala kum kum lika walpa tilara kauhan, bara baha mâ nani pâwi takan bara srawan, tasba ba lî âpu kan bamna. 7Plun mâ wala nani lika kiaya nani tilara kauhan, bara kiaya wal pâwan bamna, sut blaki ikan. 8Sakuna mâ wala nani lika tasba pain ra kauhan, bara pâwan, mâ pain yan, mâ bani wina tila handat prais sin sakan.”

Jisas naha diara aisin ningkara, witin ai bîla baikra karna wini, naku win: “¡Man nani kiamam nani walaia brisma kaka, pain wali banhs!”

Maprika lilka nani tânka ba

(Mt 13.10-17; Mk 4.10-12)

9Bamna ai disaipilka nani mita makabi walan baha maprika sturka ba dîa tânka sapa. 10Bara witin bila: “Gâd mita man nani ra lika ai kingka lâka diara yukukan nani ba tânka briaia maikan sa; sakuna upla wala nani ra lika maprika ra baman aisisna, witin nani kau kaikbia, bara kau kaikras takbia, bara kau walbia ba ra, kau tânka bribia apia.#Ais 6.9-10.

Mamangkra maprika lilka tânka Jisas aisin ba

(Mt 13.18-23; Mk 4.13-20)

11“Naha sika maprika sturka tânka na: Saumuk ba lika Dawan bîla; 12saumuk kum kum yabal tnaya ra kauhan ba lika upla nani bîla ba wali ba, sakuna dibil bal naha smalkanka ai kupia ra kata ba sakuya, witin nani kra kasak lukbia bara swaki sin sâkbia apia dukiara. 13Saumuk mâ nani walpa nani tilara kauhan ba lika upla nani sturi yamni ba wali, liliakira brisa, sakuna ai wakia pain briras, piu wiria baman kasak lukuya, kuna traika kaikanka aula ba ra, mahka tnaya ra tawuya. 14Saumuk mâ nani kiaya nani tilara kauhan ba lika bîla smalkan ba waluya uplika nani, kuna ban ai yabalka nina bliki auya, bara yan taibuya kupia trabilka nani mita, bara lalah nani, bara tasba liliaka nani mita sin yan blakuya, bara baha mita mâ kumi sin sakras. 15Sakuna saumuk mâ nani tasba pain ra kauhan ba sika, baha uplika nani ai kupia pain ni, ridi pali Dawan bîla smalkanka ba waluya, bara piua bani kasak ban sa, bara mâ pain pali sakuya.

Lamp maprika lilka ba

(Mk 4.21-25)

16“Upla kumi sin âpu sa, witin lamp kum angki muni diara ni pura praki ba, apia kaka ai krikrika mununhtara swi ba; sakuna witin diara kum purara sunisa,#Mt 5.15; Lk 11.33. ani uplika ai watla ra dimuya ba ingni bri kabia dukiara. 17Bamna diara yukuwan ra ba param sakan kabia, diara dahra sin param aisan kabia.#Mt 10.26; Lk 12.2.

18“Baku bamna, pain wals; ya diara bri ba, witin ra kau yan kabia, sakuna ya âpu ba lika, witin dîa brisa luki ba sut ai mihta dakban kabia.”#Mt 25.29; Lk 19.26.

Jisas yaptika bara muihnika nani ba

(Mt 12.46-50; Mk 3.31-35)

19Bara Jisas yaptika bara muihnika nani sin balan witin bâra kan pliska ra, kuna upla ailal ba mita sip lamara waras kata. 20Bamna upla kum Jisas ra bal maisa pakan:

—Man mamikam bara muihkam nani kira latara sa, bara mai kaikan sin daukisa.

21Sakuna witin bila:

—Ani uplika nani Gâd bîla smalkanka ba wali dauki ba, baha nani sika yang mamiki, muihki nani sin.

Jisas pâsa bara rip nani sin lamni daukisa

(Mt 8.23-37; Mk 4.35-41)

22Yu kumi Jisas ai disaipilka nani kira duri tara kum ra aimaki, naku win:

—Kaisa yawan lakun na baila wala ra luaia.

Witin nani wan, 23bara lui auya kan ba ra, Jisas mahka yapan. Baha nani ai dara walras kan, lakun ba ra pâsa karna kum krawan, bara duri tara bilara mahka lî diman ban sin rungwaia praiska kat. 24Bara witin nani wih Jisas ra tatukbi, naku win:

—¡Smasmalkra! ¡Smasmalkra! ¡Yawan na rungwisa!

Bara Jisas mita pâsa bara rip nani ba ra lawi daukan; bara sâp takan, lamni tara sin balan. 25Bamna witin mita disaipil nani ra naku win:

—¿Kasak lukankam lâka ba dîa takan?

Sakuna witin nani sibrin takan, tâ sin iwan, bara pana pana tawi makabi wali kata:

—¿Naha waitna na ya, kan pâsa bara liura sin adar yan ai bîla wali ba?

Gerasa ra waitna kumi lasa bri kan ba

(Mt 8.28-34; Mk 5.1-20)

26Witin nani laki ban Gerasa tasbaya ra balan, baha ba lakun ba baila wala ra sa, Galili mawan tani ra. 27Jisas sauhka ra nan ulan ba ra, tawan ba wina waitna kum ai lamara balan. Naha waitna lika piua wihka pali pirit saura nani bri kata. Witin kwala dimras, utla kumi ra sin dimi iwras kan, sakuna raiti ra baman takaski kata. 28Witin Jisas kaikan piua ra, mawan kat wih ai lula ra kauhi, ai pura winan:

—Jisas, Gâd Laih Purara iwi ba Luhpia, ¿dîa kan tili dimisma ki? ¡Yang mamkabisni, rau ai sauhkpara!

29Witin baku aisin, kan Jisas mita piritka saura ba ra win, witinka ba wina takbia. Aima ailal piritka saura ba mita alkan kan, bara upla nani mita mihta nani sîn ni priski aihwaki bri kan, sakuna baha sut dakban, bara pirit saura ba mita munan twi ra plapan. 30Jisas mita makabi walan:

—¿Man ninam dîa?

Witin pana win:

—Yang nini ba Dakni Tara.

Witin naku aisin, kan pirit saura ailal pali waitna ba ra diman kata. 31Naha pirit saura nani Jisas ra makaban, tihu tara ra lika blîkbia apia. 32Kwirku ailal il ba ra plun pi kan bamna, pirit saura nani ba makaban kwirkuka nani ra wih dimaia adar yabia; bara Jisas mita adar yan. 33Bamna pirit saura nani ba waitna ba wina taki, kwirku nani ra wih diman, bara naha nani sut albangka tara bâk plapi lakun ra diman, bahara sut lî dih kwapi pruan.

34Kwirku nani main kaiki kan uplika nani naha diara kaikan piua ra, witin nani tâ iwi tawan ra bara insla warkka taki uplika nani ra sin plapi wih dîa takan ba win. 35Bara upla nani ba aidrubi balan, diara takan ba kaikaia. Witin nani ba Jisas bâra kan pliska ra balan ba ra, kaikan baha waitnika wina pirit saura nani taki wan ba; witin Jisas mina ra iwi kan, kwala dimi, ai sinska sin pain; bamna sut ba tâ iwan. 36Kaikan uplika nani mita aidrubi balan uplika nani ra maisa pakan, nahki waitnika ba pirit saura nani bri kan ba wina rawan ba. 37Naha wal, Gerasa kuntrika uplika nani sut mita Jisas ra makaban, baha wina mahka taki wabia, witin nani sibrin dauki kan ba mita. Baku bamna, Jisas duri tara ra aimaki, baha wina mahka wan. 38Baha waitnika wina pirit saura nani takan ba, Jisas ra makaban, swika witin wal taukaia. Sakuna Jisas mita adar yabi, naku win:

39—Wamtla ra kli tawi was, Gâd bui dîa man ra daukan ba sut kat aisas.

Waitna ba mahka wih, Jisas dîa witin ra daukan ba tawan uplika nani ra aisan.

Jairus luhpia mairin bara Jisas prâka ra kangban mairka ba

(Mt 9.18-26; Mk 5.21-43)

40Jisas lakun baila wala wina kli tawi balan ba ra, upla nani mita liliakira brin; kan sut witin bîla kaiki kata. 41Bara waitna kum balan, ai nina Jairus; witin ba prias watla wihtka kum kata. Naha waitnika na Jisas mawanra bal bawi, makaban ai watla ra wabia, 42ai luhpia mairin unhsak bara mani 12 bri kan ba prui kan bamna.

Jisas auya kan, upla ailal ai nina blikan bara ban sin taibi kata. 43Witin nani ba tilara mairin kum bâra kan, witinka ba pat mani 12 tala plapan sikniska bri kan, bara dîa bri kan ba sut daktar nani ra man tikan, sakuna kumi mita sin sip rakras kan. 44Witin Jisas ninak bal prâka un ra kangban, bara baha sim piua ra ai tâlia plapi kata ba takaskan. 45Bara Jisas makabi walan:

—¿Ya mita ai kangban?

Upla sut win witin ra kangbras. Bara Pita ai pânika wala nani sin win:

—Smasmalkra, upla nani na mita kutbi mai brisa bara mai taibisa.

46Sakuna Jisas bila:

—Upla kum ai kangban, kan yang daira walri karniki yang wina takan.

47Bamna mairin ba kaikan witin sip yukuwras kan, bara tatatwi Jisas mina ra bal ai lula krikan. Upla nani sut mawanra ai dahra sakan dîa dukiara witin Jisas prâka ra kangban ba, bara nahki sim piua ra ai sikniska wina rawan ba. 48Jisas pana win:

—Luhpi mairin, kasak lukram ba mita mai rakan sa. Kupiam kumi wamtla ra was.

49Jisas kau aisi kan ba ra, prias watla wihtka ba watla wina upla kum bal Jairus ra naku win:

—Luhpiam mairin ba pat pruan; bamna Smasmalkra ra kau trabil munpara.

50Sakuna Jisas baha wali, naku win:

—Man si bripara; kasak luki bas, bara luhpiam ba rawbia.

51Utla ra balan ba ra, upla wala kumi sin yan dimras kan, Pita, Jems, Jan bara tukta mairin aisika bara yaptika baman. 52Upla sut bâra kan ba pura mata ini yahwi kan. Sakuna Jisas bila:

—Man nani inpara; tuktan mairin na pruras, witin yapisa.

53Sakuna upla nani ai lawaska kikata, kan witin nani kaikan mairin ba pruan sa bamna. 54Bara Jisas tukta mairin mihta ra alki, ai bîla baikra tara ni win:

—¡Tukta mairin, bus!

55Baha sim piua ra tukta mairin ba ai rayaka kli brin, bara mahka sin buan; bara Jisas adar yan plun piaia yabia. 56Aisika bara yaptika wal lika tâ iwan kan; sakuna Jisas adar yan upla kumi ra sin diara takan ba wibia apia.

Currently Selected:

Luk 8: MSKTU

Highlight

Copy