Libait Lâka 5

Saura daukan ba ai dara walan bara sakripais daukaia lâka ba

1“Upla kum bui upla wala saura dauki kan kaikan, bara baha witniska ba aisaia lâ watla ra paiwan, sakuna witin baha dahra ba aisaras yukukbia kaka, saura daukisa. Uplika saura daukan saurka ba witin purara kabia.

2“Upla kum diara kum tâski kulkan kan ba ai tânka briras ai mihta ni kangbi kaka, tâski kulkan daiwra kum pruan kan wîna ra, daiwan wail kan, apia kaka daiwra ba tim kan sapa, apia kra ai biara purara kwasi daiwra kata sapa, sakuna diara tâski ra kangban bamna, witin sin tâski kulkan kabia.

3“Upla kum bui upla wala wîna tara tâski kulkan kan ba ra kangbia, apia kaka wîna kum tâski ba kangban kaka, diara wala kra kabia sin, tâski kulkan kan ba ai dara walras kira kangban sa kaka, witin ai dara walbia bara witin ra saurka ba kulkan kabia.

4“Upla kum pain ai dara wali luki kaikras kira, diara kum yamni, apia kra saura kum kra daukaia dukiara swer taki aisin, sakuna baha minitka ra kau ai tânka briras kan, ningkara witin ai dara walan ba ra, baha swer taki aisin saurka ba mana pâtkira kulkan kabia.

5“Naha diara nani sut taki ba tilara, pâtkira takan uplika ba, baha saurka witin daukan ba mana ai dahra sakaia sa. 6Witin ai daiwra daknika ba wina, daiwan mairin kum bri sal witin saura daukan ba mana Dawan ra yabi, sakripais daukbia. Sîp mairin kum, apia kra guts mairin kum, baha daiwra prîs ba bri sakripais dauki ba natka ra uplika saura daukan saurka ba swih tikbia.

7“Saura daukan uplika ba, sîp kum, apia kaka guts kum kra sin atkaia lalahka âpu sa kaka, butku tara wâl, apia kaka butku kau sirpi nani ba wâl brih wabia, Dawan mawanra buaia ai saurka daukan ba mana yabaia. Daiwra kum ba saurka daukan ba mana sakripaiska daukbia, daiwan wala ba aiska angki daukaia sakripaiska ba daukbia. 8Daiwan nani ba prîs ra bri si yabia, bara saurka daukan mana sakripaiska ba pas daukbia, daiwra nana dusa ba warbi kriki ikbia, sakuna lal ba lika dakbia apia. 9Tâlia kau wirâ takan ba brih, altar tnaya ba srikbia; bara wîna ba altar lamara bri si, tâlia ba sut taibi saki ba ra laikbia, saurka daukan sakripaiska ba mita baku daukbia. 10Bara daiwan wala ba brih, wîna aiska angki sakripaiska daukaia lâka win ba baku natka kat daukbia. Baku dauki prîs ba, baha uplika saura daukan ba saurka swih tikaia lâka ba daukbia. Bara uplika saurka ba ban swih tikan kabia.

11“Saura daukan uplika ba, butku tara wâl, apia kaka, butku sirpi wâl pan atkaia lalahka sin briras sa kaka, plawar kau pain ba wina paun wâl brih waia sa ai saurka daukan ba mana. Sakuna saurka daukan mana brih aula ba mita, plawarka ba purara batana laya laikaia apia, kîa yamni angki daukaia dukia nani sin mangkbia apia. 12Plawarka ba, prîs ra bri si yabia bara witin ai mihta banhki bribia, pura sunra ba daukbia. Bara plawarka ba sut bribia, baku sakripais wala nani sin brih balan ba sut brih, kîa pain angki dauki Dawan ra yabaia altarka purara angkbia, baha ba saura daukan ba mana sakripaiska kum bamna. 13Prîs ba baku dauki natka ra saura daukan uplika saurka ba ban swih tikaia lâka ba daukbia, bara saurka ba ban swin tikan kabia. Plun nani bri sal sakripais dauki ba, pata nani sut sakripais daukras kau swin ba, baha lika prîs nani ra yabia.”

Ai dara walras saura daukan ba sakripaiska daukaia sa

14Dawan ba Moses ra aisi, naku win:

15“Upla kum ai brinka wina apia, ai tânka briras Dawan ra yan dukia nani pata pura suni swin ba alki saura daukan kaka, witin ai daiwra daknika ba wina, sîp wainhka kum skahwa apia, watawan âpu pali ba bri balaia sa. Witin pâtkira takan ba, kli aibapaia sakripaiska daukaia sa, baha Dawan ra brih waia sa. Baha sîpka mana ba, silbar ra kulkaia sa tempel lalahka paun ra mangki kulki ba praiska, pâtkira takan ba prisantka nani yabaia. 16Baha uplika Dawan ra yan dukia pat pura suni swin kan, sâbi alkan ba mana ba aibapaia sa; baha purkara mânka matsip pura praki, witin prîs ra aibapbia. Baha ningkara, pâtkira takan ba sakripaiska daukaia sîpka ba prîs ba brih, sakripais dauki uplika ba saurka mana daukbia, bara uplika ai saurka ba ban swin tikan kabia.

17“Dawan ai lâka nani mangkan ba mapara mita, upla kum ai dara walras kira saura daukbia kaka, ai dara walras kan sakuna pâtkira kulkan kabia, bara baha pâtka ba witin twilkbia. 18Baha ba mita, witin ai daiwra daknika ba tila wina, sîp kum skahwa apia pali ba bri balaia sa, daiwra mana ba man kulkaia sma. Bara prîs brih wabia, ai saurka daukan ba mana sakripais daukbia. Baku daukbia baha uplika ai dara walras saura daukan saurka ba, ban swih tikaia dukiara, bara ai saurka ba swin tikan kabia. 19Baha pâtkira takan ba sakripaiska kum sa, kan baha uplika ba Dawan mawanra pâtkira kulkan sa.”

Currently Selected:

Libait Lâka 5: MSKTU

Highlight

Copy