Libait Lâka 4
4
Saurka daukan mana sakripais nani daukan ba
1Dawan ba Moses ra aisi, naku win:
2“Israel luhpia nani ra wis, upla kum ai lukanka wina saura daukaia lukras kan ban saura kum daukan ba, Dawan lâka nani krikaia apia win kuna lâka nani ba ban krikan ba, baha sât uplika lâka ba naku daukan kabia:
3“Prîs ba bahmuna saurka daukan kaka, bara baha wal tawan uplika nani baku pâtkira takan sa kaka, witin bîp kum watawan âpu pali ba iki, saura daukan ba mana sakripais daukbia. 4Sakripais ba Dawan kaiki ba ra brih wabia, Dawan wal aisaia Tintka watla ra. Bahara witin ai mihta daiwan ba lal ra kahbia, baha ningkara Dawan kaiki ba ra daiwan ba skiru ni sabi ikbia. 5Ningkara Dawan lâka krikan prîska ba, witin mita bîpka tâlia ba bara wîna wiria brih, Dawan wal aisaia tintka watla bilara brih wabia. 6Bara witin Dawan kaiki ba ra, tala ba ai mihta sirpika ra buski, 7 taim tempel kwalka paman ba lamara srikbia. 7Kîa pain daukaia altarka aringka nani ba ra sin tala ba ni wirâ yûkbia, tint watla ra upla nani buaika ba ra, Dawan kaiki ba lamara, tala kau aihkika laikras swin ba, baha ni altarka ba lamara laikbia, tint watla ra dimaika durka bilara bâra ba. 8Baha daukbia ningkara, bîpka biara bara batanka nani ba sut sâkbia. 9Kiskamka wâl ba, biara bîla batanka nani ba sin sut, bara âuya batanka nani sin sâkbia. 10Bîpka wainhka kum ikan ba, baha ni kli wal ai uplika takaia prisantka dauki yabia, wîna batanka nani sut sakan ba, prîs ba baha dukia nani sut brih angkbia altar ba purara. 11Sakuna bîpka taya ba, wîna ba sut, lal ba, kuhma nani ba, bara tâskika ba sin sut, 12wibia kaka bîpka aiska ba, tint watla lata tani ra saki, tâski âpu pliska ra yamhpus yakabaika ba ra pauta paski baha sut angkbia.
13“Israel luhpia nani sut ai tânka briras kan witin nani sin ban kra ai dara walras, saura daukan kaka tânka Dawan lâka mapara daukan bara baku witin nani pâtkira takan sa kaka, 14witin nani saura daukan ba ai dahra waluya ba ra, uplika ba mahka balbia, ai saurka ba ban swih tikaia sakripaiska daukaia. Bîp wainhka kum brih wabia, Dawan wal aisaia Tintka watla ra. 15Bahara Dawan kaiki ba ra, upla almuk nani ba wal bîpka ba lal ra ai mihta kahbia, bara baha kat skiru ni sabi ikbia. 16Bara prîs tara bara bal, tâlia ba wina wirâ brih, Dawan wal aisaia Tintka watla bilara brih wabia. 17Bara ai mihta sirpika tala ra buski, tempel kwalka paman ba lamara, Dawan kaiki ba ra 7 taim srikbia. 18Baha ningkara altar aringka nani ba ra sin, tala ba ni wirâ yûkbia Dawan kaiki ba ra, baha ba Dawan wal aisaia Tintka watla ba bilara daukbia. Bara tala kau ailal yus munras ba, baha bri si daiwan aiska wîna batanka nani ba saki angki ba, altarka ba lamara laikbia, Dawan wal aisaia tint watla ra dimaia ba bilara. 19Bara bîpka wina batanka nani ba sut saki si, bara wîna ba aiska, angkbia altar ra. 20Wibia kaka, baha bîpka ikan ba sika, tawan saura daukan saurka ba mana; baha mita upla saurka swih tikaia sakripaiska dauki ba baku, dauki angkbia, bara witin nani pâtka ba swin tikan kabia. 21Baha ningkara, bîpka wîna ba sut saki, tint watla lata tani ra angkbia, baha ba tawan saura daukan ba saurka mana sakripaiska bamna.
22“Wihta tara kum ai tânka briras saura daukan, Dawan lâka nani ba krikan, baha saurka ba mana witin ra kulkan sa kuna ai dara walras sa kaka, 23witin nani ai dara walbia saura daukan ba. Ai tânka bribia ba ra, mahka pali guts wainhka kum watawan âpu pali ba, ai saurka mana prisantka yabaia brih wabia. 24Witin ai mihta ba gutska ba lal ra kahbia, Dawan kaiki ba ra; baha ningkara, daiwra ba nana klaki dakbi ikbia, daiwan nani ikaika pliska ra, angkbia saurka daukan ba mana sakripaiska. 25Baha ningkara prîs ba bal, daiwra ikan tâlia ba wina ai mihta sirpika tâura buski brih, kîa yamni dauki angkaia altarka aringka nani ba ra yûkbia. Baha wina tâlia ba sut, altar ba lamara laikbia, 26bara daiwra batanka nani ba sut, altar ba purara angkbia, kli wal ai uplika takaia sakripaiska nahki dauki angki ba baku daukbia. Prîs ba baku dauki, wihta saura daukan ba pura sunbia, bara witin ai saurka ba ban swin tikan kabia.
27“Upla wala nani kulkanka mâyara kum, saura daukan ai tânka briras kira, witin diara kum daukan bara Dawan lâka nani ba mapara pâtkira takan sa kaka, 28saura daukan ba witin ai dara waluya ba ra, mahka pali guts kum brih wabia, watawan âpu sunu pali ba, bara baha saurka daukan ba mana prisantka Dawan ra yabia. 29Witin daiwra bri balan ba lal ra ai mihta kahbia, baha ningkara aiska angkaika pliska ra bri si nana dakbi ikbia. 30Bara prîs ba bal ai mihta sirpika ba ni tâlia ba ra buski, kîa yamni dauki angki altarka ra aringka nani ba ra yûkbia, bara tâlia wala sut ba lika altar ba lamara laikbia. 31Bara daiwra ba wina batanka nani ba sut saki bribia, kli wal uplika wan sakaia sakripaiska daukaia, daiwra wîna batanka nani saki ba baku naha daiwra ba wina sin sâkbia, bara kîa pain Dawan kiawali ba dauki angkbia. Prîs ba baku daukbia, bara uplika saura daukan saurka pâtka ba ban swih tikbia, bara ai saurka daukan ba ban swih tikan kabia.#Kul K 15.27-28.
32“Baha uplika ba sîp kum brih balbia kaka, witin saura daukan ba mana prisantka yabaia, sîpka ba skahwa apia bara sauhkan âpu pali kaia sa. 33Witin ai mihta sîpka ba lal ra kahbia, baha ningkara sakripaiska daukaia daiwra nani ikaika pliska ra bri si, saura daukan ba mana lal dakbi ikbia. 34Bara prîs ba bal, ai mihta sirpika ni tâlia ba ra buski wîna aiska angki altarka aringka nani ba ra yûkbia, bara tala sut ba lika altarka ba lamara laikbia. 35Baha ningkara daiwra wîna ba wina batanka nani ba sut sâkbia, kli wal wan uplika takaia sakripaiska dauki sîpka wîna batanka saki ba baku. Naha sîpka na wina sin batanka nani sut sâkbia, bara batanka nani ba sut altar ba purara angkbia, Dawan ra pain kulkan lâka dauki yabaia prisantka nani ba sut aikuki angkbia. Bara prîs ba baku daukbia bara saura daukan ba swih tikbia, bara uplika saura daukan pâtka ba ban swih tikbia.
Currently Selected:
Libait Lâka 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua