Libait Lâka 3
3
Kli wal uplika takaia sakripaiska nani
1“Upla kum Dawan wal kli ai uplika takaia sakripaiska daukisa kaka, witin ai daiwra ba wina bîp mairin kum, apia kaka wainhka kum bri balaia sa, sakuna daiwra aiska ba watawan sirpi kumi sin âpu kaia sa. 2Uplika ai prisantka dauki yabaia aula ba, witin ai mihta ba daiwra ba lal ra kahbaia sa; baha ningkara, Dawan wal aisaia Tintka watla durka lama ba kat, skiru ni sabi ikbia. Bara prîs nani ai warkka ba daukbia, tâlia ba brih altar pura ba tnaya ba kir sin srikbia.
3“Ani uplika ai daiwra angki kli wal ai uplika takaia sakripaiska kum daukaia brih aula ba, naku dauki Dawan ra yabaia sa, angki daukan prisantka kum ba, biara batanka nani, 4kiskamka nani batanka, biara bîla batanka, âuya batanka nani ba, baha nani sut ba kiskamka nani ba sut sâkbia. 5Prîs nani ba baha nani ba brih, daiwra wîna ba sin brih, altar purara pauta muki angkbia, angkan prisantka kum kîa painkira Dawan yamni kiawali ba dauki yabia.
6“Upla kum ai daiwra daknika ba wina daiwan kum brih, Dawan wal kli ai uplika takaia sakripaiska dauki yabisa kaka, daiwan wainhka kum, apia kaka mairin kum, watawan kumi sin âpu ba bri balaia sa. 7Sîp wainhka kum prisantka dauki Dawan ra yabaia kaka, 8daiwan ba lal ra witin ai mihta kahbaia sa; baha ningkara Dawan wal aisaia tintka watla ba durka lamara, sîpka ba skiru ni sabi ikaia. Bamna prîs nani bal tâlia ba brih, altar pura ba tnaya kir ba srikbia.
9“Kiskamka wal bara batanka nani purara alki ba, nina dusa purara batanka ba, âuya purara batanka ba nani sut ba saki, kiskama nani wâl ba bribia, 10baha bîpka wainhka wîna sakan ba bara baha ni kli wal uplika takaia sakripaiska ba daukbia. Prîs ba baha ba brih, daiwan aiska angki ba altarka purara angkbia. 11Baha ningkara prîs ba bal wîna nani ba sut altar purara angki, plun prisantka kum dauki, Dawan ra pain kulki ba yabia.
12“Prisantka yabaia daiwra ba guts kum brih aula sa kaka, Dawan kaiki ba ra bri balbia. 13Witin ai mihta daiwan ba lal ra kahbia, baha ningka Dawan wal aisaia Tintka watla ba lamara bri si skiru ni sabi ikbia. Bamna prîs nani bal tâlia ba brih, altar pura ba tnaya kir ba sin tala ni srikbia.
14“Daiwra bri balan uplika ba, Dawan ra pain kulkaia lâka dauki yabia, biara batanka nani ba sut Dawan ra yabia, 15kiskama wâl ba, batanka nani, âuya batanka ba nani sut, kiskama nani ba aikuki sâkbia. 16Ningkara prîs ba baha nani sut brih, altar ra angkbia, plun angkaia prisantka, kîa painkira Dawan kiawali ba, baha batanka nani sut ba witin bribia.
17“Naha lâka daukan na, aisika nani ba tawi ai luhpia nani ra smalki ban kabia, ai piua sut ra. Ani anira man nani wih iwma ba ra, man nani daiwan tâlia bara batanka ba pipara.”
Currently Selected:
Libait Lâka 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua