Libait Lâka 6
6
Kunin aisin tâka mita sakripaiska daukaia ba
1 #Naha borska nani 6.1-30 na bors. wala 5.20—6.23 ra kli baku ulban sa, baku Hibru nani ulbanka baku sa. Dawan ba Moses ra aisi, naku win:
2“Upla kum naha saurka nani dauki ba ai tahkia mapara, Dawan kaikisa ai uplika ra kunin muni aisi ba. Ai uplika witin ra diara kum yaban kan, sakuna pana mana, apia kra diara kum lin munan kan, apia kaka ai uplika dukia implikan, apia kra ai uplika dukia lâ tânka kat wina apia dakbi brin ba ra, baha dukiara kunin aisin kaka, 3apia kaka diara tiwan kum sakan bara sakras wisa kaka, apia kaka diara kum daukaia wisi aisin ba kat daukras, kunin aisisa kaka, baha daukanka nani tilara ya saura dauki ba, 4pâtkira kulkan kabia saura daukan ba mana. Baha mita baha dukia nani witin impliki brin sapa, apia kaka lâ kat apia dakbi brin kaka, apia kaka diara kum ai uplika witin ra yaban kli yabaia kan ba kli yaras kaka, baha dawanka ra kli yabia sa, upla dukia tiwan kan sakan kaka baha sut sin kli dawanka ra yabia, 5diara wala nani dukiara swer taki kunin aisin sa kaka, baha dukia nani sin sut ba kli dawanka ra yabia. Baha purkara, dukia praiska kulkan ba purara mânka matsip pura praki aibapbia. Witin ai saurka daukan ba mana sakripais daukbia ba ra, 6baha sakripaiska Dawan ra bri balaia ba lika, sîp kum watawan âpu pali ba bri balbia. Sîpka mana ba prîs mita praiska ba wibia, uplika ba ai daiwra daknika ba tila wina, daiwan ba saki prîs ra bri si yabia, ai saurka daukan ba mana sakripais daukaia. 7Bara baku prîs ba, baha uplika ba dukiara ani ani saurka kum daukan pâtka ba, ban swih tikaia warkka ba Dawan kaiki ba ra daukbia, bara uplika saura daukan pâtka ba ban swih tikbia.”#Kul K 5.5-8.
Aiska angkaia sakripaiska daukaia lâka nani ba
8Dawan ba Moses ra aisi, naku win:
9“Man nani bui Eran ra bara ai luhpia waitna nani ra wis, daiwan aiska angkaia sakripaiska ba nahki daukaia lâka nani ba: Sakripais daukaia daiwra ba altar purara pauta aswan nani ba purara kahbi swibia, tihmia aiska ban bâra lalawbia, pauta klauhan ba sin daswaia apia. 10Wîna ambia ba ningkara, prîs ba ai prâka, ai draska sut pihni pali dimi, bara daiwan aman yamhpuska nani ba sut, altar purara ba wina saki, altar tnaya ra laki swibia. 11Baha ningkara ai kwalka diman ba kli daiki saki, kwala wala dimi, bara yamhpuska ba watla lata tani ra plis kum tâski âpu ba ra bri si swibia.
12“Sakuna pauta altar purara aswi ba lika swika daswaia apia. Prîs tara ba, titan bani pauta baha purara kli kahbi kaia sa, bara angkaia daiwra ba sin, baha purara kahbi kaia. Baha dauki ba purkara sin, daiwan batanka nani ba altar ba purara angki kaia, baha lika kli wal wan uplika sakaia sakripaiska ba baku daukbia. 13Altarka purara pauta klauhi ba swika daswaia apia bara ami ban kaia sa.
Plun mâ nani prisantka ba nahki pura suni dauki yabaia
14“Plun mâ nani prisantka ba nahki pura suni dauki yabaia tânka ba lika, naku sa: Prîs ba mita altar lamara Dawan kaiki ba ra baha prisantka ba yabaia sa. 15Plawar bri balan uplika kum ba, plawar ba ai mihta banhki bribia, batana laya ba wina sin wirâ bribia, bara kîa pain angkaia dukia nani ba sin bribia; bara pata nani ba sut, altar purara angkan baku, kli ai kupia kraukbia. Dîa brin ba angki kîa yamni daukbia, Dawan pain kaiki ba dauki yabia. 16Bara plun nani kau angkras, tâka swin ba lika, Eran ra yabia bara luhpia nani ra sin. Ningkara sunu daukan iwaika kum ra iwi pibia, Dawan wal aisaia watla latka ra. 17Plawarka ba îs mangkras angkbia, baha plawarka yang ra prisant aikan angkan ba wina witin nani ra yabri sa kaka, baha ba sunu pali kulkan sa bamna, saurka swih tikan pâtka kulkras swin ba sakripaiska daukan ba wal baku kulkan sa bamna. 18Naha lâka daukan na, Eran kiamka nani prîs aimaki kabia ba piua sut, lâka na kulki ban kabia, Dawan ra plun nani prisant yaban, angkan tâka kau swin ba, baha witin nani piaia bribia. Dîa dîa diara wala nani baha prisantka nani kangbia kaka dukia ba sin, sunu kulkan kabia.”
Prîs mangki Dawan ra prisantka yabaia lâka ba
19Dawan ba Moses ra aisi, naku win:
20“Eran bara ai kiamka nani sin prîs lâka ra mangki ba yua ra, prisantka nani ba Dawan kaiki ba ra brih balaia sa: plawar kau pain ba wina paun wâl, plun laya prisantka yaia daukan ba, bamna titan bara tutni ra prisantka yabi ba sin bri balbia. 21Sakuna brit angkaia pânka kum ra batana laiki mangki, pîs sirpi ra klaki bara kîa yamni prisantka painkira, Dawan kiawali ba dauki yabia. 22Eran kiamka nani wina Eran watlika ra prîs tara lâka ra mangki ba ra, baha yua ba baku dauki kabia. Piua bani, prîs tara Dawan warkka ra mangki ba piua ra, sakripais prisantka nani angki baku prisantka sut pali angkbia. 23Prîs nani mangkaia prisantka nani brih aula ba, sut pali angki kaia sa, upla kumi sin baha wina brih piaia apia.”
Saura daukan sakripaiska nahki daukaia ba
24Dawan ba Moses ra aisi, naku win:
25“Eran ra bara baku sin ai luhpia waitna nani ra wis, upla kum saura daukan saurka mana sakripaiska ba, nahki daukaia tânka ba: Daiwra ba, Dawan kaiki ba pliska ra bri si angkaika ba ra nana klaki dakbia, baha sakripaiska ba tâski âpu pali kaia kulkan sa. 26Baha prîska baha sakripaiska daukan ba, daiwra wîna ba, witin piaia sip sa, sakuna tint watla latka ra sunu pliska kum ra iwi pibia. 27Diara kum kra dukia kum ra ya baha daiwra wîna tâski âpu daukan ba ni kangbia kaka, dukia ba sin tâski âpu kulkan kabia. Ai prâka dimi ba ra tala srikwi alkbia kaka, tâski âpu kulkan ba pliska ra dimi ai prâka ba tuskbia. 28Sumi dakawa ra prisantka yabi wînka ba yaban lukwan sa kaka, dakawa ba baikaia sa. Sakuna bras dakawa ra yaban lukwan sa kaka, dakawa bîla ba wisbi sikbi klin daukbia.
29“Baha sakripaiska ba diara kum tâski âpu pali kulkan sa. Bamna prîs nani ba baman baha wina piaia sip sa. 30Sakuna upla saura daukan mana prisantka yabi sakripaiska daukaia daiwra nani bri balan ba tâlia tint watla bilara, Dawan wal aisi ba pliska ra bri balan ba, saurka nani ban swih tikaia tâski âpu kulkan watla ra dingkan ba, baha daiwra wîna ba upla kumi sin piaia apia sa. Baha sakripaiska ba pauta ra angkan kabia.
Currently Selected:
Libait Lâka 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua