Oseas 10
10
Israel altarka nani sauhki tikan ba
1Israel ba, wain kiwka ra mâ ailal pali alkan ba baku sa;
witin nani ba kau ailal alki kan ba ra,
altar nani sin kau ailal paski kan;
tasbaya kau painkira taki kan ba ra
ai gâdka bahki nani walpaya ba sin, kau pranakira paski kan.
2Israel ai lukanka wâl brisa,
bara nanara saura daukan ba mana ba aibapaisa.
Dawan bal ai altarka nani ba slingbi tikbia,
bara ai gâdka bahki nani altarka walpaya nani paskan ba sin slingbi tikbia.
3Bâra lika witin nani naku aisabia:
“Yawan king âpu na,
kan yawan bui Dawan ra kulkanka yaras ba mita.
Sakuna, ¿king kum sin yawan wan dukiara dîa daukaia sip sa ki?
4Aisin, bara aisi baman sa,
kunin baman pramis takisa bara wal lâ dauki nani ba, ulbi baman swisa;
ai kasakka lâka ba inma puisinkira lainka ra mangkan wapni pâwi ba baku sa.”
5Sameria uplika nani tatatwisa;
Bet-avén ra ai bîpka lupia#Os 8.5. bri ba tiwuya ba dukiara inisa.
Upla nani ba, prîs nani ba bîpka lupia ba pura mata inisa,
ai prana ba lap tiwan bamna.
6Bîpka pali ba sin Asiria ra brih wabia
king tara ba ra prisant yabaia.
Baku Efraín ba ai swira pali takbia:
Israel sin aidul bri ba swira daukan kabia.
7Sameria kingka ba, dus yuyaka lupia lî purara awi si lap tiwi ba baku lap tiwbia.
8Idan nani ai pura sunaia watla nani mâkan ba, sauhki tikbia,
bahara Israel luhpia nani saura dauki kan ba.
Altarka nani ba purara kiaya kiwka, kiaya dusa nani pâwbia,
bara upla nani ba il tara nani ra wibia:
“¡Yang nani puri biks!”,
il purara pali nani ba ra wibia:
“¡Man nani, yang nani purira bal kauhs!”#Lk 23.30; Par M 6.16.
Dawan ba Israel luhpia nani mapara lâ daukuya
9Dawan aisisa:
“Israel Guibeá ra wih saura daukan ba wina#Wih 19.1-30.
baha saurka swira dauki ban sa.
¡Ai saurka ra ban iwisa!
Baha mita war ba
Guibeá ra baha watawikira nani ba ra alkbia.
10Yang klala yabamna naha tawanka ra, ansa piua ra yang want sna ba ra.
Witin mapara nisan nani asla takaisa,
ansa piua ra, yang klala yabamna ai saurka tara mata.
11“Efraín ba bîp tiara kum, pat tim takan ba baku kan,
plun mâ taya sakaia lihki kan.
Nana dusa painkira bara mangkaika dusa ba mangkri
wagin ba wina kauhbia dukiara,
bara Juda tasba baikaika ba wina kauhbia,
Jekob sin baha dusa raski pahbi ba wina kauhbia.
12Yang bui witin nani ra wîri:
Kasakka lâka mâ ba, man nani mangks
bara latwan kaikaia mâ nani ba kriks.
Tasba baiki dauks, mâ raya nani mangkaia dukiara,#Jir 4.3.
kan nanara mahka Dawan plikaia piua sa,
witin balbia kat
bara swaki mai sakan laya ba, man nani puramra auhbia.#Ais 44.3; 45.8; Os 6.3.
13Sakuna man nani lika, watawika lâka mâ nani mangkram
bara watawika lâka mâ nani dakbram
bara man nani kunin aisaia mâ nani piram.
“War waginka nani brisma bara karnikam brisma lukram ba mita
war aiklaklabra ailal brisma ba ra sin,
14bahamna uplikam nani tilara unsaban bâra kabia,
bara kan kahbaika pliskam nani ba sut bîla baman dauki swin kabia,
king Salmón Bet-arbel ra war aiklaban yua ra âpu dauki swin ba,
mairin nani luhpia nani aikuki iki âpu daukan ba baku.
15Baha nani ra takan ba baku, Betel uplika nani,
man nani ra sin takbia,
watawika lâka tara daukram ba tâwan.
¡Israel kingka ba yu nan baiwbia ra pat ikan kabia!
Currently Selected:
Oseas 10: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua