Impakan Sturka 39
39
Prîs nani prâka nani ba sipan
(Imp St 28.1-43)
1Tint watla ra pamaia kwalka nani maman ba, mapla blu, paura, balianta, bara kwala pauni pali, baku sin Eran prâka sin sipan Dawan mita Moses ra dîa daukaia win ba kat daukan.
2Bamna prâka lama purara prakaia pîska ba, gul, kwala blu, paura, balianta, kwala pauni pali bara linin pitban brin. 3Gul ba amar ni pruki tanta dauki, baha wina sirpi klaki bara kwala sipaia sialaka nani daukan, kwala blu, kwala paura, balianta, pauni pali sin linin kwalka nani ba sipaia. 4Pahpaya purara prakaia pîska nani ba wâl daukan, lama prakaika ‘‘efod’’ ba ra prakan kaia, tâ kum ba tâ wala ba wal wilkan. 5‘‘Efod’’ ba purak laki maisa wilkaia pîska wal wilkan, baha baku sin gul ni, kwala paura ni kwala balianta ni, kwala pauni bara linin kwalka ra pitban ba sin baku wilkan, Dawan mita Moses ra dîa daukaia win ba tânka ba kat daukan.
6Karnilian walpaya nani ba, Israel luhpia waitna nani nina ulban ba pîska ra praki swin, sîl prakan ba baku. 7Pahpaya purara prakaika ba bara lama prakaia pîska paskan ba Besalel brin, bara prâka ba ra prakan. Israel luhpia waitna nani ba ai kupia krauki kaia dukiara, Dawan mita Moses ra dîa daukaia win ba tânka kat.
8Bamna lama prakaika, purara prakaia pîska ba sin, lama prakaika aiska ba, nahki mawan ba tânka kat maman, gul ni, kwala paura ni, kwala balianta ni, kwala pauni bara linin kwalka ni sin maman. 9Pîska yahpika yarika ba 9 ins bri kan, bîla yahpika sin 9 ins kan, bara baha pîska wal praki sipan, bara yahpika ba wan mihta yahpika baku kan. 10Bara baha purara walpa manakira nani 12 prakan; walpaya yumhpa tnaya kat prakan: tâura lainka ba rubi, krisulait bara esmeralt kan, 11bara lain wala ra esmeralt, sapair, daimans, 12lain yumhpika ba ra jasint, agat, amatist; 13lâs lain ra beril, kalsiduni bara jasper. Naha walpaya nani ba gul purara prakan. 14Walpaya nani ba 12 kata, Israel luhpia nani nina 12 ba bâra ulban. Walpaya kum ra tukin ba praki, nina ba sîl praki baku ulban, kiamka matawalsip pura wâl kulkanka ba kat.
15Lama prakaika ba purara prakaia gul aihwa ni awa pitban kata kiwa pitbi ba baku. 16Baku sin gul ni pîs wala wâl daukan, bara unta wâl tâura daukan, lama prakaika tâ wâl ra wilkaia, 17bara gul ni awa nani daukan ba, baha kakauka untika wâl ra wilkan. 18Baha tâ wâl ra wilkan awa tâka ba ni, pahpaya purara prakan pîska tâ wâl ba wilkan mawan tani ra. 19Bara gul ni kakauka untika wala wâl dauki, lama prakaika tâ wâl ra wilkan, baha ba lama prakaika un mâyara, bîla tani ra. 20Baha purkara, gul ni kakauka unta wala wâl daukan, prâka aiska ba ra wilkaia, pîska mawan tani ra pahpaya ra wilkan mununhta tani ra. 21Baha ningkara awa pauni kum brin, prâka untika nani bâk kauhbi, lama prakaia untika nani bâk kauhbi, maisa pura bâk laki wilkan lanhwaia apia. Baha nahki daukaia Dawan mita Moses ra win ba baku daukan.
22Bamna lama prakaika aiska purara pîska ba, kwala blu, paura sâtka nani wal daukan. 23Prâka tara ba lilapas kat unta ailal kan, baha untika mawan butin untika mami ba baku, kalwaia apia ba dukiara. 24Prâka ba un ra dus mâ sâtka nani kwala ni dauki paman, paura, balianta, pauni pali linin maman sâtka. 25Baha purkara bil luhpia nani gul aihwa ni paski paman bara dus mâ sâtka nani daukan kan ba, baha nani tilara prâka ba un ra paman, 26prîs warkka daukaia ra dimi ba prâka un ra, bil lupia kumi bara dus mâ sâtka kum, kli bil lupia kum bara dus mâ sâtka wala kum pâwan. Baku ban kan baha Dawan bui Moses ra baku daukaia win ba baku daukan.
27Sasipra kum mita linin kwalka ni Eran luhpia nani prâka sin sipan, 28lal ra wilkaika ba, lal prakaika ba, draska awa ba sin linin pitban; 29maisa wila ba sin linin ni pitban, kwala blu, balianta, kwala pauni ni pitbi daukan kata, Dawan mita nahki daukaia Moses ra win ba baku daukan.
30Bamna witin nani sin gul aihwa ba amar ni pruki tanta dauki, prîs kum aihka sunu sakan, sîl baku daukan bara bahara naku ulban: “Dawan yaban.” 31Baha ningkara, kwala paura kumi brin prîs lal pura prakaika ra baha wilkan, Dawan nahki daukaia Moses ra win ba baku daukan.
Wark nani ba sut daukan
(Imp St 35.10-19)
32Bara baku tint watla, Dawan wal aisaia tintka watla ba aiska paskan. Dawan mita nahki daukaia Moses ra win ba kat, Israel luhpia nani ba daukan. 33Bara watla ba Moses mihta ra mangkan tint watla ba, bilara wark daukaia dukia nani, kwala pamaika pînka nani ba, tat nani, silak yari tara nani ba, playa nani ba bara munhta karnika nani, 34pura prakaika nani, sîp wainhka taya pauni dingkan ba, pura prakaika kau pain nani daukan ba, lâ auhbaia watla pura prakaika kwalka ba, 35lâ daukan, lâka auhbaika watla ba, twilkaia dusa nani ba, pura prakaika ba, 36tibil ba bara diara laikaia watlika nani ba sin, bâk sakan britka Dawan ra yabi ba, 37kiandil bapi angkaika gul ni paskan ba, lamp nani bri kaia dukia nani ba, yus munaia dukia nani ba sut, batana laya lamp angkaia ba, 38altar gul ni daukan ba, lal ra laikaia batanka ba, kîa yamni angkaia dukia nani ba, tint watla durka dimaia ra pamaia kwalka nani ba sin. 39Diara angkaia altarka bras ni daukan ba, yamhpus yakawaika daukan ba, twilki brih waia dusa nani ba, diara watla nani ba, bisin ba bara mina purara kahbaia dusa ba bara iliska daukan ba, kahra nani bara wark daukaia dukia nani, lî plapaika munhta karnika ba, 40utla kutbanka pamaia kwalka nani, playa nani munhta karnika nani, utla kutbanka ra dimaia pamaia kwalka, kiwa nani bara dus tatwa daukan nani, utla ra wark daukaia dukia nani, asla taki watla ba, 41tint watla ra dimi wark takaia prâka pitbi daukan, Eran prâka bara luhpia nani prâka ba sin.
42Dawan mita Moses ra dîa daukaia win tânka kat daukan, Israel luhpia nani baku daukan, 43bara Moses mita kaikan warkka nani sut ba. Bara kaiks, Dawan dîa daukbia wisi win ba baku daukan kata. Bara witin nani ra yamni munan.
Currently Selected:
Impakan Sturka 39: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua