Impakan Sturka 38

Altar ba bras ni paskan

(Imp St 27.1-8)

1Bamna Besalel, akasia dusa ba ni daiwan aiska angkaia altarka ba paskan. Yarika ba 7 pît bri kan, bîla yahpika ba 7 pît, yarika yahpika ba wal kumi kata, bara paknika ba 4 pît bri kan. 2Bara aringka nani daukan tâ walhwal ra, bara baha sut ba slilki praki pîs kumi daukan altar ba wal, bara baha aiska ba bras ni lalauban kata. 3Bara yamhpus watla nani ba, plit nani ba, kâp tara nani ba, park nani ba bara pauta turbaika nani sut ba bras ni paskan, altar ra yus muni dukia nani ba sin. 4Bara yamhpus yakawaika kum sin bras ni paski bri si altar ba ra dingkan, munhta lilapas kat swin. 5Bara baha alki twilkaia dukiara, tâ walhwal ra unta daukan, baha untika bâk twilkaika dusa ba dingkaia dukiara. 6Baha ningkara akasia dusa ni dusa nani ba paskan, bara baha aiska ba bras ni lalauban, 7bara altar ba tnaya ra unta nani bâk dus nani ba dingkan, baku twilki brih waia dukiara. Altarka ba dus ni paskan bara untra kan.

Bisin ba bras ni daukan ba

(Imp St 30.18)

8Bisin ba bras ni daukan, mina buaika ba sin bras ni daukan, mairin nani ai mawan kaikaika glaska ba sin,#Mawan kaikaia glaska: baha sika bras lipni daukan ba. tint watla ra dimaia durka pali ba kat swin.#Imp St 30.18.

Tint watla kutbanka ba

(Imp St 27.9-19)

9Utla kutbanka muna tani pamaia kwalka ba, linin ni pitbi daukan, yarika ba 50 yar bri kan. 10Playa nani ba asla yawanaiska kan, bara munhta karnika playka ba sin yawanaiska, bras ni paskan. Pîn nani bara kakauka untika nani sut ba, silbar ni paskan. 11Yahbra tani pamaia kwalka ba yarika 50 yar bri kan. Plaika nani ba yawanaiska kan, bara munhta karnika playka nani ba bras ni daukan, baku sin pîn nani bara kakauka untika nani ba, silbar ni paskan. 12Muna tani pamaia kwalka ba yarika 25 yar bri kan, playa ba matawalsip kan, bara munhta karnika playka sin matawalsip kan. Pîn nani bara kakauka untika nani ba, silbar ni daukan kata. 13Lalma tani pamaia kwalka ba yarika 25 yar bri kan. 14Watla dimaika tnaya kum ba ra, pamaia yarika ba 7 yar bri kan, playa yumhpa bara munhta karnika playka sin yumhpa kan. 15Bailka wala tani ra pamaia kwalka ba sin yarika 7 yar bri kan playa yumhpa, bara munhta karnika playka sin yumhpa kan. 16Pamaia kwalka sut utla kutbanka ra kir bri kan ba, linin pitban nani kata. 17Munhta karnika playka nani ba bras ni paskan, pîn nani ba bara kakauka untika ba silbar ni paskan, playa tarkika sut ba silbar ni lalauban.

18Utla kutbanka ra dimaia kwalka ba, kwalka nani sut ba maman kata, mapla blu, paura, pauni pali bara linin pitban, yarika ba 10 yar bri kata, yahpika bara pura yarka ba lika 2 yar bri kan, utla bîla kutbanka ra pamaia kwalka ba wal baku. 19Playa walhwal bri kan, munhta karnika playka ba bras ni paskan, kakauka untika ba lika silbar ni paskan, bara watla playa pura tani bapan ba silbar ni lalauban. 20Watla kutbanka dusa nani sut ba bras ni baman paskan.

Gul bara silbar tint watla ra yus munan ba

21Moses mita Itamar, prîs Eran luhpia waitna ba ra win, wal lâ daukan tintka watla ba paskaia, Libait nani gul, silbar, bras nani nahki prais yus munaia ba kulki kaikan.

22Besalel, Urí luhpia bara Hur mulika, Juda kiamka wina ba, Dawan mita Moses ra dîa daukbia win ba, witin baha warkka sut daukan. 23Dan kiamka wina Ahisamac luhpia Oholiab wal wark ba daukan, witin sika, ayan ni diara papaskra, baku sin diara mamaia bara pitbaia tânka bri kan kwala blu, paura, balianta, kwala pauni bara linin kwalka nani ra.

24Tint watla ba paskaia gul nani brin ba upla nani wina Dawan ra yan ba sut kulki kaikan praiska ba naku kan: 2,195 paun, baha tint watla lalahka wirhika praiska kulkanka ba kat.

25Upla nani kulki kaikan piua ra, silbar wahban ba sut 7,550 paun kata, baha ba tint watla lalahka kulkanka praiska ba kat. 26Baha nani prisant yan ba, kumi bani ba mani yawanaiska pura bri kan. Bara baha nani sut kulkan ba 603,550 upla nani kata. Upla kumi bani ra silbar nahki prais makaban ba, praiska kat yaban kan,#Mt 17.24. tint watla lalahka kulkanka kulki ba praiska kat.#Imp St 30.11-16. 27Tint watla playka nani paskaia dukiara bara kwala pamaia playka nani ba dukiara upla nani mita yan kata, silbar 7,500 paun. Bara baha silbarka ba ni, handat playa nani mununhta karnika mangkan, kwala pamaia playa nani ba, karnika sin mangkan; playa kumi bani ba 75 paun bri kan. 28Upla nani wina silbar nani brin ba ni, Besalel mita playa bani ba, kwala pamaia pînka nani ba bara kakauka untika nani ba paskan.

29Bras nani upla nani mita yan ba asla 5,310 paun kata. 30Baha braska nani ni, tint watla durka playka nani ba paskan: Altar ba, yamhpus yakawaika ba bara watlika nani altar ra yus muni nani ba sut. 31Baku sin, utla latka playka nani ba bara utla kutbanka tnaya kir bapi lakaia dusa nani ba bara utla kutbanka durka playka ba sut baha ni paskan.

Currently Selected:

Impakan Sturka 38: MSKTU

Highlight

Copy