Impakan Sturka 40

Sunukira takaia watla sunu daukan ba

1Dawan ba Moses ra aisi, naku win:

2“Kati pas yua pas aimakan ra, tint watla, Dawan wal aisaia tintka watla mâkan ba, yus munaia pura sunbia. 3Bahara lâ auhbaia watla ba bri si swibia bara pura prakaia kwalka ni pura prakma. 4Tibil ba sin bahara bri si swibia bara kiandil bapi angkaika ba sin, diara nani sut baha purara kahbia bara lampka nani ba sin kahbi swibia. 5Diara kîa pain angkaia altarka gul ni daukan ba, lâ nani auhban watla ba mawan tani ra swima, bara pamaia kwalka ba pams, upla nani ba balbia holi pliska ra asla takaia. 6Baha ningkara daiwan aiska angkaia altarka ba, holi pliska mawanra bri si swima, Dawan wal aisaia pliska ra. 7Baha ningkara Dawan wal aisaia pliska ba ra, altar ba wal lilara swima, lî banhki. 8Bara utla kutbanka tnaya kir pamaia kwalka ba, utla kutbanka dimaika ra pams.

9“Bara lal ra laikaia batanka ba bris, holi pliska ra diara wala bâra ba sut ra laikma. Bara wark daukaia dukia nani sut ba sunu daukma, bara holi sakaia pliska kum sunu kabia. 10Bara baku, daiwan aiska altarka ba, wark daukaia dukia nani sut bâra ba, batana ni laikma. Bara baku altar ba sunu daukma, altar kum sunu kabia. 11Baku sin lî watla ba ra sin batana laikma, bara baha sin sunu sâkma.

12“Bara Eran ai luhpia nani ba sin, tint watla ra dimaia durka ra brih wabia, bara aihtabi takbia, 13bara Eran prâka ba yas dimbia. Bara batana ai purara laiki aihka sunu sâkma, yang naipakan kaia. 14Baha ningkara luhpia nani ba sin yas witin lamara wabia, bara prâka nani ba yas dimbia. 15Bara baha nani ra sin batana laikma, aisika purara laikram ba baku, bara witin nani ba yang naipakan nani kabia, batana laikaia tânka sika, yang prîski ban kaia bara ai kiamka nani sut ra sin.”

16Bamna Dawan bui Moses ra dîa win ba kat daukan. 17Baku witin nani Idsip wina takan ba wina mani wâl alkan, bara kati pas, yua pas, aimakan ba ra tint watla ba buki mâkaia warkka ba bukan. 18Moses mita tint watla ba bukan munhta karnika playka ba mangkan, tatka nani sin mangkan, prihni mangkaia dusa nani mangkan, playka nani ba buki bapan, 19bara tint watla bahna prakaika kwalka nani ba sin mangkan, baha pura bâk kli pura prakaika wala mangkan, Dawan bui Moses ra nahki daukaia win ba baku daukan.

20Baha ningkara, lâ nani ulban walpaya wâl ba Moses brin, bara lâ watla ra mangkan; baha ningkara lâ auhbaia watla buki twilkaika dusa nani ba tnaya untika ra dingkan bara pura prakaika ba sin prakan. 21Bara holi pliska, tint watla lila ba kat bri si swin. Bara pamaia kwalka ba paman bara lâ auhban watla ba yukukan, Dawan mita Moses ra nahki daukaia win ba baku daukan.

22Baha wina tint watla bilara tibil ba brih wan, kwala yahbra tani ra paman ba kwalka ba lata tani ra swin. 23Baha purara brit nani kahban, ai watlika kat. Dawan mawanra, Dawan mita Moses ra dîa daukaia win ba kat daukan.

24Kiandil angkaia dusa ba sin tint watla ra brih wan tibil ba lama kat, kwala paman ba waupasa tani ra. 25Bara lamp nani ba angki, Dawan lamara swin. Dawan mita Moses ra nahki daukbia win ba baku daukan.

26Altar gul ni paskan ba sin tint watla ra brih wan kwala paman ba lama kat. 27Bara baha purara kîa yamni ba angkan, Dawan bui Moses ra nahki daukaia win ba baku.

28Ba ningkara pamaia kwalka nani ba sin Moses brin bara dur nani ra paman. 29Ba ningkara daiwan aiska angkaia altarka ba sin pliska ra bri si swin, tint watlika durka ba kat. Baha purara daiwan aiska angkan, diara diaia prisantka sin Moses ra nahki daukaia win ba baku daukan.

30Bara lî laikaika bisinka ba sin tint watla ra altar utla ra dimaia ra ba wal lilapas kat, lî banhki swin. 31Moses bara Eran wal baha wina lî brih ai mihta ai mina nani sikbi kan, 32witin nani tint watla ra dimaia altar ra buaia auya ba ra, witin nani ai mita ai mina nani sikban. Dawan bui Moses ra nahki daukaia win ba baku daukan.

33Bara baku Moses tint watla ba, holi pliska ba, altar nani ba, sut pliska kat mangkan. Bara kwala nani ba dimaika kat paman, bara baku wark ba sut daukan.

Dawan tukinka kasbrika ba tint watla ra balan

(Kul K 9.15-23)

34Utla ba sut mâkan ba ra, tint watla ba kasbrika kumi bal Dawan prana#1 Ki 8.10-11; Ais 6.4; Isi 43.4-5; Par M 15.8. ni madiskan, bara tint watla ba Dawan prana ni banhkan kan. 35Bara Moses watla ba ra sip dimras kan, kasbrika ba baha purara bâra ba mita, bara Dawan prana sin banhkan kan ba mita. 36Kasbrika ba kli utla ba pura wina purara ulan ba ra, Israel luhpia nani ai kiampka ba buki, ai yabalka ra impaki kata. 37Sakuna kasbrika ba purara ulras kan kaka, witin nani sin impakras kan, ani yua kasbrika ba impakuya ba kat. 38Israel luhpia nani yabal ra impaki kan ba piua sut ra, witin nani kaiki kan, Dawan kasbrikika ba kakna ra tint watla ba purara kan, tihmia ra pauta klauhi playka taki kan.#Imp St 13.21-22.

Currently Selected:

Impakan Sturka 40: MSKTU

Highlight

Copy